1 Ma sa oo ina fanauina e ia Omera, ma sa nofotupu Omera e suitulaga ia te ia. Ma sa fanauina e Omera ia Iareto; ma sa fanauina e Iareto ia atalii ma afafine.

2 Ma sa fouvale Iareto i lona tamā, ma ua sau ma ua nofo i le laueleele o Hetu. Ma sa oo ina ia viivii faaoleole tagata e toatele, ona o ana upu poto, seia oo ina ia maua le afa o le malo.

3 Ma ina ua uma ona ia maua o le afa o le malo sa ia sii taua atu i lona tamā, ma sa ia ave ai lona tamā faatagataotaua, ma faia o ia ia tautua a o faatagataotauaina;

4 Ma o lenei, i aso o le nofoaiga a Omera, sa faatagataotauaina o ia i le afa o ona aso. Ma sa oo ina fanauina e ia atalii ma afafine, e aofia ai ma Esoroma ma Korianetuma.

5 Ma sa feitai tele i la’ua i mea na fai e Iareto lo la’ua uso, sa oo ai ina la faatuina se autau ma si’itaua ai ia Iareto. Ma sa oo ina la tau ma ia i le po.

6 Ma sa oo ina ua uma ona la fasiotia o le autau a Iareto sa fai o le a la fasiotia foi o ia; ma sa ia aioi mai ia te i la’ua e aua ne’i o la fasiotia o ia, ma o le a ia tuu atu le malo i lona tamā. Ma sa oo ina la tuu atu ia te ia lona ola.

7 Ma o lenei sa matua faanoanoa tele Iareto ona o le aveesea o le malo, ona sa ia tuu atu lona loto atoa i le malo ma le mamalu o le lalolagi.

8 O lenei, o le afafine o Iareto, o se sa atamai tele, ma ina ua vaai atu i le faanoanoa o lona tamā, sa mafaufau e fai se fuafuaga e mafai ai ona ia toe faafoi mai le malo i lona tamā.

9 O lenei sa lalelei tele le afafine o Iareto. Ma sa oo ina talanoa o ia ma lona tamā, ma fai atu ia te ia: Aisea ea ua faanoanoa tele ai lo’u tamā? Na te lei faitauina ea talafaamaumau ia na aumai e o tatou tamā mai le isi itu i luga o le moana loloto? Faauta, e le o i ai ea se tala iina e uiga ia i latou anamua, e faapea sa latou maua malo ma le mamalu tele e ala ia latou fuafuaga ^afaalilolilo?

10 Ma o lenei, o lea, ia aami Akiso e lo’u tamā, le atalii o Kimino; faauta foi, ua lalelei a’u, ma o le a ou ^asiva i ona luma, ma o le a ou faafiafia ia te ia, o le a fia faiavā ai o ia ia te a’u; o le mea lea, afai e manao mai o ia ia te oe ia e tuu atu a’u e avea ma ana avā, ona e fai atu lea: O le a ou tuuina atu o ia pe afai e te aumaia ia te a’u le ulu o lo’u tamā, le tupu.

11 Ma o lenei o Omera sa avea ma uo ia Akiso; o le mea lea, ina ua amia mai Akiso e Iareto, sa siva le afafine o Iareto i ona luma sa faafiafia ai o ia ia te ia, sa oo ai ina manao o ia ia fai o ia ma ana avā. Ma sa oo ina fai mai o ia ia Iareto: Tuu mai o ia ia te a’u e fai ma a’u avā.

12 Ma sa fai atu Iareto ia te ia: O le a ou avatu o ia ia te oe, pe afai e te aumaia ia te a’u le ulu o lo’u tamā, le tupu.

13 Ma sa oo ina faapotopoto mai e Akiso i le fale o Iareto lona aiga uma, ma fai atu ia te i latou: Tou te tauto mai ea ia te a’u o le a outou faamaoni mai ia te a’u i le mea lea o le a ou manao i ai mai ia te outou?

14 Ma sa oo ina latou ^atauto uma ia te ia, i le Atua o le lagi, ma i le lagi foi, ma le lalolagi ma o latou ulu, o soo se tasi e ese mai le fesoasoani ua manao i ai Akiso o le a vaea lona ulu; ma o soo se tasi na te faailoa atu soo se mea o le a faailoa mai e Akiso ia te i latou, o ia lava lea o le a maumau lona ola.

15 Ma sa oo ina faapea ona latou ioe faatasi ma Akiso. Ma sa tuu atu e Akiso ia te i latou ^atautoga ia na tuuina mai e i latou o anamua o ē sa latou sailia foi le pule, lea na tuulima faasolo mai lava i lalo mai ia ^eKaino, o lē o se fasioti tagata mai le amataga.

