1 Vakai, ʻe hoku kāinga, ʻikai ʻoku mou manatu ki hoʻomou lau ʻa e ngaahi lea ʻa e palōfita ko ^aSeinosí, ʻa ia naʻá ne lea ki he fale ʻo ʻIsilelí, ʻo pehē:

2 Tokanga mai, ʻA kimoutolu, ʻe fale ʻo ʻIsileli, pea fanongo ki he ngaahi lea ʻaʻakú, ʻa ia ko ha palōfita ʻa e ʻEikí.

3 He vakai, ʻoku folofola peheni ʻe he ʻEikí, te u fakatatau koe, ʻE fale ʻo ^aʻIsileli, ki ha fuʻu ^bʻōlive kolo, ʻa ia naʻe ʻave ʻe ha tangata ʻo tauhi ʻi heʻene ^cngoue vainé; pea tupu ia, ʻo fakaʻau ʻo motuʻa, pea kamata ke ^dmate.

4 Pea naʻe hoko ʻo pehē naʻe ʻalu atu ʻa e pule ʻo e ngoue vainé, ʻo ne vakai ʻoku kamata ke mate ʻa ʻene fuʻu ʻōlivé; pea pehē ʻe ia: Te u ʻauhani ia, pea keli ʻo takatakai ai, mo tauhi ia, koeʻuhi ke tupu mai ʻapē ha ngaahi vaʻa mui mo litolito, pea ʻe ʻikai mate ia.

5 Pea naʻe hoko ʻo pehē naʻá ne ʻauhani ia, mo ne keli takatakai mo tauhi ia ʻo hangē ko ʻene leá.

6 Pea naʻe hoko ʻo pehē ʻi he hili ʻa e ngaahi ʻaho lahi naʻe kamata ke tupu mai ha ngaahi vaʻa foʻou mo litolito ʻe niʻihi; kae vakai, naʻe kamata ke mate ʻa e ngaahi vaʻa lalahi ʻi ʻolungá.

7 Pea naʻe hoko ʻo pehē naʻe mamata ki ai ʻa e pule ʻo e ngoue vainé, pea naʻe pehē ʻe ia ki heʻene tamaioʻeikí: ʻOku fakamamahi kiate au ʻo ka mole ʻiate au ʻa e fuʻu ʻakaú ni; ko ia, ke ke ʻalu, ʻo tuʻusi mai ʻa e ngaahi vaʻa mei he fuʻu ʻōlive ^avaó, pea ʻomi ia ki heni kiate au; pea te ta tuʻusi ʻa e ngaahi vaʻa lalahi ko ia ʻoku kamata ke maé, pea te ta laku ia ki he afí ʻo tutu ai.

8 Pea vakai, ʻoku pehē ʻe he ʻEiki ʻo e ngoue vainé, ʻoku ou ʻave ʻa e lahi ʻo e ngaahi vaʻa mui mo litolito ní, pea te u fakahoko ia ki ha ngaahi potu ʻoku ou loto ki aí; pea ʻoku tatau ai pē pe ʻe mate ʻa e aka ʻo e ʻakaú ni, ka te u lava pē ʻo fakatolonga ʻa hono fuá maʻaku; ko ia, te u ʻave ʻa e ngaahi vaʻa mui mo litolito ní, pea te u fakahoko ia ʻi he ngaahi potu ʻoku ou loto ki aí.

9 Ke ke ʻave ʻa e ngaahi vaʻa ʻo e fuʻu ʻōlive vaó, pea fakahoko ia ke ^afetongi ʻaki ia; pea ko e ngaahi vaʻá ni ʻa ia kuó u tuʻusi mei aí, te u lī ia ki he afí, ʻo tutu ai, ke ʻoua naʻa fakafelefele ʻe ia ʻa e kelekele ʻo ʻeku ngoue vainé.

10 Pea naʻe hoko ʻo pehē naʻe fai ʻe he tamaioʻeiki ʻa e ʻEiki ʻo e ngoue vainé ʻo hangē ko e lea ʻa e ʻEiki ʻo e ngoue vainé, ʻo ne fakahoko leva ki ai ʻa e ngaahi vaʻa ʻo e ʻakau ko e ʻōlive ^avaó.

11 Pea naʻe fekau ʻe he ʻEiki ʻo e ngoue vainé ke keli takatakai, pea ʻauhani, pea tauhi ia, ʻo ne pehē ange ki heʻene tamaioʻeikí: ʻoku fakamamahi kiate au ʻo ka mole ʻiate au ʻa e ʻakaú ni; ko ia, koeʻuhi ke u lava ʻapē ʻo fakatolonga hono ngaahi aká ke ʻoua naʻa nau mate, koeʻuhi ke u fakaili ia maʻaku, ko ia kuó u fai ai ʻa e meʻá ni.

