Vaj Lug Kub
Hilamas 3


Tshooj 3

Cov Neeg Nifais coob tug tsiv mus rau thaj av sab qaum teb—Lawv tau ua tej tsev thawv cib thiab sau ntau phau ceev xwm txheej—Kaum tawm txhiab leej tau hloov siab tshiab thiab ua kev cai raus dej—Vajtswv txoj lus coj neeg mus rau txoj kev cawm seej—Nifais uas yog Hilamas tus tub txum lub rooj txiav txim. Kwv yees li 49–39 xyoo ua ntej yug Yexus.

1 Thiab nim no tau muaj tias nyob rau hauv xyoo thib plaub caug thiab peb ntawm cov neeg txiav txim txoj kev kav, tsis tau muaj kev sib cav sib ceg nyob hauv Nifais cov neeg tsuas yog muaj me ntsis kev khav theeb uas nyob hauv lub koom txoos xwb, uas tau ua kom muaj me ntsis kev tsis sib haum nyob hauv cov neeg, tej kev ntawd tau raug kho kom zoo nyob rau thaum kawg xyoo thib plaub caug thiab peb.

2 Thiab tsis tau muaj kev sib cav sib ceg nyob hauv cov neeg rau hauv xyoo thib plaub caug thiab plaub; thiab kuj tsis muaj kev sib cav sib ceg ntau nyob hauv xyoo thib plaub caug thiab tsib.

3 Thiab tau muaj tias nyob rau hauv xyoo thib plaub caug thiab rau, muaj tseeb tiag, tau muaj kev sib cav sib ceg ntau thiab kev ntxeev siab ntau; thiab vim muaj qhov ntawd tau muaj ib co neeg coob heev uas tau ncaim tawm ntawm thaj av Xalahelas, thiab tau tawm mus rau thaj av sab qaum teb mus nyob rau pem thaj av.

4 Thiab lawv tau mus deb heev kawg nkaus li, kawg tias lawv tau los rau tej dej loj thiab ntau tus dej.

5 Muaj tseeb tiag, thiab lawv tau faib mus rau hauv txhua qhov ntawm thaj av, mus rau txhua qhov uas tsis tau ciaj quav poj thiab tsis muaj ntoo, vim yog tej neeg coob uas twb tau nyob hauv thaj av ua ntej lawm.

6 Thiab nim no tsis muaj ib qho ntawm thaj av uas tsis muaj neeg nyob, tsuas yog tshuav tej qho uas tsis muaj ntoo; tiam sis vim yog txoj kev puas tsuaj loj ntawm cov neeg uas xub nyob hauv thaj av lawm thiaj raug hu ua thaj av quav poj.

7 Thiab vim tsis muaj ntoo ntau nyob rau saum thaj av, txawm li ntawd los cov neeg uas tau mus tau rais los ua ib cov neeg uas txawj siv hmoov zeb cib heev; yog li ntawd lawv tau xuas hmoov zeb cib los ua tej tsev uas lawv nyob.

8 Thiab tau muaj tias lawv tau coob ntxiv thiab tau sib faib, thiab tau tawm ntawm thaj av sab qab teb mus rau thaj av sab qaum teb, thiab tau faib kawg tias lawv pib puv thoob plaws hauv lub ntiaj teb, txij li hiav txwv sab qab teb mus rau hiav txwv sab qaum teb, txij li hiav txwv sab hnub poob mus rau hiav txwv sab hnub tuaj.

9 Thiab cov neeg uas nyob rau hauv thaj av sab qaum teb tau nyob hauv tej tsev pheeb suab ntaub, thiab hauv tej tsev hmoov zeb cib, thiab lawv tau cia txhua tus ntoo uas yuav tuaj rau saum thaj av tuaj xwv kom yuav loj, kom txog sij hawm lawv yuav muaj ntoo los ua lawv tej tsev, muaj tseeb tiag, ua lawv tej nroog, thiab lawv tej tuam tsev, thiab lawv tej tsev sab laj, thiab lawv tej chaw dawb huv, thiab tag nrho txhua yam ntawm lawv tej tsev.

10 Thiab tau muaj tias vim ntoo muaj tsawg heev nyob rau thaj av sab qaum teb, lawv tau xa ntau mus los ntawm txoj kev xuas nkoj thauj.

11 Thiab li no lawv pab tau cov neeg uas nyob rau thaj av sab qaum teb xwv kom lawv yuav ua tau ntau lub nroog, uas yog ntoo thiab hmoov zeb cib.

12 Thiab tau muaj tias tau muaj cov neeg Amoos ntau leej, uas yog Neeg Lamas yug, kuj tau mus rau hauv thaj av no thiab.

13 Thiab nim no tau muaj ntau cov ceev xwm txheej tau sau txog tej keeb kwm ntawm cov neeg no, tau muaj ntau yam, hais txog lawv, los ntawm ntau leej ntawm cov neeg no.

