Tshooj 5
Nifais thiab Lihais nkawd muab siab tag nrho mus qhuab qhia—Nkawd tej npe caw nkawd kom ua nkawd lub neej mus raws li nkawd tej yawg koob—Khetos txhiv cov ua hloov siab lees txim dim—Nifais thiab Lihais coj ntau tus hloov siab tshiab thiab tau raug kaw qhov taub, thiab hluav taws cig vij nkawd—Ib tau huab tsaus tsaus los roos peb puas leej neeg—Lub ntiaj teb ua zog koog, thiab ib lub suab tau txib kom neeg hloov siab lees txim—Nifais thiab Lihais tham nrog tej tim tswv, thiab cov neeg coob coob tau raug hluav taws cig vij. Kwv yees li 30 xyoo ua ntej yug Yexus.
1 Thiab tau muaj tias nyob rau tib xyoos no, saib seb, Nifais tau muab lub rooj txiav txim rau ib tug neeg uas npe hu ua Xixaulas.
2 Vim yog lawv tej kev cai thiab lawv tej nom tswv tau raug tsim los ntawm cov neeg tej suab, thiab lawv cov uas tau xaiv qhov phem tau coob dua li lawv cov uas xaiv qhov zoo, yog li ntawd lawv tau tab tom siav rau txoj kev puas tsuaj, vim tej kev cai tau raug muab hloov tsis ncaj lawm.
3 Muaj tseeb tiag, thiab tsis tas li no xwb; lawv tau yog ib co neeg tawv ncauj, kawg tias txoj kev cai thiab txoj kev txim lij tsis muaj peev xwm kav tau lawv, tsuas yog rau lawv txoj kev puas tsuaj xwb.
4 Thiab tau muaj tias Nifais tau rais los qaug zog heev vim yog lawv txoj kev tsis ncaj; thiab nws thiaj tau tso lub rooj txiav txim tseg, thiab nws tau muab txoj kev mus qhuab qhia Vajtswv txoj lus ris nyob rau hauv tag nrho nws lub neej uas tseem tshuav, thiab nws tus kwv Lihais thiab, tag nrho nws lub neej uas tseem tshuav;
5 Vim nkawd nco qab ntsoov tej lus uas nkawd txiv Hilamas tau hais rau nkawd. Thiab cov no yog cov lus uas nws tau hais:
6 Saib seb, kuv ob tug tub es, kuv xav kom neb yuav nco ntsoov coj Vajtswv tej lus txib; thiab kuv xav kom neb yuav tsum qhia tej lus no rau cov neeg. Saib seb, kuv tau muab rau neb tej npe ntawm peb thawj cov yawg koob uas tau tawm tim thaj av Yeluxalees tuaj; thiab kuv tau ua li no xwv kom thaum neb nco txog neb tej npe neb yuav nco txog nkawd; thiab thaum neb nco txog nkawd neb yuav nco txog nkawd tej hauj lwm; thiab thaum neb nco txog nkawd tej hauj lwm neb yuav paub saib nws tau hais li cas, thiab tau sau li cas, tias nkawd yeej zoo.
7 Yog li ntawd, kuv ob tug tub es, kuv xav kom neb ua tej uas zoo, xwv kom yuav muaj neeg hais, thiab sau txog neb, tib yam li twb tau hais thiab sau txog nkawd lawm.
8 Thiab nim no kuv ob tug tub es, saib seb kuv muaj tej yam uas xav kom neb ua ntxiv, qhov uas yog tias, kom neb tsis txhob ua tej yam no xwv kom neb khav theeb, tiam sis kom neb yuav ua tej yam no kom neb yuav cia tau puav pheej rau saum ntuj ceeb tsheej, muaj tseeb tiag, qhov uas yuav nyob mus ib txhis, thiab qhov uas yuav tsis txawj ploj mus; muaj tseeb tiag, xwv kom neb yuav muaj qhov txiaj ntsim uas muaj nqis ntawm txoj sia uas nyob mus ib txhis, uas peb tau paub tseeb tias twb tau muab rau peb tej yawg koob lawm.
