Tshooj 2
Cov Neeg Tsales npaj lawv txoj kev tsiv rau thaj av uas tau cog lus tseg cia lawm—Nws yog ib thaj av zoo uas cov neeg nyob saum yuav tsum pe hawm Khetos los sis yuav raug cheb tawm pov tseg—Tus Tswv tham rau Tsales tus tij laugtau peb teev—Cov Neeg Tsales txua tej nkoj—Tus Tswv nug kom Tsales tus tij laugxav saib yuav taws teeb rau hauv cov nkoj li cas.
1 Thiab tau muaj tias Tsales thiab nws tus tij laug, thiab lawv tej tsev neeg, thiab Tsales thiab nws tus tij laugtej phooj ywg thiab lawv tej tsev neeg, tau nqis mus rau hauv lub hav uas yog sab pem toj, (thiab lub hav ntawd lub npe yog Nilos, tau hu raws li ib tug neeg tua tsiaj uas muaj suab npe) nrog lawv tej pab tsiaj uas lawv tau sau los ua ke, tej maum thiab tej txiv, txhua yam.
2 Thiab lawv kuj tau cuab ntxiab thiab txhom tej noog saum nruab ntug; thiab lawv kuj tau npaj ib lub thoob, uas cia lawv coj tej ntses ntawm tej dej nrog lawv.
3 Thiab lawv kuj coj nrog lawv tej dexiles, uas, txhais tias, ntab muaj zib; thiab li no lawv tau coj nas ntab nrog lawv, thiab tag nrho tej uas muaj nyob saum thaj av, tej noob txhua yam.
4 Thiab tau muaj tias thaum lawv tau nqis los rau hauv lub hav Nilos tus Tswv tau nqis los thiab tau tham nrog Tsales tus tij laug; thiab nws tau nyob hauv cov huab, thiab Tsales tus tij laugtsis pom nws.
5 Thiab tau muaj tias tus Tswv tau txib lawv kom lawv yuav tsum tawm mus rau hauv roob moj sab qhua, muaj tseeb tiag, rau hauv feem uas tsis tau muaj neeg mus dua li. Thiab tau muaj tias tus Tswv tau mus ua lawv ntej, thiab tau tham nrog lawv thaum nws sawv nyob hauv cov huab, thiab tau qhia kev saib lawv yuav tsum mus qhov twg.
6 Thiab tau muaj tias lawv tau mus hauv roob moj sab qhua, thiab tau txua tej nkoj, rau lawv hla tej dej ntau, tau raug coj kev tsis tu ncua los ntawm tus Tswv txhais tes.
7 Thiab tus Tswv tsis cia kom lawv yuav nres ntawm tej hiav txwv uas nyob hauv roob moj sab qhua, tiam sis nws xav kom lawv yuav tsum tuaj kom mus txog rau thaj av uas tau cog lus cia lawm, uas tau yog thaj uas zoo tshaj dua li lwm thaj av, uas yog thaj uas tus Tswv Vajtswv tau tshwj tseg rau cov neeg uas ncaj ncees.
8 Thiab nws tau cog lus nyob hauv nws txog kev npau taws rau Tsales tus tij laug, tias tus uas yuav tuaj nyob thaj av cog lus tseg cia no, txij lub sij hawm no lawm yav tom ntej thiab mus ib txhis, yuav tsum pe hawm nws, tus uas yog Vajtswv tseeb thiab tib leeg xwb, los sis lawv yuav raug cheb pov tseg thaum txoj kev puv npo ntawm nws txoj kev npau taws yuav los rau lawv.
9 Thiab nim no, peb pom tau Vajtswv tej lus ceeb toom txog thaj av no, tias nws yog ib thaj av uas tau cog lus tseg cia lawm; thiab haiv neeg twg uas yuav nyob hauv nws yuav tsum tu Vajtswv, los sis lawv yuav raug cheb tawm mus thaum txoj kev puv npo ntawm nws txoj kev npau taws yuav los rau saum lawv. Thiab txoj kev puv npo ntawm nws txoj kev npau taws yuav los rau saum lawv thaum lawv siav nyob hauv txoj kev tsis ncaj.
