1 Na ɔbaa dɛ dɛm afe yi ara mu, hwɛ, ^aNephi dze atsɛmbu egua no maa banyin bi a ne dzin dze Cezoram.

2 Na dɛ mbrɛ hɔn mbra nye hɔn ahendzi ne nhyehyɛɛ gyina dɔm no hɔn ^andze do na hɔn a ^bwɔpɛ bɔn no dɔɔ sõ koraa sen hɔn a wɔpɛ papa no, dɛm ntsi wonyinii maa ɔsɛɛ, osiandɛ mbra no asɛɛ.

3 Nyew, na nnyɛ iyi nye ne nyinara; wɔyɛ nkorɔfo a wɔyɛɛ akɔnkye ara ma dɛ wonntum mmfa mbra anaadɛ pɛrpɛrdzi nnhwɛ hɔn do, gyedɛ wogyaa hɔn ma ɔsɛɛ.

4 Na ɔbaa dɛ osian hɔn emumuyɛ ntsi Nephi berɛe; na ^aogyaa atsɛmbu egua no mu mae, na ɔgyee too no do dɛ ɔbɛkã Nyame n’asɛm no nkwa nda a aka nyina, na no nua Lehi so no nkwa nda a aka nyina.

5 Na wɔkaa nsɛm a hɔn egya Helaman kãa kyerɛɛ hɔn no. Na nsɛm a ɔkãa kyerɛɛ hɔn no nye iyi:

6 Hwɛ, me mbabanyin, mepɛ dɛ hom kaa dɛ hom bedzi Nyankopɔn ne mbrasɛm do; na mebɛpɛ dɛ hom bɛkã dɛm nsɛm yi akyerɛ dɔm no. Hwɛ medze hɛn ^aawofo a wodzi kan no a wofi Jerusalem baa no edzin ama hom; na meyɛɛ iyi ama sɛ hom kaa hom edzin a hom aakaa hɔn; na sɛ hom kaa hɔn a hom akaa hɔn ndwuma; na sɛ hom kaa hɔn ndwuma a hom ehu dza wɔkãe, na wɔkyerɛwee so too hɔ dɛ ^bwoye.

7 Dɛm ntsi, me mbabanyin, mebɛpɛ dɛ hom bɛyɛ dza oye, ama wɔaakã wɔ hom ho na wɔakyerɛw so ato hɔ, dɛ mbrɛ wɔkãe na wɔkyerɛwee wɔ hɔn ho so mpo.

8 Na afei me mbabanyin, hwɛ mowɔ biribi so bio a mebɛpɛ dɛ hom yɛ, dza mepɛ nye dɛ, mma hom nnyɛ dɛm ndzɛmba yi, mma hom nhyehyɛ hom ho, mbom dɛ hom bɛyɛ dɛm ndzɛmba yi dze apɛ ^aakoradze egu sor, nyew, dza ɔyɛ onnyiewiei, na ɔmmpa; nyew, ama hom eenya dɛm ^bakyɛdze mapã no a ɔyɛ onnyiewiei nkwa no, dza yesusu na yɛgye to mu dɛ wɔdze ama hɛn egyanom no.

9 O hom nkaa, hom nkaa, me mbabanyin, ^ansɛm a ɔhen Benjamin kãa kyerɛɛ no nkorɔfo no; nyew, hom nkaa dɛ kwan fofor bi anaadɛ ndzeyɛɛ biara nnyi hɔ a wɔnam do bɛgye ɔdasanyi nkwã, gyedɛ wɔnam Jesus Christ a ɔbɛba no, no bɔgyaa a ɔbɔ ^bwerdam no do, nyew, hom nkaa dɛ ɔbɛba ^cabɔpon ^dwiadze mba.

10 Na hom nkaa ^ansɛm so a Amulek kaa kyerɛɛ Zeezrom wɔ Ammonihah kuropɔn mu no; na ɔkãa kyerɛɛ hɔn dɛ Ewuradze bɛba nokwar mu abɔpon no nkorɔfo, na ɔremmba mmbɔpon hɔn wɔ hɔn bɔn mu, na mbom ɔbɔpon hɔn efi hɔn bɔn mu.

