1 Nooria Ngai, ae ^aMoronaai, I a kabanea ana ^breekoti tamau ae Moomon. Nooria bon iai ti tabeua bwaai ake I kan koroi taekaia, ake bwaai ake I a tia n tuangaki iroun tamau.

2 Ao ngkai e a koro bukina bwa i mwin te buaka are e ^akorakora ma n rianako are i Kumora, nooria, Nibwaite ake a tia ni birinako nakon te aba are i maiaki a bon kakiokioaki irouia ^bReimwanaite, ni karokoa ae a kamaunaki.

3 Ao e tiringaki naba tamau irouia, ao ngai I a tiku n ^ati ngai bwa N na korea rongorongon tiringakia au botanaomata ae kananokawaki. Ma nooria, a nako, ao I kakoroa ana tua tamau. Ao I aki ataia bwa a na tiringai ke a na aki.

4 Ngaia are N na koroboki ma ni karabai taian reekoti n te tano; ao e aki kakawaki bwa I nakea.

5 Nooria, e a tia ni korea te ^areekoti aio tamau, ao e a tia ni korea te kantaninga ibukina. Ao nooria, N na koroboki naba ngkana e tau nnena iaon taian ^bbwaatua, ma e bon aki tau ao akea te tano ae iai te biti i nanona irou, bwa are I a bon tiku n ti Ngai. E a tia n tiringaki tamau n te buaka, ao au koraki ni kabane, ao bon akea raoraou ke te tabo are N na nako iai; ao I bon aki ataia bwa e na maan ra te tai ae e na kariaia te Uea bwa N na maiu iai.

6 Nooria, e a bane ^aabubua te ririki man te tai are e kaoti iai ara Uea ao ara Tia Kamaiu.

7 Ao nooria, a ukoukoria au botanaomata Reimwanaite, ake Nibwaite man te kaawa teuana nakon te kaawa teuana, ni karokoa ae a bon akea; ao e korakora ^abwakaia; eng, e korakora ao e kamiimia te nano aron tiringakia au botanaomata aika Nibwaite.

8 Ao nooria, e bon riki aei man bain te Uea. Ao nooria naba, a bon ^abuaka Reimwanaite imarenaia; ao te aba aio ni kabuta e bon waaki iai te tiritiri ao kawawaean te raraa ae reiti nako; ao bon akea ae ataia bwa e na toki te buaka n ningai.

9 Ao ngkai, nooria, I aki manga taekinia, bwa ai bon akea ma ti Reimwanaite ao ^ataan iraa ae iai ngkai iaon te aba.

10 Ao bon akea ae a ataa te Atua ni koaua ma bon ti ana ^areirei Iesu, ake a bon tiku n tataninga iaon te aba ni karokoa ae a rangi korakora buakakaia aomata n te aro are e aki kariaia te Uea bwa ana ^btiku ma aomata; ao bon akea te aomata ae e ataia bwa a mena iaon te aba ke a aki.

11 Ma nooria, Ngai ma ^atamau ti a tia n nooria, ao a tia ni karaoa te ibuobuoki nakoira.

12 Ao ane e reke irouna te reekoti aio, ao e na aki kabuakaka ibukin aro n aki kororaoi ake a mena iai, ao e na bon atai riki ^abwaai aika a korakora nakon aikai. Nooria, bon Ngai Moronaai; ao ngke arona bwa e konaki ni karaoaki ao I a kaoti bwaai ni kabane nakoimi.

13 Nooria, I a katoka au taetae ni kawai ibukiia te botanaomata aio. Ngai bon natin Moomon te mwaane ao tamau bon ^akanoan Nibwaai.

14 Ao bon Ngai are I ^akarabai taian rongorongo iroun te Uea; akea manenan taian bwaatua, ma ti ana tua te Uea. Bwa e bon taetae ma te koaua ni kangai bwa akea te aomata ae e kona n anai ^bibukin karekean ana raka; ma te reekoti are iai e bon rangi ni kakawaki; ao ane e na oti irouna, e na kakabwaiaki iroun te Uea.

15 Bwa bon akea ae e kona n reke irouna te mwaaka ni kaotia ma ti ngkana e anganaki mai iroun te Atua; bwa bon nanon te Atua bwa e na karaoaki ma te ^amata teuana ae kaineti nakon mimitongina, ke ibukin mweraoia aomata ngkoa ae ana aomata ni berita ae tabu te Uea ake a kaman kamaenakoaki.

