Vaj Lug Kub
Amas 7


Amas tej lus uas nws tau hais rau cov neeg nyob hauv Khede-oos, raws li nws phau ceev xwm txheej.

Muaj nyob hauv tshooj 7.

Tshooj 7

Khetos yuav raug yug los ntawm Maivliag—Nws yuav los tso txoj kev tuag tej hlua kom xoob thiab los ris nws cov neeg tej kev txhaum—Cov uas hloov siab lees txim, raug ua kev cai raus dej, thiab coj tej lus txib yuav tau txoj sia nyob mus ib txhis—Txoj kev tsis dawb huv yuav tsis muaj ntiag tug nyob saum Vajtswv lub nceeg vaj—Kev txo hwj chim, kev ntseeg, kev cia siab, thiab kev muaj siab hlub yuav tsum muaj. Kwv yees li 83 xyoo ua ntej yug Yexus.

1 Saib seb kuv cov kwv tij uas kuv hlub es, pom tias kuv tau raug cia tuaj rau nej, yog li ntawd kuv sim siv kuv yam lus hais rau nej; muaj tseeb tiag, los ntawm kuv lub qhov ncauj kiag, pom tau tias nws yog thawj zaug uas kuv tau hais rau nej los ntawm tej lus ntawm kuv lub qhov ncauj, kuv tau raug nyob nruj rau lub rooj txiav txim, tau muaj ntau yam hauj lwm uas kuv tuaj tsis tau rau nej.

2 Thiab kuv twb yuav tsis tau tuaj rau lub sij hawm no yog tias lub rooj txiav txim tsis tau muab rau lwm tus, los kav kuv qhov chaw; thiab tus Tswv nyob hauv txoj kev muaj siab hlub heev tau pub kom kuv yuav tsum tuaj rau nej.

3 Thiab saib seb, kuv tau tuaj cia siab heev thiab xav heev tias kuv yuav ntsib nej tau txo hwj chim rau Vajtswv, thiab nej tau thov nws txoj kev hlub tsis tu ncua, kom kuv yuav nrhiav pom tias nej tsis muaj txim nyob ntawm nws xub ntiag, kom kuv yuav nrhiav pom tias nej tsis nyob hauv txoj kev nyuaj phem uas peb cov kwv tij tau nyob nyob hauv Xalahelas.

4 Tiam sis thov kom Vajtswv lub npe tau koob hmoov, vim nws tau ua rau kuv paub, muaj tseeb tiag, tau muab rau kuv txoj kev xyiv fab heev uas paub txog tias lawv raug txhim tsa dua nyob hauv nws txoj kev ncaj ncees.

5 Thiab kuv cia siab, raws li Vajtswv tus Ntsuj Plig uas nyob hauv kuv, tias kuv kuj yuav tsum muaj kev xyiv fab rau nej; txawm li ntawd los kuv tsis xav kom kuv txoj kev xyiv fab rau nej yuav tsum los ntawm tej kev txom nyem thiab nyuaj siab heev uas kuv tau muaj rau cov kwv tij nyob tom Xalahelas, vim saib seb, kuv txoj kev xyiv fab tau los rau lawv tom qab uas tau raug txoj kev txom nyem thiab nyuaj siab heev.

6 Tiam sis saib seb, kuv cia siab tias nej yuav tsis zoo li nej tej kwv tij uas nyob hauv txoj kev uas tsis ntseeg kiag li; kuv cia siab tias nej yuav tsis khav theeb ntxhias nyob hauv nej tej siab; muaj tseeb tiag, kuv cia siab tias nej yuav tsis muab nej tej siab tso rau tej kev nplua nuj thiab tej khoom tsis muaj nuj nqis ntawm lub ntiaj teb; muaj tseeb tiag, kuv cia siab tias nej yuav tsis teev dab teev mlom, tiam sis nej yuav teev tiam tus Vajtswv tseeb thiab tus uas muaj txoj sia nyob, thiab nej yuav tos ntsoov rau txoj kev zam txim ntawm nej tej kev txhaum, nrog txoj kev ntseeg uas kav ib txhis, uas yuav muaj los.

7 Vim saib seb, kuv hais rau nej tias yuav muaj ntau yam yuav los; thiab saib seb, muaj ib yam uas tseem ceeb dua txhua yam huv tib si—vim saib seb, lub sij hawm tshuav tsis deb ncua lawm tias tus Txhiv Dim yuav los thiab nyob nrog nws cov neeg.

8 Saib seb, kuv tsis tau hais tias nws yuav los nyob hauv peb thaum lub caij uas nws tseem nyob hauv nws cev nqaij daim tawv; vim saib seb, tus Ntsuj Plig tsis tau hais rau kuv tias yuav yog li no. Nim no ib yam li tej yam no kuv los tsis paub; tiam sis kuv yeej paub npaum li no, tias tus Tswv Vajtswv yeej muaj hwj chim ua tau tag nrho ib puas tsav yam uas raws li nws txoj lus.