12 Ko ia, ke fai atu hoʻo ngāué; tokangaʻi ʻa e ʻakaú, pea tauhi ia, ʻo hangē ko ʻeku ngaahi leá.

13 Pea te u ^atuku ʻa e ngaahi vaʻá ni ki he potu mamaʻo taha ʻo ʻeku ngoue vainé, ʻi he potu pē te u loto ki aí, ʻoku tatau ai pē kiate koe; pea ʻoku ou fai ia koeʻuhi ke u lava ʻo fakatolonga maʻaku ʻa e ngaahi vaʻa totonu ʻo e ʻakaú; pea koeʻuhí foki, ke u lava ʻo tokonaki ʻa e fua mei ai ki ha ʻosi ʻa e faʻahitaʻú maʻaku; koeʻuhí he ʻoku fakamamahi kiate au ʻo ka mole ʻiate au ʻa e ʻakaú ni mo hono fuá.

14 Pea naʻe hoko ʻo pehē naʻe ʻalu atu ʻa e ʻEiki ʻo e ngoue vainé, ʻo ne fufuuʻi ʻa e ngaahi vaʻa totonu ʻo e fuʻu ʻōlive koló ʻi he ngaahi potu mamaʻo taha ʻo e ngoue vainé, ko e niʻihi ʻi he potu ʻe taha mo e niʻihi ʻi ha potu kehe, ʻo fakatatau ki hono lotó mo ʻene faʻitelihá.

15 Pea naʻe hoko ʻo pehē naʻe ʻosi atu ʻa e taimi fuoloa, pea naʻe pehē ange ʻe he ʻEiki ʻo e ngoue vainé ki heʻene tamaioʻeikí: Haʻu, ta ō hifo ki he loto ngoue vainé, koeʻuhi ke ta ngāue ʻi he ngoue vainé.

16 Pea naʻe hoko ʻo pehē naʻe ʻalu hifo ʻa e ʻEiki ʻo e ngoue vainé, pea mo e tamaioʻeikí, ke ngāue ʻi he ngoue vainé. Pea naʻe hoko ʻo pehē naʻe pehē ange ʻe he tamaioʻeikí ki hono ʻeikí: Vakai, mamata mai ki heni; vakai ki he ʻakaú.

17 Pea naʻe hoko ʻo pehē naʻe vakai atu ʻa e ʻEiki ʻo e ngoue vainé, ʻo ne mamata ki he ʻakau ʻa ia kuo fakahoko ki ai ʻa e ngaahi vaʻa ʻōlive vaó; kuo tupu hake ia ʻo kamata ke ^afua. Pea naʻá ne vakai kuo lelei ia; pea naʻe tatau ʻa hono fuá mo e fua totonú.

18 Peá ne pehē ange ki he tamaioʻeikí: Vakai, kuo maʻu ʻe he ngaahi vaʻa ʻo e ʻakau tupu vao ʻa e huhuʻa mei he aká, ko ia kuo fakatupu ai ʻe hono aká ʻa e mālohi lahi; pea ko e meʻa ʻi he lahi ʻo e mālohi ʻo hono aká kuo fua ʻaki ai ʻe he ngaahi vaʻa tupu vaó ʻa e fua tupu kolo. Ko ʻeni, kapau naʻe ʻikai ke ta fakahoko ki ai ʻa e ngaahi vaʻá ni, kuo mate ʻa e ʻakaú ia. Pea ko ʻeni, vakai, te u maʻu ha fua lahi, ʻa ia kuo fua ʻaki ʻe he ʻakau ko iá; pea te u lava ʻo tokonaki ʻa e fua mei he ʻakaú ki ha ʻosi ʻa e faʻahitaʻú; maʻaku ke u ngaueʻaki.

19 Pea naʻe hoko ʻo pehē naʻe pehē ʻe he ʻEiki ʻo e ngoue vainé ki he tamaioʻeikí: Haʻu, ta ō ki he potu mamaʻo taha ʻo e ngoue vainé, ʻo vakai pe kuo fua ʻaki foki ʻe he ngaahi vaʻa totonu ʻo e ʻakaú ha ngaahi fua lahi pe foki, koeʻuhi ke u lava ʻo tokonaki maʻaku ʻa e fua mei he ʻakaú ke u ngāue ʻaki ki ha ʻosi ʻa e faʻahitaʻú.

20 Pea naʻe hoko ʻo pehē naʻá na ʻalu atu ki he potu kuo fufuuʻi ai ʻe he ʻeikí ʻa e ngaahi vaʻa totonu ʻo e ʻakaú, pea pehē ʻe ia ki he tamaioʻeikí: Vakai ki he ngaahi vaʻá ni; pea naʻá ne vakai ki he ^aʻuluaki vaʻá ʻoku fua lahi; peá ne vakai foki ʻoku lelei ia. Peá ne pehē ange ki he tamaioʻeikí: Toli hono fuá pea tokonaki maʻaku ia ki ha ʻosi ʻa e faʻahitaʻú; koeʻuhi ke u fakatolonga ia maʻaku, he vakai, naʻe pehē ʻe ia, kuó u tauhi ia ʻi he taimi fuoloá ni, pea kuo fua ʻaki ʻe ia ʻa e fua lahi.

