Ch’ol 2
Eb’ laj Jaredita neke’xkawresi rib’ choq’ re lix b’eenikeb’ sa’ jun li ch’och’ yeechi’inb’il—A’an jun li sik’b’il ru ch’och’ b’ar wi’ eb’ li winq tento te’k’anjelaq chiru li Kristo, malaj ut te’mesuuq chaq aran—Li Qaawa’ naraatina li ras laj Jared chiru oxib’ hoonal—Eb’ laj Jaredita neke’xyiib’eb’ li k’amonel jukub’—Li Qaawa’ naxpatz’ re li ras laj Jared chanru naxk’oxla a’an naq taak’ehe’q li saqen sa’eb’ li k’amonel jukub’.
1 Ut kik’ulman naq laj Jared ut li ras, ut eb’ lix junkab’al, ut jo’kaneb’ ajwi’ li neke’ochb’eenink re laj Jared ut li ras ut lix junkab’aleb’ a’an, ke’kub’e sa’ li ru taq’a li wan sa’ xjayal lix nim li saq’e (ut lix k’ab’a’ li ru taq’a a’an aNimrod, k’ab’a’inb’il jo’ chanru li xnimal ru aj yo) rochb’een lix ketomq li ke’xch’utub’ chaq, li teelom ut ixqi xul, li jar paay wan.
2 Ut ke’xk’e ajwi’ li ra’al ut ke’xchap li xik’anel xul rub’el choxa; ut ke’xkawresi ajwi’ jun k’uuleb’aal, sa’ li ke’xk’am wi’ chirixeb’ xkaril li ha’.
3 Ut ke’xk’am ajwi’ chirix li deseret, ut chi k’utb’il xyaalalil li aatin, a’an saq k’aw; ut chi jo’kan ke’xk’am chirixeb’ chi tzoqol li saq k’aw, ut jar paay li k’a’ru wan chiru lix b’een li ch’och’, ut li jar paay chi iyaj wan.
4 Ut kik’ulman naq chirix naq ke’kub’e sa’ li ru taq’a Nimrod, li Qaawa’ kikub’e chaq ut ki’aatinak rik’in li ras laj Jared, ut kiwan sa’ jun achoql, ut li ras laj Jared ink’a’ kiril ru.
5 Ut kik’ulman naq li Qaawa’ kixtaqlaheb’ naq te’xik chiru li yamyookil ch’och’, relik chi yaal, sa’ li jun raqal a’an b’ar wi’ maajun wa wanjenaq chaq li winq. Ut kik’ulman naq li Qaawa’ xko’o chiruheb’, ut kiraatinaheb’ naq xaqxo sa’ jun achoql, ut kixk’eheb’ xna’leb’ b’ar te’b’eeq wi’.
6 Ut kik’ulman naq ke’b’eek chiru li yamyookil ch’och’, ut ke’xyiib’eb’ li k’amonel jukub’, sa’ li ke’xq’ax wi’ k’iila ha’, ut b’eresinb’ileb’ rajlal xb’aan li ruq’ li Qaawa’.
7 Ut li Qaawa’ ink’a’ kixkanab’ naq te’xaqliiq chirix li palaw sa’ li yamyookil ch’och’; kiraj b’an naq te’wulaq toj sa’ li ach’och’ ajwi’ li yeechi’inb’il, a’an li sik’b’il ru sa’ xb’eeneb’ chixjunil chik li ch’och’, li kixk’uula chaq li Qaawa’ choq’ re jun tenamit tiik xch’ool.
8 Ut a’an sa’ xjosq’il kixxaqab’ chaq aatin re li ras laj Jared, naq ani te’eechaninq re li ch’och’ a’in li yeechi’inb’il, chalen chaq sa’ li kutan a’an ut chi junelik, ate’k’anjelaq chiru a’an, li tz’aqal ut junaj chi Dios, malaj ut bte’mesuuq chaq naq taachalq xtz’aqalil lix josq’il sa’ xb’eeneb’.
