1 Thiab tau muaj tias thaum xyoo rau caum thiab ob ntawm cov neeg txiav txim txoj kev kav tau xaus lawm, tag nrho txhua yam no tau tshwm sim thiab cov Neeg Lamas tau rais los mus ua, cov feem coob ntawm lawv, ib cov neeg ncaj ncees, kawg tias lawv tej kev ncaj tau ncaj dua li cov Neeg Nifais tej, vim yog lawv txoj kev ruaj nrees thiab lawv txoj kev nyob khov kho hauv txoj kev ntseeg.

2 Vim saib seb, tau muaj ntau tus ntawm cov Neeg Nifais cov uas tau rais los ua siab tawv thiab tsis kam hloov siab lees txim thiab phem qias kawg li, kawg tias lawv tau tsis kam lees yuav Vajtswv txoj lus thiab tag nrho tej kev qhuab qhia thiab txoj kev qhia tej uas yuav muaj los yav tom ntej uas tau los rau hauv lawv.

3 Txawm li ntawd los, cov neeg ntawm lub koom txoos tseem tau muaj kev xyiv fab heev vim yog txoj kev hloov siab tshiab ntawm cov Neeg Lamas, muaj tseeb tiag, vim yog Vajtswv lub koom txoos, uas tau txhim tsa nyob hauv lawv. Thiab lawv ib leeg tau ua phooj ywg rau ib leeg, thiab ib leeg tau zoo siab rau ib leeg, thiab tau muaj kev xyiv fab heev.

4 Thiab tau muaj tias ntau tus ntawm cov Neeg Lamas tau nqis los rau hauv thaj av Xalahelas, thiab tau tshaj tawm rau cov Neeg Nifais txog lawv txoj kev hloov siab tshiab, thiab tau ntuas lawv rau txoj kev ntseeg thiab txoj kev hloov siab lees txim.

5 Muaj tseeb tiag, thiab ntau tus tau qhuab qhia nrog lub hwj chim thiab cai loj heev kawg, rau txoj kev coj lawv coob leej los mus rau hauv txoj kev txo hwj chim qis, los ua cov neeg txo hwj chim raws Vajtswv thiab tus Me Nyuam Yaj.

6 Thiab tau muaj tias cov Neeg Lamas coob leej tau mus rau hauv thaj av sab qaum teb; thiab Nifais thiab Lihais los kuj mus rau hauv thaj av sab qaum teb, mus qhuab qhia rau cov neeg. Thiab li no tau xaus xyoo rau caum thiab peb.

7 Thiab saib seb, tau muaj kev thaj yeeb nyob tag nrho txhua thaj av, kawg tias cov Neeg Nifais tau mus rau hauv tej feem hauv thaj av uas lawv xav mus, tsis hais nyob hauv cov Neeg Nifais los sis cov Neeg Lamas.

8 Thiab tau muaj tias cov Neeg Lamas los kuj tau mus rau tej qhov uas lawv xav mus, tsis hais hauv cov Neeg Lamas los sis hauv cov Neeg Nifais; thiab li no lawv tau muaj kev ywj siab ib leeg mus txuam tau rau ib leeg, mus yuav los sis muag khoom, thiab ua kom muaj tshaj thawj, raws li lawv siab xav.

9 Thiab tau muaj tias lawv tau rais los nplua nuj heev, cov Neeg Lamas thiab cov Neeg Nifais; thiab lawv tau muaj kub, thiab nyiaj dawb nplua mias, thiab tas nrho txhua yam hlau muaj nuj nqis, nyob rau thaj av sab qab teb thiab thaj av sab qaum teb.

10 Nim no thaj av sab qab teb hu ua Lihais, thiab thaj av sab qaum teb hu ua Mules, uas tau hu raws li Xedekhiyas tus tub; vim tus Tswv tau coj Mules tuaj rau hauv thaj av sab qaum teb, thiab Lihais tuaj rau thaj av sab qab teb.

11 Thiab saib seb, tau muaj tas nrho txhua yam kub nyob rau hauv ob thaj av no, thiab muaj nyiaj dawb, thiab muaj tej quav hlau muaj nqis txhua yam; thiab kuj tau muaj tej neeg uas txawj ua hlau, uas tau ua txhua yam quav hlau thiab tau ua kom tau ua hlau; thiab li no lawv thiaj tau rais los nplua nuj.

