1 Pea naʻe hoko ʻo pehē naʻá ku ʻalu atu ʻi he kau Nīfaí, pea naʻá ku fakatomala mei he ^afuakava kuó u fai ʻe ʻikai te u toe tokoni kiate kinautolú; pea naʻa nau toe tuku mai kiate au ʻa e pule ki heʻenau ngaahi kau taú, he naʻa nau sio kiate au ʻo hangē te u lava ʻo fakahaofi ʻa kinautolu mei honau ngaahi faingataʻá.

2 Kae vakai, naʻe ^aʻikai haʻaku ʻamanaki, he naʻá ku ʻilo ʻa e ngaahi tautea ʻa e ʻEikí ʻa ia ʻe tō kiate kinautolú; he naʻe ʻikai te nau fakatomala mei heʻenau ngaahi angahalá, ka nau feinga ke maluʻi ʻenau moʻuí kae ʻikai ui ki he Tokotaha ʻa ia naʻá ne fakatupu ʻa kinautolú.

3 Pea naʻe hoko ʻo pehē naʻe ʻoho mai ʻa e kau Leimaná kiate kimautolu ʻi heʻemau hola ki he kolo ko Soataní; kae vakai, naʻe tekeʻi fakaholomui ʻa kinautolu ʻo ʻikai ai te nau puke ʻa e koló ʻi he taimi ko iá.

4 Pea naʻe hoko ʻo pehē naʻa nau toe ʻoho mai ke tau mo kimautolu, ka naʻa mau maluʻi ʻa e koló. Pea naʻe ʻi ai mo e ngaahi kolo kehe ʻa ia naʻe maluʻi ʻe he kau Nīfaí, ʻa ia ko ha ngaahi kolotau naʻe taʻofi ʻa kinautolu ʻo ʻikai te nau faʻa hū mai ki he fonua naʻe tuʻu ki muʻa ʻiate kimautolú, ke nau fakaʻauha ʻa e kakai ʻo homau fonuá.

5 Ka naʻe hoko ʻo pehē ko e ngaahi fonua kotoa pē kuo mau tuku ki muí, pea kuo ʻikai ke tānaki mai mo honau kakaí, naʻe fakaʻauha ʻe he kau Leimaná, pea ko honau ngaahi koló, mo e ngaahi kolo īkí, mo e ngaahi kolo lalahí, naʻe tutu ʻaki ʻa e afi; pea naʻe pehē ʻa e ʻosi atu hono tolungeau fitungofulu mā hiva ʻo e taʻú.

6 Pea naʻe hoko ʻo pehē ʻi hono tolungeau valungofulu ʻo e taʻú naʻe toe ō mai ai ʻa e kau Leimaná ke tauʻi ʻa kimautolu, pea naʻa mau tau mo kinautolu ʻi he loto-toʻa; ka naʻe taʻeʻaonga pē ia, he naʻe pehē fau honau tokolahí naʻa nau molomoloki ʻa e kakai ʻo e kau Nīfaí ʻi honau lalo vaʻé.

7 Pea naʻe hoko ʻo pehē naʻa mau toe hola, pea ko kinautolu naʻe vave ange ʻenau holá ʻi he kau Leimaná, naʻa nau hao, pea ko kinautolu naʻe ʻikai ke vave ange ʻi he kau Leimaná naʻe tā hifo mo fakaʻauha.

