1 Anajwan ut kik’ulman naq chirix naq kixk’ul laj Moroni li hu a’in kichal xkawil xch’ool, ut kinujak rik’in sahil ch’oolejil q’axal nim xb’aan naq xaqxo xch’ool laj Pahoran, naq maawa’ jun ^aaj pleetinel re li ach’ab’aak wan wi’ ut lix chaab’ilal lix tenamit.

2 A’b’an kiraho’ ajwi’ xch’ool chi numtajenaq xb’aan xmaa’usilaleb’ li ani ke’alinasink chaq re laj Pahoran sa’ li raqleb’aal aatin; relik ut chi yaal, xb’aaneb’ li ke’po’resink chaq xch’ool chirix lix tenamiteb’ jo’ ajwi’ chirix lix Dios.

3 Ut kik’ulman naq laj Moroni kixk’am chirix ka’ch’in xk’ihaleb’ li winq, jo’ chanru rajom laj Pahoran, ut kixk’e laj Lehi ut laj Teankum chi taqlank sa’ xb’een rela’ lix teep aj pleet, ut kixchap xb’e sa’ xjayal li ch’och’ Gideon.

4 Ut kixtaqsi li ^axaqxookil eetalil re ^bach’ab’aak sa’ yalaq b’ar chi na’ajej ki’ok wi’, ut kixk’ul jo’ nimal li teep kiru sa’ chixjunil lix b’eenik toj sa’ li ch’och’ Gideon.

5 Ut kik’ulman naq mileb’ li ke’xmola rib’ rik’in li eetalil kixtaqsi, ut ke’xchap xyok’leb’ ch’iich’ re xkolb’al rix li ach’ab’aak wankeb’ wi’, re naq ink’a’ te’ok chi moosil.

6 Ut chi jo’kan, chirix naq laj Moroni kixch’utub’ jo’ k’ihal li winq kiru chiru sa’ chixjunil lix b’eenik, kiwulak sa’ li ch’och’ Gideon, ut naq kixjunaji lix teep rik’in xteep laj Pahoran, q’axal kaweb’ ke’kana, jo’kan naq kaweb’ wi’chik chiruheb’ lix winq laj Pajus, a’an ^axreyeb’ laj isihom rib’ a’an li ke’alinasink chaq reheb’ li ^bach’ab’anb’il winq sa’ li ch’och’ Tzarahemla ut ke’reechani chaq li ch’och’.

7 Ut kik’ulman naq laj Moroni ut laj Pahoran xkoheb’ taq’a rochb’eeneb’ lix teep aj pleet sa’ li ch’och’ Tzarahemla, ut xkoheb’ chixpleetinkil li tenamit, ut ke’xk’ul rib’ rik’ineb’ lix winq laj Pajus, jo’kan naq ke’ok sa’ pleet.

8 Ut k’ehomaq reetal, kikamsiik laj Pajus, ut eb’ lix winq ke’chape’ jo’ preex, ut laj Pahoran kik’ojob’aak wi’chik sa’ xraqleb’aal aatin.

9 Ut eb’ lix winq laj Pajus ke’tz’ile’ rix sa’ raqleb’ aatin, jo’ chanru li chaq’rab’, ut jo’kaneb’ ajwi’ li rey aj winq a’an li ke’chape’ chaq ut ke’tz’ape’ chaq sa’ tz’alam, ut kitaqlaman ^axkamsinkileb’ jo’ chanru li chaq’rab’; relik chi yaal, eb’ li winq a’an re laj Pajus ut li rey aj winq a’an, li ani ink’a’ ke’ajok re xchapb’al li k’anjeleb’aal re pleet sa’ xkolb’al rix lix tenamiteb’, li ke’pleetink b’an re, ke’k’ehe’ chi kamk.

10 Ut chi jo’kan kiwan chi aajel ru naq taapaab’amanq li chaq’rab’ a’in chi tz’aqal tz’aqal re xkolb’al rix lix tenamiteb’; relik chi yaal, ut ani natawe’ chixtz’eqtaanankil li ach’ab’aak wan wi’, sa’ junpaat nataqlaman xkamsinkil jo’ chanru li chaq’rab’.