10 Vim saib seb, qhov no yog ib thaj av uas zoo dua li tag nrho lwm thaj av; yog li ntawd tus uas nyob hauv nws yuav tsum pe hawm Vajtswv los sis yuav raug cheb tawm mus; vim nws yog Vajtswv lo lus ceeb toom uas kav ib txhis. Thiab yuav tsis muaj li mus txog thaum uas muaj txoj kev tsis ncaj puv npo nyob hauv cov me nyuam ntawm thaj av, es lawv mam raug cheb tawm.
11 Thiab qhov no yuav los rau nej, Au nej cov uas yog Lwm Haiv Neeg es, kom nej yuav paub txog Vajtswv tej lus ceeb toom—kom nej yuav hloov siab lees txim, thiab yuav tsis ua ntxiv nyob hauv nej tej kev tsis ncaj ncees mus txog thaum txoj kev puv npo los, kom nej yuav tsis raug coj txoj kev puv npo ntawm txoj kev npau taws ntawm Vajtswv nqis los rau saum nej ib yam li cov neeg uas nyob ntawm thaj av tau ua los lawm.
12 Saib seb, qhov no yog ib thaj av zoo, thiab haiv neeg twg uas yuav tuaj nyob hauv nws yuav raug dim ntawm txoj kev ua qhev, thiab ntawm txoj kev txhom, thiab ntawm tag nrho lwm haiv neeg uas nyob hauv qab ntuj, yog lawv tsuas yuav pe hawm tus Vajtswv ntawm thaj av, tus yog Yexus Khetos, tus uas tau raug ua kom paub los ntawm tej yam uas peb tau muab sau cia lawm.
13 Thiab nim no kuv rov qab txuas nrog kuv phau ceev xwm txheej; vim saib seb, tau muaj tias tus Tswv tau coj Tsales thiab nws tus tij laugtawm mus txog tus hiav txwv loj uas faib tej av. Thiab thaum lawv tau los txog ntawm hiav txwv lawv tau rub lawv tej tsev pheeb suab ntaub; thiab lawv tau hu qhov chaw ntawd npe ua Mali-akhumaws; thiab lawv tau nyob hauv tej tsev pheeb suab ntaub, thiab tau nyob hauv tej tsev pheeb suab ntaub nyob ntawm ntug hiav txwv tau ncua li plaub xyoos.
14 Thiab tau muaj tias thaum kawg plaub xyoos lawm tus Tswv tau los rau Tsales tus tij laugdua, thiab tau sawv nyob hauv ib tau huab thiab tau tham nrog nws. Thiab tus Tswv tau tham nrog Tsales tus tij laugtau ncua li peb teev, thiab tau ntuas nws vim nws tau tsis nco qab thov rau tus Tswv lub npe.
15 Thiab Tsales tus tij laugtau hloov siab lees txim txog txoj kev phem uas nws tau ua lawm, thiab nws tau thov tus Tswv lub npe rau nws cov kwv tij uas tau nyob nrog nws. Thiab tus Tswv tau hais rau nws tias: Kuv yuav zam txim rau koj thiab koj tej kwv tij txog lawv tej txim; tiam sis nej yuav tsum tsis txhob ua txhaum ntxiv lawm, vim nej yuav nco tias kuv tus Ntsuj Plig yeej yuav tsis nrog neeg nyob tas mus li; yog li ntawd, yog nej yuav ua txhaum kom mus txog thaum nej siav siav nej yuav raug txiav tawm ntawm tus Tswv qhov chaw mus. Thiab tej no yog kuv tej kev xav nyob rau saum thaj av uas kuv yuav muab rau nej ua nej tej qub txeeg qub teg; vim nws yuav yog ib thaj av uas zoo dua li tag nrho lwm thaj av.
