Vaj Lug Kub
Amas 9


Amas tej lus, thiab Amulej tej lus, uas tau tshaj tawm rau cov neeg uas nyob hauv thaj av Amonaihas. Thiab nkawd kuj raug pov rau hauv qhov taub, thiab cawm dim los ntawm Vajtswv lub hwj chim tseem ceeb uas nyob hauv nkawd, raws li Amas phau ceev xwm txheej.

Muaj nyob hauv tshooj 9 mus tag nrho rau tshooj 14.

Tshooj 9

Amas txib kom cov neeg hauv Amonaihas hloov siab lees txim—Tus Tswv yuav hlub tshua rau cov Neeg Lamas nyob rau hauv lub caij kawg—Yog tias cov Neeg Nifais tso qhov kaj tseg, lawv yuav raug puas tsuaj los ntawm cov Neeg Lamas—Vajtswv Leej Tub yuav los sai—Nws yuav los txhiv cov uas hloov siab lees txim thiab ua kev cai raus dej thiab muaj kev ntseeg nyob hauv nws lub npe. Kwv yees li 82 xyoo ua ntej yug Yexus.

1 Thiab ntxiv, kuv, Amas, tau raug Vajtswv txib tias kuv yuav tsum coj Amulej thiab mus ncig thiab qhuab qhia ntxiv rau cov neeg no, los sis cov neeg uas nyob hauv lub nroog Amonaihas, tau muaj tias thaum kuv tau pib qhuab qhia rau lawv, lawv tau pib cav nrog kuv, hais tias:

2 Koj yog leej twg? Koj xav tias peb yuav ntseeg cov lus pov thawj ntawm ib tug neeg, txawm tias nws yuav qhuab qhia rau peb tias lub ntiaj teb yuav txawj kawg no los?

3 Nim no lawv tsis to taub tej lus uas nkawd tau hais; vim lawv tsis tau paub tias lub ntiaj teb yuav kawg.

4 Thiab lawv kuj tau hais tias: Peb yuav tsis ntseeg koj tej lus txawm tias koj yuav qhia tej uas yuav muaj los yav tom ntej tias ib hnub xwb lub nroog loj no yuav raug puas tsuaj tag.

5 Nim no lawv tsis tau paub tias Vajtswv muaj peev xwm ua tej yam hauj lwm zoo uas xav tsis thoob li ntawd, vim lawv yog ib co neeg siab tawv thiab tawv ncauj.

6 Thiab lawv tau hais tias: Vajtswv yog leej twg, es ho tsis xa tus muaj hwj chim tshaj li ib tug neeg los rau cov neeg no, los tshaj tawm qhov tseeb rau lawv ntawm tej yam xwm loj thiab xav tsis thoob no?

7 Thiab lawv tau sawv los cev tes rau kuv; tiam sis saib seb, lawv tsis ua. Thiab kuv tau sawv yam tsis ntshai kiag tshaj tawm rau lawv, muaj tseeb tiag, kuv tau ua tim khawv yam tsis ntshai rau lawv hais tias:

8 Saib seb, Au nej cov uas phem thiab tiam neeg tsis ncaj es, ua li cas nej yuav hnov qab nej tej yawg koob txoj kev li kev cai; muaj tseeb tiag, ua li cas nej yuav hnov qab Vajtswv tej lus txib sai ua luaj li.

9 Nej tsis nco qab txog peb tus yawg koob, Lihais, tau raug coj tawm ntawm Yeluxalees los ntawm Vajtswv txhais tes los? Nej tsis nco qab tias tag nrho lawv tau raug nws coj dhau hauv tej hav zoov no los?

10 Thiab nej yuav hnov qab sai ua luaj tias nws tau cawm peb tej yawg koob tawm ntawm lawv tej yeeb ncuab tes pes tsawg zaus lawm thiab tshwj lawv tseg kom tsis txhob puas tsuaj, los ntawm lawv cov kwv tij kiag tej tes?

11 Muaj tseeb tiag, thiab yog tsis yog rau nws lub hwj chim uas tsis muaj dab tsi piv tau, thiab nws txoj kev zam txim, thiab nws txoj kev ua siab ntev nyiaj rau peb, ces peb twb raug zam tsis tau kev puas tsuaj nyob hauv lub ntiaj teb ntev ua ntej lub caij no lawm, thiab tej zaum tau raug mus nyob hauv qhov chaw tsis zoo thiab txom nyem uas tsis muaj qhov kawg li lawm.

12 Saib seb, nim no kuv hais rau nej tias nws tau hais kom nej hloov siab lees txim; thiab tsuas yog nej hloov siab lees txim xwb, tsis li ces nej yuav tsis muaj ntiag tug nyob hauv Vajtswv lub nceeg vaj tau. Tiam sis saib seb, tsis tas li no xwb—nws tau txib kom nej hloov siab lees txim, los sis nws yuav ua kom nej puas tsuaj tag huv tib si tawm ntawm lub ntiaj teb no mus; muaj tseeb tiag, nws yuav los xyuas nej nyob hauv nws txoj kev npau taws, thiab nyob hauv nws txoj kev npau taws heev nws yuav tsis tig mus li.