12 Lawv tau cog noob qoob noob loos nplua mias, nyob rau sab qaum teb thiab nyob rau sab qab teb; thiab lawv tau vam meej heev kawg nkaus, nyob rau sab qaum teb thiab nyob rau sab qab teb. Thiab lawv tau coob ntxiv thiab rais los mus muaj zog heev nyob rau hauv thaj av. Thiab lawv tau yug tej yaj thiab tej tsiaj txhu ntau, muaj tseeb tiag, ntau tus tsiaj uas rog.

13 Saib seb lawv tej poj niam tau ua hauj lwm thiab kis xov, thiab tau ua txhua yam ntaub yaj pwm thiab ntaub txhua yam, los hnav rau lawv tej kev liab qab. Thiab li no xyoo thib rau caum thiab plaub tau dhau los mus ntawm kev thaj yeeb.

14 Thiab nyob rau hauv xyoo rau caum thiab tsib lawv kuj tau muaj kev xyiv fab thiab kev thaj yeeb, muaj tseeb tiag, tau muaj kev qhuab qhia ntau thiab ntau yam kev qhia tej uas yuav muaj los yav tom ntej txog tej uas yuav muaj los. Thiab li no xyoo rau caum thiab tsib thiaj tau dhau mus.

15 Thiab tau muaj tias nyob rau hauv xyoo thib rau caum thiab rau ntawm cov neeg txiav txim txoj kev kav, saib seb, Xixaulas tau raug tua los ntawm ib txhais tes uas tsis muaj neeg paub thaum nws tseem zaum saum lub rooj txiav txim. Thiab tau muaj tias nyob rau hauv tib xyoos ntawd, nws tus tub, tus uas tau raug cov neeg tsa los nyob nws qhov chaw, los kuj tau raug tua thiab. Thiab li no tau xaus xyoo rau caum thiab rau.

16 Thiab nyob rau thaum pib xyoo rau caum thiab xya cov neeg tau pib rov ua phem heev kawg nkaus dua.

17 Vim saib seb, tus Tswv tau foom koob hmoov rau lawv ntev heev nrog tej kev nplua nuj ntawm lub ntiaj teb es lawv twb tsis tau raug txhib kom npau taws, ua tsov rog, los sis kom muaj nqaij ntuag ntshav nrog; yog li ntawd lawv tau pib muab lawv tej siab nruab rau saum lawv tej kev nplua nuj; muaj tseeb tiag, lawv tau pib nrhiav ua kom tshaj thawj kom lawv yuav tau khav tias lawv ib leeg zoo dua li ib leeg; yog li ntawd lawv tau pib tua neeg ntsiag to, thiab ua tub sab thiab ua lim hiam, xwv kom lawv yuav tau tshaj thawj.

18 Thiab nim no saib seb, cov neeg tua neeg thiab ua lim hiam twb yog ib pab uas tau tsim los ntawm Kisawkhumas thiab Nkadi-atoos. Thiab nim no tau muaj tias tau muaj coob leej, twb nyob hauv cov Neeg Nifais, uas yog Nkadi-atoos pab. Tiam sis saib seb, lawv tau muaj coob dua rau hauv cov Neeg Lamas feem uas phem zog. Thiab lawv tau raug hu ua Nkadi-atoos cov neeg tub sab thiab cov neeg tua neeg.

19 Thiab lawv twb yog cov uas tau tua tus thawj tub txiav txim Xixaulas, thiab nws tus tub, thaum tseem nyob hauv lub rooj txiav txim; thiab saib seb, nrhiav tsis tau lawv.

20 Thiab nim no tau muaj tias thaum cov Neeg Lamas tau nrhiav pom tias tau muaj tej tub sab nyob hauv lawv lawv tau nyuaj siab heev; thiab lawv tau siv txhua yam peev xwm uas nyob hauv lawv tej hwj chim ua kom lawv puas tsuaj ntawm lub ntiaj teb mus.

