1 Saib seb kuv cov kwv tij uas kuv hlub es, vim tus Tswv tau cia rau kuv tuaj ntsib nej, yog li ntawd kuv yuav siv kuv yam lus hais rau nej; muaj tseeb tiag, los ntawm kuv lub qhov ncauj kiag, pom tau hais tias zaum no yog thawj zaug uas kuv tau hais lus rau nej los ntawm tej lus ntawm kuv lub qhov ncauj, vim kuv tau tshwj kuv tus kheej tag nrho rau lub rooj txiav txim, vim kuv muaj hauj lwm ntau es kuv thiaj tsis tau tuaj ntsib nej.

2 Thiab ntshe kuv twb tuaj tsis tau thaum lub sij hawm no yog hais tias tsis tau muab lub rooj txiav txim rau lwm tus, pauv kuv qhov chaw los kav; thiab tus Tswv, muaj kev hlub tshua ntau cia rau kuv tuaj ntsib nej.

3 Thiab saib seb, kuv cia siab thiab xav hais tias kuv yuav tuaj pom tias nej twb txo hwj chim rau Vajtswv, thiab hais tias nej thov nws txoj kev tshav ntuj tsis tu ncua, kom kuv yuav tuaj pom tias nws tsis xav tias nej muaj txim, kom kuv yuav tuaj pom tias nej tsis raug txoj kev nyuaj uas phem ib yam li peb cov kwv tij uas nyob hauv Xalahelas raug.

4 Tiam sis cia li qhuas Vajtswv lub npe, vim nws tau ua rau kuv paub, muaj tseeb tiag, tau ua rau kuv xyiv fab heev thaum kuv paub tias lawv rov txhim tsa dua ua raws li nws txoj kev ncaj ncees.

5 Thiab kuv cia siab, raws li Vajtswv tus Ntsuj Plig uas nyob hauv kuv, hais tias kuv kuj yuav muaj kev xyiv fab rau nej; txawm li ntawd los kuv tsis xav kom kuv txoj kev xyiv fab rau nej yog los ntawm tej kev txom nyem thiab kev tu siab ntau uas kuv muaj rau cov kwv tij nyob tom Xalahelas, vim saib seb, kuv muaj kev xyiv fab rau lawv tom qab tau hla dhau tej kev txom nyem thiab kev tu siab ntau heev.

6 Tiam sis saib seb, kuv cia siab tias nyaj nej tsis zoo ib yam li nej cov kwv tij uas tsis ntseeg hlo li; kuv cia siab tias nyaj nej tsis khav theeb vim nej lub siab muab hlob; muaj tseeb tiag, kuv cia siab tias nyaj nej tsis muab nej lub siab tso rau tej kev nplua nuj thiab tej khoom tsis muaj nuj nqis ntawm lub ntiaj teb; muaj tseeb tiag, kuv cia siab tias nyaj nej tsis teev dab teev mlom, tiam sis nej teev tiam tus Vajtswv uas tseeb thiab muaj txoj sia nyob, thiab nej yuav cia siab tos ntsoov rau txoj kev zam txim ntawm nej tej kev txhaum, nrog txoj kev ntseeg uas kav ib txhis, uas yuav muaj los.

7 Vim saib seb, kuv hais rau nej tias muaj ntau yam yuav los; thiab saib seb, muaj ib yam uas tseem ceeb tshaj txhua yam—vim saib seb, lub sij hawm tshuav tsis deb ncua lawm uas tus Txhiv Dim yuav los thiab nyob nrog nws cov neeg.

8 Saib seb, kuv tsis yog hais tias nws yuav los nyob nrog peb thaum lub caij uas nws tseem nyob hauv nws cev uas txawj tuag; vim saib seb, tus Ntsuj Plig tsis tau hais rau kuv tias yuav yog li no. Nim no kuv twb tsis paub txog qhov no; tiam sis kuv paub npaum li no, hais tias tus Tswv uas yog Vajtswv yeej muaj hwj chim ua tau txhua yam uas yog raws li nws txoj lus.

9 Tiam sis saib seb, tus Ntsuj Plig tau hais npaum li no rau kuv, hais tias: Tshaj tawm rau cov neeg no, hais tias—Nej cia li hloov siab lees txim, thiab cia li npaj tus Tswv txoj kev, thiab cia li taug nws txoj kev, uas ncaj; vim saib seb, twb yuav txog lub sij hawm rau lub nceeg vaj ceeb tsheej lawm, thiab Vajtswv Leej Tub los rau hauv lub ntiaj teb.