13 Saib seb, nej tsis nco cov lus uas nws tau hais rau Lihais, hais tias: Npaum tias nej yuav coj kuv tej lus txib, nej yuav vam meej nyob hauv thaj av no los? Thiab ntxiv tau hais tias: yog nej tsis coj kuv tej lus txib nej yuav raug txiav tawm ntawm tus Tswv xub ntiag mus.

14 Nim no kuv xav kom nej yuav tsum nco ntsoov, tias vim cov Neeg Lamas tsis tau coj Vajtswv tej lus txib, lawv tau raug txiav tawm ntawm tus Tswv xub ntiag mus. Nim no peb pom tias tus Tswv txoj lus tau muaj tseeb tiag nyob hauv tej yam no, thiab cov Neeg Lamas tau raug txiav tawm ntawm nws xub ntiag, txij li thaum chiv thawj ntawm lawv tej kev txhaum nyob hauv thaj av.

15 Txawm li ntawd los kuv hais rau nej, tias yuav muaj kev zam taus ntau dua rau lawv nyob rau hnub txiav txim dua li rau nej, yog tias nej tseem nyob hauv nej tej kev txog kev txhaum, muaj tseeb tiag, thiab yuav muaj kev zam taus ntau dua rau lawv nyob hauv lub neej no dua li rau nej, tsuas yog nej yuav hloov siab lees txim xwb.

16 Vim muaj ntau lo lus cog tseg uas tau muab cev mus rau cov Neeg Lamas; vim nws yog tej kev li kev cai ntawm lawv tej yawg koob uas tau ua kom lawv pheej nyob hauv lawv txoj kev tawv ncauj; yog li ntawd tus Tswv yuav zam txim rau lawv thiab cia lawv nyob hauv thaj av ntxiv mus.

17 Thiab nyob rau ib lub sij hawm lawv yuav raug coj los mus ntseeg nws txoj lus, thiab paub txog lawv tej yawg koob tej kev li kev cai uas tsis yog; thiab lawv coob tug yuav dim, vim tus Tswv yuav zam txim rau txhua tus uas hu nws lub npe.

18 Tiam sis saib seb, kuv hais rau nej tias yog nej tsis tseg nej tej kev phem ces nej txoj sia yuav tsis cia ntev nyob rau hauv thaj av, vim cov Neeg Lamas yuav raug xa tuaj tawm tsam nej, thiab yog tias nej tsis kam hloov siab lees txim lawv yuav tuaj thaum ib lub sij hawm uas nej tsis paub, thiab nej yuav raug xyuas los ntawm txoj kev puas tsuaj kom tu noob nrho; thiab nws yuav muaj raws li tus Tswv txoj kev npau taws heev.

19 Vim nws yuav tsis cia nej ua neej nyob hauv nej txoj kev tsis ncaj ncees, ua kom nws cov neeg puas tsuaj. Kuv hais rau nej tias, Tsis yog li ntawd; nws yeej yeem cia kom cov Neeg Lamas ua kom tag nrho nws cov neeg uas hu ua Nifais cov neeg puas tsuaj huv tib si mus, yog tias lawv yuav poob taus mus rau hauv kev txog thiab kev txhaum, tom qab uas tau muab qhov kaj ntau thiab kev paub ntau rau lawv los ntawm tus Tswv lawv tus Vajtswv;

20 Muaj tseeb tiag, tom qab uas tau yog ib co neeg uas tau koob hmoov los ntawm tus Tswv; muaj tseeb tiag, tom qab uas tau koob hmoov tshaj dua li lwm haiv neeg, lwm xeem neeg, lwm yam lus, los sis lwm cov neeg; tom qab uas tau muaj tag nrho ib puas tsav yam ua rau lawv paub, raws li lawv siab xav, thiab lawv txoj kev ntseeg, thiab tej kev thov Vajtswv, ntawm tej uas tau muaj los lawm, thiab tseem tab tom muaj, thiab tej uas yuav muaj los;

21 Tau raug saib xyuas los ntawm Vajtswv tus Ntsuj Plig; tau hais lus nrog tej tim tswv, thiab tau raug tus Tswv lub suab hais lus rau; thiab tau muaj tus ntsuj plig ua qhia tej uas yuav muaj los yav tom ntej, thiab tus ntsuj plig qhia kev tshwm sim, thiab ntau yam txiaj ntsig, thiab kev pub txawj hais lwm yam lus, thiab kev pub txoj kev qhuab qhia, thiab lub txiaj ntsim Vaj Ntsuj Plig Dawb Huv, thiab kev pub txawj txhais lus;