21 Tiam sis saib seb, Dab Ntxwg Nyoog tau txhib cov Neeg Nifais feem coob tej siab, kawg tias lawv tau koom nrog tej pab tub sab ntawd, thiab tau nkag rau lawv tej kev khi lus thiab lawv tej kev lav lus, tias lawv ib leeg yuav tsom kwm thiab saib xyuas ib leeg nyob hauv tej kev nyuaj txawm npaum li cas los xij uas lawv yuav raug tso rau, xwv kom lawv yuav tsis raug txim rau lawv tej kev tua neeg, thiab lawv tej kev ua lim hiam, thiab lawv tej kev ua tub nyiag.

22 Thiab tau muaj tias lawv yeej muaj lawv tej cim, muaj tseeb tiag, lawv tej cim ntsiag to, thiab lawv tej lus ntsiag to; thiab ua li no kom lawv thiaj yuav nco tau tus kwv tij uas tau sib khi lus, xwv kom txhua yam phem uas nws tus kwv tij yuav ua kom nws thiaj li yuav tsis raug mob los ntawm nws tus kwv tij, los sis los ntawm cov uas tau zwm rau hauv nws pab, cov uas tau nkag rau txoj kev khi lus no lawm.

23 Thiab li no es kom lawv yuav tua neeg, thiab ua lim hiam, thiab ua tub sab, thiab ua txhaum kev nkauj kev nraug thiab tas nrho txhua yam kev phem, tawm tsam tej kev cai ntawm lawv lub teb chaws thiab tej kev cai ntawm lawv tus Vajtswv.

24 Thiab yog leej twg ntawm cov uas tau zwm rau lawv pab lawm qhia rau lub ntiaj teb txog lawv tej kev phem thiab lawv tej kev qias, yuav tsum raug txiav txim rau, tsis raws li tej kev cai ntawm lawv lub teb chaws, tiam sis raws li tej kev cai ntawm lawv txoj kev phem, uas tau raug muab los ntawm Nkadi-atoos thiab Kisawkhumas.

25 Nim no saib seb, nws twb yog tej kev lav lus thiab kev khi lus ntsiag to no uas Amas tau kom nws tus tub yuav tsum tsis txhob tawm mus rau hauv lub ntiaj teb, ntshai nyob tsam lawv yuav yog ib qho dab tsi uas yuav coj cov neeg poob mus rau txoj kev puas tsuaj.

26 Nim no saib seb, cov kev lav lus thiab tej kev khi lus ntsiag to ntawd tsis tau los rau Nkadi-atoos los ntawm tej ceev xwm uas tau muab rau Hilamas; tiam sis saib seb, tej ntawd tau raug muab rau hauv Nkadi-atoos lub siab los ntawm tib tug yawg uas tau ntxias peb thawj nkawg niam txiv noj cov txiv uas tau txwv lawm—

27 Muaj tseeb tiag, tib tug yawg ntawd tus uas tau ntxias Kayees, tias yog nws tua nws tus kwv Anpees lub ntiaj teb yeej yuav tsis paub txog. Thiab nws tau ntxias Kayees thiab cov neeg raws nws qab txij li lub sij hawm ntawd los lawm.

28 Thiab nws kuj yog tib tug yawg uas tau ua rau cov neeg tej siab kom ua ib tug pej thuam siab txaus xwv kom lawv yuav mus txog saum ntuj ceeb tsheej. Thiab nws twb yog tib tug yawg uas tau coj cov neeg uas tau tuaj ntawm tus pej thuam tuaj rau thaj av no; tus uas tau tsuag tej hauj lwm tsaus ntuj thiab qias rau saum thaj av tas nrho, mus txog thaum nws muab cov neeg cab luag nqis mus rau ib txoj kev puas tsuaj tag nrho, thiab mus rau ib lub ntuj txiag teb tsaus uas kav ib txhis.

29 Muaj tseeb tiag, nws twb yog tib tug yawg uas tau ua kom Nkadi-atoos lub siab tseem coj txoj hauj lwm tsaus ntuj, thiab txoj kev tua neeg ntsiag to; thiab nws tau coj txij li puag thaum neeg chiv keeb nqis los txog lub sij hawm no.

