Pukfel
Alma 9


Ekkewe kapas an Alma, me pwan ekkewe kapas an Amulek, minne ra affateno ngeni ekkewe aramas minne ra nom non ewe fonuen Ammonaia. Iwe ra pwan katurunong non kanapus, me ngaseno me ren ewe manaman mi amwarar an Kot minne a nom rer, anongonong won ewe uruon Alma.

Mi kapachenong non sopun 9 ngeni 14.

Sopun 9

Alma a annuku ekkewe aramasen Ammonaia pwe repwe aier—Ewe Samon epwe umoumoch ngeni ekkewe chon Leiman non ewe ranin soponon—Ika ekkewe chon Nifai ra nikitano ewe saram, repwe ninnino me ren ekkewe chon Leiman—Ewe Noun Kot epwe mwitir wareto—I epwe angasa ekkewe ra aier, ra papatais, me a wor ar nuku non Itan we. Arap ngeni 82 Ier Mwen Kraist.

1 Iwe pwan, ngang, Alma, pokiten ua fen annuk me ren Kot pwe upwe angei Amulek me feino me afanafan sefan ngeni ekkei aramas, are ekkewe aramas minne ra nom non ewe teninimwen Ammonaia, non ewe fansoun nupwen ua poputa ne afanafan ngeni ir, ra poputa ne anini ngeniei, ra apasa:

2 En ion? Ka ekieki pwe am aupwe nuku ewe kapasen pwarata an emon mwan, inamo i a afanafan ngenikich pwe ewe fonufan epwe morono?

3 Iei rese weweiti ekkewe kapas minne ra apasa; pun rese sinei pwe ewe fonufan epwe morono.

4 Iwe ra pwan apasa: Am ausap nuku om kewe kapas ika pwe kopwe osini pwe ei teninimw mi napanap epwe tano non ew ran.

5 Iei rese sinei pwe Kot mi tongeni fori ekkena sokkun angang mi amwarar, pun ir ra ew aramas mi netip pochokun me nukumach.

6 Iwe ra apasa: Ion Kot, ewe ese tinato nap seni emon chok mwan nein ekkei aramas, pwe repwe affata ngeni ir ewe ennetin sokkun mettoch mi auchea me amwarar?

7 Iwe ra uta pwe repwe wata pour woi; nge nengeni, rese fori. Iwe ua uta ren pwaracho pwe upwe affata ngeni ir, ewer, ua pwaracho ne pwarata ngeni ir, ua apasa:

8 Nengeni, O ami ei tappin aramas mi ngaw me tipeforea, ifa usun oua fen monnuki eerenien sememi kewe; ewer, ifa mwitirin ami oua fen monnuki ekkewe annukun Kot.

9 Ouse chechemeni pwe semach we, Liai, a emmweniu seni Jerusalem me ren poun Kot? Ouse chechemeni pwe ir meinisin ra emmwen me ren me non ewe fonu pon?

10 Oua fen mwitir monnuki ifa chommong fansoun i a angasa semach kewe seni ne poun ekkewe chon koum ngeni ir, me tumunur seni ar repwe ninnino, pwan mwo me ren poun pwisin pwir kewe?

11 Ewer, iwe ika esap ren an we manaman mi napanap, me an umoumoch, me an engino ngenikich, sipwe wesewesen fokkun pokupokuno seni unungen ewe fonufan me nom me mwen atun ei fansoun, me eni sipwe fen ewiis ngeni ew nikinik mi eriaffou me weires esemuch.

12 Nengeni, iei ua apasa ngenikemi pwe a annuku ngenikemi pwe oupwe aier; tiwenon chok ika oupwe aier, ami ouse tongeni muuni ewe muun Kot. Nge nengeni, esap ikkei meinisin—i a annuku ngenikemi pwe oupwe aier, are i epwe unusen nii kemino seni unungen ewe fonufan; ewer, i epwe churikemi non an song, iwe non an song mi pochokun i esap kunnuno.

