1 Ka sa yaco me ra yadravi na kaivesu ni Leimanaiti, ka vakaroti me ra buluta na nodra mate, io, kei na nodra mate tale ga na Nifaiti; a sa lesia ko Moronai e so na tagane me yadravi ira ni ra sa vakayacora tiko na nodra cakacaka.

2 Ka sa lako ko Moronai vata kei Liai ki na koro ko Muleki, a sa solia vei Liai me lewa na koro. Ia raica, sai Liai oqo ka rau dau tovata tiko kei Moronai ena iwase levu cake ni nona ivalu; a sa tamata me ^avakataki Moronai, io, erau sa dauveilomani sara, ka ra lomani rau tale ga ko ira na tamata i Nifai.

3 Ka sa yaco ni ra sa buluta oti na nodra mate kei na nodra mate tale ga na Nifai ko ira na Leimanaiti, era sa kau lesu tale ki Vanuasautu; me vaka na lewa i Moronai, sa vakatulewa kina ko Tenikamu vei ira na kaivesu me ra tekivu cakacaka ka kelia na ikeli me wavokita na vanua, se na koro levu ko Vanuasautu.

4 Ia sa lewa ko koya me keli na ^abai kau ena tai ni ikeli ki na koro; ka qai bini yani kina na qele me taurivaka na bai kau; a ra sa vakacakacakataki tiko kina na Leimanaiti me yacova ni ra sa viria rawa tu e dua na bai kaukauwa sara ka rewa icake me wavokita na koro levu ko Vanuasautu, io e dua na bai kau kei na qele, ka rewa icake sara.

5 Ia me tekivu mai na gauna ko ya, sa yaco na koro oqo me dua na itikotiko ni ivalu kaukauwa sara; ka ra sa kaivesu tiko kina na Leimanaiti; io era sa kaivesu tiko ena loma ni bai era viria ga ko ira. Sa vakacakacakataki ira tiko na Leimanaiti ko Moronai, ni sa rawarawa cake na nodra vakatawai ni ra cakacaka tiko; ka ni na gadreva na nona mataivalu kece kevaka me na kabai ira na Leimanaiti.

6 Ka sa yaco ni sa qaqa ko Moronai mai na dua na mataivalu levu ni Leimanaiti, ka taura lesu tale na koro ko Muleki, io na koro ka dua tiko na nodra koro ni ivalu kaukauwa na Leimanaiti ena vanua ko Nifai; ia sa viria vakaukauwa na kena bai me ra tiko kina na nona kaivesu.

7 Ka sa yaco ni sa sega ni via valuti ira tale na Leimanaiti ena yabaki ko ya, ia sa vakarautaki ira ga na nona tamata ko koya ki na ivalu, io, me ra viria na bai me taqomaki kina na nodra koro mai vei ira na Leimanaiti, io, sa taqomaki ira na nodra yalewa kei na gone, mai na dausiga kei na leqa, ka raica tale ga me tiko na kedra kakana na nona mataivalu.

8 Ka sa yaco oqo ni sa lako tu ko Moronai me vakameyautaka e dua na nodra duiyaloyalo se veileti vakai ira na Nifaiti, era qai kabai ira mai ko ira na Leimanaiti ka ra tiko ena ceva ni wasawasa ena ra, ka ra taura kina e vuqa na nodra veikoro ena yasayasa ko ya.

9 Ia oqo me vaka na nodra ivakarau ca ga, na duiyaloyalo kei na nodra veileti vakai ira na Nifaiti, sa yaco me ra tu kina ena dua na itutu vakarerevaki.

10 Ia oqo raica, au na tukuna mada e vica na ka me baleti ira na ^atamata i Amoni, io ko ira era a Leimanaiti tu e liu; ka ra a qai ^bsaumaki ka lesu vua na Turaga ena mana ni vosa ni Kalou, eratou a vunautaka vei ira ko Amoni kei ira na nona itokani; era a lako sobu mai ki na vanua ko Saraemala ka ra a mai taqomaki ira tu ko ira na Nifaiti me yacova sara mai oqo.