22 Muaj tseeb tiag, thiab tom qab uas tau raug Vajtswv coj dim ntawm thaj av Yeluxalees, los ntawm tus Tswv txhais tes; tau raug cawm dim ntawm kev tshaib, thiab ntawm kev mob nkeeg, thiab tag nrho txhua yam kab mob kev nkeeg; thiab lawv tau loj muaj zog nyob hauv kev ua rog, xwv kom lawv thiaj tsis raug puas tsuaj; tau raug coj tawm ntawm kev poob cev qhev ib lub sij hawm dhau ib lub sij hawm, thiab tau raug ceev thiab hwm tseg los txog nim no; thiab lawv tau raug vam meej mus txog thaum lawv nplua nuj nyob hauv txhua yam—

23 Thiab nim no saib seb kuv hais rau nej tias, yog tias cov neeg no, cov uas tau txais koob hmoov ntau heev los ntawm tus Tswv txhais tes, yuav ua txhaum tsis raws li qhov kaj thiab txoj kev paub uas lawv tau muaj, kuv hais rau nej tias yog yuav yog li qhov no, tias yog lawv yuav poob mus rau hauv txoj kev txhaum, ces cov Neeg Lamas yuav tiv tau ntau dua li lawv.

24 Vim saib seb, cov lus cog tseg ntawm tus Tswv tau muab cev mus rau cov Neeg Lamas, tiam sis lawv tsis yog rau nej yog nej ua txhaum; vim tus Tswv tsis tau cog lus ncaj nraim thiab ruaj khov, tias yog nej yuav ntxeev siab tawm tsam nws ces nej yuav raug puas tsuaj huv tib si tawm ntawm lub ntiaj teb mus no los?

25 Thiab nim no vim qhov no, xwv kom nej yuav tsis raug puas tsuaj, tus Tswv tau xa nws tus tim tswv los saib xyuas nws cov neeg ntau tus, tshaj tawm rau lawv tias lawv yuav tsum mus ncig thiab hais nrov nrov rau cov neeg no, hais tias: Nej cia li hloov siab lees txim, vim ntuj ceeb tsheej lub nceeg vaj nyob ze lawm;

26 Thiab tsis ntau hnub txij no mus Vajtswv Leej Tub yuav los nyob hauv nws lub yeeb koob; thiab nws lub yeeb koob yuav yog lub yeeb koob ntawm Leej Txiv Tib Leej Tub, uas muaj puv npo kev zoo, kev ncaj, thiab kev tseeb, muaj puv npo kev siab ntev, kev hlub tshua, thiab kev ua siab ntev nyiaj, hnov nws cov neeg tej lus thov nrawm thiab teb lawv tej lus thov.

27 Thiab saib seb, nws yuav los txhiv cov uas yuav ua kev cai raus dej rau txoj kev hloov siab lees txim, dhau los ntawm txoj kev ntseeg nws lub npe.

28 Yog li ntawd, nej cia li npaj tus Tswv txoj kev, vim lub sij hawm los txog lawm tias neeg txhua tus yuav tau sau ib qho nqi zog ntawm lawv tej hauj lwm, raws li tej uas lawv tau ua los lawm—yog lawv tau ua ncaj ncees lawv yuav tau sau txoj kev cawm seeg ntawm lawv tej ntsuj plig, raws li lub hwj chim thiab txoj kev cawm dim ntawm Yexus Khetos; thiab yog lawv ua phem lawv yuav sau txoj kev raug txim ntawm lawv tej ntsuj plig, raws li lub hwj chim thiab kev raug txhom ntawm tus dab.

29 Nim no saib seb, qhov no yog tus tim tswv lub suab, hais nrov nrov rau cov neeg.

30 Thiab nim no, kuv cov kwv tij uas kuv hlub es, vim nej yog kuv cov kwv tij, thiab nej yuav tsum raug hlub, thiab nej yuav tsum ua tej hauj lwm uas tsim nyog rau txoj kev hloov siab lees txim, pom tau tias nej tej siab tau tawv heev tawm tsam Vajtswv txoj lus, thiab tau pom tias nej yog ib co neeg tau yuam kev thiab tau poob lawm.

31 Nim no tau muaj tias thaum kuv, Amas, tau hais tej lus no tas lawm, saib seb, cov neeg tau npau taws rau kuv vim kuv tau hais rau lawv tias lawv tau yog ib cov neeg siab tawv thiab tawv ncauj.

32 Thiab vim kuv kuj tau hais rau lawv tias lawv tau yog ib co neeg yuam kev thiab tau poob lawm lawv tau npau taws rau kuv, thiab tau nrhiav kev cev lawv tej tes rau kuv, xwv kom lawv yuav tau muab kuv pov rau hauv qhov taub.

33 Tiam sis tau muaj tias tus Tswv tsis tau pub tias lawv yuav tsum txhom tau kuv lub sij hawm no thiab muab kuv pov rau hauv qhov taub.

34 Thiab tau muaj tias Amulej tau mus thiab tau sawv nres nroos, thiab tau pib qhuab qhia rau lawv thiab. Thiab nim no Amulej tej lus tsis tau muab sau tag nrho tseg, txawm li ntawd los nws cov lus ib txhia tau muab sau rau hauv phau ntawv no.