Vaj Lug Kub
Maumoos 3


Tshooj 3

Maumoos qhuab qhia txoj kev hloov siab lees txim rau cov Neeg Nifais—Lawv muaj ib qho kev yeej loj heev thiab qhuas lawv tus kheej tej zog—Maumoos tsis kam coj lawv, thiab nws tej kev thov Vajtswv rau lawv twb tsis muaj kev cia siab—Phau Ntawv Maumoos caw kaum ob xeem neeg ntawm Ixayees los ntseeg txoj moo zoo. Kwv yees li 360–362 xyoo tom qab yug Yexus.

1 Thiab tau muaj tias cov Neeg Lamas tsis tau rov tuaj ua rog mus txog kaum xyoo ntxiv tau dhau mus. Thiab saib seb, kuv tau kom kuv cov neeg, cov Neeg Nifais, ua hauj lwm npaj lawv tej av thiab lawv tej cuab yeej rau lub caij ua rog.

2 Thiab tau muaj tias tus Tswv tau hais rau kuv tias: Qhuab qhia nrov nrov rau cov neeg no—Nej cia li hloov siab lees txim, thiab los cuag kuv, thiab ua kev cai raus dej, thiab rov tsa kuv lub koom txoos dua, thiab nej yuav raug cia dim.

3 Thiab kuv tau qhuab qhia nrov nrov rau cov neeg no, tiam sis nws tsis muaj nuj nqis dab tsi; thiab lawv tseem tsis paub tias nws twb yog tus Tswv uas tau cia lawv dim, thiab tau muab ib lub caij rau lawv los hloov siab lees txim. Thiab saib seb lawv tau ua lawv tej siab tawv tawm tsam tus Tswv lawv tus Vajtswv.

4 Thiab tau muaj tias tom qab uas kaum xyoo no tau dhau mus lawm, tau muaj tag nrho peb puas thiab rau caum xyoo txij li Khetos txoj kev los, cov Neeg Lamas tus vaj ntxwv tau xa ib tsab ntawv tuaj rau kuv, uas muab rau kuv kom paub tias lawv tab tom npaj rov tuaj ua rog tawm tsam peb.

5 Thiab tau muaj tias kuv tau kom kuv cov neeg yuav tsum sib sau lawv tus kheej tuaj ua ke nyob rau hauv thaj av Quav Poj, rau hauv ib lub nroog uas nyob rau hauv tej ciam teb, uas nyob ze txoj kev nqaim uas coj mus rau hauv thaj av qab teb.

6 Thiab peb tau tso peb tej tub rog rau qhov ntawd, xwv kom peb yuav cheem tau tej tub rog ntawm cov Neeg Lamas, xwv kom lawv yuav txeeb tsis tau peb tej av ib qho li; yog li ntawd peb tau tiv thaiv tawm tsam lawv nrog tag nrho peb pawg tub rog.

7 Thiab tau muaj tias nyob rau hauv peb puas thiab rau caum thiab ib xyoos cov Neeg Lamas tau nqis tuaj rau hauv lub nroog Quav Poj ua rog tawm tsam peb; thiab tau muaj tias nyob rau hauv xyoo ntawd peb tau kov yeej lawv, kawg tias lawv tau tig rov qab mus rau lawv tej av.

8 Thiab nyob rau hauv peb puas thiab rau caum thiab ob xyoos lawv tau nqis rov qab tuaj ua rog dua. Thiab peb tau rov qab kov yeej lawv dua, thiab tau tua lawv coob leej heev, thiab lawv cov neeg tuag tau raug muab pov rau hauv dej hiav txwv.

9 Thiab nim no, vim yog qhov loj no uas kuv cov Neeg Nifais, tau ua lawm, lawv tau pib khav lawv tus kheej lub zog, thiab tau pib cog lus ua ntej rau ntuj tias lawv yuav pauj txiaj ntsig rau tej ntshav ntawm lawv tej kwv tij uas tau raug tua tuag los ntawm lawv tej yeeb ncuab.

10 Thiab lawv tau cog lus los ntawm ntuj, thiab kuj los ntawm Vajtswv lub rooj zaum, tias lawv yuav nce mus ua rog tawm tsam lawv tej yeeb ncuab, thiab yuav muab lawv txiav tawm ntawm thaj av mus.

11 Thiab tau muaj tias kuv, Maumoos, tsis kam kiag txij li lub sij hawm no mus uas yuav los ua ib tug thawj txib thiab ib tug thawj coj ntawm cov neeg no, vim yog lawv txoj kev phem thiab txoj kev qias.