11 Na Egya no ama no tum, ɔmpon hɔn mfi hɔn bɔn ho osian nnuho ntsi; dɛm ntsi ^aɔasoma n’abɔfoe dɛ wɔmbɛkã nnuho ho nsɛm, dza ɔma Pomfo no tum dze nkwagye ma hɔn akra.

12 Na afei me mbabanyin, hom nkaa, hom nkaa dɛ hɛn Pomfo a ɔyɛ Christ, Nyame ne Ba no, no ^abotan no do na ɔwɔ dɛ hom tow hom ^bfapem; ama sɛ abɔnsam bɔ ^cn’ehum dzendzen no a, nyew, n’egyen—menaba a ɔwɔ ekyinehyia ehum no mu no a, nyew, sɛ n’ɔsor-bo nyinara tɔ na n’ehum kɛse bɔ dzendzenndzen hwe hom a, orinnya tum wɔ hom do nntwe hom nnkɛhyɛ awerɛhow nye mbusu a onnyi ewiei no bun ase, osian ɔbotan a hom atow hom adan wɔ do ntsi, dza ɔyɛ fapem tsim, fapem a sɛ adasamba si hɔn adan wɔ do a wɔnkɔhwe ase.

13 Na ɔbaa dɛ dɛm nsɛm yi na Helaman dze ^akyerɛkyerɛɛ ne mbabanyin; nyew, ɔkyerɛkyerɛɛ hɔn ndzɛmba pii a wɔannkyerɛw, nye ndzɛmba pii so a wɔakyerɛw.

14 Na wɔkaa ne nsɛm; na dɛm ntsi wɔkɔr do dzii Nyankopɔn ne mbrasɛm do, dɛ wɔbɛkyerɛkyerɛ Nephi dɔm no nyina Nyankopɔn n’asɛm, wɔhyɛɛ ase fi Dzifuu kurow kɛse no mu;

15 Na wofii hɔ no wɔkɔr Gid kurow kɛse no mu, na wofii Gid kurow kɛse no mu kɔr Mulek kurow kɛse no mu;

16 Na wofii kurow kor mu kɔr kor so mu araa kesii dɛ wɔkɔr Nephi dɔm nyina a wɔwɔ anaafo asaase afamu no do; na wofii hɔ no wɔkɔr Lamanfo a wɔwɔ Zarahemla asaase do no mu.

17 Na ɔbaa dɛ wɔdze tum kɛse kãa asɛmpa no araa ma wɔhyɛɛ hɔn a ^awɔtseew etua fii Nephifo mu kɔree no mu pii fɛr, ma wɔbaa bɛkãa hɔn bɔn na wonumaa hɔn kɔr nnuho mu, na wɔsaan hɔn ekyir ntsɛmara kɔr Nephifo nkyɛn na wɔbɔɔ mbɔdzen siesiee bɔn a wɔdze yɛɛ hɔn nyina yie.

18 Na ɔbaa dɛ Nephi nye Lehi duaa tum a woenya no do dze tum kɛse kãa nsɛmpa kyerɛɛ Lamanfo no, osiandɛ nna wɔdze tum nye tumdzi no ama hɔn ama woeetum ^aakasa, na dza ɔwɔ dɛ wɔkã no so wɔdze maa hɔn—

19 Dɛm ntsi wɔkasaa ma ahobow kɛse kãa Lamanfo no, na ^awɔgyee dzii ara yie ma Lamanfo mpemawɔtwe a wɔwɔ Zarahemla asaase nye ne nkyɛn nyina do na wonumaa hɔn kɔr nnuho mu, na wɔgyee too mu dɛ hɔn egyanom amambra no yɛ emumuyɛdze.

20 Na ɔbaa dɛ Nephi nye Lehi fii hɔ toaa do kɔr Nephi asaase do.

21 Na ɔbaa dɛ Lamanfo no mu nsordaafo bi kyeer hɔn dze hɔn koguu ^aefiadze; nyew, dɛm efiadze kor noara a Limhi no nkowaa dze Ammon nye no nuanom kogui no.

22 Na wɔnye hɔn guu efiadze nda pii a wɔamma hɔn edziban, na hwɛ ekyir no wɔkɔr efiadze hɔ dɛ wɔrekɛfa hɔn na woeku hɔn.

23 Na ɔbaa dɛ wohun dɛ ^agya etwa Nephi nye Lehi ho ehyia ma dɛm ntsi woenntum ammfa hɔn nsa annka hɔn, nna wosuroo dɛ bɛyɛ na wɔahyew. Naaso Nephi nye Lehi annhyew; na ɔyɛ dɛ wogyina gya finimfin naaso wɔnnhyew.