16 Thiab tus Tswv tau hais tias: Cia li mus ua hauj lwm thiab txua, tej nkoj raws li tej uas nej tau txua tas los no. Thiab tau muaj tias Tsales tus tij laugtau mus ua hauj lwm, thiab nws cov kwv tij los tib yam, thiab tau txua tej nkoj zoo li tej uas lawv tau txua tas los lawm, raws li tus Tswv tej kev qhia. Thiab tej nkoj ntawd me, thiab lawv sib sib nyob rau saum nplaim dej, twb sib ib yam li ib tug noog nyob rau saum nplaim dej.
17 Thiab lawv tau raug txua kom lawv yuav ntom heev, twb kom lawv yuav ntim tau dej li ib lub ntim; thiab hauv tej qab los ntom ib yam li ib lub ntim; thiab ntawm tej sab tav los ntom ib yam li ib lub ntim; thiab tom ob tog kawg ntse; thiab sab saum kuj ntom tib yam li ib lub ntim; thiab qhov ntev ntev li ib tug ntoo; thiab lub qhov rooj ntawd, thaum muab nws kaw, kuj ntom tib yam li ib lub ntim.
18 Thiab tau muaj tias Tsales tus tij laugtau thov rau tus Tswv, hais tias: Au tus Tswv es, kuv tau ua txoj hauj lwm uas koj tau txib kuv lawm, thiab kuv tau ua tej nkoj raws li qhov uas koj tau kom kuv ua.
19 Thiab saib seb, Au tus Tswv es, tsis muaj teeb nyob hauv tej nkoj ntawd; peb yuav tsav mus qhov twg? Thiab peb kuj yuav piam sij, vim peb ua tsis taus pa nyob hauv lawv, tsuas muaj tej cua uas nyob hauv lawv xwb; yog li ntawd peb yuav piam sij.
20 Thiab tus Tswv tau hais rau Tsales tus tij laugtias: Saib seb, koj cia li tho ib lub qhov rau sab saum, thiab rau hauv qab; thiab thaum koj yuav cia cua los koj yuav qhib lub qhov thiab txais yuav cua. Thiab yog dej los rau hauv nej, saib seb, nej yuav kaw lub qhov, kom nej yuav tsis piam sij nyob hauv dej nyab.
21 Thiab tau muaj tias Tsales tus tij laugtau ua raws li tus Tswv tau txib.
22 Thiab nws tau rov thov rau tus Tswv dua hais tias: Au tus Tswv es, saib seb kuv twb tau ua tas li koj tau txib kuv lawm; thiab kuv tau npaj tej nkoj rau kuv cov neeg, thiab saib seb tsis muaj teeb nyob hauv lawv. Saib seb, Au tus Tswv es, koj puas yuav cia peb hla cov dej loj heev kawg no tsaus ntuj nti?
23 Thiab tus Tswv tau hais rau Tsales tus tij laugtias: Koj xav kom kuv ua dab tsi kom nej thiaj li yuav muaj tau teeb nyob hauv nej tej nkoj? Vim saib seb, nej muaj tsis tau qhov rais, vim lawv yuav raug tawg ua dwb daim; los sis nej yuav coj tsis tau hluav taws nrog nej, vim nej yuav tsis mus nrog qhov kaj ntawm hluav taws.
24 Vim saib seb, nej yuav zoo li ib tug ntses loj loj nyob hauv plawv hiav txwv; vim tej nthwv dej zoo li tej roob yuav vau los npog nej. Txawm li ntawd los, kuv mam coj nej tawm hauv tej dej hiav txwv tob tob rov los; vim tej cua tau tawm ntawm kuv lub qhov ncauj mus, thiab kuv kuj tau xa tej nag thiab tej dej nyab.
25 Thiab saib seb, kuv tau npaj nej rau tej yam no; vim nej yuav tsis muaj peev xwm hla qhov dej tob heev no tsuas yog kuv yuav npaj nej rau tej dej sawv ntawm hiav txwv, thiab tej cua uas tau tawm mus, thiab tej kev dej nyab uas yuav los xwb. Yog li ntawd koj xav kom kuv npaj yam dab tsi rau nej kom nej yuav muaj teeb thaum nej raug nqos nyob hauv tej hiav txwv tob tob?