10 Thiab saib seb, nws yuav yug los ntawm Maivliag, nyob hauv Yeluxalees uas yog peb cov yawg koob thaj av, thiab Maivliag yuav yog ib tug nkauj xwb, yog ib tug uas Vajtswv xaiv thiab muaj nuj nqis heev, tus uas tus Vaj Ntsuj Plig Dawb Huv lub hwj chim yuav roos thiab ua rau nws xeeb tub, thiab yuav yug ib tug me tub, muaj tseeb tiag, twb yog Vajtswv Leej Tub.

11 Thiab nws yuav mus, raug tej kev mob thiab tej kev txom nyem thiab tej kev ntxias txhua yam; thiab ua li no xwv kom yuav muaj raws li txoj lus uas hais tias nws yuav ris nws cov neeg tej kev mob thiab tej kev nkeeg.

12 Thiab nws yuav ris txoj kev tuag, xwv kom nws yuav daws tau kev tuag tej hlua uas khi nws cov neeg; thiab nws yuav ris lawv tej kev qaug dag qaug zog, xwv kom nws lub siab thiaj li yuav muaj kev hlub tshua puv nkaus, ntawm sab cev nqaij daim tawv, xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog.

13 Nim no tus Ntsuj Plig paub txhua yam; txawm li ntawd los Vajtswv Leej Tub yuav raug kev txom nyem ntawm sab cev nqaij daim tawv xwv kom nws yuav ris tau nws cov neeg tej kev txhaum, xwv kom nws yuav rho tau lawv tej kev ua txhaum tawm raws li lub hwj chim ntawm nws txoj kev txhiv dim; thiab nim no saib seb, nov yog cov lus tim khawv uas nyob hauv kuv.

14 Nim no kuv hais rau nej tias nej yuav tsum hloov siab lees txim, thiab yug dua tshiab; vim tus Ntsuj Plig tau hais tias yog nej tsis yug dua tshiab nej yuav tsis tau lub nceeg vaj ceeb tsheej los ua nej tug; yog li ntawd cia li los thiab ua kev cai raus dej rau txoj kev hloov siab lees txim, xwv kom Khetos yuav ntxuav tau nej tej kev txhaum tawm, xwv kom nej yuav ntseeg Vajtswv tus Me Nyuam Yaj, tus uas yuav tshem neeg ntiaj teb tej kev txhaum, tus uas muaj hwj chim pab kom dim thiab ntxuav tawm tag nrho tej kev tsis ncaj ncees.

15 Muaj tseeb tiag, kuv hais rau nej tias cia li los thiab tsis txhob ntshai, thiab muab txhua txoj kev txhaum tso tseg, uas yooj yim tawm tsam nej, uas pheej khi nej kom raug puas tsuaj, muaj tseeb tiag, cia li los thiab tawm mus, thiab qhia rau nej tus Vajtswv tias nej txaus siab los hloov siab lees txim rau nej tej kev txhaum thiab khi lus nrog nws los ua raws li nws tej lus txib, thiab ua tim khawv rau nws hnub no los ntawm txoj kev mus rau hauv cov dej ua kev cai raus dej.

16 Thiab tus uas ua li no, thiab coj Vajtswv tej lus txib txij no mus, tus ntawd yuav nco qab ntsoov tias kuv hais rau nws, muaj tseeb tiag, nws yuav nco qab qhov uas kuv tau hais rau nws lawm hais tias, nws yuav tau txoj sia nyob mus ib txhis, raws li cov lus tim khawv ntawm tus Ntsuj Plig Dawb Huv, uas ua tim khawv nyob hauv kuv.

17 Thiab nim no kuv cov kwv tij uas kuv hlub, nej puas ntseeg tej yam no? Saib seb, kuv hais rau nej tias, muaj tseeb tiag, kuv paub tias nej yeej ntseeg tej no; thiab qhov uas ua rau kuv paub tias nej yeej ntseeg tej no twb yog los ntawm txoj kev tshwm sim ntawm tus Ntsuj Plig uas nyob hauv kuv. Thiab nim no vim nej txoj kev ntseeg muaj zog ntsig txog tej no, muaj tseeb tiag, ntsig txog tej uas kuv tau hais lawm, kuv txoj kev xyiv fab ntau kawg li.

