1 Ma o lenei ou te faaiu la’u talafaamaumau e faatatau i le ^afaaumatiaga o o’u tagata, o sa Nifaē. Ma sa oo ina matou savavali atu i luma o sa Lamanā.

2 Ma o a’u, o Mamona, sa ou tusi atu se tusi i le tupu o sa Lamanā, ma ou manao mai ia te ia, ia ona tuu mai i matou ia matou faapotopoto faatasi o matou tagata i le ^alaueleele o Kumora, i tafatafa o se maupu’epu’e ua ta’ua o Kumora, ma o iina o le a matou tau ai ma i latou.

3 Ma sa oo ina tuu mai e le tupu o sa Lamanā ia te au le mea na ou manao ai.

4 Ma sa oo ina matou savavali atu i le laueleele o Kumora, ma sa matou faatutu o matou faleie faataamilo i le mauga o Kumora; ma o se laueleele sa tele ai vai, o vaitafe, ma vaipuna; ma o iinei na matou faamoemoe o le a matou maua ai se lelei sili atu i luga o sa Lamanā.

5 Ma e mavae atu le toluselau valusefulu ma le fa o tausaga ua matou faapotopotoina faatasi o matou tagata uma na totoe i le laueleele o Kumora.

6 Ma sa oo ina ua uma ona matou faapotopoto faatasi o matou tagata uma i le laueleele o Kumora, faauta, o a’u, o Mamona, sa amata ona ou toeaina; ma i lo’u iloa o le tauiviga faaiu lea a lo’u nuu, ma ina ua poloaiina a’u e le Alii ia ou le tuuina talafaamaumau ia na tuulima faasolo mai e o matou tamā, ina ia pa’u’ū atu i lima o sa Lamanā, (ona e faaumatia ai i latou e sa Lamanā) o lea na ou faia ai ^alenei talafaamaumau mai papatusi a Nifae, ma ^enatia mau i le maupu’epu’e o Kumora ia talafaamaumau uma na tuuina mai ia te au e le aao o le Alii, vagana ai nai papatusi itiiti ⁱnei na ou tuuina atu i lo’u atalii o ^oMoronae.

7 Ma sa oo ina iloa atu nei e o’u tagata, ma a latou avā ma a latou fanau, ^aautau a sa Lamanā ua savavali agai mai ia te i latou; ma ua latou faatalitalia i latou, faatasi ma lena mata’u tele i le oti e faatumulia ai loto o i latou uma o e e amioleaga.

8 Ma sa oo ina latou o mai e faasagatau mai ia te i matou, ma sa faatumulia tagata taitoatasi i le mata’u ona o le toatele naua o lo latou aofai.

9 Ma sa oo ina latou pa’u’ū ifo i luga o lo’u nuu ma le pelu, ma le aufana, ma le ufanafana, ma le matau, ma auupega uiga eseese uma o taua.

10 Ma sa oo ina taia ifo o’u tagata, ioe, e oo i la’u sefulu afe lava o e sa faatasi ma a’u, ma sa ou pa’ū ma faamanualia i totonu o i latou; ma sa latou ui ane i o’u tafatafa ma sa latou le faaumaina lava lo’u ola.

11 Ma ina ua uma ona latou ala atu ma taia i lalo o’u tagata ^auma vagana ai le luasefulu ma le fa o i matou, (na aofia ai i totonu lo’u atalii o Moronae) ma ua faaolatia mai i matou i e na oti o lo matou nuu, sa matou vaaia i le aso na sosoo ai, mai luga o le maupu’epu’e o Kumora, ina ua toe foi atu sa Lamanā i o latou togalauapi, le sefulu afe o o’u tagata o e na taia i lalo, o e na ou ta’ita’ia i luma.

12 Ma sa matou vaaia foi le sefulu afe o o’u tagata o e sa ta’ita’ia e lo’u atalii o Moronae.

13 Faauta foi, sa pa’u’ū foi le sefulu afe a Kitakitona, ma ia foi i totonu o i latou.

14 Ma sa pa’ū foi Lama ma faatasi ma lana sefulu afe; ma sa pa’ū foi Kilikala faatasi ma lana sefulu afe; ma sa pa’ū foi Lima ma lana sefulu afe; ma sa pa’ū foi Ioneama ma lana sefulu afe; ma sa pa’u’ū foi Kamenaea, ma Moronaea, ma Anetionuma, ma Sepeloma, ma Semu, ma Iosa faatasi ma a latou ta’i sefulu afe.

15 Ma sa oo ina sa i ai foi le isi toasefulu faaopoopo o e na fasiotia foi i le pelu, faatasi ma a latou ta’i sefulu afe; ioe, o o’u tagata ^auma lava, vagana ai i latou ia e luasefulu ma le fa o e na faatasi ma a’u, ma ni isi foi e toaitiiti o e na sosola atu i laueleele i saute, ma se toaitiiti o e na sosola atu ma ua aufaatasi ma sa Lamanā, ua pa’u’ū; ma ua taatitia o latou tino, ma ivi, ma toto i luga o le fogaeleele, ua lafoai e lima o e na fasiotia i latou ia pala ai i luga o le laueleele, ma ia nuti ma toe foi atu i lo latou tinā o le eleele.

16 Ma sa saeia lo’u agaga i le mafatia, ona o e o lo’u nuu ua fasia, ma sa ou tagi:

17 E, outou tagata lalelei e, pe na mafai faapefea ea ona outou o ese mai ala o le Alii! E, outou tagata lalelei e, pe na mafai faapefea ea ona outou teena Iesu lena, o le na tulai mai ma aao faaloaloa mai e talia outou!

18 Faauta, a na outou le faia lenei mea, po ua outou le pa’u’ū. Ae faauta, ua outou pa’u’ū, ma ua ou faanoanoa i le toesea o outou.

19 E, outou atalii ma afafine lalelei e, outou tamā ma tinā, outou tane ma avā, outou tagata lalelei e, ua mafai faapefea ea ona outou pa’u’ū!

20 Ae faauta, ua mavae atu outou, ma e le mafai e lo’u fanoanoa ona toe faafoisia mai outou.

21 Ma e vave ona oo mai o le aso e faaoofuina ai o outou tino faaletino i le tino ola pea, ma o nei tino ua i ai nei i le pala e le pine ae avea ma tino ^alē pala; ma ona tatau ai lea ona outou tutulai i luma o le nofoa-faamasino o Keriso, e faamasinoina e tusa ma a outou galuega; afai e faapea ua outou amiotonu, ona faamanuiaina lea o outou faatasi ma o outou tamā o e na muamua atu ia te outou.

22 E, pe a na outou salamo ae lei oo mai lenei faafanoga tele ia te outou. Ae faauta, ua outou o atu, ma ua silafia e le Tamā, ioe, le Tamā Faavavau o le lagi, lo outou tulaga; ma e faia e ia ia te outou e tusa ma lona ^afaamasinotonu ma lona ^ealofa mutimutivale.