9 Tiam sis saib seb, tus Ntsuj Plig tau hais npaum li no rau kuv, hais tias: Hais rau cov neeg no, hais tias—Nej cia li hloov siab lees txim, thiab cia li npaj tus Tswv txoj kev, thiab cia li taug nws txoj kev, uas ncaj; vim saib seb, ntuj ceeb tsheej lub nceeg vaj twb los txog lawm, thiab Vajtswv Leej Tub yuav los rau saum lub ntiaj teb.

10 Thiab saib seb, nws yuav yug los ntawm Maivliag, nyob hauv Yeluxalees uas yog thaj av ntawm peb tej yawg koob, nws yuav yog ib tug nkauj xwb uas tsis tau deev hluas li, yog ib tug ntxhais uas muaj nuj nqis heev thiab raug xaiv cia lawm, tus uas yuav raug roos thiab xeeb tub los ntawm tus Vaj Ntsuj Plig Dawb Huv lub hwj chim, thiab yuav yug ib tug me tub, muaj tseeb tiag, twb yog Vajtswv Leej Tub.

11 Thiab nws yuav mus, raug tej kev mob nkeeg thiab tej kev txom nyem thiab tej kev dag ntxias txhua yam; thiab ua li no xwv kom txoj lus thiaj yuav muaj puv npo li uas tau hais tias nws yuav ris nws cov neeg tej kev mob thiab tej kev nkeeg.

12 Thiab nws yuav ris txoj kev tuag, xwv kom nws yuav txo tau txoj kev tuag tej hlua uas khi nws cov neeg kom xoob; thiab nws yuav ris lawv tej kev qaug dag qaug zog, kom nws lub siab thiaj li yuav muaj puv nkaus kev hlub tshua, raws li cev nqaij daim tawv, xwv kom nws yuav paub pab nws cov neeg raws li ntawm cev nqaij daim tawv raws li lawv tej kev qaug dag qaug zog.

13 Nim no tus Ntsuj Plig paub tag nrho txhua yam; txawm li ntawd los Vajtswv Leej Tub yuav raug raws li ntawm cev nqaij daim tawv kom nws yuav ris tau nws cov neeg tej kev txog kev txhaum, xwv kom nws yuav tshem tau lawv tej kev txhaum tawm raws li lub hwj chim ntawm nws txoj kev txhiv dim; thiab nim no saib seb, qhov no yog cov lus tim khawv uas nyob hauv kuv.

14 Nim no kuv hais rau nej tias nej yuav tsum hloov siab lees txim, thiab yug dua tshiab; vim tus Ntsuj Plig tau hais tias yog nej tsis yug dua tshiab nej yuav tsis tau ntuj ceeb tsheej lub nceeg vaj ua nej tug; yog li ntawd cia li los thiab ua kev cai raus dej rau txoj kev hloov siab lees txim, kom nej yuav raug ntxuav tawm ntawm nej tej kev txhaum, kom nej yuav muaj kev ntseeg nyob hauv Vajtswv tus Me Nyuam Yaj, tus uas yuav tshem lub ntiaj teb tej kev txog kev txhaum, tus uas muaj hwj chim pab kom dim thiab ntxuav tau tag nrho tej kev tsis ncaj ncees tawm tau.

15 Muaj tseeb tiag, kuv hais rau nej tias cia li los thiab tsis txhob ntshai, thiab tso txhua yam kev txhaum tseg, tej uas pheej tab kaum nej, uas pheej khi nej kom vau rau txoj kev puas tsuaj, muaj tseeb tiag, cia li los thiab tawm mus, thiab qhia rau nej tus Vajtswv tias nej txaus siab los hloov siab lees txim ntawm nej tej kev txhaum thiab nkag rau txoj kev khi lus nrog nws los coj nws tej lus txib, thiab ua tim khawv qhov ntawd rau nws hnub no los ntawm txoj kev nqes mus rau hauv cov dej ua kev cai raus dej.

16 Thiab tus uas ua li no, thiab coj Vajtswv tej lus txib txij no mus, tus ntawd yuav nco qab ntsoov tias kuv tau hais rau nws, muaj tseeb tiag, nws yuav nco qab ntsoov tias kuv tau hais rau nws lawm, nws yuav muaj txoj sia nyob mus ib txhis, raws li cov lus tim khawv ntawm tus Ntsuj Plig Dawb Huv, uas tau ua tim khawv nyob hauv kuv.

