1 Ao ngkai e koro bukina bwa i mwin ririki tabeua, ao iai te aomata temanna ae maiu i buakoia Nibwaite ae arana Tierem.

2 Ao e koro bukina bwa e kakaraoa ana kabwarabwara nakoia te botanaomata, ao e taekinna nakoia bwa e taku bwa akea Kristo. Ao a mwaiti bwaai ake e tataekin ake a anaaki iai nanoia aomata; ao e karaoa aio bwa e aonga n tokanikai iaon ana reirei Kristo.

3 Ao e kakorakora ni mwakuri bwa e aonga ni kairi nako nanoia aomata man te koaua, ao a mwaiti ake a iria nako; ao ngkai e ataia ae Ngai ae Iakobwa, iai au onimaki iroun Kristo ae e na roko, ao e aki toki ni kataia ni kaitibo ma Ngai.

4 Iai te rabakau irouna, ao e ataa aron aia taetae te botanaomata; mangaia ae e kona ni kabongana te kababa, ma korakoran te kabwarabwara, ni mwaakan te riaboro.

5 Ao e taku n ana kaantaninga bwa e na kona ni kabwakaai man te onimaki, e ngae ngke a mwaiti taian ^akaotioti ma bwaai nako ake I a tia n noori n aron bwaai aikai; bwa e koaua ae I a tia n noori taian anera, ao a tia ni buokai. Ao I a tia naba n ongo bwanaan te Uea n taetae nakoiu n oin ana taeka, n taai ake e taetae iai nakoiu; ma ngaia ae N na bon aki bwaka.

6 Ao e koro bukina bwa e kawarai ao aio aron ana taeka nakoiu, ni kangai: Tariu ae Iakobwa, I a tia ni kataia ni kaitibo ma ngkoe; bwa I ongo man ataia bwa e rawata mwaamwanangam, n taetaekina te bwai ae ko aranna bwa te euangkerio, ke ana reirei Kristo.

7 Ao ko a tia ni kairiia aika a mwaiti bwa a na bita kawain te Atua ae koaua, ao n aki ^akaawakina ana tua Mote ae te kawai ni koaua; ao ni bita ana tua Mote nakon neboan te aomata ae ko taekinna bwa e na roko tabeua te bubua n ririki imwaira. ao ngkai nooria, Ngai ae Tierem, I taekinna nakoim bwa te kewe anne; bwa akea te aomata ae ataa taekan bwaai akanne; bwa e ^baki atai kanoan bwaai aika a na roko. Aio aron Tierem ni kauntaeka nakoiu.

8 Ma taraia, e kaona tamneiu te Uea ae te Atua n ^aTamneina, ao I a kaoti kewen ana taeka ni kabane nakoina.

9 Ao I taku nakoina: Ko kakewea rokon Kristo? Ao e taku: Ngke arona bwa e na iai Kristo, ao N na bon aki kakewea; ma I ataia bwa akea Kristo, n taai ngkoa, ke n taai aika a na roko.

10 Ao I taku nakoina: Ko kakoauai koroboki aika tabu? Ao e taku, Eng.

11 Ao I taku nakoina: Nanona ko aki atai nanoia; bwa e koaua ae a tataekina Kristo. Taraia, I taekina aio nakoim, bwaai ni kabane ake a tia n ni koroi man ^ataetae ni burabetin taian burabeti, a bane n taekina Kristo.

12 Tiaki ti ngaia—e a tia naba ni kaotaki nakoiu, bwa I a tia n ongo man noori; ao a tia naba ni kaotaki nakoiu ni ^amwaakan te Tamnei ae Raoiroi; mangaia ae I ataia bwa ngkana akea te mwakuri ni kamaiu ae karaoaki ao a na bane ni ^bbua aomata ni kabane.

13 Ao e koro bukina bwa e taku nakoiu: Kaota nakoiu te ^akanikina ae mani mwaakan te Tamnei ae Raoiroi aio ae ko rangi n ataia.

14 Ao I taku nakoina: Antai ngai are e na kataia ni kata te Atua bwa e na kaota te kanikina nakoim ibukin te bwai ae ko ataa ^akoauana? E ngae n anne ao ko kakewea, ngkai iai te ^briaboro iroum. Ma e na aki karaoaki are nanou; ma ngkana e boraoi nanon te Atua bwa e na katuaeko, ao e na riki anne bwa te kanikina nakoim ae iai mwaakana i karawa ao iaon te aba; ao ni kakoaua naba ae e na roko Kristo. Ao e na karaoaki are nanom, O Ngkoe ae te Uea, ao tiaki are nanou.

