Vaj Lug Kub
Ethaws 12


Tshooj 12

Tus yaj saub Ethaws ntuas cov neeg kom ntseeg Vajtswv—Maulaunais qhia txog tej yam zoo kawg thiab xav tsis thoob uas tau ua los ntawm txoj kev ntseeg—Txoj kev ntseeg ua tau rau Tsales tus tij laugpom Khetos—Tus Tswv muab txoj kev qaug zog rau tib neeg kom lawv thiaj li yuav txo hwj chim—Tsales tus tij laugtxav lub Roob Xelees los ntawm txoj kev ntseeg—Txoj kev ntseeg, kev cia siab, thiab kev siab hlub yog tej yuav tsum muaj rau txoj kev cawm seeg—Maulaunais tau pom Yexus tim ntsej tim muag.

1 Thiab tau muaj tias Ethaws tau ua neej nyob rau hauv lub caij ntawm Khauli-athumaws; thiab Khauli-athumaws tau ua vaj ntxwv kav tag nrho thaj av.

2 Thiab Ethaws yog tus Tswv ib tug yaj saub; yog li ntawd Ethaws tau tawm tuaj rau hauv lub caij ntawm Khauli-athumaws, thiab tau pib qhia tej uas yuav muaj los yav tom ntej rau cov neeg, vim nws raug ua tsis tau kom tsum vim yog tus Tswv tus Ntsuj Plig uas tau nyob hauv nws.

3 Vim nws tau qhuab qhia txij thaum sawv ntxov, mus txog rau thaum hnub poob, tau ntuas cov neeg kom ntseeg Vajtswv los mus rau txoj kev hloov siab lees txim nyob tsam lawv yuav raug puas tsuaj, tau hais rau lawv tias los ntawm txoj kev ntseeg tag nrho txhua yam yuav muaj puv npo—

4 Yog li ntawd, tus uas ntseeg Vajtswv yeej yuav muaj txoj kev cia siab rau ib lub ntiaj teb zoo dua, muaj tseeb tiag, twb yuav yog ib qho chaw nyob ntawm Vajtswv sab xis, qhov kev cia siab ntawd yog los ntawm txoj kev ntseeg, yuav ua ib tug hlau nres tuav rau tib neeg tej ntsuj plig, uas yuav ua kom lawv ruaj thiab khov, niaj hnub lo rau tej hauj lwm uas zoo, uas yuav raug coj mus qhuas Vajtswv.

5 Thiab tau muaj tias Ethaws tau qhia tej uas yuav muaj los yav tom ntej txog tej yam loj thiab zoo kawg uas xav tsis thoob rau cov neeg, tej uas lawv tsis ntseeg, vim lawv tsis tau pom tej ntawd.

6 Thiab nim no, kuv, Maulaunais, yuav hais me ntsis txog tej yam no; kuv yuav ua rau ntiaj teb paub tias txoj kev ntseeg yog tej yam uas cia siab rau thiab tsis pom; yog li ntawd tsis txhob cam vim nej tsis pom, vim nej yuav tsis pom ib qho tim khawv mus txog thaum nej txoj kev ntseeg twb raug muab sim lawm tso.

7 Vim nws tau yog los ntawm txoj kev ntseeg uas Khetos tau ua nws tus kheej rau peb tej yawg koob pom, tom qab uas nws tau sawv hauv qhov tuag los; thiab nws tsis tau ua rau lawv pom nws mus txog tom qab uas lawv tau muaj kev ntseeg nyob hauv nws; yog li ntawd, nws yeej yuav tsum yog tias ib txhia tau muaj kev ntseeg hauv nws, vim nws yeej tsis tau ua nws tus kheej rau ntiaj teb pom.

8 Tiam sis vim yog tib neeg txoj kev ntseeg nws tau ua nws tus kheej rau ntiaj teb pom, thiab tau qhuas Leej Txiv lub npe, thiab tau npaj ib txoj kev xwv kom los ntawm qhov ntawd lwm tus yuav tau ua cov uas tau txais tej txiaj ntsim saum ntuj, xwv kom lawv yuav cia siab rau tej yam uas lawv tsis tau pom.