11 Ut chi jo’kan kiraqe’ li xlaje xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi; ut laj Moroni ut laj Pahoran ak ke’xk’ojob’ wi’chik li tuqtuukilal sa’ li ch’och’ Tzarahemla, sa’ xyanq lix tenamiteb’ a’an, chirix xk’eeb’al li kamk sa’ xb’een chixjunileb’ li moko xaqxookeb’ ta chixpaab’ankil li na’leb’ chirix li ach’a’b’aak.

12 Ut kik’ulman naq sa’ xtiklajik li xjunlaju xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi, laj Moroni tikto kixtaqla naq taataqlamanq li k’a’aq re ru taak’anjelaq, ut jo’kan ajwi’ taataqlamanq re laj Helaman jun teep aj pleet waqib’ mil chi winq xnimal, re xtenq’ankil sa’ xkolb’al rix li jun raqal chi ch’och’ a’an.

13 Ut kixtaqla ajwi’ naq jun teep aj pleet waqib’ mil chi winq xnimal, rochb’een tz’aqal li tzakemq, te’taqlaaq rik’in lix teep aj pleet laj Lehi ut laj Teankum. Ut kik’ulman naq kib’aanuman a’in re xk’eeb’al xkawil li ch’och’ chiruheb’ laj Lamanita.

14 Ut kik’ulman naq laj Moroni ut laj Pahoran, chirix xkanab’ankil jun nimla ch’uut chi winq sa’ li ch’och’ Tzarahemla, ke’xchap xb’eheb’ rochb’een jun nimla ch’uut chi winq sa’ xjayal li ch’och’ Nefihah, chi k’eek’ookeb’ xch’ool chi numtaak sa’ xb’eeneb’ laj Lamanita sa’ li tenamit a’an.

15 Ut naq yookeb’ chi b’eek sa’ xjayal li ch’och’, kik’ulman naq ke’xchap jun nimla ch’uut chi winq xkomoneb’ laj Lamanita, ut ke’xkamsi naab’al reheb’, ut ke’xchap li k’a’ru k’amb’il xb’aaneb’ ut lix k’anjeleb’aal re pleet.

16 Ut kik’ulman naq chirix naq ke’xchapeb’, ke’xteneb’eb’ chi ok sa’ jun sumwank naq moko te’xchap ta chik li k’anjeleb’aal re pleet chiruheb’ laj Nefita.

17 Ut chirix naq ke’ok sa’ li sumwank a’in ke’xtaqlaheb’ chi wank rik’in lix tenamit laj Ammon, ut a’aneb’ na kaahib’ mil rajlankileb’ li ink’a’ ke’kamsiik.

18 Ut kik’ulman naq chirix naq ke’xtaqlaheb’ aran ke’xchap wi’chik xb’e sa’ xjayal li ch’och’ Nefihah. Ut kik’ulman naq chirix naq ke’wulak sa’ li ch’och’ Nefihah, ke’xyiib’ xmuheb’aal t’ikr sa’ li helhookil ch’och’ aran Nefihah, li nach’ wan rik’in li tenamit Nefihah.

19 Anajwan laj Moroni kiraj naq eb’ laj Lamanita te’chalq chixpleetinkileb’, chiru li helhookil ch’och’; a’b’an eb’ laj Lamanita, rik’in naq ak neke’xnaw chirix lix kawileb’ xch’ool q’axal nim, ut neke’ril xnimal li rajlankileb’, jo’kan naq moko ke’wan ta xch’ool chi elk re xpleetinkileb’, jo’kan naq ink’a’ ke’chal chi pleetik sa’ li kutan a’an.

20 Ut naq ki’ok q’ojyin, laj Moroni xko’o chiru raak’ab’il li q’ojyin, ut kiwulak sa’ xb’een li xaqxookil tz’ak re xk’eeb’al reetal sa’ muqmu k’a’ru raqal re li tenamit k’ojk’ookeb’ wi’ laj Lamanita rik’in lix teep aj pleet.

21 Ut kik’ulman naq wankeb’ sa’ releb’ saq’e, chixk’atq li okeb’aal, ut warenaqeb’ chixjunileb’. Anajwan ut kisutq’i laj Moroni rik’in lix teep aj pleet, ut kixtaqla naq te’xseeb’a rib’ chixk’uub’ankil li kawil k’aam ut li eeb’, re te’kub’siiq chaq sa’ xb’een li xaqxookil tz’ak sa’ xjunpak’alil li tz’ak.