8 Pea ko ʻeni vakai, ko au, Molomona, ʻoku ʻikai te u fie fakamamahiʻi ʻa e loto ʻo e kakaí ʻi he fakahā kiate kinautolu ʻa hono fakamanavahē ʻo e totó mo e fakaʻauhá ʻo hangē ko ia naʻá ku mamata ki ai ʻaki hoku matá; ka ko au, ʻi heʻeku ʻiloʻi kuo pau ke ^afakahā ʻa e ngaahi meʻá ni, pea ko e ngaahi meʻa kotoa pē kuo fufuuʻí kuo pau ke fakahā ia ʻi he ngaahi funga falé—

9 Pea ko e tahá kuo pau ke ^amaʻu ʻa e ʻilo ki he ngaahi meʻá ni ʻe he toenga ʻo e kakai ní, pea mo e kau Senitailé foki, ʻa ia kuo folofola ʻe he ʻEikí te nau ^bfakamovetevete ʻa e kakai ní, pea ʻe lau ʻa e kakaí ni ko e meʻa noa pe ʻi honau ʻaó—ko ia ʻoku ou hiki hano ^ckiʻi fakanounouʻi, ka ʻoku ou manavahē ke fai hano fakamatalaʻi kakato ʻo e ngaahi meʻa kuó u mamata ki aí, koeʻuhi ko e fekau kuó u maʻú, kae ʻumaʻā foki ke ʻoua ʻe fuʻu lahi hoʻomou mamahi koeʻuhi ko e fai angahala ʻa e kakai ní.

10 Pea ko ʻeni vakai, ʻoku ou lea ʻaki ʻeni ki honau hakó, kae ʻumaʻā mo e kau Senitaile ʻa ia ʻoku tokanga ki he fale ʻo ʻIsilelí, ʻa ia ʻoku mahino ki ai mo ʻiloʻi ʻoku haʻu mei fē honau ngaahi tāpuakí.

11 He ʻoku ou ʻilo ʻe mamahi ʻa e faʻahinga peheé koeʻuhi ko e tuʻutāmaki ʻa e fale ʻo ʻIsilelí; ʻio, te nau loto-mamahi koeʻuhi ko e fakaʻauha ʻo e kakai ní; te nau loto-mamahi koeʻuhi ko e ʻikai fakatomala ʻa e kakaí ni ke lava ai ke hapai ʻa kinautolu ʻi he ongo toʻukupu ʻo Sīsuú.

12 Ko ʻeni ʻoku tohi ʻa e ngaahi ^ameʻá ni ki he ^btoenga ʻo e fale ʻo Sēkopé; pea ko e anga ʻeni honau tohí, koeʻuhi ʻoku ʻafioʻi ʻe he ʻOtuá ʻe ʻikai fakahā mai ia kiate kinautolu ʻe he fai angahalá; pea ʻe ^cfufuuʻi ia ki he ʻEikí koeʻuhi ke hā mai ia ʻi he taimi ʻokú ne ʻafioʻi ʻoku leleí.

13 Pea ko e fekau ʻeni kuó u maʻú; pea vakai te nau hā mai ʻo fakatatau mo e fekau ʻa e ʻEikí, ʻo ka ne ka ʻafioʻi ʻoku lelei, ʻi hono finangalo potó.

14 Pea vakai, te nau ʻalu atu ki he kau ^aSiu ʻoku taʻetuí; pea ko hono ʻuhinga ʻeni te nau ʻalu atu aí—koeʻuhi ke ^bfakalotoʻi ʻa kinautolu ke nau tui ko Sīsū ko e Kalaisí, ko e ʻAlo ʻo e ʻOtua moʻui; koeʻuhi ke lava ʻo fakahoko ʻe he Tamaí, ʻi hono ʻOfaʻangá, ʻa ʻene taumuʻa maʻongoʻonga mo taʻengatá, ʻi he fakafoki ʻo e kau Siú, pe ko e fale kotoa ʻo ʻIsilelí, ki he fonua ʻo honau tofiʻá, ʻa ia kuo tuku ʻe he ʻEiki ko honau ʻOtuá kiate kinautolu, ko hono fakahoko ʻo ʻene ^cfuakavá;

15 Pea koeʻuhi foki ko e hako ʻo hono kakai ^aní ke nau tui lahi ange ki heʻene ongoongoleleí, ʻa ia ʻe ^bʻalu atu kiate kinautolu mei he kau Senitailé; koeʻuhi ʻe ^cfakamoveteveteʻi ʻa e kakaí ni, pea te nau ^dhoko ko ha kakai lanu fakapoʻupoʻuli, mo ʻuli, mo fakalielia, ʻo laka hake ʻi he kau Leimana kuo tau mamata ki ai pea nofo mo kitautolú, pea ʻe hoko ʻeni koeʻuhi ko ʻenau taʻetuí mo e tauhi tamapuá.

