1 Pea ko ʻeni ʻoku ou fakaʻosi ʻeku lekooti ʻo kau ki hono ^afakaʻauha ʻo hoku kakai, ko e kau Nīfaí. Pea naʻe hoko ʻo pehē naʻa mau laka atu ki muʻa ʻi he kau Leimaná.

2 Pea ko au, Molomona, naʻá ku fai ha tohi ki he tuʻi ʻo e kau Leimaná, pea naʻá ku kole kiate ia ke ne tuku mai ke mau tānaki fakataha homau kakaí ki he ^afonua ko Komolá, ʻi he veʻe moʻunga naʻe ui ko Komolá, pea te mau tau ʻi ai mo kinautolu.

3 Pea naʻe hoko ʻo pehē naʻe tuku mai ʻe he tuʻi ʻo e kau Leimaná kiate au ʻa e meʻa naʻá ku fie maʻu.

4 Pea naʻe hoko ʻo pehē naʻa mau laka atu ki he fonua ko Komolá, pea naʻa mau fokotuʻu homau ngaahi fale fehikitakí ʻo takatakai ʻi he moʻunga ko Komolá; pea ko e fonua ia ʻo e ngaahi anovai lahi, mo e ngaahi vaitafe, mo e ngaahi matavai; pea naʻa mau ʻamanaki ke ikunaʻi ʻi ai ʻa e kau Leimaná.

5 Pea kuo ʻosi atu hono tolungeau valungofulu mā fā ʻo e taʻú, pea kuo mau tānaki mai ʻa e toenga hono kotoa ʻo homau kakaí ki he fonua ko Komolá.

6 Pea naʻe hoko ʻo pehē kuo mau tānaki fakataha mai ʻa homau kakaí kotoa ki he fonua ko Komolá, pea vakai ko au, Molomona, ne u fakaʻau ʻo motuʻa; pea ʻi heʻeku ʻiloʻi koe tau fakaʻosi ʻeni ʻa hoku kakaí, pea ko e meʻa ʻi he fekauʻi au ʻe he ʻEikí ke ʻoua naʻá ku tuku ke tō ki he nima ʻo e kau Leimaná ʻa e ngaahi lekooti ʻa ia kuo tukufakaholo mai mei heʻemau ngaahi tamaí, ʻa ia ʻoku toputapu, (he ʻe fakaʻauha ia ʻe he kau Leimaná) ko ia naʻá ku hiki ʻa e ^alekōtí ni mei he ngaahi peleti ʻa Nīfaí, peá u ^bfufuuʻi ʻi he moʻunga ko Komolá ʻa e ngaahi lekooti kotoa kuo tuku ke u tauhi ʻe he toʻukupu ʻo e ʻEikí, tuku kehe pē ʻa e ngaahi peleti siʻi ^cko ʻení ʻa ia naʻá ku tuku ki hoku foha ko ^dMolonaí.

7 Pea naʻe hoko ʻo pehē ko hoku kakaí, mo honau ngaahi uaifí mo ʻenau fānaú, naʻa nau sio he taimí ni ki he ngaahi ^akau tau ʻa e kau Leimaná ʻoku nau laka mai kiate kinautolu; pea naʻa nau tatali ke tali ʻa kinautolu ʻi he fuʻu ilifia fakaʻulia ki he mate ko ia ʻoku fakafonu ʻa e loto ʻo e kau fai angahala kotoa pē.

8 Pea naʻe hoko ʻo pehē naʻa nau ō mai ke tauʻi ʻa kimautolu, pea naʻe fonu ʻa e kakai kotoa pē ʻi he ilifia koeʻuhi ko hono lahi fau ʻo honau tokolahí.

9 Pea naʻe hoko ʻo pehē naʻa nau ʻohofi ʻa hoku kakaí ʻaki ʻa e heletā, mo e kaufana, mo e ngahau, mo e toki, pea mo e faʻahinga mahafu tau kotoa pē.

10 Pea naʻe hoko ʻo pehē naʻe tā hifo ʻa ʻeku kau tangatá, ʻio, ʻa ʻeku toko mano ʻa ia naʻa nau ʻiate aú, peá u lavea ʻo tō ʻi honau lotolotongá; pea naʻa nau laka ʻiate au ʻo ʻikai te nau fakaʻosi ʻa ʻeku moʻuí.

11 Pea kuo nau ʻalu atu ʻo tā hifo ʻa hoku kakaí ^akotoa tuku kehe pē hamau toko uofulu mā fā, (ʻa ia naʻe kau ai ʻa hoku foha ko Molonaí) pea ʻi heʻemau hao mei he mate ʻa homau kakaí, naʻa mau vakai ʻi he pongipongi haké, ʻi he hili ʻa e foki atu ʻa e kau Leimaná ki honau ngaahi ʻapitangá, mei he tumutumu ʻo e moʻunga ko Komolá, ki he toko mano ʻo hoku kakaí ʻa ia kuo tā hifo, ʻa ia naʻá ku muʻomuʻa ʻo taki ʻa kinautolú.