21 Pea naʻe hoko ʻo pehē naʻe pehē ʻe he tamaioʻeikí ki hono ʻeikí: Ko e hā ʻokú ke haʻu ai ki heni ke tō ʻa e ʻakau ní, pe ko e vaʻa ko ʻeni ʻo e ʻakaú? He vakai, ko e potu kovi taha ia ʻi he kelekele kotoa ʻo hoʻo ngoue vainé.

22 Pea pehē ʻe he ʻEiki ʻo e ngoue vainé kiate ia: ʻOua te ke akonakiʻi au; he naʻá ku ʻilo ko e potu kelekele kovi ia; ko ia, naʻá ku pehē ai kiate koe, kuó u tauhi ia ʻi he taimi fuoloá ni, pea ʻokú ke vakai kuo fua mai ia ʻaki ʻa e fua lahi.

23 Pea naʻe hoko ʻo pehē naʻe pehē ʻe he ʻEiki ʻo e ngoue vainé ki heʻene tamaioʻeikí: Sio atu ki hē; vakai kuó u tō ai mo ha vaʻa kehe ʻo e ʻakaú foki; pea ʻokú ke ʻilo naʻe kovi ange ʻa e potu kelekele ko iá ʻi he ʻuluakí. Kae vakai ki he ʻakaú. Kuó u tauhi ia ʻi he taimi fuoloá ni, pea kuo tupu ai ʻa e fua lahi; ko ia, tānaki ia, mo tokonaki ki ha ʻosi ʻa e faʻahitaʻú, koeʻuhí ke u fakatolonga ia maʻaku.

24 Pea naʻe hoko ʻo pehē naʻe toe pehē ange ʻe he ʻEiki ʻo e ngoue vainé ki heʻene tamaioʻeikí: Sio atu ki hē, vakai foki ki ha toe ^avaʻa kehe, ʻa ia kuó u tō; vakai kuó u tauhi ia foki, pea kuo tupu ai ha fua.

25 Pea pehē ange ʻe ia ki he tamaioʻeikí: Sio atu ki hē, pea vakai ki he vaʻa fakaʻosí. Vakai, kuó u tō ʻeni ʻi ha ^apotu lelei ʻo e kelekelé; pea kuó u tauhi ia ʻi he taimi fuoloá ni, pea ko ha konga pē ʻo e ʻakaú kuo fua ʻaki ʻa e fua koló, pea kuo fua ʻaki ʻe he konga ʻe ^btaha ʻo e ʻakaú ʻa e fua vao; vakai, kuó u tauhi ʻa e ʻakaú ni ʻo hangē ko e ngaahi ʻakau kehé.

26 Pea naʻe hoko ʻo pehē naʻe pehē ange ʻe he ʻEiki ʻo e ngoue vainé ki he tamaioʻeikí: Tuʻusi hifo ʻa e ngaahi vaʻa ʻa ia kuo ʻikai ke tupu ai ʻa e ^afua leleí, pea laku ia ki he afí.

27 Kae vakai, naʻe pehē ange kiate ia ʻe he tamaioʻeikí: Ta ʻauhani ia, pea keli takatakai ai, pea tauhi ia ʻo kiʻi fuofuoloa ange, koeʻuhi ke fua ʻaki ʻapē ʻe ia ʻa e fua lelei maʻau, koeʻuhi ke tokonaki ia ki ha ʻosi ʻa e faʻahitaʻú.

28 Pea naʻe hoko ʻo pehē naʻe hanga ʻe he ʻEiki ʻo e ngoue vainé mo e tamaioʻeiki ʻa e ʻEiki ʻo e ngoue vainé ʻo tauhi ʻa e fua kotoa pē ʻo e ngoue vainé.

29 Pea naʻe hoko ʻo pehē naʻe ʻosi atu ʻa e taimi fuoloa, pea naʻe pehē ange ʻe he ʻEiki ʻo e ngoue vainé ki heʻene ^atamaioʻeikí: Haʻu, ta ō hifo ki he ngoue vainé, koeʻuhi ke ta toe ngāue ʻi he ngoue vainé. He vakai, ʻoku ofi mai ʻa e ^btaimí, pea ʻoku haʻu vave ʻa e ^cngataʻangá; ko ia, kuo pau ke u tokonaki ʻa e fua ki ha ʻosi ʻa e faʻahitaʻú, maʻaku.

30 Pea naʻe hoko ʻo pehē naʻe ʻalu hifo ʻa e ʻEiki ʻo e ngoue vainé mo e tamaioʻeikí ki he loto ngoue vainé; pea naʻá na aʻu atu ki he ʻakau ʻa ia kuo tuʻusi hono ngaahi vaʻa totonú, pea fakahoko ki ai ʻa e ngaahi vaʻa tupu vaó; pea vakai naʻe opeope ʻa e ngaahi ^afaʻahinga fua kehekehe kotoa pē ʻi he ʻakaú.