17 Thiab nim no kuv cov kwv tij uas kuv hlub, nej puas ntseeg tej no? Saib seb, kuv hais rau nej tias, muaj tseeb tiag, kuv paub tias nej yeej ntseeg tej ntawd; thiab qhov kuv ho paub tias nej yeej ntseeg lawv yog los ntawm txoj kev tshwm sim ntawm tus Ntsuj Plig uas nyob hauv kuv. Thiab nim no vim nej tej kev ntseeg muaj zog txog qhov ntawd, muaj tseeb tiag, txog tej uas kuv tau hais lawm, kuv txoj kev xyiv fab ntau kawg li.

18 Vim ib yam li kuv tau hais rau nej txij li thaum chiv thawj los, uas kuv xav tau tias nej tsis tau nyob hauv txoj kev nyuaj phem li nej tej kwv tij, txawm li ntawd los kuv tau nrhiav pom tias kuv tej kev xav tau raug txaus siab lawm.

19 Vim kuv paub tias nej yeej taug tej kev ncaj ncees; kuv paub tias nej nyob hauv txoj kev uas coj mus rau Vajtswv lub nceeg vaj; muaj tseeb tiag, kuv paub tias nej yeej tab tom ua nws txoj kev kom ncaj.

20 Kuv paub tias nws tau ua rau nej paub, los ntawm cov lus tim khawv ntawm nws txoj lus; tias nws taug tsis tau tej kev com kawb; thiab nws tsis pauv ncaim ntawm tej uas nws tau hais lawm; los sis nws yuav tsis tig ntawm sab xis mus rau sab laug hlo li, los sis ntawm qhov uas yog mus rau qhov uas tsis yog; yog li ntawd, nws txoj kev yog txoj uas ncig nyob mus ib txhis.

21 Thiab nws yuav tsis nyob hauv tej tuam tsev uas tsis dawb huv; thiab tsis muaj tej vuab tsuab los sis ib yam dab tsi uas tsis huv yuav txais tau mus rau hauv Vajtswv lub nceeg vaj; yog li ntawd kuv hais rau nej tias lub sij hawm yuav los, muaj tseeb tiag, thiab nws yuav yog thaum hnub kawg, tias nws tus uas vuab tsuab yeej yuav tseem nyob hauv nws txoj kev vuab tsuab.

22 Thiab nim no kuv cov kwv tij uas kuv hlub es, kuv tau hais tej yam no rau nej kom kuv yuav tsa tau nej los nco txog nej txoj hauj lwm rau Vajtswv, xwv kom nej yuav mus tsis muaj qhov thuam tau rau nws, xwv kom nej yuav lawv tau Vajtswv tus txheej txheem dawb huv qab, tom qab uas nej tau txais lawm.

23 Thiab nim no kuv xav kom nej yuav txo hwj chim, thiab zam rau lwm tus thiab muaj siab mos siab muag; qhia yooj yim; muaj kev ua siab ntev puv npo thiab ua siab ntev nyiaj; mob siab rau txhua yam; rau siab coj Vajtswv tej lus txib txhua lub caij nyoog; thov txhua txhia yam uas nej xav tau, tag nrho sab cev nqaij daim tawv thiab sab ntsuj plig; nco ntsoov ua Vajtswv tsaug rau txhua yam uas nej tau txais.

24 Thiab kom pom tias nej muaj kev ntseeg, kev cia siab, thiab kev sib hlub, thiab tom qab ntawd ces nej yeej yuav niaj hnub xav ua tej hauj lwm uas zoo.

25 Thiab thov tus Tswv foom koob hmoov rau nej, thiab ceev nej tej ris tsho kom tsis txhob muaj ceb tsuas, xwv kom thaum kawg nej yuav raug coj mus zaum nrog Anplaham, Ixaj, thiab Yakhauj, thiab cov yaj saub dawb huv uas tau nyob txij li thaum lub ntiaj teb chiv los, kom nej tej ris tsho tsis txhob muaj qhov ceb ib yam li lawv tej ris tsho uas tsis muaj qhov ceb, nyob hauv ntuj ceeb tsheej lub nceeg vaj tsis tawm mus ib zaug ntxiv li lawm.

26 Thiab nim no kuv cov kwv tij uas kuv hlub es, kuv tau hais tej lus no rau nej raws li tus Ntsuj Plig uas ua tim khawv hauv kuv; thiab kuv tus ntsuj plig yeej zoo siab heev, vim yog nej txoj kev rau siab heev thiab cuab pob ntseg rau kuv txoj lus.

27 Thiab nim no, thov kom Vajtswv txoj kev thaj yeeb los rau saum nej, thiab rau saum nej tej vaj tse thiab tej av, thiab rau saum nej tej yaj thiab tej tsiaj txhu, thiab tag nrho ib puas tsav yam uas nej muaj, nej tej poj niam thiab nej tej me nyuam, raws li nej tej kev ntseeg thiab tej hauj lwm zoo, txij li lub sij hawm no mus thiab mus ib txhis li. Thiab kuv tau hais li ntawd tiag. Amees.