1 Im ālikin men kein riLeman ro raar jab bar itok n̄an pata m̧ae jon̄oul iiō ko raar eļļāļo̧k. Im lo, iaar kōjerbal armej ro aō, riNipai ro, ilo kōpooj āne ko āneer im kein tariņae ko aer ilo kōtmāne iien pata.

2 Im ālikin men kein Irooj ar ba n̄an eō: Kwōn kūr armej rein—Kom̧in ukeļo̧k, im itok n̄an Eō, im kom̧in peptaij, im bar kalōk kabun̄ eo Aō, im kom̧ naaj mour.

3 Im iaar kūr n̄an armej rein, a eaar ilo waan; im raar jab kile bwe eaar Irooj eo eaar oņaake er, im leļo̧k n̄an er juon iaļ n̄an ukeļo̧k. Im lo raar kapene burueer ņae Irooj aer Anij.

4 Im ālikin men kein ālikin an jon̄oul iiō in kar eļļāļo̧k, kōm̧m̧an, ilo dipiio, jilubukwi im jiljinon̄oul iiō jān itok eo an Kraist, kiin̄ eo an riLeman eo eaar jilkintok juon lōta n̄an eō, eo eaar letok n̄an eō n̄an jeļā bwe raar m̧aanjāppopo in bar itok n̄an pata ņae kōm.

5 Im ālikin men kein iaar kōm̧m̧an bwe armej ro aō ren aikuj kukļo̧k ippān doon ilo Āneen Lo̧urō, n̄an jikin kwelo̧k eo eaar ilo tōrerein ko, iturin iaļ aidik eo ej tōlļo̧k ilo āneo iturōk.

6 Im ijo kōm ar likūt jarin tariņae ko am, bwe kōmin maron̄ kabbōjrak jarin tariņae ko an riLeman ro, bwe ren maron̄ jab bōk aer jabdewōt iaan āne ko āneem; kōn menin kōm ar kapenļo̧k ņae er kōn aolep am kajoor.

7 Im ālikin men kein ilo jilubukwi im jiljinon̄oul im juon iiō eo riLeman ro raar wanlaļtak n̄an jikin kwelo̧k in Lo̧urō n̄an kōpata ņae kōm; im ālikin men kein ilo iiō eo kōm ar anjo̧ ioer, jon̄an raar ro̧o̧l n̄an āne ko āneer bar juon alen.

8 Im ilo jilubukwi im jiljinon̄oul im ruo iiō eo raar bar wanlaļtak n̄an kōpata. Im kōm ar anjo̧ ioer bar juon alen, im kar m̧an juon oran eo eļap iaer, im rimej ro aer kar joļo̧k er ilo lo̧jet.

9 Im kiiō, kōnke men in eļap eo armej ro aō, riNipai ro, raar kōm̧m̧ane, raar jino in ^alikōmjāje ilo kajoor eo aer make, im kar jino in kanejnej im̧aan lan̄ ko bwe renaaj kar idenoņeik er jān bōtōktōkin ro jeir im jatier ro raar mej jān rikōjdat ro aer.

10 Im raar kanejnej kōn lan̄ ko, im barāinwōt kōn tūroon an Anij, bwe ^aren kar wanlōn̄ļo̧k n̄an kōpata ņae rikōjdat ro aer, im naaj kar jekļo̧k er jān mejān āneo.

11 Im ālikin men kein n̄a, Mormon, iaar kanooj m̧akoko jān iien in m̧aanļo̧k n̄an juon rilale im ritōl an armej rein, kōnke aer jero̧wiwi im kajjōjō.

12 Lo, i kar tōl er, jekdo̧o̧n aer jero̧wiwi i kar tōl er elōn̄ iien ko n̄an kōpata, im kar iakwe er, ekkar n̄an ^aiakwe an Anij eo eaar ilo n̄a, kōn aolepān buruō; im aō kar lutōkļo̧k ilo jar n̄an aō Anij aolep aetok in raan kōn er; mekarta, eaar ilo ^bejjeļo̧k tōmak, kōnke pen eo an burueer.

13 Im jilu alen iaar kōtļo̧k er jān peier ro aer rikōjdat, im raar jab ukeļo̧k jān jero̧wiwi ko aer.

14 Im ke eaar m̧ōj aer kanejnej kōn aolep men ko kar ^akōmo̧iki jān ad Irooj im Rilo̧mo̧o̧r Jisōs Kraist, bwe ren kar wanlōn̄ļo̧k n̄an rikōjdat ro aer n̄an pata, im idenoņeik er make kōn bōtōktōkin ro jeir im jatier, lo ainikien Irooj eaar itok n̄an eō, im ba:

15 ^aIdenoņe ej Aō, im Inaaj ^bņa wōņāān; im kōnke armej rein raar jab ukeļo̧k ālikin Aō kar kōtļo̧k er, lo, renaaj m̧wijkōk jān mejān laļ.

16 Im ālikin men kein iaar kanooj m̧akoko in wanlōn̄ļo̧k ņae rikōjdat ro aō; im iaar kōm̧m̧an em̧ool āinwōt Irooj eaar jiron̄ eō; im iaar jutak āinwōt rikam̧ool ewaan n̄an kwaļo̧k n̄an laļ men ko iaar lo im ron̄, ekkar n̄an waļo̧k ko an jetōb eo eaar kam̧ool kōn men ko rej itok.

17 Kōn menin ij jeje ^an̄an kom̧, ro riAelōn̄ ko, im barāinwōt n̄an kom̧, m̧weo im̧ōn Israel, n̄e jerbal eo enaaj ijjino, bwe kom̧ naaj nan̄in itōn pojak n̄an ro̧o̧l n̄an āneen ami jolōt.

18 Aaet, lo, ij jeje n̄an aolep jeban ko in laļ; aaet, n̄an kom̧, jon̄oulruo bwij ko an Israel, ro renaaj ^aekajet ekkar n̄an jerbal ko ami jān jon̄oulruo eo Jisōs eaar kāālet bwe ren An rikaļoor ilo āneen Jerusalem.

19 Im ij jeje barāinwōt n̄an ro m̧ōttan in armej rein, ro renaaj barāinwōt ekajet jān ro ^ajon̄oulruo im Jisōs eaar kāālet ilo āne in; im renaaj ekajet jān bar jon̄oulruo ro jet im Jisōs eaar kāālet ilo āneen Jerusalem.

20 Im men kein jetōb eo ej kwaļo̧k n̄an eō; kōn menin ij jeje n̄an kom̧ aolep. Im kōn un in ij jeje n̄an kom̧, bwe kom̧in maron̄ jeļā bwe kom̧ aikuj aolep jutak im̧aan ^ajea in ekajet an Kraist, aaet, aolep armej ro rej an aolepān ^bnukwin eo an Adam ioon laļ; im kom̧ aikuj jutak n̄an ekajet kōn jerbal ko ami, eļan̄n̄e rej em̧m̧an ak nana.

21 Im barāinwōt bwe kom̧ maron̄ ^atōmak gospel eo an Jisōs Kraist, eo kom̧ naaj lo ilubwiljimi; im barāinwōt bwe ^briJu ro, armej in bujen eo an Irooj, naaj wōr bar jet ^crikam̧ool ijello̧kun E eo raar lo im ron̄jake, bwe Jisōs, eo raar m̧ane, eaar ^dlukkuun Kraist eo im lukkuun Anij eo.

22 Im ikōņaan bwe in maron̄ karreel ^aaolep kom̧ jeban ko in laļ n̄an ukeļo̧k im pojak n̄an jutak im̧aan jea in ekajet an Kraist.