Balaan ng mga Kasulatan
Helaman 14


Kapitulo 14

Gintagna ni Samuel ang kasanag sa tion sang kagab-ihon kag isa ka bag-o nga bituon sa pagkabun-ag ni Cristo—Ginatubos ni Cristo ang mga tawo halin sa dutan-on kag espirituhanon nga kamatayon—Ang mga tanda sang Iya kamatayon nagalakip sang tatlo ka adlaw sang kadulom, sang pagkalapihak sang mga bato, kag tuman ka dalagko nga natural nga mga kalamidad. Mga 6 B.C.

1 Kag karon natabo ini nga si Samuel, ang Lamanhon, nagpropesiya sang tuman kadamo pa nga mga butang nga indi masulat.

2 Kag tan-awa, nagsiling sia sa ila: Tan-awa, ginahatagan ko kamo sing isa ka tanda; kay lima pa ka tuig ang magaabot, kag tan-awa, dayon magaabot ang Anak sang Dios agud tuboson ang tanan nga magapati sa iya ngalan.

3 Kag tan-awa, ini ang ihatag ko sa inyo bilang tanda sa tion sang iya pagkari; kay tan-awa, mangin may tuman nga mga kasanag sa langit, sa bagay nga sa gab-i antes sia magkari mangin wala sing kadulom, sa bagay nga daw adlaw ini sa panulok sang mga tawo.

4 Gani, mangin may isa ka adlaw kag isa ka gab-i kag isa ka adlaw, nga daw isa ini ka adlaw kag wala sing gab-i; kag ini mangin isa ka tanda sa inyo; kay mahibal-an ninyo ang pagbutlak sang adlaw kag amo man ang pagtunod sini; gani mahibal-an ninyo sing pat-od nga mangin may duha ka adlaw kag isa ka gab-i; apang ang gab-i indi magdulom; kag mangin amo sini ang gab-i antes sia mabun-ag.

5 Kag tan-awa, may isa ka bag-o nga bituon nga magatuhaw, isa nga wala pa gid ninyo makita; kag ini mangin isa man ka tanda sa inyo.

6 Kag tan-awa, indi lamang ini, mangin may madamo nga tanda kag mga katilingalahan sa langit.

7 Kag matabo ini, nga kamo tanan makibot, kag matingala, sa bagay nga magkalatumba kamo sa duta.

8 Kag matabo ini nga kon sin-o man ang magapati sa Anak sang Dios, ang amo man makaangkon sang kabuhi nga wala’y katubtuban.

9 Kag tan-awa, gani ang Ginuo nagsugo sa akon, paagi sa iya anghel, nga magkadto ako kag isugid ini nga butang sa inyo; huo, nagsugo sia nga magpropesiya ako sining mga butang sa inyo; huo, nagsiling sia sa akon: Isinggit sa sining katawhan, maghinulsol kag ihanda ang dalanon sang Ginuo.

10 Kag karon, tungod isa ako ka Lamanhon, kag naghambal sa inyo sang mga pulong nga ginsugo sa akon sang Ginuo, kag tungod masakit ini batok sa inyo, akig kamo sa akon kag nagatinguha kamo sa pagpatay sa akon, kag gintabog ninyo ako halin sa inyo.

11 Kag mabatian ninyo ang akon mga pulong, kay, sa amo nga tinutuyo nagtaklas ako sa ibabaw sang mga pader sining siyudad agud inyo mabatian kag mahibal-an ang mga paghukom sang Dios nga nagahulat sa inyo tungod sang inyo mga kalainan, kag mahibal-an man ninyo ang mga kondisyon sang paghinulsol;

12 Kag amo man nga inyo mahibal-an ang pagkari ni Jesucristo, ang Anak sang Dios, ang Amay sang langit kag sang duta, ang Tagtuga sang tanan nga butang halin sa ginsuguran; kag agud inyo mahibal-an ang mga tanda sang iya pagkari, sa tinutuyo nga basi pa lang nga magpati kamo sa iya ngalan.

13 Kag kon nagapati kamo sa iya ngalan magahinulsol kamo sang tanan ninyo nga sala, nga paagi sa sini mahimo nga makaangkon kamo sang kapatawaran sang mga ini paagi sa iya mga merito.

14 Kag tan-awa, sa liwat, isa pa ka tanda ang ginahatag ko sa inyo, huo, ang tanda sang iya kamatayon.

15 Kay tan-awa, pat-od gid nga kinahanglan sia mapatay agud ang kaluwasan mag-abot; huo, nagakadapat sa iya kag mangin kinahanglanon nga mapatay sia, agud mahanabo ang pagkabanhaw sang mga minatay, agud sa sini ang mga tawo mahimo nga madala sa presensya sang Ginuo.

16 Huo, tan-awa, ining kamatayon nagapahanabo sang pagkabanhaw, kag nagatubos sang tanan nga tawo halin sa una nga kamatayon—inang espirituhanon nga kamatayon; kay ang tanan nga tawo, tungod sang pagkahulog ni Adan nga napahilayo sa presensya sang Ginuo, ginakabig nga patay, pareho sa mga butang nga dutan-on kag sa mga butang nga espirituhanon.