31 Pea naʻe hoko ʻo pehē naʻe ʻahiʻahiʻi ʻe he ʻEiki ʻo e ngoue vainé ha fua, ko e faʻahinga kotoa pē ʻo fakatatau ki hono lahí. Pea naʻe pehē ʻe he ʻEiki ʻo e ngoue vainé: Vakai, kuó ta tauhi ʻi he taimi fuoloá ni ʻa e ʻakaú ni, pea kuo u tokonaki maʻaku ʻa e fua lahi ki ha ʻosi ʻa e faʻahitaʻú.

32 Kae vakai, ko e taimi ʻeni kuo tupu ai ʻa e fua lahi, pea ʻoku ^aʻikai ke ʻi ai hano fua ʻe taha ʻoku lelei. Kae vakai, ʻoku ʻi ai ʻa e ngaahi faʻahinga kehekehe kotoa pē ʻo e fua kovi; pea ʻoku taʻeʻaonga ia kiate au, neongo ʻa ʻeta ngāué kotoa; pea ko ʻeni ʻoku fakamamahi kiate au ka mole meiate au ʻa e ʻakaú ni.

33 Pea naʻe pehē ʻe he ʻEiki ʻo e ngoue vainé ki he tamaioʻeikí: Ko e hā te ta fai ki he ʻakaú ke u toe tokonaki mei ai maʻaku ha fua ʻoku leleí?

34 Pea naʻe pehē ʻe he tamaioʻeikí ki hono ʻeikí: Vakai, ko e meʻa ʻi hoʻo fakahoko ʻa e ngaahi vaʻa ʻo e fuʻu ʻōlive vaó ko ia kuo nau fakamoʻui ʻa e ngaahi aká, ko ia ʻoku nau moʻui ai pe kuo ʻikai te nau mate; ko ia, ʻokú ke vakai ai ʻoku nau kei lelei pē.

35 Pea naʻe hoko ʻo pehē naʻe pehē ʻe he ʻEiki ʻo e ngoue vainé ki heʻene tamaioʻeikí: ʻOku taʻeʻaonga kiate au ʻa e ʻakaú, pea ʻoku taʻeʻaonga kiate au hono ngaahi aká lolotonga ʻoku kei tupu ai ʻa e fua koví.

36 Neongo iá, ʻoku ou ʻilo ʻoku lelei ʻa e ngaahi aká, pea kuó u fakatolonga ia koeʻuhi ko ʻeku ʻuhinga pē ʻaʻaku; pea ko e meʻa ʻi honau mālohi lahí, ko ia kuo nau fua ʻaki, mei he ngaahi vaʻa tupu vaó, ʻa e fua lelei.

37 Kae vakai, kuo tupu ʻa e ngaahi vaʻa tupu vaó ʻo ^alahi ange ʻi hono ngaahi aká; pea ko e meʻa ʻi he ikunaʻi ʻe he ngaahi vaʻa tupu vaó ʻa hono ngaahi aká kuo tupu ai ʻa e fua kovi lahí; pea ko e meʻa ʻi heʻene fua ʻaki ʻa e fua kovi lahi peheé ʻokú ke vakai ʻoku fakaʻau ia ke mate; pea ʻe vave pē haʻane popo, pea ʻe lelei ke lī ia ki he afí, tuku kehe kapau te ta fai ha meʻa ki ai ke fakatolonga ia.

38 Pea naʻe hoko ʻo pehē naʻe pehē ange ʻe he ʻEiki ʻo e ngoue vainé ki heʻene tamaioʻeikí: Ta ō hifo ki he ngaahi potu mamaʻo taha ʻo e ngoue vainé, ʻo vakai pe kuo tupu foki ʻi he ngaahi vaʻa totonú ha fua kovi.

39 Pea naʻe hoko ʻo pehē naʻá na ō hifo ki he ngaahi potu mamaʻo taha ʻo e ngoue vainé. Pea naʻe hoko ʻo pehē naʻá na vakai kuo hoko ʻo kovi foki mo e fua ʻo e ngaahi vaʻa totonú; ʻio, ʻa e ^aʻuluakí mo hono uá pea mo e fakaʻosí foki; pea kuo nau kovi kotoa pē.

40 Pea kuo ikunaʻi ʻe he fua tupu ^avao ʻo e vaʻa fakaʻosí ʻa e konga ko ia ʻo e ʻakaú ʻa ia naʻe fua ʻaki ʻa e fua leleí, ʻo aʻu ki he mae ʻo mate ʻa e vaʻá.