9 Yog li ntawd, nej los kuj yuav tsum muaj kev cia siab, thiab ua cov uas tau txais qhov txiaj ntsim ntawd, yog nej tsuas yuav muaj txoj kev ntseeg.

10 Saib seb nws twb yog los ntawm txoj kev ntseeg lawv txheej thaum ub thiaj raug hu mus raws li tus txheej txheem dawb huv ntawm Vajtswv.

11 Yog li ntawd, los ntawm txoj kev ntseeg Mauxes txoj kev cai thiaj raug muab. Tiam sis nyob hauv lub txiaj ntsim ntawm nws Leej Tub Vajtswv tau npaj ib txoj kev zoo dua; thiab nws yog los ntawm txoj kev ntseeg uas tej kev cai ntawd tau muaj puv npo.

12 Vim yog tsis muaj txoj kev ntseeg nyob hauv noob neej Vajtswv yuav ua tsis tau tej txuj ci tseem ceeb nyob hauv lawv; yog li ntawd, nws tsis tau ua nws tus kheej rau lawv pom mus txog tom qab uas lawv muaj txoj kev ntseeg.

13 Saib seb, nws twb yog txoj kev ntseeg ntawm Amas thiab Amulej uas tau ua kom lub qhov taub vau rau hauv av.

14 Saib seb, nws twb yog txoj kev ntseeg ntawm Nifais thiab Lihais uas tau ua kom muaj kev hloov rau saum cov Neeg Lamas, kom lawv raug ua kev cai raus dej nrog hluav taws thiab nrog tus Vaj Ntsuj Plig Dawb Huv.

15 Saib seb, nws twb yog txoj kev ntseeg ntawm Amoos thiab nws cov kwv tij uas tau ua ib qho txuj ci tseem ceeb loj heev nyob hauv cov Neeg Lamas.

16 Muaj tseeb tiag, thiab tag nrho lawv cov uas tau ua tej txuj ci tseem ceeb twb tau ua tej ntawd los ntawm txoj kev ntseeg, cov uas nyob ua ntej Khetos thiab cov uas nyob tom qab los kuj tib yam.

17 Thiab nws twb yog los ntawm txoj kev ntseeg es peb tug pab coj thiaj tau txais ib lo lus cog tseg tias lawv yuav tsis tau saj txoj kev tuag; thiab lawv tsis tau txais lo lus cog tseg mus txog tom qab uas lawv muaj txoj kev ntseeg.

18 Thiab ib txwm tsis muaj ib lub sij hawm uas muaj tau tej txuj ci tseem ceeb mus txog tom qab uas lawv muaj txoj kev ntseeg; yog li ntawd, lawv yeej xub ntseeg Vajtswv Leej Tub tso.

19 Thiab tau muaj ntau leej uas txoj kev ntseeg tau muaj zog heev, nyob ua ntej Khetos los, cov uas tsis muaj peev xwm ceev rau sab hauv daim ntaub thaiv, tiam sis tau pom tiag nrog lawv tej qhov muag tej yam uas lawv tau pom nrog ib lub qhov muag ntawm txoj kev ntseeg, thiab lawv tau zoo siab.

20 Thiab saib seb, peb tau pom nyob hauv phau ceev xwm txheej no tias ib tug ntawm cov no yog Tsales tus tij laug; nws txoj kev ntseeg Vajtswv loj heev li, kawg tias thaum uas Vajtswv tau cev nws tus ntiv tes nws tsis muaj peev xwm zais tau tus ntiv tes ntawd ncaim ntawm Tsales tus tij lauglub qhov muag, vim yog nws lo lus uas nws tau hais rau nws uas yog lo lus uas nws tau txais los ntawm txoj kev ntseeg.

21 Thiab tom qab uas Tsales tus tij laugtau pom tus Tswv tus ntiv tes, vim yog lo lus cog tseg uas Tsales tus tij laugtau txais los ntawm txoj kev ntseeg, tus Tswv thiaj tsis muaj peev xwm tseg tau ib yam dab tsi kom nws lub qhov muag tsis pom; yog li ntawd nws tau ua rau nws pom tag nrho txhua yam, vim nws tsis muaj peev xwm ceev tau nyob sab nraum daim ntaub thaiv ntxiv lawm.