9 Au nco ntsoov, nco ntsoov mog, kuv ob tug tub, tej lus uas vaj ntxwv Npeyamis tau hais rau nws cov neeg; muaj tseeb tiag, nco ntsoov tias yeej tsis muaj dua lwm txoj kev los sis lwm yam uas neeg yuav dim taus li, tsuas yog dhau los ntawm Yexus Khetos, tus yuav los, cov ntshav theej txhoj xwb; muaj tseeb tiag, nco ntsoov tias nws yuav los cawm lub ntiaj teb.
10 Thiab kuj nco ntsoov tej lus uas Amulej tau hais rau Xi-elas, nyob rau hauv lub nroog Amaunaihas; vim nws tau hais rau nws tias tus Tswv yeej yuav los txhiv nws cov neeg, tiam sis nws yuav tsis los txhiv lawv nyob hauv lawv tej kev txhaum, tiam sis los txhiv lawv ntawm lawv tej kev txhaum mus.
11 Thiab nws tau muaj hwj chim muab rau nws los ntawm Leej Txiv los txhiv lawv dim ntawm lawv tej kev txhaum vim yog txoj kev hloov siab lees txim; yog li ntawd nws tau xa nws tej tim tswv los tshaj tawm tej moo zoo txog tej uas yuav tsum ua ntawm txoj kev hloov siab lees txim, uas coj los rau tus Txhiv Dim lub hwj chim, mus rau txoj kev cawm seej ntawm lawv tej ntsuj plig.
12 Thiab nim no, kuv cov me tub es, nco ntsoov, nco ntsoov tias twb yog nyob rau saum lub pob zeb peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb qhov chaw cuab zog; xwv kom thaum tus dab yuav xa nws tej cua muaj zog, muaj tseeb tiag, nws tej xub nyob hauv tej cua moj lwg kaw, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom luag tau neb nqis mus rau tus kwj tob tob ntawm txoj kev nyuaj siab thiab txom nyem uas tsis muaj qhov kawg, vim yog lub pob zeb uas neb tau cog rau saud, uas yog qhov chaw cuab zog ruaj, ib qhov chaw cuab zog uas yog neeg cog rau saud lawm yuav vau tsis tau.
13 Thiab tau muaj tias cov no yog tej lus uas Hilamas tau qhia rau nws cov tub; muaj tseeb tiag, nws tau qhia nkawd ntau yam uas tsis tau muab sau, thiab kuj ntau yam uas tau muab sau.
14 Thiab nkawd tau nco ntsoov nws tej lus; thiab yog li ntawd nkawd tau tawm mus, coj nraim Vajtswv tej lus txib, mus qhia Vajtswv txoj lus rau tag nrho hauv Nifais cov neeg, pib hauv lub nroog Huaj Vam;
15 Thiab tom qab ntawd mus rau lub nroog Nkis; thiab ntawm lub nroog Nkis mus rau lub nroog Mules;
16 Thiab twb mus ib lub nroog mus rau lwm lub, mus txog thaum nkawd tau tawm mus rau tag nrho hauv Nifais cov neeg uas nyob hauv thaj av sab qab teb; thiab txij ntawd ces ho mus rau hauv thaj av Xalahelas, nyob hauv cov Neeg Lamas.
17 Thiab tau muaj tias nkawd tau qhuab qhia nrog lub hwj chim loj heev, kawg tias nkawd tau ua rau ntau tus neeg ntxeev siab uas tau khiav ntawm cov Neeg Nifais mus txaj muag, kawg tias lawv tau tawm los thiab tau lees lawv tej kev txhaum thiab tau ua kev cai raus dej rau txoj kev hloov siab lees txim, thiab tau rov qab los nrawm nroos rau cov Neeg Nifais los thov kho rau lawv tej kev tsis yog uas lawv tau ua lawm.