12 Saib seb, kuv tau coj lawv, txawm tias lawv muaj txoj kev phem los kuv tseem tau coj lawv ntau zaus mus ua rog, thiab tau hlub lawv, raws li Vajtswv txoj kev hlub uas muaj nyob hauv kuv, nrog tag nrho kuv lub siab; thiab kuv tus ntsuj plig tau nchuav tawm nyob hauv txoj kev thov rau kuv tus Vajtswv tag nrho ib hnub rau lawv; txawm li ntawd los, tej ntawd tau tsis muaj kev cia siab dab tsi, vim yog txoj kev tawv ntawm lawv tej siab.

13 Thiab kuv tau cawm lawv dim ntawm lawv tej yeeb ncuab tes peb zaug, thiab lawv tsis tau hloov siab lees txim txog lawv tej kev txhaum.

14 Thiab thaum lawv tau cog lus los ntawm tag nrho tej uas tau raug txwv lawv los ntawm peb tus Tswv thiab tus Cawm Seeg Yexus Khetos, tias lawv yuav nce mus ua rog rau lawv tej yeeb ncuab, thiab pauj txiaj ntsig rau tej ntshav ntawm lawv tej kwv tij, saib seb tus Tswv lub suab tau los rau kuv, hais tias:

15 Txoj kev pauj txiaj ntsig yog kuv li, thiab kuv yuav them rov qab; thiab vim cov neeg no tsis tau hloov siab lees txim tom qab uas kuv tau cawm lawv dim, saib seb, lawv yuav raug txiav tawm saum thaj av mus.

16 Thiab tau muaj tias kuv tsis kam nce mus tawm tsam kuv tej yeeb ncuab kiag; thiab kuv tau ua tib yam li tus Tswv tau txib kuv lawm; thiab kuv tau sawv ua ib tug tim khawv qhuab qhia rau lub ntiaj teb txog tej yam uas kuv tau pom thiab tau hnov, raws li txoj kev qhia ntawm tus Ntsuj Plig uas tau ua tim khawv txog tej yam uas yuav muaj los.

17 Yog li ntawd kuv sau rau nej, cov uas yog Lwm Haiv Neeg, thiab kuj rau nej, tsev neeg Ixayees, thaum txoj hauj lwm pib, ces nej yuav tau npaj rov qab mus rau thaj av ntawm nej qub txeeg qub teg;

18 Muaj tseeb tiag, saib seb, kuv sau rau tag nrho sawv daws hauv qab ntuj kawg; muaj tseeb tiag, rau nej, kaum ob xeem neeg Ixayees, uas yuav raug txiav txim raws li nej tej hauj lwm los ntawm kaum ob tug uas Yexus tau xaiv los ua nws cov pab coj nyob rau hauv thaj av Yeluxalees.

19 Thiab kuv kuj sau rau cov seem tshuav ntawm cov neeg no, uas kuj yuav raug txiav txim los ntawm kaum ob leeg uas Yexus tau xaiv nyob hauv thaj av no; thiab lawv yuav raug txiav txim los ntawm lwm cov kaum ob leeg uas Yexus tau xaiv nyob hauv thaj av Yeluxalees.

20 Thiab tus Ntsuj Plig qhia tej yam no rau kuv paub; yog li ntawd kuv sau rau nej sawv daws. Thiab rau qhov txiav txim no kuv thiaj sau rau nej, xwv kom nej yuav paub tias nej sawv daws yuav tsum tau sawv ua ntej ntawm Khetos lub rooj txiav txim, muaj tseeb tiag, txhua tus uas zwm rau tag nrho tib neeg tsev neeg ntawm Adas; thiab nej yuav tsum tau sawv raug txiav txim txog nej tej hauj lwm, txawm tias lawv zoo los sis phem;

21 Thiab kuj xwv kom nej yuav ntseeg Yexus Khetos txoj moo zoo, uas nej yuav muaj nyob hauv nej; thiab kom cov Neeg Yudais, cov neeg khi lus ntawm tus Tswv, yuav muaj lwm tus tim khawv nrog nws tus uas lawv tau pom thiab tau hnov tias Yexus, tus uas lawv tau muab tua lawm, twb yog kiag tus Khetos thiab tus Vajtswv.

22 Thiab kuv xav tias kheev lam kuv muaj peev xwm yaum tau nej sawv daws hauv qab ntuj kawg los hloov siab lees txim thiab npaj tos mus sawv ntawm Khetos lub rooj txiav txim.