22 Ut kik’ulman naq laj Moroni kixtaqla naq eb’ lix winq toxe’b’eeq ut te’taqe’q sa’ xb’een li xaqxookil tz’ak, ut te’xkub’si rib’ sa’ li jun raqal a’an re li tenamit; relik chi yaal, sa’ rokeb’ saq’e, b’ar wi’ moko k’ojk’ookeb’ ta laj Lamanita rik’ineb’ lix teep aj pleet.

23 Ut kik’ulman naq chixjunileb’ ke’xkub’si rib’ sa’ li tenamit chi q’eq, rik’ineb’ lix kawil k’aam ut lix eeb’; chi jo’kan, naq kisaqew chixjunileb’ wankeb’ sa’ xyanq xtz’akil li tenamit.

24 Anajwan ut, naq ke’aj ru laj Lamanita ut ke’ril naq wankeb’ lix teep aj pleet laj Moroni sa’ xyanq li xaqxookil tz’ak, ke’chal xxiw chi numtajenaq, jo’kan naq ke’eelelik chiru li okeb’aal.

25 Ut anajwan naq kiril laj Moroni naq yookeb’ chi eelelik chiru, kixtaqla naq toxe’b’eeq lix winq chixpleetinkileb’, ut ke’xkamsi naab’al ut naab’al chik ke’xsuti rix, ut ke’xchapeb’ choq’ preex, ut li jun ch’ol chik reheb’ ke’eelelik sa’ li ch’och’ Moroni, li wan sa’eb’ li nub’aal chire li palaw.

26 Chi jo’kan laj Moroni ut laj Pahoran ke’reechani li tenamit Nefihah chi maajun aamej kisach; ut wankeb’ naab’al reheb’ laj Lamanita li ke’kamsiik.

27 Anajwan kik’ulman naq naab’al reheb’ laj Lamanita li preexeb’ ke’raj xjunajinkil rib’ rik’in lix ^atenamit laj Ammon ut wank choq’ ach’ab’anb’il tenamit.

28 Ut kik’ulman naq jo’ k’ihal li ke’raj, reheb’ a’an kik’eeman jo’ chanru li rajomeb’.

29 Chi jo’kan, chixjunileb’ li preex xkomoneb’ laj Lamanita ke’xjunaji rib’ rik’in lix tenamit laj Ammon, ut ke’ok chi k’anjelak chi numtajenaq, re xk’anjelankil li ch’och’, re xk’iresinkil li k’iila paay chi iyaj nak’uxman, ut li ketomq ut teep chi xul, li jar paay wan; ut chi jo’kan ki’isiik chaq jun li nimla iiq sa’ xb’eeneb’ laj Nefita; relik chi yaal, kik’ulman naq ke’isiik chaq sa’ xb’eeneb’ chixjunil li preex xkomoneb’ laj Lamanita.

30 Anajwan kik’ulman naq laj Moroni, chirix naq kireechani li tenamit Nefihah, chirix xchapb’al k’iila preex, li kika’ch’inob’resink re lix teepeb’ aj pleet laj Lamanita chi numtajenaq, ut chirix xk’ulb’al wi’chik naab’al xkomoneb’ laj Nefita li ke’chape’ chaq choq’ preex, li kixk’e xkawilal lix teep aj pleet laj Moroni chi numtajenaq, jo’kan naq laj Moroni ki’el chaq sa’ li ch’och’ Nefihah toj sa’ li ch’och’ Lehi.

31 Ut naq ke’ril laj Lamanita naq chalk re laj Moroni sa’ xb’eeneb’, kik’ulman naq ke’xuwak wi’chik ut ke’eelelik chiru lix teep aj pleet laj Moroni.

32 Ut kik’ulman naq laj Moroni ut lix teep aj pleet ke’xtaaqeheb’ sa’ li junjunq chi tenamit, toj reetal naq ke’k’ule’ xb’aan laj Lehi ut laj Teankum; ut ke’eelelik laj Lamanita chiru laj Lehi ut laj Teankum, toj taq’a sa’eb’ li nub’aal chixk’atq li palaw, toj reetal naq ke’wulak sa’ li ch’och’ Moroni.