18 Thiab tau muaj tias Nifais thiab Lihais tau qhuab qhia rau cov Neeg Lamas nrog lub hwj chim thiab cai loj heev, vim nkawd tau muaj hwj chim thiab cai uas tau muab rau nkawd xwv kom nkawd yuav txawj hais, thiab kuj tau muab rau nkawd tej uas nkawd yuav tsum hais thiab—
19 Yog li ntawd nkawd tau hais rau cov Neeg Lamas xav tsis thoob li, mus rau txoj kev yaum tau lawv, kawg tias tau muaj cov Neeg Lamas yim txhiab leej uas nyob hauv thaj av Xalahelas thiab ib puag ncig ntawd tau ua kev cai raus dej rau txoj kev hloov siab lees txim, thiab tau pom txog txoj kev phem ntawm lawv tej yawg koob tej kev li kev cai.
20 Thiab tau muaj tias Nifais thiab Lihais tau mus ntxiv ntawm qhov ntawd mus rau thaj av Nifais.
21 Thiab tau muaj tias nkawd tau raug cov Neeg Lamas ib pab tub rog txhom thiab pov rau hauv qhov taub; muaj tseeb tiag, twb yog tib lub qhov taub uas Amoos thiab nws cov kwv tij tau raug Leehais cov tub qhe muab pov rau hauv.
22 Thiab tom qab uas nkawd tau raug muab pov rau hauv qhov taub tau ntau hnub tsis tau zaub mov noj lawm, saib seb, lawv tau mus rau hauv qhov taub mus txhom nkawd xwv kom lawv yuav muab nkawd tua.
23 Thiab tau muaj tias Nifais thiab Lihais tau raug vij ib puag ncig zoo ib yam li hluav taws, kawg tias lawv tsis kam cev lawv tej tes rau saum nkawd vim ntshai tsam lawv yuav raug kub hnyiab. Txawm li ntawd los, Nifais thiab Lihais tsis raug kub hnyiab; thiab nkawd zoo li sawv ntsug nyob hauv plawv cub taws thiab tsis tau raug kub hnyiab.
24 Thiab thaum nkawd pom tias nkawd tau raug ib tug nplaim hluav taws vij ib puag ncig, thiab nws tsis kub nkawd, nkawd tej siab txawm tau muaj zog hlo tuaj.
25 Vim nkawd pom tias cov Neeg Lamas tsis kam cev lawv tej tes rau saum nkawd; thiab lawv kuj tsis kam los ze rau nkawd, tiam sis tau sawv zoo li lawv raug ua kom ruam xav tsis thoob.
26 Thiab tau muaj tias Nifais thiab Lihais tau sawv ntsug thiab tau pib hais rau lawv, hais tias: Tsis txhob ntshai, vim saib seb, nws yog Vajtswv tus uas tau ua rau nej pom yam uas zoo kawg nkaus no, uas tau ua rau nej pom tias nej cev tsis tau nej tej tes rau wb es muab wb tua.
27 Thiab saib seb, thaum nkawd tau hais tej lus no tas lawm, lub ntiaj teb tau co qeg txoog heev kawg nkaus, thiab tej phab ntsa ntawm lub qhov taub tau co zoo li lawv twb yuav vau rau hauv av; tiam sis saib seb, lawv tsis tau vau. Thiab saib seb, lawv cov uas tau nyob hauv lub qhov taub yog cov Neeg Lamas thiab cov Neeg Nifais uas tau ntxeev siab.
28 Thiab tau muaj tias lawv tau raug ib tau huab tsaus los tsaus roos, thiab ib qho kev txhawj ntshai phem heev tau los rau saum lawv.
