Ewe Puken Moronai
Sopun 1
Moronai a mak fan iten tufichin ekkewe chon Leiman—Ekkewe chon Nifai resap amam Kraist ra ninnino. Arap ngeni Ierin ewe Samon 401–421.
1 Iei ngang, Moronai, mwirin ai awesano ammwochun uruon ekkewe aramasen Jared, ua ekieki pwe usap chiwen pwan makkei ekkoch, nge use mwo mano; me use pwarano inisi ngeni ekkewe chon Leiman ren nuokusun ika repwe nieino.
2 Pun nengeni, ar kewe maun ra fokkun pochokun me neir pwisin; iwe pokiten ar koput ra nieno meinisin ekkewe chon Nifai ekkewe resap amam ewe Kraist.
3 Iwe ngang, Moronai, usap amam ewe Kraist; ina minne, ua fein fetan ian chok ua tongeni fan iten tumunun pwisin manauei.
4 Ina minne, ua makkei pwan ekkoch mettoch, mi ungeni met minne ua fen ekieki; pun ua fen ekieki pwe usap chiwen pwan makkei ekkoch; nge ua makkei pwan ekkoch mettoch, pwe eni repwe fen fich ngeni pwi kewe, ekkewe chon Leiman, non ekkoch ran mwach, anongonong won mochenin ewe Samon.