12 Pea naʻa mau vakai foki ki he toko mano ʻo hoku kakaí ʻa ia naʻe taki ʻe hoku foha ko Molonaí.

13 Pea vakai, kuo tō ʻa e toko mano ʻa Kitikitioná, pea kuó ne tō foki mo ia ʻi honau lotolotongá.

14 Pea kuo tō ʻa Lema mo ʻene toko manó; pea kuo tō ʻa Kilikali mo ʻene toko manó; pea kuo tō ʻa Limihā mo ʻene toko manó; pea kuo tō ʻa Seoneami mo ʻene toko manó; pea kuo tō ʻa Kameninaihā, mo Molonaihā, mo ʻAniteonumi, mo Sipiloni, mo Semi, mo Sose, mo ʻenau toko mano taki taha.

15 Pea naʻe hoko ʻo pehē naʻe ʻi ai mo e toko hongofulu kehe naʻa nau tō ʻi he heletaá mo ʻenau toko mano taki taha; ʻio, kuo tō ʻa hoku kakai ^akotoa pē, tuku kehe pē ʻa e toko uofulu mā fā ʻa ia naʻa nau ʻiate aú, pea mo e niʻihi tokosiʻi foki kuo hao ki he ngaahi fonua ʻi he tongá, mo e niʻihi tokosiʻi kuo tafoki ki he kau Leimaná; pea naʻe fokotuʻu ʻa honau ʻangaʻangá, mo e ngaahi huí, mo e totó ʻi he funga kelekelé, kuo tuku ia ʻe he nima ʻo e faʻahinga kuo nau tā ʻa kinautolú ke ʻauha ʻi he funga fonuá, pea popo mo foki atu ki honau tupuʻanga ko e kelekelé.

16 Pea naʻe mamahi lahi ʻa hoku laumālié, koeʻuhi ko e tō ʻa hoku kakai, peá u kaila:

17 ʻA kimoutolu ʻe kakai fakaʻofoʻofa, kuo fēfē nai ʻa hoʻomou afe mei he ngaahi hāʻeleʻanga ʻo e ʻEikí! ʻA kimoutolu, ʻe kakai fakaʻofoʻofa, kuo fēfē nai ʻa hoʻomou liʻaki ʻa e Sīsū ko ia, ʻa ia naʻá ne tuʻu mo e ongo toʻukupu ʻoku mafao mai ke tali ʻa kimoutolú!

18 Vakai, kapau naʻe ʻikai te mou fai ʻeni, ʻe ʻikai te mou tō. Kae vakai, kuo mou tō, pea ʻoku ou tengihia ʻa hoʻomou molé.

19 ʻOiauē ʻa e ngaahi foha mo e ngaahi ʻofefine fakaʻofoʻofa, ʻa kimoutolu ʻa e ngaahi tamaí mo e ngaahi faʻeé, ʻa kimoutolu ʻa e ngaahi husepānití mo e ngaahi uaifí, ʻa kimoutolu ʻa e kakai fakaʻofoʻofa, kuo fēfē hoʻomou lava nai ʻo toó!

20 Kae vakai, kuo mou mole atu, pea ʻe ʻikai lava ʻe heʻeku loto-mamahí ʻo fakafoki mai ʻa kimoutolu.

21 Pea ʻoku vave mai ʻa e ʻaho kuo pau ke ʻai ai ʻe homou sino faʻa maté ʻa e taʻe-faʻa-maté, pea ko e ngaahi sinó ni ʻa ia ʻoku ʻauʻauhá kuo pau ke nau hoko ko e ngaahi sino ^ataʻe-faʻa-ʻauʻauha; pea ʻoku pau ke mou tuʻu ʻi he ʻao ʻo e nofoʻanga fakamaau ʻo Kalaisí, ke fakamāuʻi ʻo fakatatau ki hoʻomou ngaahi ngāué; pea kapau leva ʻoku mou māʻoniʻoni, pea ʻe tāpuakiʻi ʻa kimoutolu fakataha mo hoʻomou ngaahi tamai ʻa ia kuo nau muʻomuʻa ʻiate kimoutolú.

22 Taumaiā ne mou fakatomala ʻi he teʻeki ai tō ʻa e fuʻu fakaʻauhá ni kiate kimoutolú. Kae vakai, kuo mou mole atu, pea ko e Tamaí, ʻio, ʻa e Tamai Taʻengata ʻo e langí, ʻokú ne ʻafioʻi ʻa homou tuʻungá; pea ʻokú ne fai kiate kimoutolu ʻo fakatatau mo ʻene ^afakamaau totonú mo e ^bʻaloʻofá.