33 Ut ch’utub’anb’ileb’ chixjunileb’ li teep aj pleet reheb’ laj Lamanita, jo’kan naq wankeb’ sa’ junaj chi molam sa’ li ch’och’ Moroni. Anajwan laj Ammoron, xreyeb’ laj Lamanita, wan ajwi’ rik’ineb’.

34 Ut kik’ulman naq laj Moroni ut laj Lehi ut laj Teankum ke’xk’ojob’ rib’ rochb’eeneb’ lix teep aj pleet chixsutam lix nub’aal li ch’och’ Moroni, jo’kan naq eb’ laj Lamanita sutsuukeb’ rix sa’eb’ li nub’aal chire li yamyookil ch’och’ sa’ xtz’e li saq’e, ut sa’eb’ li nub’aal chire li yamyookil ch’och’ sa’ releb’ saq’e.

35 Ut chi jo’kan ke’xk’ojob’ lix teepeb’ chiru q’ojyin. Xb’aan naq k’ehomaq reetal, eb’ laj Nefita ut jo’kaneb’ ajwi’ laj Lamanita lub’luukeb’ xb’aan xnajtil li b’eek; jo’kan naq maajun pleetik ke’xk’oxla xb’aanunkil chi q’eq, ka’aj b’an wi’ laj Teankum; xb’aan naq a’an numtajenaq xjosq’il rik’in laj Ammoron, jo’kan naq jo’ naxk’oxla a’an, ^axmaak laj Ammoron, ut laj Amalikiah li ras, naq ke’wan chaq sa’ li pleet a’in li nim ut najt kiwan chaq rik’ineb’ laj Lamanita, ut xb’aan a’an wanjenaq chaq xnimal li pleetik ut li hoyok kik’, relik chi yaal, ut xnimal li we’ej.

36 Ut kik’ulman naq laj Teankum sa’ xjosq’il xko’o b’ar k’ojk’ookeb’ wi’ xteepeb’ laj Lamanita, ut kixkub’si rib’ chirix lix xaqxookil tz’ak li tenamit. Ut xko’o rik’in jun k’aam, sa’ li junjunq chi na’ajej, toj reetal naq kixtaw li rey, ut ^akixkut rik’in jun li jutz’juukil che’, li kik’ob’ok re chixk’atq li raam. A’b’an k’ehomaq reetal, li rey kirajsiheb’ ru lix moos chi maji’ nakam, jo’kan naq ke’xtaaqe laj Teankum, ut ke’xkamsi.

37 Anajwan naq ke’xnaw laj Lehi ut laj Moroni naq kamenaq laj Teankum, kik’ulman naq ke’raho’ xch’ool chi numtajenaq; xb’aan naq k’ehomaq reetal, a’an chaq jun winq li kipleetik chaq chi kaw xch’ool choq’ re lix tenamit, relik chi yaal, li tz’aqal naxra li ach’ab’aak, ut kixnumsi chaq xnaab’alil li ch’a’ajkilal li numtajenaq xrahil. A’b’an k’ehomaq reetal, ak kamenaq, ut xikenaq sa’ li b’e naxik wi’ chixjunil li ruchich’och’.

38 Anajwan kik’ulman naq laj Moroni koxb’eeq sa’ li kutan jun chik, ut kichal sa’ xb’eeneb’ laj Lamanita, jo’kan kaq ke’xkamsiheb’ rik’in nimla kamsink; ut ke’ralinasiheb’ chaq sa’ li ch’och’; ut eb’ a’an ke’eelelik, jo’kan naq ink’a’ chik ke’sutq’i chixpleetinkileb’ laj Nefita sa’ li kutan a’an.

39 Ut chi jo’kan kiraqe’ li xjunlaju xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi; ut chi jo’kan wanjenaq chaq li pleet, ut li hoyok kik’, ut li we’ej, ut li ch’a’ajkilal sa’ xyanqeb’, chiru xnumik k’iila chihab’.

40 Ut wanjenaq li kamsink, ut li wech’ok-ib’, ut li jachok-ib’, ut li k’iila paay chi maa’usilal sa’ xyanq lix tenamit laj Nefi; a’b’anan choq’ reheb’ ^ali tiikeb’ xch’ool, relik chi yaal, xb’aan xtijeb’ li tiikeb’ xch’ool, ke’kole’ xyu’am.