13 Nengeni, ouse chechemeni ekkewe kapas minne i a apasa ngeni Liai, a apasa: Ukukun ami oupwe aneasochisi ai kewe annuk, ami oupwe pisekisekino me non ewe fonu? Iwe a pwan apasa sefan: Ukukun ami ousap aneasochisi ai kewe annuk ami oupwe pokupokuno me mwen ewe Samon.

14 Iei ua mochen pwe oupwe chechemeni, pwe non ukukun an ekkewe chon Leiman rese aneasochisi ekkewe annukun Kot, ra fen pokupokuno me mwen ewe Samon. Iei sia kuna pwe ewe kapasen ewe Samon a fen punguno me non ei mettoch, iwe ekkewe chon Leiman ra fen pokupokuno me mwen i, seni nepoputan ar kewe atai annuk me non ewe fonu.

15 Nge inamo ua apasa ngenikemi, pwe epwe kon mecheres ngeni ir non ewe ranin kapung nap senikemi, ika oupwe nonnom non ami kewe tipis, ewer, me epwe pwan kon mecheres ngeni ir non ei manau nap senikemi, tiwenon chok ika oupwe aier.

16 Pun mi chommong pwon minne ra kawor ngeni ekkewe chon Leiman; pun iei pokiten eerenien semer kewe ewe a fori ir pwe repwe nonnom non ar nikinikin rese weweiti; iei minne ewe Samon epwe umoumoch ngeni ir me attamano ar nonnom non ewe fonu.

17 Iwe atun ekkoch fansoun repwe emmwen ngeni ar repwe nuku non an kapas, me ar repwe sinei usun muanin eerenien semer kewe; iwe chommong me neir repwe manau, pun ewe Samon epwe umoumoch ngeni meinisin ekkewe repwe kokkori itan we.

18 Nge nengeni, ua apasa ngenikemi pwe ika oupwe soposopono non ami fofforungaw iwe ranimi kewe resap nangatameno me non ewe fonu, pun ekkewe chon Leiman repwe titito womi; iwe ika ousap aier repwe feito non ew fansoun nupwen ousap sinei, iwe oupwe chu ren unusen kiteter; iwe epwe anongonong won ewe song mi pochokun an ewe Samon.

19 Pun i esap mutata pwe oupwe manau non ami angangangaw, ren ami oupwe nieno noun kewe aramas. Ua apasa ngenikemi, Apw; eni epwe fen mutata pwe ekkewe chon Leiman repwe tongeni nieno noun kewe aramas meinisin ekkewe ra iteni ekkewe aramasen Nifai, ika pwe epwe tufich pwe repwe tongeni turunong non tipis me atai annuk, mwirin an wor watten saram me watten mirit a kawor ngeni ir me ren ewe Samon ar Kot;

20 Ewer, mwirin ar ra fen aramas mi fokkun chen me ren ewe Samon; ewer, mwirin ar ra fen chen nap seni ekkoch pwan muu, einang, sokopaten kapas, are aramas; mwirin an ekkei mettoch meinisin a fen pwano ngeni ir, anongonong won ar mochen, me ar nuku, me iotek, usun met minne a fen fis, me minne mi fis, me minne epwe fis;

21 Mwirin ar ra fen chu me ren ewe Ngunun Kot; ra fen kapas ngeni ekkewe chon nang, me mwirin ar ra fen angei kapas me ren mongungun ewe Samon; me mwirin ewe ngunun osini, me ewe ngunun pwarata, me pwan chommong niffang, ewe niffangen kapas ren kapasen ekis, me ewe niffangen afanafan, me ewe niffangen Ngun mi Fel, me ewe niffangen awewen kapas;