11 Ia era sa sega ni tauri iyaragi me ra vala kei ira na wekadra, ni ra sa vosa bubuluitaka oti ni ra na ^asega ni vakadave dra tale; ia me vaka na nodra bubului era na mate dina; io, ia kevaka me a sega ni ra lomani mai vei Amoni kei ira na wekana, ke ra a kune rarawa ka rusa e ligadra na wekadra.

12 Ia ena vuku ni ka oqo era sa kau sobu mai kina ki na vanua ko Saraemala; io era sa mai ^ataqomaki ira tiko e kea ko ira na Nifaiti.

13 Ia a sa yaco ni ra sa raica na leqa, na levu ni rarawa kei na nodra oca na Nifaiti ena vukudra, era sa lomani ira sara ka ^avinakata me ra sa tauri iyaragi tale ka valataka na nodra vanua.

14 Ia raica, ni vakarau me ra tauri iyaragi ni valu tale, sa rawai ira sara na vakamamasu nei Ilamani kei ira na nona itokani, me ra kakua sara ni ^avoroka na vosa ^bbubului era sa cakava oti.

15 Ia sa rere ko Ilamani de ena nodra kitaka vakakina era na vakayalia kina na yalodra; o koya era sa mani tu ga kina ko ira kece era a curu ki na veiyalayalati oqo ka raica na nodra vuto kosova na nodra veika rarawa ena draki ni bula vakarerevaki ko ira na wekadra, ena gauna oqo.

16 Ia raica, e sa yaco ni ra lewevuqa na luvedra tagane era a sega ni curu ki na dua na veiyalayalati me ra kakua ni tauri iyaragi ni valu ka taqomaki ira mai vei ira na nodra meca; a ra sa soqoni vata ena gauna ko ya ko ira kece oqo ka rawa ni ra tauri yaragi, ka ra sa vakatokai ira me ra sa Nifaiti.

17 Ia era sa ia na veiyalayalati me ra valataka na nodra bula galala na Nifaiti, io, ka ra solia na nodra bula me ra taqomaka na nodra vanua; io, era sa yalataka tale ga ni ra na tudei tiko ga ena ^abula galala, ka ra na dauvala me ra taqomaki ira kei ira na Nifaiti mai na veivakabobulataki.

18 Oqo raica, era sa lewe rua na udolu na cauravou era sa ia na veiyalayalati oqo ka ra sa taura na nodra iyaragi ni valu me ra taqomaka na nodra vanua.

19 Ka raica oqo, era sa sega vakadua ni dauvakatubu leqa vei ira na Nifaiti ko ira na matatamata oqo, ia oqo era sa vukei ira vakalevu sara; ni ra sa taura na nodra iyaragi ni valu ka vinakata me sa nodra iliuliu ko Ilamani.

20 Ia era sa cauravou bulabula kece ka yaloqaqa, ia era sa icegu bula ka ^akaukauwa vinaka tu; ia raica, me kena ikuri—ni ra sa tamata ^byalodina ena veigauna kecega ena veika kecega era nuitaki kina.

21 Io era sa tamata dina sara ka yalomatua, ni ra sa vakavulici me ra muria tiko ga na ivakaro ni Kalou ka ^alako vakadodonu e matana.

22 Ka sa yaco oqo me liutaki ira yani na lewe ^arua na udolu na gone tagane sotia oqo ko Ilamani, ia era sa lako yani ka laki vukei ira na wekadra era vala tiko ena iyalayala ni vanua ena ceva ki na yasa ni wasawasa ena ra.

23 Ia oqo sa mai cava eke na ikaruasagavulu kawalu ni yabaki ni nodra veiliutaki na turaganilewa vei ira na tamata i Nifai.