29 Thiab tau muaj tias tau muaj ib lub suab zoo li nws nrov sab huab tsaus tsaus sab saud tuaj, hais tias: Nej cia li hloov siab lees txim, nej cia li hloov siab lees txim, thiab tsis txhob nrhiav ua kom kuv cov tub qhe uas kuv tau xa los qhia txoj moo zoo rau nej puas tsuaj ntxiv lawm.
30 Thiab tau muaj tias thaum lawv tau hnov lub suab no, thiab tau pom tias tsis yog ib lub suab xob quaj, thiab kuj tsis yog ib lub suab uas feeb tsis meej, tiam sis saib seb, nws yog ib lub suab meej yws uas mos muag kawg nkaus li, zoo li nws yog ib lub suab ntxhi, thiab nws tau chob txog ntua lub siab—
31 Thiab txawm tias lub suab mos muag npaum li ntawd los, saib seb lub ntiaj teb tau co qeg txoog heev kawg nkaus li, thiab tej phab ntsa qhov taub tau rov co dua, zoo li nws twb yuav luag vau rau hauv av; thiab saib seb cov huab tsaus tsaus, uas tau roos lawv, tsis yaj li—
32 Thiab saib seb lub suab rov qab los dua, hais tias: Nej cia li hloov siab lees txim, nej cia li hloov siab lees txim, vim ntuj ceeb tsheej lub nceeg vaj twb los txog lawm; thiab tsis txhob nrhiav ua kom kuv tej tub qhe puas tsuaj ntxiv lawm. Thiab tau muaj tias lub ntiaj teb tau rov co dua, thiab tej phab ntsa tau yuav vau.
33 Thiab lub suab kuj tau rov qab los dua zaum peb, thiab tau hais rau lawv tej lus zoo kawg nkaus li uas neeg tsis muaj peev xwm hais tau; thiab tej phab ntsa tau rov co dua, thiab lub ntiaj teb tau co zoo li nws twb yuav luag faib ua ob sab.
34 Thiab tau muaj tias cov Neeg Lamas tsis muaj peev xwm khiav tau vim tauv huab tsaus tsaus uas tau roos lawv; muaj tseeb tiag, thiab lawv kuj txav tsis tau vim yog txoj kev ntshai uas tau los rau saum lawv.
35 Nim no tau muaj ib tug nyob hauv lawv uas yog ib tug Neeg Nifais yug, tus uas twb tau zwm rau hauv Vajtswv lub koom txoos ib zaug lawm tiam sis tau ntxeev siab ncaim ntawm lawv lawm.
36 Thiab tau muaj tias nws tau tig puag ncig, thiab saib seb, nws tau pom Nifais thiab Lihais ob lub ntsej muag dhau ntawm cov huab tsaus tsaus mus; thiab saib seb, ob lub ntsej muag ntawd tau ci heev kawg nkaus, twb zoo tib yam li tej tim tswv tej ntsej muag. Thiab nws tau pom tias nkawd tau tsa nkawd qhov muag ntsia rau saum ntuj ceeb tsheej; thiab zoo li nkawd tab tom tham los sis tsa nkawd tej suab rau tej tus uas nkawd tau pom.
37 Thiab tau muaj tias tus txiv neej no tau qw nrov nrov rau cov neeg coob coob, xwv kom lawv yuav tig los thiab ntsia. Thiab saib seb, tau muaj hwj chim muab rau lawv kom lawv tig los thiab ntsia; thiab lawv tau pom Nifais thiab Lihais ob lub ntsej muag.
38 Thiab lawv tau hais rau tus txiv neej tias: Saib seb, tas nrho tej yam no txhais li cas, thiab ob tug neeg no nrog leej twg tham?
39 Nim no tus txiv neej ntawd npe hu ua Aminadas. Thiab Aminadas tau hais rau lawv tias: Nkawd nrog Vajtswv cov tim tswv tham.
40 Thiab tau muaj tias cov Neeg Lamas tau hais rau nws tias: Peb yuav ua li cas, es tauv huab tsaus tsaus no thiaj li yuav raug tshem tsis roos peb?
