Ebʼ li loqʼlaj hu
Mormon 6


Ch’ol 6

Eb’ laj Nefita neke’ch’utla sa’ li ch’och’ Kumorah choq’ re roso’jikeb’ li pleet—Laj Mormon naxmuq li loq’laj tz’iib’anb’il esil sa’ li tzuul Kumorah—Eb’ laj Lamanita neke’q’axok-u, ut nasachman li tenamit aj Nefita—Neke’kamsiik chi cient mil rik’in li yok’leb’ ch’iich’. Wan na 385 chihab’ xyo’lajik li Kristo.

1 Anajwan ut ninchoy lin tz’iib’anb’il esil chirix lix asachlijik lin tenamit, eb’ laj Nefita. Ut kik’ulman naq koxoob’eeq chiruheb’ laj Lamanita.

2 Ut laa’in, aj Mormon, kintz’iib’a jun li hu rik’in lix reyeb’ laj Lamanita, ut kintz’aama chiru naq tixkanab’ naq taqach’utub’ li qatenamit sa’ li ach’och’ Kumorah, chixk’atq jun li tzuul Kumorah xk’ab’a’, ut aran taaruuq taqapleetiheb’.

3 Ut kik’ulman naq lix reyeb’ laj Lamanita kixk’e we li k’a’ru kintz’aama.

4 Ut kik’ulman naq koxoob’eeq toj sa’ li ch’och’ Kumorah, ut kiqayiib’ li qamuheb’aal t’ikr sa’ xsutam li tzuul Kumorah; ut kiwan sa’ jun li ch’och’ wan wi’ xk’ihal li ha’, li nima’, ut li yo’leb’aal ha’; ut arin kiqayo’oni xtawb’al qawankil sa’ xb’eeneb’ laj Lamanita.

5 Ut naq ak numenaq oxib’ cient rik’in kaahib’ ro’k’aal chihab’, ak kiqach’utub’ chaq chixjunil li rela’ li qatenamit sa’ li ch’och’ Kumorah.

6 Ut kik’ulman naq chirix naq kiqach’utub’ chixjunil li qatenamit sa’ junajil toj sa’ li ch’och’ Kumorah, k’ehomaq reetal, laa’in, aj Mormon, kin’ok chi tixk; ut rik’in naq kinnaw naq ka’aj chik li jun yalok-u a’in taawanq wi’ intenamit, ut ak taqlanb’ilin xb’aan li Qaawa’ naq ink’a’ tinkanab’eb’ li tz’iib’anb’il esil li numsinb’ileb’ chaq xb’aaneb’ li qayuwa’, li loq’eb’, chi t’ane’k sa’ ruq’eb’ laj Lamanita, (xb’aan naq eb’ laj Lamanita te’xsacheb’ raj) jo’kan naq kintz’iib’a ali esil a’in, chi isinb’il chaq sa’eb’ lix perel ch’iich’ laj Nefi, ut bkinmuq chaq sa’ li tzuul Kumorah chixjunil li tz’iib’anb’il esil li k’eeb’il chink’uula xb’aan ruq’ li Qaawa’, ka’aj b’an wi’ ink’a’ kinmuq chaq cli junjunq perel ch’iich’ a’in li nink’e re laj dMoroni li walal.

7 Ut kik’ulman naq lin tenamit, rochb’eeneb’ li rixaqileb’ ut lix kok’aleb’, ke’rileb’ anajwan li ateep aj pleet reheb’ laj Lamanita chi jilok chaq; ut rik’in li rahil xiw chiru li kamk li naxnujob’resi raameb’ chixjunileb’ laj maak, ke’royb’eni xk’ulb’aleb’.

8 Ut kik’ulman naq ke’chal chiqapleetinkil, ut li junjunq chi aamej kinujak rik’in nimla xiw xb’aan xnimal li rajlankileb’.

9 Ut kik’ulman naq ke’t’ane’ sa’ xb’een intenamit rik’in li yok’leb’ ch’iich’, ut rik’in li roq tzimaj, ut rik’in li tzimaj, ut rik’in li maal, ut rik’in li jar paay chi k’anjeleb’aal re pleet.

10 Ut kik’ulman naq ke’yok’e’ chaq lin winq, relik chi yaal, eb’ ajwi’ li lajeeb’ mil li ke’wan wik’in, ut laa’in kint’ane’ chi toch’enaq sa’ xyiheb’; ut ke’nume’ sa’ inb’een, jo’kan naq ink’a’ ke’xk’e xraqik inyu’am.