15 Ao e koro bukina bwa ngke I a tia n taekin taeka aikai, Ngai ae Iakobwa, ao e a roko mwaakan te Uea iaona, ao e a bwaka iaontano ni korakorana. Ao e koro bukina bwa e a kakamwarakeaki irouia tabemwaang i nanon te maan ae boong aika mwaiti.

16 Ao e koro bukina bwa e taku nakoia aomata: kam na botaki nakon te ingabong, bwa N nang mate; mangaia ae I kan taetae nakoia aomata i mwaain mateu.

17 Ao e koro bukina bwa a botaki aomata aika a uanao ngke e a ingabong; ao e kamataatai raoi ana taeka nakoia ni kaoti kewen bwaai ni kabane ake a tia n reireinia, ao ni kaota Kristo, ma mwaakan te Tamnei ae Raoiroi, ma aia mwakuri n ibuobuoki anera.

18 Ao e koro bukina bwa e kamataatai ana taeka nakoia, ni kaotia bwa e a tia ni ^akamwaneaki ni mwaakan te ^briaboro. Ao e taekina moone, ma te tai are akea tokina, ma te katuaeaki ae akea tokina.

19 Ao e taku: E korakora te maaku irou ngkai I ataia bwa I a tia ni karaoa te ^abure ae e aki kona ni kabwaraki, bwa I a tia ni kewe nakon te Atua; bwa I a tia ni kakewea Kristo, ao n taku bwa I kakoauai koroboki aika tabu; aika a koaua man tataekina Kristo. E korakora maakan ^bmotin taekau ngkai I a tia ni kewe nakon te Atua; ma I a kaoti au bure nakon te Atua.

20 Ao e koro bukina bwa ngke e a tia n taekin taeka aikai ao e a toki ana taetae ni kawai, ao e ^anako tamneina man rabwatana.

21 Ao ngke a tia n nooria botanaomata ae uanao n taekin bwaai aikai ao ni kaaniia tain matena, ao a rootaki n te mimi ae korakora; ao a rootaki ni mwaakan te Atua, ao a bwaka nako aontano ni ^akorakorana.

22 Ao e kakukureiaki nanou Ngai ae Iakobwa, n rikin te bwai aio, ngkai I a tia ni bubuti nakon Tamau are I karawa; ao e a tia n ongo tangiu ao e a kaeka au tataro.

23 Ao e koro bukina bwa e a oki ana rau ma ana tangira te Atua i buakoia te botanaomata; ao a ^aukoukora nanon koroboki aika tabu ao a aki manga ongo n ana taeka nako te aomata ae buakaka aio.

24 Ao e koro bukina bwa a iangoaki aaro aika a mwaiti ibukin ^akarekean ma kaokan ataakin te koaua nakoia Reimwanaite; ma e ^baki nakoraoi te waaki aio, bwa a kukurei nanoia n te ^cbubuaka ma te ^dtiritiri, ao akea tokin ^eribakira irouia, ngaira aika tariia. Ao a teimatoa ni bubuakaniira.

25 Mangaia ae a katei ooia ana botanaomata Nibwaai ma n tabeki aia bwai ni buaka ibukin otangan maiuia mai irouia, ma korakoraia ni kabane, ao n onimakina te Atua are ngaia te ^abwaa ibukin kamaiuaia; mangaia ae a teimatoa n tokanikai iaoia aia kairiribai.

26 Ao e koro bukina bwa e a roko te kara irou Ngai ae Iakobwa; ao a kaawakinaki rongorongoia te botanaomata aio i nanon ana ^abwaatua Nibwaai ake tabeua, mangaia ae I a motika te rongorongo aio, ma ni kaotia bwa I a tia ni koroi n aron au atatai ni kabane, ni kaotia bwa ti rinanon boong aikai, ao ti rinanon ^bmaiura n aiaron ae ti rinanon te mi, ngkai ngaira te botanaomata ae kaokoroaki ma n nanomatoa, ma n tiotio, aika a otinako mai Ierutarem, ni bungiaki i nanon te rawawata, i nanon te rereua, ma n ribaki irouia tarira, ake a karika te bubuaka ma te itabaraara, ao a tang n rawawata nanora i nanon ara bong ni maiu.

27 Ao Ngai ae Iakobwa, I ataia bwa e a kaan riniu i nanon ruan mateu; mangaia ae I taku nakon natiu ae ^aEnoti: Anai taian bwaatua aikai. Ao I tuangnga bwaai ake e tia n ^btuatua tariu are Nibwaai bwa N na karaoi, ao e berita bwa e na iri nanon taian tua. Ao I a motika au koroboki i nanon taian bwaatua aikai, aika a kimototo; ao I anga au kaboo nakon te tia wareware, ma au kaantaninga bwa a na mwaiti aika a na wareki au koroboki. Tariu, ti a kaboo.