41 Pea naʻe hoko ʻo pehē naʻe tangi ʻa e ʻEiki ʻo e ngoue vainé, ʻo ne pehē ange ki he tamaioʻeikí; ^aKo e hā mo ha toe meʻa naʻá ku mei lava nai ʻo fai ki heʻeku ngoue vainé?

42 Vakai, naʻá ku ʻilo kuo hoko ʻo kovi ʻa e fua kotoa pē ʻo e ngoue vainé, tuku kehe pē ʻeni. Pea ko ʻeni ko e ngaahi vaʻa ʻeni naʻe muʻaki fakatupu mai ʻa e fua leleí kuo hoko ʻo kovi foki; pea ko ʻeni ʻoku taʻeʻaonga ʻa e ngaahi ʻakau kotoa pē ʻo ʻeku ngoue vainé, ka ke tā hifo pea laku ki he afí.

43 Pea vakai ko e ʻakau fakaʻosi ko ʻení, ʻa ia kuo mae ʻa hono vaʻá, naʻá ku tō ia ʻi ha potu kelekele ^alelei; ʻio, naʻe lelei ange ia kiate au ʻi he ngaahi potu kehe kotoa pē ʻo e kelekele ʻo ʻeku ngoue vainé.

44 Pea naʻá ke vakai naʻá ku tā hifo foki ʻa ia naʻe ^afakafelefele ʻi he potu kelekele ko ʻení, koeʻuhi ke u lava ʻo tō ʻa e ʻakaú ni ʻo fetongi ʻaki ia.

45 Pea naʻá ke vakai naʻe ʻi ai hono konga ʻe taha naʻe fua ʻaki ʻa e fua lelei, pea ko hono konga ʻe taha naʻe fua ʻaki ʻa e fua tupu vao; pea ko e meʻa ʻi he ʻikai te u tuʻusi ʻa hono ngaahi vaʻá ʻo lī ia ki he afí, vakai, kuo nau ikunaʻi ai ʻa e vaʻa leleí pea kuo mae ia.

46 Pea ko ʻeni, vakai, neongo ʻa e tauhi kotoa pē ʻa ia kuó ta fai ki heʻeku ngoue vainé, kā kuo hoko ʻo kovi ʻa e ngaahi ʻakau ʻi aí, pea ʻoku ʻikai ai te nau fua ʻaki ha fua lelei; pea kuó u fakaʻamu ke u lava ʻo fakatolonga mo tokonaki ʻa e fua ki ha ʻosi ʻa e faʻahitaʻú maʻaku. Kae vakai, kuo nau hoko ʻo tatau mo e fuʻu ʻōlive vaó, pea ʻoku nau taʻeʻaonga ka ke ^atā hifo pea laku ki he afí; pea ʻoku fakamamahi kiate au ke mole ia meiate au.

47 Ka ko e hā mo ha meʻa naʻá ku mei toe lava nai ʻo fai ʻi heʻeku ngoue vainé? Kuó u fakapikopiko koā, ʻo ʻikai te u tauhi ia? ʻIkai, kā kuó u tauhi ia, pea kuó u keli takatakai ai, pea kuó u ʻauhani ia, pea kuó u ^amafao atu ʻa hoku nimá ʻi he meimei ʻahó hono kotoa, pea ʻoku fakaʻau ʻo ofi mai ʻa e ^bngataʻanga. Pea ʻoku fakamamahi kiate au ke u tā hifo ki lalo ʻa e ngaahi ʻakau kotoa pē ʻo ʻeku ngoue vainé, ʻo laku ia ki he afí ʻo tutu ia. Ko hai ia kuó ne fakakoviʻi ʻa ʻeku ngoue vainé?

48 Pea naʻe hoko ʻo pehē naʻe pehē ange ʻe he tamaioʻeikí ki hono ʻeikí: ʻIkai ko hono māʻolunga ʻo hoʻo ngoue vainé—ʻikai kuo ikunaʻi ʻe hono ngaahi vaʻá ʻa e ngaahi aka ʻa ia ʻoku leleí? Pea ko e meʻa ʻi hono ikunaʻi ʻe he ngaahi vaʻá ʻa hono ngaahi aká, vakai kuo nau tupu ʻo vave ange ʻi hono mālohi ʻo e ngaahi aká, ʻo toʻo ʻa e mālohí moʻonautolu. Vakai, ʻoku ou pehē, ʻikai ko e tupuʻanga ia ʻo e fakakoviʻi ʻo e ngaahi ʻakau ʻo hoʻo ngoue vainé?

49 Pea naʻe hoko ʻo pehē naʻe pehē ange ʻe he ʻEiki ʻo e ngoue vainé ki he tamaioʻeikí: Ta kamata ā hono tā hifo ʻo e ngaahi ʻakau ʻo e ngoue vainé pea laku ia ki he afí ke ʻoua naʻa nau fakafelefele ʻi he kelekele ʻo ʻeku ngoue vainé, he kuó u fai ʻa e meʻa kotoa pē te u lava ʻo faí. Ko e hā mo ha toe meʻa te u lava ʻo fai ki heʻeku ngoue vainé?

