1 Ao ngai ae Aramwa, I a manga tuangaki riki iroun te Atua bwa N na kaira Amureki ma ni waaki nako ni kabwarabwara i buakoia te botanaomata aio, ke te botanaomata ake a mena n te kaawa are Amonia, ao e koro bukina bwa ngke I waaki ni kabwarabwara nakoia, ao a moanna ni kauntaeka ma ngai ni kangai:

2 Antai ngkoe? Ko kantaningaia bwa ti na kakoaua ana kakoaua ^atemanna te aomata, e ngae ngke e kabwarabwara nakoira bwa e na mauna nako te aonaba?

3 Ngkai aki ataa nanon te taeka ake a taekin; bwa aki ataia ae te aonaba e na mauna nako.

4 Ao a taku naba: ti na aki kakoauai am taeka ngkana ko taetae ni burabetiia bwa te kaawa ae korakora ma ni bubura aio e na kamaunaki n te bong ae ti ^ateuana.

5 Ngkai aki ataia ae te Atua e kona ni karaoi mwakuri aika a kamimi, bwa bon aomata aika a matoatoa nanoia ao a bonotaninga.

6 Ao a taku: ^aAntai te Atua, ae karokoa mwaakana ^biroun te aomata ae ti temanna i buakoia te botanaomata aio, bwa e na taekina koauan bwaai aika a korakora ma ni kamimi.

7 Ao a waaki rake bwa ana katokai baia iaou; ma nooria, a aki. Ao I tei ma te ninikoria n taekinna nakoia, eng, I ninikoria ni kakoaua nakoia, ni kangai:

8 Nooria, O ngkami te ^aroro ae buakaka man rairaki nako, kam kanga ni mwaninga kateia tamami; eng, kam a waekoara ni mwaninga ana tua te Atua.

9 Kam aki uringa are tamara, Riaai, e kaotinakoaki mai i Ierutarem ni ^abain te Atua? Kam aki uringa are a bane ni kairaki irouna rinanon te rereua?

10 Ao kam a mwaninga naba n te tai ae waekoa bwa iraua te tai ae e kamaiuia tamara mai i nanon baia aia kairiribai, ao e kawakinia bwa a na aki kamaunaki, man baia naba bon oin tariia.

11 Eng, ao ngke arona bwa akea mwaakana ae e aki kona ni kabootauaki, ao ana nanoanga, ao ana taotaonakinnano n te tai ae maan nakoira, ao ti na bon aki kona n tuka kamaunakira man te aonaba aio i mwaain te tai aei, ao tao ti na bon tiku n te aro n nanokawaki man rawawata ae ^aaki totoki.

12 Nooria, ngkai I taku nakoim bwa e anga te tua nakoim bwa ko na rairananom; ao ngkana ko aki rairananom ao ko na bon aki kona ni karekea uean te Atua. Ma nooria, e tuai ni bane—e a tia n anga te tua bwa ko na rairananom, bwa e rawa ni ^akamaunako mai aon te aonaba aio; eng, e na kawariko n unna, ao e na bon aki tannako unna ae ^bkorakora mai iroum.

13 Nooria, kam aki uringi taeka ake e taekin nakon Riaai, ni kangai bwa: ^aNgkana kam kaawakin au tua, ao kam na kakabwaiaki iaon te aba aei? Ao e manga taekinaki naba ae kangai: Ngkana kam aki kaawakin au tua kam na kamaunaki mai matan te Uea.

14 Ngkai, I tangiria bwa kam na uringnga, bwa ngkai Reimwanaite a tia n aki kaawakin ana tua te Atua, ao a bon tia ni ^akamaunaki mai matan te Uea. Ngkai ti nooria bwa ana taeka te Uea e a tia ni kaotaki koauana n te bwai aio, ao Reimwanaite a tia ni kamaunaki mai matana, man te tai are a riaon tua iaon te aba.

15 Ma e ngae n anne I taku nakoimi, bwa e na ^abeebete riki ibukiia n te bong ni motiki taeka ni kabootauaki nakoimi, ngkana kam tiku i nanon ami bure, eng, ao e na beebete riki ibukiia n te maiu aei ni kabootauaki nakoimi, ti ngkana kam rairinanomi.

16 Bwa a mwaiti taian berita ake ^aanganaki Reimwanaite; bwa bon ibukin ^bkatein tamaia ae ngaia ae a tiku n aroia n ^caki atatai; ngaia ae te Uea e na nanoangaia ao e na ^dkamaana tikuia iaon te aba.

17 Ao n te taina ao a ^ana kakoaua ana taeka, ao a na ataa kairuan kateia tamaia; ao a mwaiti mai i buakoia aika a na kamaiuaki, bwa te Uea e na nanoanga nakoia ni kabane ake a ^bwetea arana.

18 Ma nooria, I taku nakoimi bwa ngkana kam teimatoa n ami buakaka ao e na bon aki kamaanaki ami bong n te aba, bwa a na kanakoaki ^aReimwanaite nakoimi; ao ngkana kam aki rairinanomi ao a na roko n te tai ae ko aki ataia, ao kam na kawaraki n te urubwai ae ^bkorakora; ao e na kaineti ma aron ^cunin te Uea ae kakamaku.

19 Bwa e na aki kariaia bwa kam na maiu i nanon ami bure, are e na kamaunaia ana aomata. I kangai nakoimi, Tiaki, e kukurei riki bwa Reimwanaite a na ^akamaunaia ana aomata ni kabane ake aranaki bwa ana botanaomata Nibwaai, ngkana arona bwa a kona ni ^bbwaka i nanon te bure ma riaoan tua, i mwin reken te oota ao te rabakau ae bati are a tia n anganaki iroun aia Uea ae Atuaia.