24 Na ber a wohun dɛ ^aogya fadum etwa hɔnho ehyia na ɔnnhyew hɔn no, wonyaa akokodur.

25 Na wohun dɛ Lamanfo no nntum mmfa hɔn nsa nnkã hɔn; nna wonntum mmbɛn hɔn so, mbom wogyinaa hɔ dɛ ma ahobow ama wɔatɔ mmum.

26 Na ɔbaa dɛ Nephi nye Lehi gyinaa hɔ na wɔhyɛɛ ase kasaa kyerɛ hɔn dɛ: Mma hom nnsuro, na hwɛ, Nyankopɔn na ɔayɛ dɛm anwanwadze yi dze akyerɛ hom, na iyi mu na oeyi akyerɛ hom dɛ hom runntum mmfa hom nsa nnkã hɛn na hom nnku hɛn.

27 Na hwɛ, ber a wɔkãa dɛm nsɛm yi wiei no, asaase wosoow kɛsenara, na efiadze dan n’afasu no wosoow dɛ mbrɛ worubu egu famu; mbom hwɛ, emmbu enngu famu. Na hwɛ hɔn a wɔwɔ efiadze hɔ no yɛ Lamanfo nye Nephifo etuatsewfo no.

28 Na ɔbaa dɛ fua ^akebii hyɛɛ hɔn do, na suro kɛse baa hɔn do.

29 Na ɔbaa dɛ ^andze bi bae a ɔyɛ dɛ ofi fua kebii no sor rekã dɛ: Hom nnu homho, hom nnu homho, na mma hom mmper bio dɛ hom bɛsɛɛ mo nkowaa a masoma hɔn wɔ hom nkyɛn dɛ wɔmbɛkã nsɛmpa no.

30 Na ɔbaa dɛ ber a wɔtsee ndze yi no, wohun dɛ ɔnnyɛ wimu mpaapaamu anaadɛ dede kɛse dzendzen bi na mbom hwɛ, ɔyɛ ^andze tseabaa bɔkɔɔ a ɔtse dɛ ma ɔrowasa gu asowa mu a ohwira kɔ ɔkra mu.

31 Na ndze no yɛ bɔkɔɔ dze, naaso hwɛ, asaase wosoow kɛsenara, na efiadze adan n’afasu no wosoow bio, dɛ mbrɛ worubu egu famu; na hwɛ fua kebii a ɔahyɛ hɔn do no annhwetse—

32 Na hwɛ ndze no baa bio, dɛ: Hom nnu homho, hom nnu homho, na sor ahenman no abɛn; na mma hom mmper bio dɛ hom bɛsɛɛ mo nkowaa. Na ɔbaa dɛ asaase wosoow bio, na afasu no wosowee.

33 Na ndze no baa bio ne mpɛn a otsĩa ebiasa so, na ɔkãa anwanwasɛm a ɔdasanyi runntum nnkã kyerɛɛ hɔn; na afasu no wosoow bio, na asaase wosoow dɛ mbrɛ no mu repaapaa.

34 Na ɔbaa dɛ nna Lamanfo no nntum nnguan osian fua kebii a ɔakata hɔn do no ntsi; nyew, nna wonntum so nnkekã hɔnho osian suro a ahyɛ hɔn do no ntsi.

35 Afei nna hɔn a wɔwɔ hɔ no mu kor yɛ Nephinyi wɔ awoo mu, nna nkyɛ ɔdɔm Nyame n’asɔr no na mbom ɔatsew etua noho efi hɔn mu.

36 Na ɔbaa dɛ ɔdaan no ho, na hwɛ, ohun Nephi na Lehi hɔn enyim wɔ fua kebii no mu; na hwɛ ^awɔahyerɛn mbordo, dɛ mbrɛ abɔfo enyim tse ara pɛr. Na ohun dɛ wɔama hɔn enyiwa do wɔ sor; na ɔyɛ dɛ mbrɛ wɔrekasa anaadɛ wɔrema hɔn ndze do dze kyerɛ nyimpa bi a woehu no.