22 Thiab nws yog los ntawm txoj kev ntseeg uas kuv tej yawg koob tau txais lo lus cog tseg tias tej yam no yuav muaj los rau lawv cov kwv tij dhau los ntawm Lwm Haiv Neeg; yog li ntawd tus Tswv tau txib kuv, muaj tseeb tiag, twb yog Yexus Khetos.

23 Thiab kuv tau hais rau nws tias: Tus Tswv es, Lwm Haiv Neeg yuav thuam tej yam no, vim yog peb txoj kev tsis txawj sau; vim tus Tswv koj tau ua rau peb txawj hais lus heev los ntawm txoj kev ntseeg, tiam sis koj tsis tau ua kom peb txawj sau ntawv; vim koj tau ua rau tag nrho cov neeg no kom lawv muaj peev xwm hais lus zoo, vim yog tus Vaj Ntsuj Plig Dawb Huv uas koj tau muab rau lawv;

24 Thiab koj tau ua rau peb kom peb txawj sau me ntsis xwb, vim yog txoj kev txhav ntawm peb tej tes. Saib seb, koj tsis tau ua kom peb txawj sau zoo li Tsales tus tij laug, vim koj tau ua nws kom tej uas nws tau sau muaj hwj chim tib yam li koj, kom kov yeej tus neeg uas yuav nyeem lawv.

25 Koj kuj tau ua kom peb tej lus muaj hwj chim thiab zoo heev, txawm tias peb tsis txawj muab lawv sau cia; yog li ntawd, thaum peb sau peb pom peb txoj kev qaug zog, thiab dawm taw vim yog txoj kev tso peb tej lus nyob chaw; thiab kuv ntshai nyob tsam Lwm Haiv Neeg yuav thuam peb tej lus.

26 Thiab thaum kuv tau hais li no tas, tus Tswv tau hais rau kuv, hais tias: Cov neeg ruam yuav thuam, tiam sis lawv yuav txom nyem siab; thiab kuv txoj kev hlub tshua yeej muaj txaus rau cov neeg uas siab dawb siab zoo, xwv kom lawv yuav tsis hais li cas rau nej txoj kev qaug zog.

27 Thiab yog tib neeg los cuag kuv kuv yuav ua kom lawv paub txog lawv tej kev tsis muaj zog. Kuv muab txoj kev tsis muaj zog rau tib neeg kom lawv yuav txo hwj chim; thiab kuv txoj kev hlub tshua yeej muaj txaus rau tag nrho txhua tus tib neeg uas txo lawv tej hwj chim rau kuv; vim yog lawv txo lawv tej hwj chim rau kuv, thiab muaj txoj kev ntseeg nyob hauv kuv, ces kuv yuav ua kom tej uas tsis muaj zog rais los mus muaj zog rau lawv.

28 Saib seb, kuv yuav ua kom Lwm Haiv Neeg paub txog lawv txoj kev tsis muaj zog, thiab kuv yuav ua rau lawv paub tias txoj kev ntseeg, txoj kev cia siab thiab txoj kev siab hlub yuav coj los cuag tau kuv—tus uas yog qhov txhawv ntawm tag nrho tej kev ncaj ncees.

29 Thiab kuv, Maulaunais, tau hnov tej lus no, tau raug nplij siab, thiab tau hais tias: Au tus Tswv es, koj txoj kev ncaj yeej yuav raug ua kom tiav, vim kuv paub tias koj ua hauj lwm rau noob neej raws li lawv txoj kev ntseeg;

30 Vim Tsales tus tij laug tau hais rau lub roob Xelees tias, Txav—thiab nws txawm cia li txav. Thiab yog nws tsis tau muaj txoj kev ntseeg ces nws yeej yuav tsis txav; yog li ntawd koj ua hauj lwm tom qab uas neeg muaj txoj kev ntseeg.