14 Tiam sis saib seb, ib puas feem ntawm tej keeb kwm ntawm cov neeg no, muaj tseeb tiag, zaj hais txog cov Neeg Lamas thiab cov Neeg Nifais, thiab lawv tej kev tsov kev rog, thiab tej kev sib cav sib ceg, thiab tej kev ntxeev siab, thiab lawv tej kev qhuab qhia, thiab lawv tej kev qhia tej uas yuav muaj los yav tom ntej, thiab lawv tej kev thauj khoom thiab lawv tej kev ua nkoj, thiab lawv tej kev ua tuam tsev, thiab tej tsev sab laj thiab lawv tej chaw dawb huv, thiab lawv tej kev ncaj ncees, thiab lawv tej kev phem, thiab lawv tej kev tua neeg, thiab lawv tej kev ua tub sab, thiab lawv tej kev ua lim hiam, thiab tag nrho txhua yam kev qias thiab tej kev sib daj sib deev, tsis txaus ntim rau hauv phau ntawv no.

15 Tiam sis saib seb, muaj ntau phau ntawv thiab ntau phau ceev xwm txheej txhua yam, thiab lawv feem ntau tau raug ceev los ntawm cov Neeg Nifais.

16 Thiab lawv tau raug muab cev nqis ib tiam dhau rau ib tiam los ntawm cov Neeg Nifais, mus txog thaum lawv tau poob rau hauv txoj kev txhaum thiab tau raug muab tua, muab ua lim hiam, thiab raug plob tua, thiab raug raws khiav, thiab raug tua, thiab raug tawg ri niab mus rau saum lub ntiaj teb, thiab nyob xyaw nrog cov Neeg Lamas mus txog thaum tsis hu lawv ua cov Neeg Nifais ntxiv lawm, tau rais los mus ua neeg phem, thiab neeg qus, thiab neeg npau taws, muaj tseeb tiag, rais los mus tib yam li cov Neeg Lamas.

17 Thiab nim no kuv rov qab mus rau kuv zaj dua; yog li ntawd, yam uas kuv tau hais lawm tau dhau lawm tom qab uas tau muaj tej kev sib cav sib ceg loj, thiab tej kev sib thab, thiab tej kev tsov rog, thiab tej kev ntxeev siab, nyob hauv Nifais cov neeg.

18 Xyoo thib plaub caug thiab rau ntawm cov neeg txiav txim txoj kev kav thiaj tau xaus;

19 Thiab tau muaj tias tseem tau muaj kev sib cav sib ceg loj heev nyob hauv thaj av, muaj tseeb tiag, nyob hauv xyoo thib plaub caug thiab xya, thiab nyob hauv xyoo thib plaub caug thiab yim.

20 Txawm li ntawd los Hilamas tseem tau txum lub rooj txiav txim nrog txoj kev txim lij thiab txoj kev sib txig; muaj tseeb tiag, nws tau mob siab coj tej kev cai, thiab tej kev txiav txim, thiab Vajtswv tej lus txib; thiab nws tau ua tej uas yog nyob ntawm Vajtswv lub qhov muag tsis tu ncua; thiab nws tau mus raws li tej kev ntawm nws txiv, kawg tias nws tau vammeej nyob rau hauv thaj av.

21 Thiab tau muaj tias nws muaj ob tug tub. Nws tau muab lub npe Nifais rau tus hlob, thiab muab lub npe Lihais rau tus ntxawg. Thiab nkawd tau pib loj hlob rau tus Tswv.

22 Thiab tau muaj tias tej kev tsov rog thiab tej kev sib cav sib ceg tau pib tsum, me ntsis, nyob hauv cov Neeg Nifais, nyob rau thaum yuav kawg xyoo thib plaub caug thiab yim ntawm cov neeg txiav txim txoj kev kav Nifais cov neeg.

23 Thiab tau muaj tias nyob rau hauv xyoo thib plaub caug thiab cuaj ntawm cov neeg txiav txim txoj kev kav, tau tsim muaj kev nyab xeeb tsis tu ncua nyob hauv thaj av, tag nrho tiam sis tsuas tshuav tej kev tuav hauv ntsiag to uas Nkadi-atoos tus tub sab tau tsim nyob rau hauv feem av uas neeg nyob ntau zog, uas nyob rau lub sij hawm ntawd cov uas ua hau ntawm cov nom tswv tseem tsis tau paub txog xwb; yog li ntawd lawv thiaj tsis tau raug ua kom puas tsuaj tawm ntawm thaj av mus.

24 Thiab tau muaj tias nyob rau hauv tib xyoos no tau muaj kev vam meej heev li nyob hauv lub koom txoos, kawg tias tau muaj txhiab txhiab leej uas tau los koom rau lub koom txoos thiab tau ua kev cai raus dej rau txoj kev hloov siab lees txim.

25 Thiab lub koom txoos tau vam meej heev kawg nkaus, thiab tau muaj tej koob hmoov ntau kawg nkaus uas tau raug nchuav los rau saum cov neeg, kawg tias tej pov thawj hlob thiab tej xib hwb lawv tus kheej tau xav tsis thoob li.