20 Eng, i mwin rikiia bwa aomata aika a korakora tangirakiia iroun te Uea; eng, i mwin tangirakiia ae bati iaoia riki aba nako, reeti, neewe, ke aomata, i mwin ^akaotan bwaai ni kabane nakoia n aron nanoia, ao aia onimaki, ao aia tataro, ibukin bwaai ake a tia, ao bwaai ake ngkai, ao bwaai ake a na roko,

21 I mwin kawarakia iroun tamnein te Atua, i mwin taetaeia ma anera, ao i mwin te taetae nakoia ni bwanan te Uea; ao i mwin reken tamnein te taeka ni burabeti, ao tamnein te kaotioti, ao bwaintituaraoi aika a mwaiti, te bwaintituaraoi ae te taetae n neewe, ao te bwaintituaraoi ibukin te kabwarabwara, ao te bwaintituaraoi ae te Tamnei ae Raoiroi, ao te bwaintituaraoi ibukin te ^arairairi;

22 Eng, ao i mwin are a tia ni ^akamaiuaki iroun te Atua mai Ierutarem, ni bain te Uea; i mwin kamaiuakia man te rongo, ao man te aoraki, ao aekakin aoraki nako n aekaia; ao a bon kamatoaki n te buaka, bwa a na aki kamaunaki; i mwin kaotinakoaia man te ^btautoronaki n te tai teuana ma te tai teuana, ao i mwin kawakinakia n uaa ngkai; ao a tia n nakoraoi aroia ni karokoa ae a kaubwai n aekan bwaai nako—

23 Ao ngkai nooria I taetae nakoimi bwa ngkana te botanaomata aio, ake a tia ni karekei kakabwaia aika a mwaiti mai bain te Uea, a riaon te tua ni kaitaraa te oota ao te rabakau are iai irouia, I taku nakoimi bwa ngkana aio ae riki, ae a na bwaka n riaoan te tua, e na bon ^anakoraoi riki aroaroia Reimwanaite nakoia.

24 Bwa nooria, ana ^aberita te Uea e rotiia Reimwanaite, ma aki roko iroumi ngkana kam bure; bwa tiaki e a tia te Uea ni katereterea ana berita ma ni kamatoa ana tua, bwa ngkana kam kaitaraa ao kam na bon kamaunaki raoi mai matan te aonaba aio?

25 Ao ibukin aio bwa kam aki kamaunaki, e a tia te Uea ni kanakoa ana anera bwa e na kawaria aika a mwaiti mai i buakomi, n taekinna nakoia bwa a na waaki nako ma ni kakorakoraia n taetae nakoia te botanaomata aio ni kangai: ^aRairinanomi, bwa e a kan roko uean karawa;

26 Ao i mwin te bong ae e ^aaki mwaiti e na roko ni mimitong Natin te Atua; ao mimitongina aiaron mimitongin ana ^bRikitemanna te Tama, ae e onrake n te ^cakoi, te tituaraoi, ao te koaua, ae e onrake n te taotaonakinnano, te ^dnanoanga, ao taonan te nano n te tai ae maan, ma ni waekoa n ^eongo tangiia ana aomata ao man kaekai aia tataro.

27 Ao nooria, e roko bwa e na ^akabooia akana a na ^bbwabetitoaki nakon te rairannano, rinanon onimakinan arana.

28 Mangaia ae, kam na katauraoa kawain te Uea, bwa e a kan roko te tai are ni kabane aomata a na karekea kanuangan aia ^amwakuri, n aron are a tia ni karaoia—ngkana a raoiroi a na ^bkarekea kamaiuan tamneia, n aron te mwaaka ao te kainaomataki are iroun Iesu Kristo; ao ngkana a tia ni buakaka a na karekea ^ckabuakakan tamneia, n aron mwaakan ao te tautoronaki mai iroun te riaboro.

29 Ngkai nooria, aio bwanan te anera, are e taetae nakoia te botanaomata aio.

30 Ao ngkai, tariu aika kam ^atangiraki, bwa ngkami tariu, ao kam riai n tangiraki, ao kam riai ni karaoi mwakuri aika a kaineti nakon te rairannano, ngkai e nooraki bwa a korakora matoatoan nanomi ni kaitaraa ana taeka te Atua, ngkai e nooraki bwa te botanaomata ngkami aika kam ^bbua ao kam bwaka.

31 Ngkai e koro bukina bwa ngkai ngai, Aramwa I a tia n taekin taeka aikai, nooria, aomata a un irou ibukina bwa I taku nakoia bwa te botanaomata ngaia ae a matoatoa nanoia ao a ^abonotaninga.

32 Ao ibukina naba bwa I taku nakoia bwa aomata ngaia aika a bua ao a bwaka ao a un irou, ao a kakaea te anga are a na katokai baia iaou, bwa aonga n tewenakoai n te karabuti.

33 Ma e koro bukina bwa te Uea e aki kariaia bwa a na anai ao a na teweai nako nanon te karabuti.

34 Ao e koro bukina bwa Amureki e waerake, ao e a waaki ni kabwarabwara nakoia naba. Ao ngkai ana ^ataeka Amureki aki bane ni koreaki, ma e ngae n anne tabeua ana taeka a bon koreaki n te boki aei.