22 Ewer, iwe mwirin ar ra fen ngaseno me ren Kot seni ewe fonuen Jerusalem, me ren poun ewe Samon; mwirin ar ra fen tumun seni nengita, me seni semwen, me sokopaten samau meinisin seni sokopaten nikinik; me mwirin ra fen pochokununo non maun, pwe resap tongeni ninnino; mwirin ar ra fen katou seni fotek non fansoun ngeni fansoun, me mwirin ar ra fen isois me tumun tori iei; iwe ra fen feioch tori ar pisekisekino non meinisin sokopaten mettoch—

23 Iwe iei nengeni ua apasa ngenikemi, pwe ika ekkei aramas, ekkewe ra fen angei fokkun chommong feioch seni poun ewe Samon, repwe atai annuk ne ungeni ewe saram me mirit minne a wor rer, ua apasa ngenikemi pwe ika epwe iei usun, pwe ika repwe turunong non atai annuk, epwe fokkun mecheres ngeni ekkewe chon Leiman nap seni ir.

24 Pun nengeni, ekkewe pwon an ewe Samon ra kawor ngeni ekkewe chon Leiman, nge rese kawor ngenikemi ika oupwe atai annuk; pun met ewe Samon ese pwon non fatafatoch me apasa non pochokun, pwe ika oupwe ungeni i iwe oupwe unusen ninnino seni unungen ewe fonufan?

25 Iwe iei ren ei popun, pwe ousap tongeni ninnino, ewe Samon a tinato noun chon nang pwe repwe churi chommong me nein noun kewe aramas, a affata ngeni ir pwe repwe fokkun feino me ennetin afanafan ngeni ekkei aramas, me apasa: Oupwe aier, pun ewe muun nang a arapeto;

26 Iwe ese chommong ran seni ewe fansoun ewe Noun Kot epwe wareto non an ning; iwe an ning epwe ningen Noun ewe Sam Anamon, mi uren umoumoch, pungoch, me ennet, uren tipepos, kirekiroch, me engino, mwitir ne rongorong sion noun kewe aramas me ponueni ar iotek.

27 Iwe nengeni, a wareto pwe epwe angasa ekkewe ir repwe papatais ngeni aier, ren nuku non itan we.

28 Iei minne, oupwe amonnata aanen ewe Samon, pun ewe fansoun a arapeto pwe aramas meinisin repwe angei ew niwinin ar angang, anongonong won usun minne ra fen fori—ika ra fen tupwon repwe angei amanauen ngunur, anongonong won ewe manaman me ngaseno an Jises Kraist; iwe ika ra fen ngaw repwe angei poutmwaninon ngunur, anongonong won ewe manaman me fotekin ewe tefin.

29 Iei nengeni, iei ewe mongungun ewe chon nang, a kapas ngeni ekkewe aramas.

30 Iwe iei, ami pwi achengicheng, pun ami pwi, iwe ita oupwe achengicheng, me ita oupwe uwani angang mi fich ngeni aier, pokiten netipemi ra fen fokkun pochokununo seni ewe kapasen Kot, me pokiten oua fen ew monuchenon me turutiwen aramas.

31 Iei non ewe fansoun pwe nupwen ngang, Alma, ua fen apasa ekkei kapas, nengeni, ekkewe aramas ra song rei pokiten ua apasa ngeni ir pwe ra ew aramas netip pochokun me nukumach.

32 Iwe pwan pokiten ua apasa ngeni ir pwe ra ew monuchenon me ew turutiwen aramas ra song rei, iwe ra sossot ne wata pour woi, pwe repwe tongeni oturaeinong non kanapus.

33 Nge non ewe fansoun ewe Samon ese mut ngeni ir pwe repwe angeiei atun ena fansoun me oturaeinong non kanapus.

34 Iwe non ewe fansoun pwe Amulek a feino me uta, me a pwan poputa ne afanafan ngeni ir. Iwe iei ekkewe kapas an Amulek rese makketiw meinisin, nge inamo ew kinikinin an kewe kapas ra makketiw non ei puk.