16 He vakai, kuo tuku ʻe he Laumālie ʻo e ʻEikí ʻa ʻene ^afeinga ke ueʻi ʻa ʻenau ngaahi tamaí; pea ʻoku ʻikai te nau maʻu ʻa Kalaisi mo e ʻOtuá ʻi he māmaní; pea ʻoku nau vilingia holo ʻo hangē ko e ^bkafukafu ʻi he matangí.

17 Naʻa nau hoko ʻi ai ha taimi ko ha kakai fakaʻofoʻofa, pea naʻa nau maʻu ʻa Kalaisi ko honau ^atauhi; ʻio, naʻe taki foki ʻa kinautolu ʻe he ʻOtua ko e Tamaí.

18 Ka ko ʻeni, vakai, ʻoku ^atākiekina holo ʻa kinautolu ʻe Sētane, ʻo hangē ko e vilingia holo ʻa e kafukafú ʻi he matangí, pe hangē ko e fetēkeekina holo ha vaka ʻi he ngaahi peaú, taʻe-hano-lā pe taulá, pe taʻe ʻi ai ha meʻa ke fakaʻuli ʻaki ia; pea ʻoku tatau ia, mo kinautolu.

19 Pea vakai, kuo tuku ʻe he ʻEiki ʻa honau ngaahi tāpuaki, ʻa ia naʻa nau mei maʻu ʻi he fonuá, moʻó e kau ^aSenitaile te nau maʻu ʻa e fonuá.

20 Kae vakai, ʻe hoko ʻo pehē ʻe tuli mo fakamoveteveteʻi ʻa kinautolu ʻe he kau Senitailé; pea hili honau tuli mo fakamoveteveteʻi ʻe he kau Senitailé, vakai, ʻe ^amanatuʻi leva ʻe he ʻEikí ʻa e ^bfuakava kuó ne fai kia ʻĒpalahamé pea ki he fale kotoa ʻo ʻIsilelí.

21 Pea ʻe manatuʻi foki ʻe he ʻEikí ʻa e ngaahi ^alotu ʻa e māʻoniʻoní, ʻa ia kuo fai kiate ia koeʻuhi ko kinautolú.

22 Pea ko ia, ʻA kimoutolu ʻe kakai Senitaile, ʻe fēfē haʻamou lava ʻo tuʻu ʻi he ʻao ʻo e māfimafi ʻo e ʻOtuá, taʻe te mou fakatomala, pea tafoki mei homou ngaahi hala kovi?

23 ʻIkai ʻoku mou ʻiloʻi ʻoku mou ʻi he toʻukupu ʻo e ʻOtuá? ʻIkai ʻoku mou ʻiloʻi ʻoku ʻiate ia ʻa e māfimafi kotoa pē, ʻo ka ne ka ^afolofola pē ʻe ^btakatakai fakataha ʻa māmani ʻo hangē ha takainga tohí?

24 Ko ia, mou fakatomala, pea fakavaivaiʻi ʻa kimoutolu ʻi hono ʻaó, telia naʻá ne hāʻele mai ke fakamāuʻi ʻa kimoutolu—telia naʻa ʻalu atu ha toenga ʻo e hako ʻo Sēkopé ʻiate kimoutolu ʻo hangē ko e ^alaione, pea haehae momomomo-iiki ʻa kimoutolu, pea ʻoku ʻikai ha taha ʻe fakahaofi ʻa kimoutolu.