50 Kae vakai, naʻe pehē ʻe he tamaioʻeikí ki he ʻEiki ʻo e ngoue vainé: Tuku ai pē ia ʻo kiʻi ^afuofuoloa siʻi.

51 Pea pehē ange ʻe he ʻEikí: ʻIo, te u fakahaofi ai pē ia ʻo kiʻi fuofuoloa siʻi, he ʻoku fakamamahi kiate au ka mole meiate au ʻa e ngaahi ʻakau ʻo ʻeku ngoue vainé.

52 Ko ia, ta ʻave ʻa e ngaahi ^avaʻa ko ʻeni ʻa ia kuó u tō ʻi he ngaahi potu mamaʻo taha ʻo ʻeku ngoue vainé, peá ta fakahoko ia ki he ʻakau ʻa ia naʻa nau tupu mei aí; peá ta tuʻusi mei he ʻakaú ʻa e ngaahi vaʻa ʻa ia ʻoku mahi taha ʻa hono fuá, pea fakahoko ki ai ʻa e ngaahi vaʻa totonu ʻo e ʻakaú ke fetongi ʻaki ia.

53 Pea te u fai ʻeni ke ʻoua naʻa mate ʻa e ʻakaú, koeʻuhi, ke u lava ʻapē, ʻo fakatolonga maʻá ku ʻa hono ngaahi aká koeʻuhi ko ʻeku ʻuhinga pē ʻaʻaku.

54 Pea vakai, ʻoku kei moʻui ʻa e ngaahi aka ʻo e ngaahi vaʻa totonu ʻo e ʻakau ʻa ia naʻá ku tō ʻi he ngaahi feituʻu kehekehe naʻá ku loto ki aí; ko ia, koeʻuhi ke u lava foki ʻo fakatolonga ia koeʻuhi ko ʻeku ʻuhinga ʻaʻaku, te u ʻave ʻa e ngaahi vaʻa ʻo e ʻakaú ni, pea te u ^afakahoko ia ki ai. ʻIo, te u fakahoko ki ai ʻa e ngaahi vaʻa ʻo e motuʻa ʻakaú koeʻuhi ke u lava foki ʻo fakatolonga ʻa e ngaahi aká maʻaku, koeʻuhi ʻo ka mālohi feʻunga ia, te nau fua ʻaki ha fua lelei, pea te u toe maʻu ʻapē ʻa e fiefia ʻi he fua ʻo ʻeku ngoué.

55 Pea naʻe hoko ʻo pehē naʻá na toʻo mei he ʻakau totonu ʻa ia ne hoko ko e ʻakau tupu vaó, ʻo fakahoko ia ki he ngaahi ʻakau totonu, ʻa ia kuo hoko foki ko e ʻakau tupu vaó.

56 Pea naʻá na toʻo foki ha ngaahi vaʻa mei he ngaahi ʻakau totonu ʻa ia kuo hoko ko e ʻakau tupu vaó ʻo fakahoko ia ki he motuʻa ʻakaú.

57 Pea naʻe pehē ʻe he ʻEiki ʻo e ngoue vainé ki he tamaioʻeikí: ʻOua naʻá ke tuʻusi ʻa e ngaahi vaʻa tupu vaó mei he ngaahi ʻakaú, tuku kehe pē ʻa ia ʻoku mahi tahá; pea ke ke fakahoko ki ai ʻo hangē ko ia kuó u fekau kiate koé.

58 Pea te ta toe tauhi ʻa e ngaahi ʻakau ʻo e ngoue vainé, pea te ta ʻauhani ʻa hono ngaahi vaʻá; pea te ta tuʻusi mei he ngaahi ʻakaú ʻa e ngaahi vaʻa ko ia kuo motuʻa, ʻa ia kuo pau ke maté, pea laku ia ki he afí.

59 Pea ʻoku ou fai ʻeni koeʻuhí, ke maʻu ʻapē ʻe hono ngaahi aká ha mālohi koeʻuhi ko honau leleí; pea ko e meʻa ʻi hono fetongi ʻo e ngaahi vaʻá, ke lava ai ʻo ikunaʻi ʻe he leleí ʻa e koví.