17 Apang tan-awa, ang pagkabanhaw ni Cristo nagatubos sang katawhan, huo, bisan sang tanan nga katawhan, kag nagadala sa ila pabalik sa presensya sang Ginuo.

18 Huo, kag nagapahanabo ini sang kondisyon sang paghinulsol, agud nga kon sin-o man ang maghinulsol ang amo man indi pagsikwayon kag idap-ong sa kalayo; apang kon sin-o man ang indi maghinulsol pagasikwayon kag idap-ong sa kalayo; kag may magaabot sa ila liwat nga isa ka espirituhanon nga kamatayon, huo, ang ika-duha nga kamatayon, kay napahilayo sila liwat suno sa mga butang nga parte sa pagkamatarong.

19 Gani maghinulsol kamo, maghinulsol kamo, kay basi tungod sa pagkahibalo sining mga butang kag indi paghimo sang mga ini pagatugotan ninyo ang inyo mga kaugalingon nga mapaidalom sa paghukom, kag madala kamo sa sining ika-duha nga kamatayon.

20 Apang tan-awa, pareho sang ginsiling ko sa inyo parte sa isa pa ka tanda, ang tanda sang iya kamatayon, tan-awa, sa sinang adlaw nga magaantos sia sang kamatayon ang adlaw magadulom kag magadumili sa paghatag sang iya kasanag sa inyo; kag amo man ang bulan kag ang mga bituon; kag mangin wala sing kasanag sa ibabaw sini nga kadutaan, bisan halin sa tion nga magaantos sia sang kamatayon, sa sulod sang tatlo ka adlaw, tubtob sa tion nga magabangon sia liwat halin sa mga minatay.

21 Huo, sa tion nga mabugtuan sia sing ginhawa mangin may mga pagpanaguob kag mga pagpangilat sa sulod sang madamo nga oras, kag ang duta magauyog kag magakurog; kag ang mga bato nga yara sa ibabaw sini nga duta, pareho nga yara sa ibabaw sang duta kag sa idalom, nga nahibal-an ninyo sa sini nga tion nga solido, ukon ang kalabanan sini bilog kag matig-a, magakalabuka;

22 Huo, ang mga ini magakalapihak, kag pagkatapos sini makita nga may mga tinabuan kag may mga litik, kag bilang buka nga mga tinipik sa ibabaw sang bug-os nga duta, huo, pareho sa ibabaw sang duta kag sa idalom.

23 Kag tan-awa, mangin may dalagko nga mga unos, kag mangin may madamo nga bukid nga magausmod, pareho sing isa ka patag, kag mangin may madamo nga mga lugar nga karon ginatawag nga mga kapatagan nga mangin mga bukid nga tuman ang kataason.

24 Kag madamo nga mayor nga mga dalan ang magkalaguba, kag madamo nga siyudad ang mangin mamingaw.

25 Kag madamo nga lulubngan ang mabuksan, kag magaluad sang madamo nila nga patay; kag madamo nga santos ang magapakita sa kadam-an.

26 Kag tan-awa, amo ini ang ginhambal sang anghel sa akon; kay nagsiling sia sa akon nga mangin may mga pagpanaguob kag mga pagpangilat sa sulod sang madamo nga oras.

27 Kag nagsiling sia sa akon nga samtang ang daguob kag ang kilat nagapadayon, kag amo man ang unos, nga ining mga butang matabo, kag ang kadulom magatabon sa ibabaw sang bug-os nga duta sa sulod sang tatlo ka adlaw.

28 Kag ang anghel nagsiling sa akon nga madamo ang makakita sing mas dalagko pa nga mga butang sangsa mga ini, sa tinutuyo nga sila mahimo nga magpati nga ining mga tanda kag ining mga katilingalahan mahanabo sa bug-os nga ibabaw sining kadutaan, sa tinutuyo nga mangin wala sing kabangdanan para sa kawala’y pagtuo sa mga anak sang katawhan—

29 Kag ini sa tinutuyo nga kon sin-o man ang magpati mahimo nga maluwas, kag kon sin-o man ang indi magpati, isa ka matarong nga paghukom ang mahimo nga magtupa sa ila; kag dugang pa kon makondenar sila, sila mismo ang nagadala sa ila mga kaugalingon sang pagkondenar.

30 Kag karon dumduma, dumduma, mga kauturan ko, nga kon sin-o man ang madula, madula sa iya kaugalingon; kag kon sin-o man ang nagahimo sang kalainan, nagahimo sini sa iya kaugalingon; kay tan-awa, hilway kamo; ginatugotan kamo sa paghulag para sa inyo mga kaugalingon; kay tan-awa, ginhatag sa inyo sang Dios ang isa ka ihibalo kag ginhimo niya kamo nga hilway.

31 Ginhatag niya sa inyo nga makahibalo kamo sang maayo sa malain, kag ginhatag niya sa inyo nga mahimo kamo magpili sang kabuhi ukon kamatayon; kag makahimo kamo sing maayo kag mapanumbalik sa sinang maayo, ukon matigayon inang maayo nga mapanumbalik sa inyo; ukon makahimo kamo sang malain, kag matigayon inang malain nga mapanumbalik sa inyo.