37 Na ɔbaa dɛ dɛm banyin yi tseaa mu see dɔmtutuw no dɛ hom ndan homho nhwɛ. Na hwɛ, wonyaa tum ma wɔdaan hɔnho na wɔhwɛe; na wohun Nephi na Lehi hɔn enyim.

38 Na wobisaa dɛm banyin no dɛ: Hwɛ, iyinom nyina ase nye dɛn, na woana na dɛm mbanyin yi nye no rekasa yi?

39 Afei dɛm banyin no ne dzin dze Aminadab. Na Aminadab see hɔn dɛ: Wɔnye Nyankopɔn n’abɔfoe na wɔnye hɔn rekasa no.

40 Na ɔbaa dɛ Lamanfo no see no dɛ: ^aEbɛnadze na yɛnyɛ, ama dɛm fua kebii yi eefi hɛn do?

41 Nna Aminadab see hɔn dɛ: Ɔsɛ dɛ hom ^anu homho, na hom sũ mfrɛ ndze no, kesi dɛ hom benya ^bgyedzi wɔ Christ mu, nyia Alma na Amulek, nye Zeezrom kãa no ho nsɛm kyerɛɛ hom no; na sɛ hom yɛ iyi a, wobeyi fua kebii no efi hom do.

42 Na ɔbaa dɛ hɔn nyinara hyɛɛ ase sũi frɛɛ nyia ne ndze awosow asaase no; nyew wosũi frɛɛ araa kesii dɛ fua kebii no hwetsee.

43 Na ɔbaa dɛ aber a wɔdze hɔn enyi kɔr aprɔw na wohun dɛ fua kebii no ahwetse efi hɔn do no, hwɛ, wohun dɛ ^aogya fadum etwa ɔkra biara ho ehyia.

44 Na Nephi na Lehi gyina hɔn finimfin; nyew, woetwa hɔnho ehyia; nyew ɔyɛ dɛ mbrɛ wɔwɔ gyatanaa a ɔredzɛw ne finimfin, naaso ɔnnhyew hɔn, nna onnsuo efiadze dan no mu; na ^adɛw na enyimnyam kɛse a onnyi kabea hyɛɛ hɔn mã.

45 Na hwɛ, Nyankopɔn no ^aSunsum Krɔnkrɔn fi sor bae, na ɔbɛhyɛɛ hɔn akoma mã, na ɔyɛɛ dɛ ogya ahyɛ hɔn mã, na wotumii ^bkasaa kasa nwanwa bi.

46 Na ɔbaa dɛ ndze bi baa hɔn hɔ, nyew, ndze nwanwa bi tse dɛ dza ɔrowasa, se dɛ:

47 ^aAsomdwee, asomdwee nkã hom, osian hom gyedzi a hom wɔ no wɔ mo Dɔba a Modɔ no yie no mu, nyia ɔwɔ hɔ fitsi wiadze ne fapem no ntsi.

48 Na afei, ber a wɔtsee iyi no wɔmaa hɔn enyiwa do wɔ sor dɛ mbrɛ wɔpɛ dɛ wohu bea a ndze no fi reba; na hwɛ, wohun dɛ ^asorsor ebue, na abɔfo fi sor sianee bɔsoom hɔn.

49 Na akra bɛyɛ ahaebiasa na wɔwɔ hɔ a wɔtsee na wohun dɛm ndzɛmba yi; na wɔsee hɔn dɛ wɔnkɔ na mma ɔnnyɛ hɔn nwanwa na mma wɔnngye kyim so.

50 Na ɔbaa dɛ wɔkɔree, na wɔkɔsoom dɔm no, na wokyiin nkurow a ɔwɔ hɔ nyina do paa mu kãa ndzɛmba nyina a wɔtsee na wohunii, wɔkãe araa ma Lamanfo hɔn mu dodowara gyee hɔn dzii osiandɛ dza wohunii no sõ.

51 Na dodowara a ^awɔgyee dzii no gyaa hɔn ɔkõ ho akodze mu guu hɔ, nye tan a wɔdze tan hɔn egyanom na hɔn amambra so.

52 Na ɔbaa dɛ wogyaa Nephifo no hɔn nsaase no mu maa hɔn.