Ebʼ li loqʼlaj hu
Mormon 3


Ch’ol 3

Laj Mormon naxyaab’asi li jalb’a-k’a’uxlej chiruheb’ laj Nefita—Neke’xk’ul jun nimla q’axok-u, ut neke’xnima rib’ xb’aan tz’aqal lix metz’eweb’—Laj Mormon naxye naq ink’a’ chik tixjolomiheb’, ut maak’a’ xpaab’aal naq natijok chirixeb’—Lix Hu laj Mormon naxb’oqeb’ li kab’laju xteepal laj Israel re te’xpaab’ li evangelio. Wan na 360–362 chihab’ xyo’lajik li Kristo.

1 Ut kik’ulman naq eb’ laj Lamanita ink’a’ ke’chal wi’chik chi pleetik toj reetal naq ak numenaq lajeeb’ chihab’ chik. Ut k’ehomaq reetal, laa’in kink’e chi k’anjelak lin tenamit, eb’ laj Nefita, sa’ xkawresinkil lix ch’och’eb’ ut lix k’anjeleb’aal re pleet choq’ re xkutankil li pleetik.

2 Ut kik’ulman naq li Qaawa’ kixye we: Elajin chiru li tenamit a’in—Jalomaq eek’a’uxl, ut chalqex wik’in, ut chikub’eeq eeha’, ut waklesihomaq wi’chik lin iglees, ut taakole’q eeyu’am.

3 Ut kin’elajin reheb’ li tenamit a’in, a’b’an maak’a’ ki’ok wi’; ut ink’a’ ke’xtaw xyaalal naq a’an li Qaawa’ li kikolok chaq xyu’ameb’, ut kixk’e reheb’ naq te’ruuq chixjalb’al xk’a’uxleb’. Ut k’ehomaq reetal, ke’xkawob’resi li raameb’ chiru li Qaawa’ lix Dios.

4 Ut kik’ulman naq chirix naq kinume’ li xlaje chihab’ a’in, ut chi junajinb’il, a’an oxib’ cient rik’in oxk’aal chihab’ xk’ulunik chaq li Kristo, lix reyeb’ laj Lamanita kixtaqla jun li hu wik’in, li kixk’e chinnaw naq yookeb’ chixkawresinkil rib’ re chalk wi’chik chiqapleetinkil.

5 Ut kik’ulman naq kintaqla naq eb’ lin tenamit te’xch’utub’ rib’ sa’ li ch’och’ Sachenaqil, sa’ jun tenamit li wan sa’ xnub’aal, chixk’atq li ka’ch’in ruhil na’ajej li nanume’ toj sa’ li ch’och’ sa’ xjayal lix tz’e li saq’e.

6 Ut aran kiqak’ojob’ li qateep aj pleet, re taaruuq taqarameb’ li teep aj pleet reheb’ laj Lamanita, re naq maajun li qach’och’ te’reechani; jo’kan naq kiqakawresi qib’ chiruheb’ rik’in x’anchalil li qakawilal.

7 Ut kik’ulman naq sa’ li rox cient rik’in jun xkaak’al chihab’ ke’kub’e laj Lamanita sa’ li tenamit Sachenaqil re qapleetinkil; ut kik’ulman naq sa’ li chihab’ a’an kiqaq’axeb’ ru, jo’kan naq ke’sutq’i wi’chik sa’ xch’och’eb’ a’an.

8 Ut sa’ li rox cient rik’in wiib’ xkaak’al chihab’ ke’kub’e wi’chik chi pleetik. Ut kiqaq’axeb’ wi’chik ru, ut naab’al rajlankileb’ kiqakamsi, ut ke’kute’ sa’ palaw lix kamenaqeb’.

9 Anajwan ut, xb’aan li nimla na’leb’ a’in ke’xb’aanu lin tenamit, eb’ laj Nefita, ke’ok achixnimankil rib’eb’ xb’aan tz’aqal lix metz’eweb’, ut ke’ok chixxaqab’ankil aatin chiru choxa naq te’reeqaju lix kik’eleb’ li ras riitz’ineb’ li ke’kamsiik chaq xb’aaneb’ li xik’ neke’ilok reheb’.

10 Ut ke’xxaqab’ aatin sa’ lix k’ab’a’ li choxa, ut sa’ lix k’ab’a’ ajwi’ lix k’ojarib’aal li Dios, naq atoxe’taqe’q chixpleetinkileb’ li xik’ neke’ilok reheb’, ut te’xsacheb’ chaq chiru lix b’een li ch’och’.

11 Ut kik’ulman naq laa’in, aj Mormon, chi junajwa kinye naq chirix li kutan a’an ink’a’ chik tinwanq choq’ aj taqlanel ut aj jolominel re li tenamit a’in, xb’aan xmaa’usilaleb’ ut xtz’eqb’eetalileb’.