31 Vim li no koj thiaj tau ua koj tus kheej rau koj cov pab coj pom; vim tom qab uas lawv tau muaj txoj kev ntseeg, thiab tau hais los ntawm koj lub npe, koj tau ua koj tus kheej rau lawv pom uas muaj hwj chim loj heev.

32 Thiab kuv kuj nco qab tias koj tau hais tias koj tau npaj ib lub tsev rau tib neeg, muaj tseeb tiag, twb yog ib lub uas nyob hauv koj Leej Txiv tej tsev, nyob hauv qhov ntawd neeg yuav muaj ib qho kev cia siab zoo heev ntxiv; yog li ntawd neeg yuav tsum cia siab, los sis nws yuav tsis muaj peev xwm txais ib qho qub txeeg qub teg nyob hauv qhov chaw uas koj tau npaj lawm.

33 Thiab ntxiv, kuv nco qab tias koj tau hais tias koj tau hlub lub ntiaj teb, twb mus txog qhov uas tau tso koj txoj sia rau lub ntiaj teb, xwv kom koj yuav muab tau nws dua mus npaj ib qho chaw rau noob neej.

34 Thiab nim no kuv paub tias txoj kev hlub no uas koj tau muaj rau noob neej yog txoj kev siab hlub; yog li ntawd, tsuas yog tib neeg yuav muaj txoj kev siab hlub xwb tsis li ntawd lawv yuav tsis muaj peev xwm txais tau qhov chaw uas koj tau npaj nyob hauv koj Leej Txiv tej tsev.

35 Yog li ntawd, kuv paub los ntawm tej yam no uas koj tau hais tias, yog Lwm Haiv Neeg tsis muaj txoj kev siab hlub, vim yog peb txoj kev qaug zog, ces koj yuav ua kom lawv pom, thiab yuav muab lawv txoj kev txawj ntse tshem mus, muaj tseeb tiag, tej uas lawv twb tau txais lawm, thiab yuav muab rau lawv cov uas yuav muaj ntxiv nplua mias.

36 Thiab tau muaj tias kuv tau thov rau tus Tswv kom nws yuav muab txoj kev hlub tshua rau Lwm Haiv Neeg, xwv kom lawv yuav muab txoj kev siab hlub.

37 Thiab tau muaj tias tus Tswv tau hais rau kuv tias: Yog lawv tsis muaj txoj kev siab hlub los nws yuav tsis ua cas rau koj, koj twb muaj kev ntseeg lawm; yog li ntawd, koj tej ris tsho yuav raug ua kom huv. Thiab vim koj tau pom koj txoj kev tsis muag zog koj yuav raug ua kom muaj zog, twb yuav tau zaum hauv qhov chaw uas kuv tau npaj nyob hauv kuv Txiv tej tsev.

38 Thiab nim no kuv, Maulaunais, thov hais ncaim mus zoo rau Lwm Haiv Neeg, muaj tseeb tiag, thiab kuj rau kuv cov kwv tij uas kuv hlub, mus txog thaum peb yuav sib ntsib rau ntawm Khetos lub rooj txiav txim, qhov uas txhua tus tib neeg yuav paub tias kuv tej ris tsho yeej tsis tsuas nej tej ntshav.

39 Thiab thaum ntawd nej yuav paub tias kuv tau pom Yexus, thiab nws tau nrog kuv tham tim ntsej tim muag, thiab nws tau hais rau kuv yam txo hwj chim heev, twb tib yam li ib tug neeg hais rau lwm tus nyob hauv kuv yam lus, ntsig txog tej yam no;

40 Thiab kuv tsuas tau sau qho me ntsis xwb, vim yog kuv txoj kev tsis txawj sau.

41 Thiab nim no, kuv xav kom nej yuav nrhiav tus Yexus no tus uas tej yaj saub thiab tej thwj tim tau sau txog, xwv kom txoj kev hlub tshua ntawm Vajtswv Leej Txiv, thiab tus Tswv Yexus Khetos, thiab tus Vaj Ntsuj Plig Dawb Huv, uas ua tim khawv txog lawv, yuav los thiab nyob hauv nej mus ib txhis. Amees.