41 A’b’an k’ehomaq reetal, rik’in naq q’axal nim xnajtil li pleet ke’wan wi’ laj Nefita ut laj Lamanita naab’al ke’kana chi kawujenaq, xb’aan naq q’axal nim xnajtil li pleet; ut naab’al li ke’q’uno’ raameb’ xb’aaneb’ ^axch’a’ajkilal, jo’kan naq ke’xtuulanob’resi rib’ chiru li Dios, toj sa’ xchamal li tuulanil ch’oolej.

42 Ut kik’ulman naq chirix naq laj Moroni kixk’e chaq xkawil li jar raqal chi ch’och’ a’an li k’utk’u chiruheb’ laj Lamanita, toj reetal naq tz’aqal xkawileb’, kisutq’i sa’ li tenamit Tzarahemla, ut jo’kan ajwi’ laj Helaman kisutq’i sa’ xna’aj li reechanihom; ut kikana wi’chik li tuqtuukilal chi xaqab’anb’il sa’ xyanq lix tenamit laj Nefi.

43 Ut laj Moroni kixq’axtesi li taqlank sa’ xb’eeneb’ lix teep aj pleet, sa’ ruq’ li ralal, aj Moronihah xk’ab’a’; ut kisutq’i sa’ tz’aqal li rochoch re tixnumsi rela’ lix kutan sa’ tuqtuukilal.

44 Ut laj Pahoran kisutq’i sa’ xraqleb’aal aatin; ut laj Helaman kixk’ul wi’chik sa’ xb’een xjultikankil li raatin li Dios chiru li tenamit; xb’aan naq xmaak xk’ihaleb’ li pleet ut li wech’ok-ib’ ki’ajman chik ru naq taa’uxq wi’chik li tuqub’ank sa’ li iglees.

45 Jo’kan ut, xko’o laj Helaman ut eb’ lix komon, ut ke’xch’olob’ li raatin li Dios rik’in nimla wankilal toj reetal naq naab’al li tenamit ^ake’q’unb’esiik xch’ool chirix lix maa’usilaleb’, ut rik’in a’an ke’xjal xk’a’uxl chirix lix maakeb’ ut ke’kub’e xha’ choq’ re li Qaawa’ lix Dios.

46 Ut kik’ulman naq ke’xxaqab’ wi’chik lix iglees li Dios, chiru chixjunil li ch’och’.

47 Relik chi yaal, ut ki’ux li tuqub’ank chirix li chaq’rab’. Ut ke’sik’e’ ru lix ^araqol aatin, ut li xb’eenileb’ aj raqol aatin reheb’.

48 Ut ke’ok wi’chik lix tenamit laj Nefi chi ^ausaak sa’ li ch’och’, ut ke’ok chi k’ihank ut chi kawuk wi’chik xmetz’eweb’ chi numtajenaq sa’ li ch’och’. Ut ke’ok chi b’ihomo’k chi numtajenaq.

49 A’b’anan rik’in xb’ihomaleb’, ut xnimaleb’ xmetz’ew, ut li usaak ke’xk’ul, moko ke’xtaqsi ta rib’ sa’ xq’etq’etileb’ li ru; chi moko timileb’ chixk’oxlankil li Qaawa’ lix Dios; ke’xtuulanob’resi b’an rib’ chi numtajenaq chiru.

50 Relik chi yaal, kijultiko’ reheb’ chanru xnimal ru li k’a’aq re ru kixb’aanu chaq li Qaawa’ choq’ reheb’, naq kixkoleb’ chaq chiru li kamk, ut chiru li b’ak’leb’, ut chiru tz’alam, ut chiru li k’iila paay chi ch’a’ajkilal, ut kixkoleb’ chaq sa’ ruq’eb’ li xik’ neke’ilok reheb’.

51 Ut ke’tijok chiru li Qaawa’ lix Dios chi rajlal, jo’kan naq li Qaawa’ kirosob’tesiheb’, jo’ chanru li raatin, jo’kan naq ke’kawu xmetz’ew ut ke’usa sa’ li ch’och’.

52 Ut kik’ulman naq kib’aanuman chixjunil li k’a’aq re ru a’in. Ut kikam laj Helaman, sa’ ro’laju xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.