1 Pea ko ʻeni, vakai, ʻoku ou fie lea siʻi ki he ^atoenga ʻo e kakaí ni ʻa ia kuo fakahaofí, ʻo kapau ʻe tuku ʻe he ʻOtuá kiate kinautolu ʻa ʻeku ngaahi leá, koeʻuhi ke nau ʻilo ki he ngaahi meʻa ʻa ʻenau ngaahi tamaí; ʻio, ʻoku ou lea kiate kimoutolu, ʻa kimoutolu ko e toenga ʻo e fale ʻo ʻIsilelí; pea ko e ngaahi lea ʻeni ʻoku ou leaʻakí:

2 ʻOku mou ʻiloʻi koā, ʻoku mou ʻo e ^afale ʻo ʻIsilelí.

3 ʻOku mou ʻiloʻi koā kuo pau ke mou haʻu ʻo fakatomala, pe ʻe ʻikai lava ʻo fakamoʻui ʻa kimoutolu.

4 ʻOku mou ʻiloʻi koā kuo pau ke mou tuku hifo hoʻomou ngaahi mahafu ʻo e taú, pea ʻikai toe fiefia ʻi he lilingi totó, pea ʻoua ʻe toe toʻo hake ia, tuku kehe ʻo kapau ʻe fekau ʻe he ʻOtuá kiate kimoutolu.

5 ʻOku mou ʻiloʻi koā kuo pau ke mou maʻu ʻa e ^aʻilo ki hoʻomou ngaahi tamaí, pea fakatomala mei hoʻomou ngaahi angahala mo e ngaahi hia kotoa pē, pea ^btui kia Sīsū Kalaisi, ko e ʻAlo ia ʻo e ʻOtuá, pea naʻe tāmateʻi ia ʻe he kau Siú, pea ʻi he māfimafi ʻo e Tamaí kuó ne toe tuʻu, ʻa ia kuó ne ^cikuna ai ʻa e faʻitoká; pea ʻiate ia foki kuo folo hifo ai ʻa e mamahi ʻo e maté.

6 Pea ʻokú ne fakahoko ʻa e ^atoetuʻu ʻa e maté, ʻa ia kuo pau ke fokotuʻu hake ai ʻa e tangatá ke tuʻu ʻi he ʻao ʻo hono ^bnofoʻanga fakamāú.

7 Pea kuó ne fakahoko ʻa e ^ahuhuʻi ʻo e māmaní, koeʻuhí ko ia ia ʻe ʻiloʻi ʻoku ^btaʻehalaia ʻi hono ʻaó ʻi he ʻaho fakamāú ʻe tuku ke ne ^cnofo ʻi he ʻao ʻo e ʻOtuá ʻi hono puleʻangá, ke hiva ʻaki ʻa e fakafetaʻi taʻetuku fakataha mo e ^dkau hiva ʻi ʻolunga, ki he Tamaí, pea ki he ʻAló, pea ki he Laumālie Māʻoniʻoní, ʻa ia ko e ʻOtua pē ʻe ^etaha, ʻi ha tuʻunga ʻo e ^ffiefia ʻa ia ʻoku ʻikai hano ngataʻanga.

8 Ko ia mou fakatomala, pea papitaiso ʻi he huafa ʻo Sīsuú, pea puke maʻu ʻa e ^aongoongolelei ʻa Kalaisi, ʻa ia ʻe tuku ʻi homou ʻaó, kae ʻikai ʻi he ^blekōtí ni pē kā ʻi he lekooti foki ʻa ia ʻe ʻomai ki he kau Senitailé ^cmei he kau Siú, ʻa ia ko e lekooti ʻe ʻomai mei he kau Senitailé ^dkiate kimoutolu.

9 He vakai, kuo tohi ^aʻeni koeʻuhí ke mou tui ki ai; pea kapau ʻoku mou ^btui ki ai te mou tui ki he meʻá ni foki; pea kapau ʻoku mou tui ki he meʻá ni te mou ʻilo ki hoʻomou ngaahi tamaí kae ʻumaʻā foki mo e ngaahi ngāue fakaofo ʻa ia kuo fakahoko ʻi he māfimafi ʻo e ʻOtuá ʻiate kinautolú.

10 Pea te mou ʻilo foki ko ha toenga ʻa kimoutolu ʻo e hako ʻo Sēkopé; ko ia ʻoku lau ʻa kimoutolu fakataha mo e kakai ʻo e ʻuluaki fuakavá; pea kapau leva te mou tui kia Kalaisi, pea mou papitaiso, ʻuluaki ʻi he vaí, pea toki ʻi he afi mo e Laumālie Māʻoniʻoni, ʻo muimui ki he ^asīpinga ʻa hotau Fakamoʻuí, ʻo fakatatau mo e meʻa kuó ne fekau kiate kitautolú, ʻe lelei ia kiate kimoutolu ʻi he ʻaho ʻo e fakamāú. ʻĒmeni.