16 Ma sa faatumauina i latou e le mana o le tiapolo e tuu atu ia tautoga i tagata, e taofi ai i latou i le pouliuli, e fesoasoani ai i mea e pei o le sailia o le pule ia maua le pule, ma fasioti tagata, ma vete, ma pepelo, ma fai amioleaga ma faitaaga uiga eseese uma.

17 Ma o le afafine o Iareto o lē na ia tuuina i lona loto le manatu ia saili i nei mea mai anamua; ma o Iareto na tuuina i le loto o Akiso; o le mea lea, na tuu atu ai e Akiso i lona aiga ma ana uo, ma taitai ese atu ai i latou e ala i folafolaga logomalie e fai soo se mea sa manao i ai o ia.

18 Ma sa oo ina latou faatuina se ^afaapotopotoga faalilolilo, e pei lava o i latou anamua; o se faapotopotoga lea ua sili ona inosia ma amioleaga i mea uma, i le silafaga a le Atua;

19 Auā e lē galue le Alii e ala i faapotopotoga faalilolilo, pe finagalo foi o ia ia faamasaa e tagata le toto, ae ua ia faasāina i mea uma, mai lava i le amataga o tagata.

20 Ma o lenei o a’u, o Moronae, ou te lē tusia le uiga o a latou tautoga ma faapotopotoga faalilolilo, ona ua faailoa mai ia te a’u ua i ai ia mea i totonu o tagata uma, ma ua i ai i latou i totonu o sa Lamanā.

21 Ma o ia mea na mafua ai le ^afaafanoga o nei tagata ua ou talatala atu ai nei, ma le faafanoga foi o le nuu o Nifae.

22 Ma o soo se malo na te lagolagoina faapotopotoga faalilolilo faapea, e maua ai le pule ma le oa, seia oo ina salalalu i luga o le atunuu, faauta, o le a faaumatia i latou; auā o le a lē tuuina e le Alii le ^atoto o lana au paia, lea o le a latou faamasaaina, ia tagi mai pea ia te ia mai le eleele mo le ^etauimasui i luga o i latou ae na te lē tauia.

23 O le mea lea, outou Nuuese e, o le poto o le Atua ua tatau ai ona faailoa atu o nei mea ia te outou, ina ia outou salamo ai i a outou agasala, ma ia lē tuuina ia faapotopotoga fasioti tagata ia oo a’e i luga o outou, ia ua atia’e ia maua ai le ^apule ma le oa—ma o le a oo mai i o outou luga le galuega, ioe, le galuega lava o le faafanoga, ioe, o le a pa’ū ifo lava le pelu o le faamasinotonu o le Atua Faavavau i o outou luga, e faatoilalo ma faaumatia outou, pe afai tou te tuu ia mea ia oo mai.

24 O le mea lea, ua poloaiina ai outou e le Alii, pe a outou vaai ua oo mai nei mea i totonu ia te outou o le a outou feala mai i se lagona o lo outou tulaga leaga matautia, ona o lenei faapotopotoga faalilolilo o le a i ai i totonu o outou; a leai oi talofa i lena faapotopotoga faalilolilo, ona o le toto o i latou o e ua fasiotia; ona ua latou tagi mai i le eleele mo le tauimasui i luga o lea faapotopotoga faalilolilo, ma luga foi o i latou o ē na atiina a’e.

25 Auā o soo se tasi na te atiina a’e i luga, ua saili o ia e faatoilalo le ^asaolotoga o laueleele uma, malo, ma atunuu; ma o le a ia aumai le faafanoga o nuu uma, ona ua atia’e e le tiapolo, o lē o le tamā o pepelo uma lava; le pepelo lava lena na ia ^efaaseseina ai o tatou uluai matua, ioe, le pepelo lava lea na ia uunaia ai le tagata mai le amataga ia fasioti tagata; o lē na faamaaaina loto o tagata na latou fasioti ai perofeta, ma fetogia i latou i maa, ma tutuli ese i latou, mai le amataga.

26 O le mea lea, na poloaiina ai a’u, o Moronae, ia ou tusia nei mea, ina ia aveesea le leaga, ma ina ia oo mai ai le taimi e le mafai ai e Satani ona toe maua se ^amana i loto o le fanauga a tagata, ae ina ia mafai ona ^efaatauanauina o i latou ia latou faia le lelei e lē aunoa, ina ia mafai ona latou o mai i le puna o le amiotonu uma ma faaolaina ai i latou.