41 Thiab Aminadas tau hais rau lawv tias: Nej yuav tsum hloov siab lees txim, thiab thov rau lub suab, mus txog thaum nej yuav muaj kev ntseeg hauv Khetos, tus uas tau raug qhia rau nej los ntawm Amas, thiab Amulej, thiab Xi-elas; thiab thaum nej yuav ua li no, tauv huab tsaus tsaus yuav raug tshem tsis roos nej lawm.
42 Thiab tau muaj tias lawv sawv daws tau pib thov rau lub suab ntawm nws tus uas tau co lub ntiaj teb; muaj tseeb tiag, lawv tau quaj thov mus txog thaum tauv huab tsaus tsaus raug ua yaj lawm.
43 Thiab tau muaj tias thaum lawv ntsia lawv ib puag ncig, thiab tau pom tias tauv huab tsaus tsaus raug ua yaj tsis roos lawv lawm, saib seb, lawv tau pom tias lawv, muaj tseeb tiag txhua tus, tau raug vij ib puag ncig, los ntawm ib tug ncej nplaim hluav taws.
44 Thiab Nifais thiab Lihais nyob hauv lawv nruab nrab; muaj tseeb tiag, lawv tau raug vij ib puag ncig; muaj tseeb tiag, lawv tau nyob zoo li hauv nruab nrab nplaim hluav taws, tiam sis nws tsis tau ua rau lawv raug mob, los sis nws kuj tsis tau kub tej phab ntsa ntawm lub qhov taub thiab; thiab lawv tau muaj txoj kev xyiv fab uas hais tsis tau tawm ntawd thiab muaj yeeb koob puv npo.
45 Thiab saib seb, Vajtswv tus Ntsuj Plig Dawb Huv tau nqis saum ntuj ceeb tsheej los, thiab tau los nkag rau hauv lawv tej siab, thiab lawv tau zoo li muaj hluav taws puv nkaus, thiab lawv txawm txawj hais lus zoo kawg nkaus li tawm.
46 Thiab tau muaj tias tau muaj ib lub suab los rau lawv, muaj tseeb tiag, ib lub suab zoo heev kawg li, zoo li nws yog ib lub suab ntxhi, hais tias:
47 Kev thaj yeeb, nej tsuas muaj kev thaj yeeb, vim nej txoj kev ntseeg hauv tus uas kuv Hlub Heev, tus uas yeej nyob txij thaum ntuj tsim teb raug los.
48 Thiab nim no, thaum lawv tau hnov qhov no lawv tau tsa lawv tej qhov muag ntsia rau qhov uas lub suab ntawd nrov tuaj; thiab saib seb, lawv pom rooj ntug qhib; thiab tej tim tswv tau nqis tawm saum ceeb tsheej los thiab tau qhuab qhia rau lawv.
49 Thiab tau muaj kwv yees li peb puas leej uas tau pom thiab tau hnov tej yam no; thiab lawv tau raug hais kom tawm mus thiab tsis txhob poob siab, thiab kom lawv tsis txhob xyem xyav.
50 Thiab tau muaj tias lawv tau tawm mus, thiab tau qhuab qhia rau cov neeg, tau tshaj tawm thoob plaws rau txhua thaj tsam ib ncig txog tag nrho tej yam uas lawv tau hnov thiab tau pom, kawg tias feem coob ntawm cov Neeg Lamas raug yaum los ntseeg lawv, vim yog tej kev ua tim khawv loj uas lawv tau txais lawm.
51 Thiab txhua tus uas tau raug yaum tau lawm puav leej tau tso lawv tej cuab yeej ua rog, thiab lawv tej kev ntxub, thiab lawv tej yawg koob txoj kev li kev cai tseg.
52 Thiab tau muaj tias lawv tau muab rau cov Neeg Nifais tej av uas yog lawv li.