60 Pea ko e meʻa ʻi heʻeku fakaili ʻa e ngaahi vaʻa totonú pea mo hono ngaahi aká, pea kuó u toe fakahoko ʻa e ngaahi vaʻa totonú ki he motuʻa ʻakaú, pea mo ʻeku fakaili ʻa e ngaahi aka ʻo e motuʻa ʻakaú, koeʻuhí, ke lava ʻapē, ke toe fua ʻaki ʻe he ngaahi ʻakau ʻo ʻeku ngoue vainé ha ^afua lelei; pea ke u toe maʻu ai ʻa e fiefia ʻi he fua ʻo ʻeku ngoue vainé, pea, ke u lava ʻapē, ʻo maʻu ha fuʻu fiefia lahi ʻi heʻeku fakaili ʻa e ngaahi aká pea mo e ngaahi vaʻa ʻo e ʻuluaki fuá—

61 Ko ia, ʻalu atu, pea ui ha kau ^atamaioʻeiki, koeʻuhi ke tau ^bngāue faivelenga ʻaki hotau tūkuingatá ʻi he ngoue vainé, koeʻuhi ke tau teuteu ʻa e hala, koeʻuhi ke u toe lava ʻo fakatupu mai ʻa e fua totonú, ʻa ia ko e fua totonu ʻoku lelei mo mahuʻinga taha ʻi he ngaahi fua kehe kotoa pē.

62 Ko ia, ke tau ʻalu atu pea ngāue ʻaki hotau tūkuingatá ko hono fakaʻosi, he vakai ʻoku ofi ʻa e ngataʻangá, pea ko hono fakaʻosi ʻeni ʻo ʻeku ʻauhani ʻa ʻeku ngoue vainé.

63 Fakahoko ʻa e ngaahi vaʻá; kamata mei he ^aki muí koeʻuhi ke nau muʻomuʻa, pea muimui ʻa e ki muʻá, pea keli takatakai ʻi he ngaahi ʻakaú, fakatouʻosi ʻa e ʻakau motuʻá mo e ʻakau toki tupú, ko e ʻuluakí mo e ki muí; pea mo e ki muí mo e ʻuluakí, koeʻuhi ke toe tauhi kotoa pē ko hono fai fakaʻosi.

64 Ko ia, keli takatakai ʻiate kinautolu, pea ʻauhani, pea toe ʻai kiate kinautolu ha teʻemanu ko hono fai fakaʻosi, he ʻoku ofi mai ʻa e ngataʻangá. Pea kapau ʻe tupu ʻa e ngaahi vaʻa fakahoko ki mui ko ʻení, pea tupu mai ʻa e fua totonú, ke mou toki tauhi lelei ʻa kinautolu koeʻuhi ke nau lava ʻo tupu.

65 Pea ʻi heʻenau kamata ke tupú ke mou tutuʻu atu leva ʻa e ngaahi vaʻa ʻa ia ʻoku tupu ai ʻa e fua mahí, ʻo fakatatau ki hono mālohi ʻo e ngaahi vaʻa ʻoku leleí pea mo honau lahí; pea ʻe ʻikai te mou ^atutuʻu fakaʻangataha kotoa ʻa e koví, telia naʻa ʻiloange kuo mālohi ange ʻa hono ngaahi aká ki he vaʻa kuo fakahoko ki aí, pea mate ʻa e vaʻa kuo fakahokó kae mole meiate au ʻa e ngaahi ʻakau ʻo ʻeku ngoue vainé.

66 He ʻoku mamahi hoku lotó ka mole meiate au ʻa e ngaahi ʻakau ʻo ʻeku ngoue vainé; ko ia, ke ke tutuʻu atu ʻa e koví ʻo fakatatau ki he tupu leleí, koeʻuhi ke mālohi tatau ʻa e aká mo e konga ʻi ʻolungá, kae ʻoua ke ikunaʻi ʻe he leleí ʻa e koví, pea tā hifo ʻa e koví ʻo laku ki he afí, koeʻuhi ke ʻoua naʻa nau fakafelefeleʻi ʻa e kelekele ʻo ʻeku ngoue vainé; pea te u tafi peheʻi atu ʻa e koví mei heʻeku ngoue vainé.

67 Pea te u toe fakahoko ʻa e ngaahi vaʻa ʻo e ʻakau totonú ki he ʻakau totonú;

68 Pea te u fakahoko ʻa e ngaahi vaʻa ʻo e ʻakau totonú ki honau ngaahi tuʻunga ʻi he ʻakau totonú; pea te u toe fakatahaʻi peheʻi ʻa kinautolu, koeʻuhi ke nau fua ʻaki ʻa e fua totonu, pea te nau taha pē.

69 Pea ʻe ^aliʻaki ʻa e koví, ʻio, mei he kelekele kotoa ʻo ʻeku ngoue vainé; he vakai, te u ʻauhani fakaʻosi ai ʻa ʻeku ngoue vainé.

70 Pea naʻe hoko ʻo pehē naʻe fekau atu ʻe he ʻEiki ʻo e ngoue vainé ʻa ʻene ^atamaioʻeikí; pea naʻe ʻalu ʻa e tamaioʻeikí ʻo ne fai ʻo hangē ko e fekau ʻa e ʻEikí kiate iá, peá ne ʻomi mo ha kau tamaioʻeiki kehe; pea naʻa nau ^btokosiʻi.