30 Thiab saib seb, twb yog nws tus uas yog tus tswv uas tsim tas nrho tej kev txhaum. Thiab saib seb, nws tseem coj nws txoj hauj lwm tsaus ntuj thiab txoj kev tua neeg ntsiag to, thiab tau cev lawv tej tswv yim ntxias, thiab lawv tej kev lav lus, thiab lawv tej kev sib khi lus, thiab lawv tej kev npaj ua phem heev, nqis ib tiam neeg dhau los rau ib tiam neeg raws li nws yuav muaj peev xwm tuav tau noob neej tej siab.

31 Thiab nim no saib seb, nws tau tuav cov Neeg Nifais tej siab ruaj; muaj tseeb tiag, kawg tias lawv tau rais los mus ua ib co neeg phem heev kawg nkaus li; muaj tseeb tiag, feem coob ntawm lawv tau ncaim tawm ntawm txoj kev ncaj, thiab tau muab Vajtswv tej lus txib tsuj rau hauv lawv qab xib taws, thiab tau tig mus rau lawv tus kheej tej kev, thiab tau muab lawv tej kub thiab lawv tej nyiaj dawb nchuav ua mlom rau lawv.

32 Thiab tau muaj tias tas nrho tej kev tsis ncaj no tau los rau lawv tau ncua tsis tau ntau xyoo, kawg tias ib feem ntau ntawd yog tau los rau lawv nyob hauv xyoo rau caum thiab xya ntawm cov neeg txiav txim txoj kev kav Nifais cov neeg.

33 Thiab lawv kuj tau loj hlob hauv lawv tej kev tsis ncaj nyob hauv xyoo rau caum thiab yim, ua rau cov neeg ncaj ncees muaj kev nyuaj siab thiab kev quaj kev nyiav.

34 Thiab li no peb pom tias cov Neeg Nifais tau pib tso txoj kev ntseeg tseg zuj zus, thiab loj zuj zus hauv txoj kev phem thiab txoj kev qias, hos cov Neeg Lamas tau pib loj hlob heev hauv txoj kev paub txog lawv tus Vajtswv; muaj tseeb tiag, lawv tau pib coj nws tej kev cai thiab tej lus txib, thiab mus hauv qhov tseeb thiab hauv qhov ncaj rau ntawm nws.

35 Thiab li no peb pom tias tus Tswv tus Ntsuj Plig tau pib thim ncaim ntawm cov Neeg Nifais, vim yog tej kev phem thiab txoj kev tawv ntawm lawv tej siab.

36 Thiab li no peb pom tias tus Tswv tau pib nchuav nws tus Ntsuj Plig los rau saum cov Neeg Lamas, vim lawv txoj kev yooj yim thiab zoo siab hlo ntseeg nws tej lus.

37 Thiab tau muaj tias cov Neeg Lamas tau plob nrhiav Nkadi-atoos pab neeg tub sab; thiab lawv tau qhuab qhia Vajtswv txoj lus rau hauv lawv feem uas phem zog, kawg tias pab neeg tub sab no tau raug puas tsuaj huv tib si ncaim ntawm cov Neeg Lamas.

38 Thiab tau muaj tias nyob rau lwm sab, cov Neeg Nifais tau txhawb lawv thiab pab lawv, pib hauv lawv feem uas phem zog, mus txog thaum lawv tau puv thoob plaws rau txhua thaj av ntawm cov Neeg Nifais, thiab tau yaum cov neeg ncaj feem coob mus txog thaum lawv tau nqis los ntseeg lawv tej hauj lwm thiab los noj lawv tej khoom lwj, thiab los koom nrog lawv nyob hauv lawv tej kev tua neeg ntsiag to thiab tej kev tuav hauv.

39 Thiab li no lawv thiaj txeeb tau lub hauv paus coj tuav ntawm tej nom tswv, kawg tias lawv tau muab tej neeg txom nyem thiab tej neeg uas muaj siab mos muag, thiab cov neeg txo hwj chim uas raws Vajtswv tsuj rau hauv lawv qab xib taws thiab muab ntaus thiab muab dua ris tsho thiab tig lawv nraub qaum rau.

40 Thiab li no peb pom tias lawv tau nyob hauv ib qho uas phem kawg nkaus, thiab tab tom siav rau txoj kev puas tsuaj uas kav ib txhis.

41 Thiab tau muaj tias li no thiaj tau xaus xyoo rau caum thiab yim ntawm cov neeg txiav txim txoj kev kav Nifais cov neeg.