16 Ao e na kakabwaiaki ane ^ae kaota te bwai aio; bwa e na ^buotaki man te roo nakon te oota, n aron ana taeka te Atua; eng, e na uotaki man te tano, ao e na raneanea man te roo, ma n ataaki irouia aomata; ao e na karaoaki ni mwaakan te Atua.

17 Ao ngkana iai ^ataian kairua ao bon ana kairua te aomata. Ma nooria, bon akea te kairua ae ti ataia; ma e ngae n anne e atai bwaai ni kabane te Atua; ngaia are, ane e ^bkabuakaka, ke e tarataraia bwa mwiina ao e na noora kakamaakun ain moone.

18 Ao ane e kangai: Kaotia nakoiu, bwa mwiina ko na oreaki—ke e tarataraia bwa mwiina ao e tuatua te bwai ae tabuia te Uea.

19 Bwa nooria, ane e ^amotikitaeka n aki akaaka ao e na manga motikaki taekana n aki akaaka; bwa e na kabooaki n aron ana mwakuri; ngaia are, ane e oro ao e na manga oreaki riki, iroun te Uea.

20 Nooria e taekinaki ae kangai ni koroboki aika tabu—akea te aomata ae e na oro, ao e na aki naba motikitaeka; bwa bon au bwai te motikitaeka, e taku te Uea, ao au bwai naba te ira n taanga ao N na kabomwi.

21 Ao ane e taekin taeka n un ma kakauntaeka ni kaitara ana mwakuri te Uea, ma ni kaaitaraia ana aomata ni berita ae tabu te Uea ake kaain te bata are Iteraera, ma ni kangai: Ti na kamauna ana mwakuri te Uea, ao te Uea e na bon aki uringa ana berita ae tabu are e a tia ni karaoia ma te bata are Iteraera—ao bon ngaia naba are e na koreaki ma n tewenakoaki nako nanon te ai.

22 Bwa ana ^awaaki te Uea aika akea tokiia a na bon waaki nako, ni karokoa ae a na bane ni kakoroaki bukin ana berita.

23 Ukoukori ana taeka ni burabeti ^aItaia. Nooria, I bon aki kona ni koroi. Eng, nooria I taku nakoimi, bwa aomata aika itiaki akekei ake a tia ni maiu imwaiu, ake a tia ni bwaina te aba aio, a na ^btakarua, eng, ma ni bubun aontano ao a na takarua nakon te Uea; ao ngkai e maiu te Uea ao e na bon uringa te berita are e tabu are e a tia ni karaoia ma ngaiia.

24 Ao e bon atai aia ^atataro, bwa bon ibukiia tariia. Ao e ataa aia onimaki, bwa n arana ao a na kona ni kamwaingi ^bmaunga; ao n arana ao a kona n ioioa te aonaba; ao man mwaakan ana taeka ao a kona ni kabwakai nako naano ^cnne ni kaikain; eng, ao te ai ni kanai ai ae ura mwaaka e bon aki kona naba ni kaikoakia, ao aki naba maan aika a kaakang, ma naeta aika a kamaamate, ibukin mwaakan ana taeka.

25 Ao nooria, a bon ^atataro naba ibukin teuare e na kariaia te Uea bwa e na karokoi bwaai aikai.

26 Ao akea ae e na taekinna bwa a na bon aki kaotaki, bwa a na bon kaotaki, bwa e a tia n taekinna te Uea; bwa a na ^aotinako man te tano, ni bain te Uea, ao akea ae kona n tukia; ao e na kaoti n te bong are e taekinaki iai bwa a toki ^bkakai; ao e na kaoti n aron ae aongkoa temanna ae taetae ^cman te mate.

27 Ao e na kaoti n te bong are ^araraaia aomata aika itiaki a na tang nakon te Uea, ibukin ^bbotaki ni karaba aika buakaka ma mwakuri n roo.

28 Ao e na kaoti n te bong are e a kakeweaki iai mwaakan te Atua, ao a bareka ^aekaretia ma n tabekaki rake ibukin kainikatongan nanoia; eng, n te bong are mataniwin ekaretia ma tia reirei a na tabekakirake ibukin kainikatongan nanoia n te aro are a bakantang irouia raoia ake a kaaina aia ekaretia.