71 Pea naʻe pehē ange ʻe he ʻEiki ʻo e ngoue vainé kiate kinautolu: Mou ʻalu, pea ^angāue ʻi he ngoue vainé, ʻaki homou iví. He vakai, ko hono ^bfakaʻosi ʻeni ʻo ʻeku tauhi ʻeku ngoue vainé; he ʻoku ofi mai ʻa e ngataʻangá, pea ʻoku haʻu vave ʻa e faʻahitaʻú; pea kapau te mou ngāue ʻaki homou iví fakataha mo au te mou maʻu ʻa e ^cfiefia ʻi he fua ko ia te u tokonaki maʻaku ki ha ʻosi ʻa e faʻahitaʻu ʻa ia ʻoku vave ʻene haʻú.

72 Pea naʻe hoko ʻo pehē naʻe ʻalu ʻa e kau tamaioʻeikí ʻo nau ngāue ʻaki honau tūkuingatá; pea naʻe ngāue foki ʻa e ʻEiki ʻo e ngoue vainé fakataha mo kinautolu; pea nau talangofua ki he ngaahi fekau ʻa e ʻEiki ʻo e ngoue vainé ʻi he meʻa kotoa pē.

73 Pea naʻe kamata ke toe ʻi ai ʻa e fua totonú ʻi he ngoue vainé; pea naʻe kamata ke tupu pea lau maʻuiʻui ʻaupito ʻa e ngaahi vaʻa totonú; pea naʻe kamata ke tuʻusi atu ʻa e ngaahi vaʻa tupu vaó ʻo liʻaki, pea naʻa nau tauhi ʻa e aká mo hono konga ʻi ʻolungá ke na tatau, ʻo fakatatau ki hona mālohí.

74 Pea naʻa nau ngāue pehē, ʻi he faivelenga kakato, ʻo hangē ko e ngaahi fekau ʻa e ʻEiki ʻo e ngoue vainé, kae ʻoua kuo liʻaki ʻa e ngaahi vaʻa koví mei he ngoue vainé, pea kuo fakaili ʻe he ʻEikí maʻana ʻa e ngaahi ʻakau kuo toe fua ʻaki ʻa e fua totonú; pea nau hoko ʻo hangē ko e sino pē ^ataha; pea naʻe tatau ʻa e ngaahi fuá; pea kuo fakatolonga ʻe he ʻEiki ʻo e ngoue vainé maʻana ʻa e fua totonú, ʻa ia kuo fungani mahuʻinga kiate ia talu mei he kamataʻangá.

75 Pea naʻe hoko ʻo pehē ʻi he mamata ʻa e ʻEiki ʻo e ngoue vainé kuo lelei ʻa ʻene fuá, pea kuo ʻikai ke toe kovi ʻa ʻene ngoue vainé, naʻá ne ui mai ʻa ʻene kau tamaioʻeikí, ʻo ne pehē kiate kinautolu: Vakai, kuo tau tauhi ʻa ʻeku ngoue vainé ko hono fai fakaʻosi; pea ʻoku mou vakai kuó u fai ʻa ia ʻoku ou loto ke faí; pea kuó u fakatolonga ʻa e fua totonú, pea ʻoku lelei ia, ʻio ʻo tatau mo hono anga ʻi he kamataʻangá. Pea ʻoku ^amonūʻia ʻa kimoutolu; he ko e meʻa ʻi hoʻomou faivelenga ʻi he ngāue fakataha mo au ʻi heʻeku ngoue vainé, ʻo mou tauhi ʻa ʻeku ngaahi fekaú, ʻo toe ʻomi kiate au ʻa e ^bfua totonú, ʻoku ʻikai ai ke toe kovi ʻa ʻeku ngoue vainé, pea kuo liʻaki ʻa e koví, vakai te mou maʻu ʻa e fiefia fakataha mo au koeʻuhi ko e fua ʻo ʻeku ngoue vainé.

76 He vakai, te u tokonaki maʻaku ʻi ha taimi ^afuoloa ʻa e fua mei heʻeku ngoue vainé maʻaku ki ha ʻosi ʻa e faʻahitaʻú; ʻa ia ʻoku vave ʻene haʻú; pea kuó u tauhi fakaʻosi ʻa ʻeku ngoue vainé, pea ʻauhani ia, ʻo keli takatakai ai, pea tuku ki ai ha teʻemanu; ko ia, te u tokonaki maʻaku ʻa e ngaahi fuá ni ʻi ha taimi fuoloa, ʻo hangē ko ia kuó u leaʻakí.

77 Pea ʻo ka hokosia ʻa e taimi ʻe toe ʻi ai ʻa e fua kovi ʻi heʻeku ngoue vainé, te u toki fekau leva ke tānaki ʻa e leleí mo e koví; pea te u fakatolonga maʻaku ʻa e leleí, pea te u liʻaki ʻa e koví ki hono potu ʻoʻona. Pea ʻe toki hoko mai ʻa e ^afaʻahitaʻú mo e ngataʻangá pea te u pule ke ^btutu ʻa ʻeku ngoue vainé ʻaki ʻa e afi.