12 K’ehomaq reetal, ak kinjolomiheb’ chaq, us ta ke’wan xmaa’usilaleb’, kinb’eresiheb’ chaq k’iila sut sa’ li pleet, ut kinraheb’ chaq, jo’ chanru lix arahom li Dios li kiwan wik’in, chi anchal inch’ool; ut kihoye’ chaq li waam rik’in tijok chiru lin Dios chiru chixjunil li kutan choq’ reheb’; a’b’anan kiwan chi bmaak’a’ inpaab’aal, xb’aan xkawileb’ li raam.

13 Ut oxib’ sut keb’inkol chaq sa’ ruq’eb’ li xik’ neke’ilok reheb’, ut ink’a’ ke’xjal xk’a’uxl chirix lix maakeb’.

14 Ut chirix naq ke’xxaqab’ aatin sa’ xk’ab’a’ chixjunil li ayeeb’il naq ink’a’ taaxaqab’aaq wi’ aatin xb’aan li Qaawa’ ut qaKolonel Jesukristo, naq toxe’taqe’q rik’ineb’ li xik’ neke’ilok reheb’ chi pleetik, ut te’reeqaju lix kik’eleb’ li ras riitz’ineb’, k’ehomaq reetal, lix yaab’ xkux li Qaawa’ kichal wik’in, ut kixye:

15 We laa’in li aeeqajunk, ut laa’in btinq’ajkaamunq; ut rik’in naq eb’ li tenamit a’in ink’a’ ke’xjal xk’a’uxl chirix naq kinkoleb’, k’e reetal, eb’ a’an te’isiiq chaq chiru lix b’een li ch’och’.

16 Ut kik’ulman naq chi junajwa kinye naq ink’a’ toxintaqe’q chixpleetinkileb’ li xik’ neke’ilok we; ut kinb’aanu ajwi’ jo’ chanru kinixtaqla chaq li Qaawa’; ut kinwan jo’ aj yehol nawom chi maak’a’ ninb’aanu, re xk’utb’esinkil chiru li ruchich’och’ li k’a’aq re ru kiwil ut kiwab’i, jo’ chanru lix k’utb’esihom li Musiq’ej li kich’olob’an xyaalal li k’a’aq re ru taachalq.

17 Jo’kan ut nintz’iib’ak aeere laa’ex, aj Gentil, ut eere ajwi’ laa’ex, xjunkab’al laj Israel, naq taatiklaaq li k’anjel, ut okaq eere chixkawresinkil eerib’ chi sutq’iik sa’ xch’och’il eereechanihom;

18 Relik chi yaal, k’ehomaq reetal, nintz’iib’ak re chixjunileb’ lix maril li ruchich’och’; relik chi yaal, eere laa’ex, kab’laju xteepal laj Israel, li ataaraqe’q aatin cherix jo’ chanru eek’anjel xb’aaneb’ li kab’laju li kixsik’ ru li Jesus chi wank choq’ xtzolom sa’ li ch’och’ Jerusalen.

19 Ut nintz’iib’ak ajwi’ re li rela’ li tenamit a’in, li te’raqe’q aatin chirixeb’ xb’aaneb’ li akab’laju li kixsik’ ru li Jesus sa’ li ch’och’ a’in; ut eb’ a’an te’raqe’q aatin chirix xb’aaneb’ li kab’laju chik li kixsik’ ru li Jesus sa’ li ch’och’ Jerusalen.

20 Ut li k’a’aq re ru a’in naxk’utb’esi li Musiq’ej we; jo’kan naq nintz’iib’a eere chejunilex. Ut a’in li ajom nintz’iib’ak wi’ eere, re naq teenaw naq tento texxaqliiq chejunilex chiru lix araqleb’aal aatin li Kristo; relik chi yaal, li junjunq chi aamej li wan sa’ chixjunil li bjunkab’al chi winq re laj Adan; ut tento texxaqliiq ut taaraqmanq aatin cherix xb’aan lee k’anjel, ma us malaj ink’a’ us;

21 Ut jo’kan ajwi’ re taaruuq ateepaab’ lix evangelio li Jesukristo, li taawanq sa’ eeyanq; ut jo’kan ajwi’ re naq eb’ laj bJudio, lix tenamit li Qaawa’ re li sumwank, te’wanq chik aj cyehol nawom xkomon li ani ke’ril ut ke’rab’i, naq li Jesus, li ke’xkamsi, a’an dtz’aqal li Kristo ut tz’aqal li Dios.

22 Ut nawaj raj naq tinruuq chixq’unb’esinkil eech’ool achejunilex xmaril li ruchich’och’ re naq teejal eek’a’uxl ut teekawresi eerib’ chi xaqliik chiru lix raqleb’aal aatin li Kristo.