1 Ma sa oo ina tupu mai se fevaevaeaiga i totonu o tagata, sa oo ina fevaevaeai i latou i lea vaega ma lea vaega ma ua o ese atu i o latou ala, a ua tuu ai Nifae na’o ia, a’o tulai o ia i le lotolotoi o i latou.

2 Ma sa oo ina alu atu Nifae i lona ala e agai atu i lona lava fale, ma ^amanatunatu loloto i mea na faaali mai e le Alii ia te ia.

3 Ma sa oo ina a o faapea ona manatunatu loloto o ia—ma le faanoanoa tele ona o le amioleaga o tagata sa Nifaē, i a latou galuega faalilolilo o le pouliuli, ma lo latou fasioti tagata, ma a latou vetega, ma amioletonu eseese uma—ma sa oo a o faapea ona manatunatu loloto o ia i lona loto, faauta, sa oo mai se siufofoga ia te ia, ua fetalai mai:

4 Amuia lava oe Nifae, ona o ia mea na e faia; ona ua ou vaai i lou tala’i atu ma le ^ale faavaivai o le upu na ou tuuina atu ia te oe, i lenei nuu. Ma sa e le fefe ia te i latou, ma sa e le sailia lou ^elava ola, ae sa e saili lo’u ⁱloto, ma ia tausia a’u poloaiga.

5 Ma o lenei, ona ua e faia lenei mea ma le le faavaivai, faauta, o le a ou faamanuiaina oe e faavavau; ma o le a ou faamamanaina oe i le upu ma mea e fai, i le faatuatua ma galuega; ioe, e oo lava i le faia o mea ^auma ia te oe e tusa ai ma lau ^eupu, ona e te ⁱle ole mai i se mea ua le tusa ai ma lo’u loto.

6 Faauta, o oe o Nifae, ma o a’u o le Atua. Faauta, ou te tautino atu le mea lenei ia te oe i luma o a’u agelu, o le a ia te oe le mana i luga o lenei nuu, ma o le a e taia le eleele i le ^aoge, ma le faamai, ma le faafanoga, e tusa ma le amioleaga o lenei nuu.

7 Faauta, ou te tuu atu ia te oe le mana, o soo se mea e te ^afaamaufaailogaina i luga o le lalolagi o le a faamaufaailogaina i le lagi; ma o soo se mea e te tatalaina i le lalolagi o le a tatalaina i le lagi; ma o le a faapea ona ia te oe le mana i totonu o lenei nuu.

8 Ma e faapea lava, afai e te fai atu i lenei malumalu ia vaeluaina, o le a faia lava.

9 Ma afai e te fai atu i lenei ^amauga, Ia lafo oe i lalo ma ia laugatasi, o le a faia lava.

10 Ma faauta, afai e te fai atu o le a taia lenei nuu e le Atua, o le a faataunuuina lava.

11 Ma o lenei faauta, ou te poloai atu ia te oe, ia e alu atu ma ta’u atu i lenei nuu, ua faapea ona fetalai mai o le Alii le Atua, o le ua Malosi Silisili: Vagana ai ua outou salamo o le a taia outou, e oo lava ina ^afaaumatia.

12 Ma faauta, o lenei sa oo ina ua uma ona fetalai mai e le Alii o nei upu ia Nifae, sa tu o ia ma sa le alu atu i lona lava fale, ae ua toe foi atu i motu o tagata o e sa salalau solo i luga o le laueleele, ma amata ona tala’i atu ia te i latou le afioga a le Alii lea na fetalai mai ia te ia, e uiga i le faaumatiaga o i latou pe afai latou te le salamo.

13 O lenei faauta, e ui i lea vavega tele na faia e Nifae i le ta’u atu ia te i latou e uiga i le maliu o le faamasino sili, sa latou faamaaa o latou loto ma le faalogo i fetalaiga a le Alii.

14 O lea na tala’i atu ai e Nifae ia te i latou le afioga a le Alii, e faapea: Vagana ai ua outou salamo, e pei ona fetalai mai o le Alii, o le a taia outou e oo lava ina faaumatia.

15 Ma sa oo ina ua uma ona tala’i atu e Nifae ana afioga ia te i latou, faauta, sa latou faamaaa pea o latou loto ma lē fia faalogo mai i ana upu; o lea na latou faifai ai e faasaga mai ia te ia, ma saili e faaoo mai o latou lima i luga ia te ia ina ia mafai ona latou lafo o ia i le falepuipui.

16 Ae faauta, sa faatasi le mana o le Atua ma ia, ma sa le mafai ona latou ave o ia e lafo i le falepuipui, ona sa ave o ia e le Agaga ma segia ese atu mai totonu ia te i latou.

17 Ma sa oo ina faapea ona alu atu o ia e tusa ai ma le Agaga, mai lea motu o tagata i lea motu o tagata, e tala’i atu le afioga a le Atua, seia oo lava ina uma ona ia tala’i atu ia te i latou uma, pe auina atu i totonu o tagata uma.

18 Ma sa oo ina sa latou lē fia faalogo i ana upu; ma sa amata ona i ai o finauga, sa oo ina latou fevaevaeai e faasaga ia i latou lava ma amata ona latou fasioti o le tasi ma le isi i le pelu.

19 Ma sa faapea ona iu o le fitusefulu ma le tasi o tausaga o le nofoaiga a faamasino i luga o le nuu o Nifae.