Kapitulo 6
Ang mga tawo nga mahinulsulon ginabunyagan kag ginabaton sa mainabyanon nga pagpakig-upod—Ang mga miyembro sang simbahan nga nagahinulsol ginapatawad—Ang mga miting ginapamunoan paagi sa gahum sang Balaan nga Espiritu. Mga A.D. 401–421.
1 Kag karon nagahambal ako parte sa pagbunyag. Tan-awa, ang mga elder, mga pari, kag mga manunudlo ginbunyagan; kag wala sila pagbunyagi luwas lang kon nagpakita sila sang nagakaigo nga bunga nga nagakaangay sila sini.
2 Wala man sila nagbaton sang bisan sin-o sa bunyag luwas lang kon nagkadto sila nga may masinulub-on nga tagipusuon kag mahinulsulon nga espiritu, kag nagsaksi sa simbahan nga matuod gid sila nga naghinulsol sang tanan nila nga mga sala.
3 Kag wala sing ginbaton sa bunyag luwas lang kon gindala nila sa ila kaugalingon ang ngalan ni Cristo nga may determinasyon sa pag-alagad sa iya tubtob sa katapusan.
4 Kag pagkatapos nga nabaton sila sa bunyag, kag nabag-o kag natinloan paagi sa gahum sang Balaan nga Espiritu, gin-isip sila sa katawhan sang simbahan ni Cristo; kag ang ila mga ngalan ginkuha, agud madumduman sila kag masagod sang maayo nga pulong sang Dios, agud tipigan sila sa husto nga dalan, agud tipigan sila nga dalayon nga magmabinantayon sa pagpangamuyo, nga nagasandig lamang sa mga merito ni Cristo, nga amo ang pangulo kag manugperpekto sang ila pagtuo.
5 Kag ang simbahan masunson nga nagtipon-tipon, sa pagpuasa kag pagpangamuyo, kag sa paghinambalanay sa isa kag isa parte sa kaayohan sang ila mga kalag.
6 Kag masunson sila nga nagtipon-tipon agud mag-ambit sang tinapay kag bino bilang pagpanumdum sang Ginuong Jesus.
7 Kag istrikto sila sa pagbantay nga mangin wala sing kalainan sa ila; kag kon sin-o man ang mahibal-an nga nagahimo sang kalainan, kag tatlo ka saksi sang simbahan ang magkondenar sa ila sa atubang sang mga elder, kag kon wala sila naghinulsol, kag wala nagkumpisar, ang ila mga ngalan ginpamanas, kag wala na sila gin-isip sa katawhan ni Cristo.
8 Apang kon ano kasunson sila nga nagahinulsol kag nagapangayo sing kapatawaran, nga may matuod-tuod nga tinutuyo, ginapatawad sila.
9 Kag ang ila mga pagtililipon ginapamunoan sang simbahan suno sa paagi sang mga pagpanghikot sang Espiritu, kag paagi sa gahum sang Balaan nga Espiritu; kay pareho nga ang gahum sang Balaan nga Espiritu nagatuytuy sa ila kon magwali, ukon maglaygay, ukon magpangamuyo, ukon mag-ampo, ukon magkanta, sa amo man nahimo ini.