18 Vim ib yam li kuv tau hais rau nej txij thaum pib los, hais tias kuv xav kom nej tsis txhob raug txoj kev nyuaj uas phem ib yam li nej cov kwv tij, ib yam li ntawd twb ua rau kuv txaus siab raws li qhov kuv xav.

19 Vim kuv paub tias nej yeej taug tej kev ncaj ncees; kuv paub tias nej yeej nyob hauv txoj kev uas coj mus rau Vajtswv lub nceeg vaj; muaj tseeb tiag, kuv paub tias nej tab tom ua kom nws txoj kev ncaj.

20 Kuv paub tias los ntawm cov lus tim khawv ntawm nws txoj lus, twb ua rau nej paub li ntawd; hais tias nws tsis taug tej kev nkhaus; thiab nws tsis ua txawv ntawm tej uas nws twb tau hais lawm; thiab nws tsis tig ntawm sab xis mus rau sab laug hlo li, los sis ntawm qhov uas yog mus rau qhov uas tsis yog; yog li ntawd, nws txoj kev yog ib txoj uas ncig mus ib txhis li.

21 Thiab nws yuav tsis nyob hauv tej lub tuam tsev uas tsis dawb huv; thiab nws tsis cia tej uas vuab tsuab los sis tsis huv mus rau hauv Vajtswv lub nceeg vaj; yog li ntawd kuv hais rau nej tias lub sij hawm yuav los, muaj tseeb tiag, thiab yuav yog thaum txog hnub kawg, thaum tus uas vuab tsuab tseem yuav nyob hauv nws txoj kev vuab tsuab li qub.

22 Thiab nim no kuv cov kwv tij uas kuv hlub es, kuv hais tej yam no rau nej xwv kom kuv yuav tsa tau nej los nco txog nej txoj hauj lwm rau Vajtswv, xwv kom nej yuav taug kev tsis muaj txim rau ntawm nws xub ntiag, xwv kom nej yuav taug kev raws li Vajtswv tus txheej txheem dawb huv, tom qab cov thawj coj hauv lub Koom Txoos tau txais nej.

23 Thiab nim no kuv xav kom nej txo hwj chim, thiab mloog lus thiab muaj siab mos siab muag; yooj yim qhia; muaj kev ua siab ntev puv npo thiab ua siab ntev nyiaj; tswj nej tus kheej rau txhua yam; rau siab coj Vajtswv tej lus txib txhua lub sij hawm; thov txais txhua yam uas nej xav tau, tsis hais sab cev nqaij daim tawv thiab sab ntsuj plig los yog; ua Vajtswv tsaug tas mus li rau txhua yam uas nej tau txais.

24 Thiab nco ntsoov kom nej muaj kev ntseeg, kev cia siab, thiab kev siab hlub, thiab yog li ntawd nej yuav ua tau ntau yam zoo tas mus li.

25 Thiab thov kom tus Tswv foom koob hmoov rau nej, thiab ceev kom nej tej tsoos tsho kom tsis txhob muaj qhov ceb, xwv kom thaum kawg tus Tswv yuav coj nej mus zaum nrog Anplaham, Ixaj, thiab Yakhauj, thiab cov yaj saub dawb huv txij puag thaum lub ntiaj teb chiv keeb los, kom nej tej tsoos tsho txhob muaj qhov ceb ib yam li lawv tej tsoos tsho tsis muaj qhov ceb, nyob hauv lub nceeg vaj ceeb tsheej tsis tawm mus ib zaug ntxiv li lawm.

26 Thiab nim no kuv cov kwv tij uas kuv hlub es, kuv hais tej lus no rau nej raws li tus Ntsuj Plig uas ua tim khawv nyob hauv kuv; thiab kuv tus ntsuj plig xyiv fab kawg nkaus, vim yog nej rau siab heev mloog kuv txoj lus.

27 Thiab nim no, thov kom Vajtswv txoj kev kaj siab lug los rau nej, thiab rau nej tej vaj tsev thiab tej av, thiab rau nej tej yaj thiab tej tsiaj txhu, thiab txhua yam uas nej muaj, nej cov poj niam thiab nej cov me nyuam, raws li nej txoj kev ntseeg thiab tej yam nej ua zoo, txij li lub sij hawm no mus thiab mus ib txhis li. Thiab kuv tau hais li ntawd tiag. Amees.