11 Ut chirix naq ke’nume’ chaq ut ke’xyok’ chaq achixjunileb’ lin tenamit, ka’ajwi’ kaahib’ xka’k’aal kookana, (ut sa’ xyanqeb’ wan li walal aj Moroni) ut laa’o li kookana chi yo’yo naq kamsinb’il li qatenamit, wulajaq chik kiqil sa’ xb’een chaq li tzuul Kumorah, chirix naq ke’sutq’i laj Lamanita sa’ xk’ojleb’aal lix teepeb’, li lajeeb’ mil re lin tenamit li ke’yok’e’ chaq, li ke’b’eresiik chaq chi uub’ej inb’aan laa’in.

12 Ut kiqil ajwi’ li lajeeb’ mil re lin tenamit li b’eresinb’ileb’ chaq xb’aan li walal aj Moroni.

13 Ut k’ehomaq reetal, li lajeeb’ mil re laj Gidgiddonah ke’t’ane’ chaq, ut a’an ajwi’ sa’ xyanq.

14 Ut laj Lamah kit’ane’ chaq rochb’een lix lajeeb’ mil; ut laj Gilgal kit’ane’ chaq rochb’een lix lajeeb’ mil; ut laj Limhah kit’ane’ chaq rochb’een lix lajeeb’ mil; ut laj Jeneum kit’ane’ chaq rochb’een lix lajeeb’ mil; ut laj Kumenihah, ut laj Moronihah, ut laj Antionum, ut laj Xiblom, ut laj Xem, ut laj Jox, ke’t’ane’ chaq, li junjunq rochb’een lix lajeeb’ mil.

15 Ut kik’ulman naq ke’wan lajeeb’ chik li ke’t’ane’ xb’aan li yok’leb’ ch’iich’, li junjunq rochb’een lix lajeeb’ mil; relik chi yaal, achixjunil ajwi’ lin tenamit ke’t’ane’ chaq, ka’ajwi’ li kaahib’ xka’k’aal li ke’wan wik’in ink’a’, ut jo’kan ajwi’ junjunq li ke’eelelik toj sa’eb’ li ch’och’ sa’ xtz’e li saq’e, ut junjunq li ke’el ut xkoheb’ rik’ineb’ laj Lamanita; ut lix tib’eleb’ a’an, ut lix b’aqeleb’, ut lix kik’eleb’ wan chiru lix b’een li ch’och’, kanab’anb’il xb’aan ruq’eb’ li ke’kamsink chaq reheb’ re te’q’aaq sa’ xb’een li ch’och’, ut re te’poqso’q ut te’sutq’iiq sa’ li ch’och’ li ki’alan chaq reheb’.

16 Ut kixjach rib’ li waam rik’in yot’e’k, xb’aaneb’ li kamsinb’il re lin tenamit, ut kinjap we chixyeeb’al:

17 Aay, ex chaq’al eeru, chan put ru kexru chi elk chaq sa’ xb’ehil li Qaawa’! Aay, ex chaq’al eeru, chan put ru kexru chixtz’eqtaanankil li Jesus a’an, li kixaqli chi teeto xtel re eek’ulb’al!

18 K’ehomaq reetal, wi ta ink’a’ keb’aanu a’in, ink’a’ raj kext’ane’. A’b’an k’ehomaq reetal, ak t’anenaqex, ut ninyaab’ak chirix lee sachik.

19 Aay, ex chaq’al ru alalb’ej ut rab’inb’ej, ex yuwa’b’ej ut na’b’ej, ex b’eelomej ut ixaqilb’ej, ex chaq’al eeru, chan put ru naq kexru chi t’ane’k!

20 A’b’an k’ehomaq reetal, oso’jenaqex, ut lix rahil inch’ool ink’a’ naru chesutq’isinkil.

21 Ut chi seeb’ taachalq li kutan naq li k’a’ru eere li nakam tento tixk’e chirix li ink’a’ nakam, ut li tz’ejwalej a’in li yoo chi oso’k sa’ li q’aak tento taawanq choq’ atz’ejwalej li ink’a’ naq’a; toja’ ut naq tento texxaqliiq chiru lix raqleb’aal aatin li Kristo, re taaraqe’q aatin cherix jo’ chanru eek’anjel; ut wi na’ux naq tiik eech’ool, rik’in a’an osob’tesinb’ilex eerochb’eeneb’ lee yuwa’ li xikenaqeb’ chaq cheru.

22 Aay, kejal taxaq raj eek’a’uxl chi maji’ nachal li nimla sachok a’in sa’ eeb’een. A’b’an k’ehomaq reetal, ak xikenaqex, ut li Yuwa’b’ej, relik chi yaal, li Junelik Yuwa’b’ej re choxa nanawok re lee wanjik; ut naxb’aanu eere jo’ chanru lix atiik ruhil na’leb’ ut li bruxtaan.