9 Anajwan ut, naru naqil li aatin taqlanb’il xb’aan li Dios chirix li ch’och’ a’in, naq a’an jun ch’och’ li yeechi’inb’il; ut yalaq k’a’ru chi tenamit li te’eechaninq re, te’k’anjelaq chiru li Dios, malaj ut te’mesuuq chaq naq taachalq xtz’aqalil lix josq’il sa’ xb’eeneb’. Ut lix tz’aqalil lix josq’il nachal sa’ xb’eeneb’ naq q’ano’jenaqeb’ sa’ li maa’usilal.
10 Xb’aan naq k’ehomaq reetal, a’in jun ch’och’ li sik’b’il ru sa’ xb’een chixjunileb’ chik li ch’och’; jo’kan naq ani na’eechanink re, taak’anjelaq chiru li Dios, malaj ut taamesuuq chaq; xb’aan naq a’an li aatin li junelik taakanaaq, taqlanb’il xb’aan li Dios. Ut moko na’ux ta toj reetal naq anatz’aqlok li maa’usilal sa’ xyanqeb’ li ralal xk’ajol li ch’och’, naq bmesunb’ileb’ chaq.
11 Ut a’in nachal eerik’in laa’ex, ex aj aGentil, re taaruuq teenaw li aatin taqlanb’il xb’aan li Dios—re taaruuq teejal eek’a’uxl, ut ink’a’ texkanaaq sa’ lee maa’usilal toj reetal naq taachalq xtz’aqalil ru, re naq ink’a’ teek’am chaq xtz’aqalil lix josq’il li Dios sa’ eeb’een jo’ chanru ke’xb’aanu chaq junxil li ani xe’wan chiru li ch’och’.
12 K’ehomaq reetal, a’in jun li ch’och’ sik’b’il ru, ut yalaq k’a’ru chi tenamit li taa’eechaninq re, taawanq chi aach’ab’anb’il chiru moosil, ut chiru preexil, ut chiru chixjunil chik li tenamit rub’el choxa, wi yal ta bte’k’anjelaq chiru li Dios re li ch’och’, a’an li Jesukristo, li k’utb’esinb’il rik’in li k’a’aq re ru kiqatz’iib’a.
13 Ut anajwan nin’ok wi’chik rik’in li esil nintz’iib’a; xb’aan naq k’ehomaq reetal, kik’ulman naq li Qaawa’ kixk’am laj Jared ut eb’ li ras riitz’in toj sa’ li nimla palaw a’an li najachok ruheb’ li ch’och’. Ut naq ke’wulak sa’ li palaw ke’xyiib’eb’ lix muheb’aal t’ikr; ut Moriankumer ke’xk’e choq’ xk’ab’a’ li na’ajej; ut ke’wan sa’ muheb’aal t’ikr, ut ke’wan sa’eb’ li muheb’aal t’ikr chire li palaw chiru xnumik kaahib’ chihab’.
14 Ut kik’ulman sa’ xraqik kaahib’ chihab’ naq li Qaawa’ kichal wi’chik rik’in li ras laj Jared, ut kixaqli sa’ jun choql ut kiraatina. Ut chiru xnumik oxib’ hoonal li Qaawa’ kiraatina li ras laj Jared, ut akixq’us rik’in naq ink’a’ kijultiko’ re bxpatz’b’al xk’ab’a’ li Qaawa’.
15 Ut li ras laj Jared kixjal xk’a’uxl chirix li ink’a’ us kixb’aanu chaq, ut kixpatz’ xk’ab’a’ li Dios choq’ reheb’ li ras riitz’in li wankeb’ rik’in. Ut li Qaawa’ kixye re: tinkuy aamaak laa’at ut eb’ laa was aawiitz’in; a’b’an ink’a’ chik tatmaakob’q, xb’aan naq taajultiko’q eere naq lin aMusiq’ moko junelik ta btixyal xq’e rik’ineb’ li winq; jo’kan ut, wi texmaakob’q toj reetal naq xexq’ano’ chi tz’aqal, tex’isiiq chaq chiru li Qaawa’. Ut a’in ink’oxlahom chirix li ch’och’ li nink’e eere choq’ eereechanihom; xb’aan naq a’anaq jun ch’och’ csik’b’il ru sa’ xb’een chixjunil chik li ch’och’.