29 Eng, e na kaoti n te bong ^aare e na ongo te aba taekan taian ai, ma angibuaka, ma ^bbuanen bubu n aba aika ianena.

30 Ao e na ongo naba te aba taekan ^abubuaka, rongorongon buaka, mwaeiein taabo aika a kakaokoro.

31 Eng, e na roko n te bong are e na korakora iai te bareka iaon te aonaba; e na iai te tiriaomata, te iraa, te kewe, ao te mwaamwana te aba, ma waaki ni kabekaau, ma aekan nako mwakuri aika bati n ribaki; ao a na mwaiti ake a na kangai, karaoa aei, ke karaoa arei, bwa akea ^abonganana, bwa te Uea e na ^bboutokaaia naakai n te kabanea ni bong. Ma e na reke kaia naakai, bwa a na mena n te ^caro ae kananokawaki ae moan te mao ao a na kabaeaki n te bure.

32 Eng, e na kaoti n te bong are a na kateaki iai ekaretia ao a na kangai: Nakomai nakoiu, ao ibukin ami mwane a na kabwaraki ami bure.

33 O ngkami aomata aika kam buakaka ma ni kamangao ao ma ni kamoamoa, e aera ngkai kam katei ekaretia ibukin karekean ami ^araka? E aera ngkai kam ^bbita ana taeka te Atua ae tabu, bwa kam aonga ni ^ckabuakaka tamneimi? Nooria, taratarai ana kaotioti te Atua; bwa nooria, e na roko te tai n te bong arei are a na kakoroaki iai bukin bwaai ni kabane.

34 Nooria, e a tia te Uea ni kaoti nakoiu bwaai aika a korakora ma ni kamiimi ni kaineti ma te bwai ae e na roko n te tai ae e aki rangi ni maan, n te bong are a na roko iai bwaai aikai i buakomi.

35 Nooria, I taetae nakoimi n aron ae aongkoa iai ngkami, ma bon akea ngkami. Ma nooria, Iesu Kristo e a tia ni kaoti ngkami nakoiu, ao I atai ami mwakuri.

36 Ao I ataia bwa kam bon ^anakonako i nanon kainikatongan nanomi; ao bon akea bwa ti tabeman aika a aki ^btabekakirake ni kainikatongan nanoia, ma ni bwaini ^ckunnikai aika a titikiraoi, ao ma ni bakantang, a kakauntaeka, a kairiribai, ao a bwainikirinia tabemwaang, ma ni karaoi aekan buakaka nako; ao ami ekaretia, eng, ni kabane, a baareka ibukin kainikatongan nanomi.

37 Bwa nooria, kam bon tangira te ^amwane, ma ami bwai, ao ami kunnikai aika a titikiraoi, ma katamaroan ami ekaretia, nakon riki tangiraia aika a raarikin ma ni kainnano, ao aika a aoraki ma n rawawata.

38 O ngkami aika kam baareka, ngkami aika bwaritaio, ngkami tia reirei, aika kam kabooingkami ibukin te bwai are kam na baareka iai, e aera ngkai kam kabareka ana ekaretia te Atua ae tabu? E aera ngkai kam ^abwainrang ni katokaa iaomi aran Kristo? E aera ngkai kam aki iangoia bwa e korakora riki kakawakin te kukurei are aki totoki nakon te ^bnanokawaki are e aki kona ni mate—ibukin ana ^ckamoamoa te aonaba.

39 E aera ngkai kam katamaroai ngkami n te bwai are akea te maiu iai, ma ni kariaia bwa naake a baki, ake a kainnano, ake akea karabaia, ao ake a aoraki ma ake a karawawataki a na rirarikimi, ao kam aki tabeakinia.

40 Eng, e aera ngkai kam kateirakei ami ^amwakuri aika bati n ribaki aika a raba bwa e aonga n reke ami raka, ma ni karekea te anga bwa a na tang ni wenei aine ake a tia ni mate buuia imatan te Uea, ao ake akea aia karo bwa a na tang ni wenei nakon te Uea naba, ao bwa raraaia tamaia ma kaainnabaia ana takarua nakon te Uea mai aontano, ibukin irakin taangaia ae e na bwaka iaon atuia.

41 Nooria, e tinetine iaomi te kabaang n irantaanga; ao e na roko n te tai ae aki maan are e na ^airantaanga raraaia aomata aika itiaki iaomi, bwa e na bon aki kariaia bwa a na manga tangitang riki.