26 Thiab tau muaj tias tus Tswv txoj hauj lwm tau vam meej rau txoj kev muab ntau leej los ua kev cai raus dej thiab koom nrog Vajtswv lub koom txoos, muaj tseeb tiag, kaum tawm txhiab leej li.

27 Li no peb pom tau tias tus Tswv yeej muaj siab hlub tshua rau tag nrho cov uas yuav, muaj lub siab tiag tiag, thov nws lub npe dawb huv.

28 Muaj tseeb tiag, li no peb pom tias rooj ntug ceeb tsheej yeej qhib rau tag nrho, txhua tus uas yuav ntseeg rau Yexus Khetos lub npe, tus uas yog Vajtswv tus Tub.

29 Muaj tseeb tiag, peb pom tias txhua tus uas kam, yeej tuav tau Vajtswv txoj lus, uas nrawm thiab muaj hwj chim, uas yuav rhuav tag nrho tej kev dag ntxias thiab tej ntxiab thiab tej kev npaj ua phem ntawm tus dab kom puas tsuaj, thiab yuav coj Khetos tus neeg mus txoj kev ti thiab nqaim hla tus kwj tob tob ntawm kev nyuaj siab uas kav ib txhis uas tau npaj nqos cov neeg phem—

30 Thiab lawv tej ntsuj plig mus txog, muaj tseeb tiag, lawv tej ntsuj plig uas tsis txawj ploj tuag, mus txog rau ntawm Vajtswv sab tes xis hauv ntuj ceeb tsheej lub nceeg vaj, mus zaum nrog Anplaham, thiab Ixaj, thiab Yakhauj, thiab nrog tag nrho peb tej yawg koob dawb huv, tsis tawm mus ib zaug ntxiv li lawm.

31 Thiab nyob rau hauv xyoo no tau muaj kev zoo siab tsis tu ncua hauv thaj av Xalahelas, thiab nyob tag nrho ib cheeb tsam, thiab nyob tag nrho tej av uas cov Neeg Nifais nyob.

32 Thiab tau muaj tias tau muaj kev nyab xeeb thiab kev xyiv fab heev kawg nkaus nyob rau hauv xyoo thib plaub caug thiab cuaj uas seem tshuav; muaj tseeb tiag, thiab kuj tau muaj kev nyab xeeb thiab kev xyiv fab heev tsis tu ncua nyob rau hauv xyoo thib tsib caug ntawm cov neeg txiav txim txoj kev kav.

33 Thiab nyob rau hauv xyoo thib tsib caug thiab ib ntawm cov neeg txiav txim txoj kev kav kuj tau muaj kev nyab xeeb thiab, tsuas yog txoj kev khav theeb uas tau pib nkag los rau hauv lub koom txoos xwb—tsis yog los rau hauv Vajtswv lub koom txoos, tiam sis yog los rau hauv tej siab ntawm cov neeg uas tau ua txuj hais tias yog cov uas nyob hauv Vajtswv lub koom txoos—

34 Thiab lawv tau khav theeb heev, mus txog thaum pib tsim txom lawv cov kwv tij ntau leej. Nim no qhov no yog ib qho kev phem loj heev, uas tau ua rau cov neeg txo hwj chim feem coob raug tej kev tsim txom hnyav, thiab tiv dhau kev txom nyem ntau.

35 Txawm li ntawd los lawv tseem tau nquag yoo mov thiab thov Vajtswv, thiab tau loj hlob muaj zog me ntsis thiab me ntsis tuaj nyob hauv lawv txoj kev txo hwj chim, thiab ruaj khov me ntsis thiab me ntsis tuaj nyob hauv txoj kev ntseeg Khetos, mus txog thaum lawv tus kheej muaj kev xyiv fab thiab kev nplij siab puv nkaus, muaj tseeb tiag, mus txog thaum lawv tej siab tau ntshiab thiab dawb huv, tau muaj txoj kev ua kom dawb huv vim yog lawv txoj kev cia lawv tej siab rau Vajtswv.

36 Thiab tau muaj tias xyoo thib tsib caug thiab ob kuj tau xaus muaj kev nyab xeeb thiab, tsuas yog tshuav tej kev khav theeb heev uas tau los rau hauv cov neeg tej siab; thiab tau muaj li ntawd los vim yog lawv txoj kev nplua nuj thiab lawv txoj kev vam meej heev nyob hauv thaj av; thiab nws tau loj hlob rau saum lawv ib hnub dhau ib hnub.

37 Thiab tau muaj tias nyob rau hauv xyoo thib tsib caug thiab peb ntawm cov neeg txiav txim txoj kev kav, Hilamas tau tuag lawm, thiab nws tus tub hlob Nifais tau pib los kav nyob hauv nws qhov chaw. Thiab tau muaj tias nws tau txum lub rooj txiav txim yam ncaj ncees thiab sib txig; muaj tseeb tiag, nws tau coj Vajtswv tej lus txib, thiab tau mus tej kev uas nws txiv mus.