16 Ut li Qaawa’ kixye: Ayu chi k’anjelak ut chatyiib’anq, jo’ chanru xyiib’ankileb’ li k’amonel jukub’ li ak keyiib’ chaq. Ut kik’ulman naq li ras laj Jared xko’o chi k’anjelak, ut jo’kaneb’ ajwi’ lix komon, ut ke’xyiib’ li k’amonel jukub’ jo’ chanru xyiib’ankileb’ li ak ke’xyiib’ chaq, jo’ chanru li ana’leb’ k’eeb’il xb’aan li Qaawa’. Ut kok’eb’, ut seeb’eb’ sa’ xb’een li ha’, chanchan xseeb’al chiru li ha’ junaq xul napurik.
17 Ut yiib’anb’ileb’ re naq q’axal atz’aptz’ookeb’, jo’kan naq ke’xtz’ap ru li ha’ chanchan jun sek’; ut wankeb’ li ru’uj ka’pak’al; ut lix b’een tz’aptz’o ru chanchan junaq sek’; ut lix nimal chanchan xnimal jun xtoonal li che’; ut li rokeb’aal, naq tz’apb’il li re, nakana chi tz’aptz’o chanchan junaq sek’.
18 Ut kik’ulman naq li ras laj Jared ki’elajin chiru li Qaawa’, ut kixye: At Qaawa’, kinb’aanu li k’anjel li kinaataqla wi’, ut keb’inyiib’ li k’amonel jukub’ jo’ chanru kinaab’eresi.
19 K’e ut reetal, at Qaawa’, sa’eb’ a’an maak’a’ li saqen; k’a’ru jayal toob’eresinq? Ut jo’kan ajwi’ too’oso’q, xb’aan naq sa’eb’ a’an maak’a’ k’a’ru toomusiq’aq wi’, ka’ajwi’ li iq’ li wan chixsa’, jo’kan naq too’oso’q.
20 Ut li Qaawa’ kixye re li ras laj Jared: K’e reetal, taayiib’ jun li jul sa’ xb’een, ut jo’kan ajwi’ rub’el; ut naq tatraho’q xb’aan xlajik li iq’ taate li jul ut taak’ul li iq’. Ut wi taa’uxq naq taa’ok li ha’ sa’ aab’een, k’e reetal, teetz’ap ru li jul, re naq ink’a’ tex’oso’q sa’ li b’uut’iha’.
21 Ut kik’ulman naq li ras laj Jared kixb’aanu chi jo’kan, jo’ chanru ajwi’ kixtaqla chaq li Qaawa’.
22 Ut ki’elajin wi’chik chiru li Qaawa’, kixye: At Qaawa’, k’e reetal, xinb’aanu jo’ chanru ajwi’ kinaataqla; ut xinkawresiheb’ li jukub’ choq’ re lin tenamit, ut k’e reetal naq maajun saqen wan chixsa’eb’. K’e reetal, at Qaawa’, ma toohaakanab’ chixq’axb’al li nimla ha’ a’in sa’ q’ojyin?
23 Ut li Qaawa’ kixye re li ras laj Jared: K’a’ru teeraj naq tinb’aanu re taawanq li saqen sa’eb’ lee jukub’? Xb’aan naq k’e reetal, ink’a’ naru taawanq li ilob’aal, xb’aan naq taajore’q raj; chi moko teek’am li xam cherix, xb’aan naq ink’a’ texxik rik’in xsaqenkil li xam.
24 Xb’aan naq k’e reetal, texwanq chanchan junaq nimla kar sa’ xyi li palaw; xb’aan naq li tzuulil b’oolam te’pujk’uq cheru. A’b’anan laa’in texintaqsi chaq wi’chik sa’ xchamal li palaw; xb’aan naq li aiq’ elenaq chaq sa’ we, ut jo’kan ajwi’ li bhab’ ut li b’uut’iha’ kintaqla chaq.
25 Ut k’e reetal, nekexinkawresi chiru li k’a’aq re ru a’in; xb’aan naq moko texruuq ta chixq’axb’al ru li nimla chamal ha’ a’in, ka’ajwi’ wi nekexinkawresi chiru lix b’oolam li palaw, ut li iq’ li xikenaq, ut li b’uut’iha’ li taachalq. Jo’kan ut, k’a’ru teeraj naq tinkawresi choq’ eere re taawanq eesaqen naq sub’b’ilex chaq sa’ xchamal li palaw?