1 Ut kik’ulman naq ke’xxaqab’eb’ laj k’aak’alenel sa’ xb’eeneb’ li preex xkomoneb’ laj Lamanita, ut ke’xmineb’ ru chi xik ut chixmuqb’aleb’ lix kamenaq, relik chi yaal, ut lix kamenaqeb’ ajwi’ laj Nefita li ke’kamsiik chaq; ut laj Moroni kixxaqab’eb’ li winq re xk’aak’alenkileb’ naq te’xb’aanu xk’anjeleb’.

2 Ut laj Moroni xko’o sa’ li tenamit Mulek rochb’een laj Lehi, ut kixk’ul xwankil sa’ xb’een li tenamit ut kixk’e re laj Lehi. Anajwan k’ehomaq reetal, laj Lehi a’in, a’an jun winq li wanjenaq rik’in laj Moroni sa’ xk’ihaleb’ li pleetik kiwan wi’; ut a’an jun winq ^achanchan laj Moroni, ut ke’saho’ sa’ xch’ool chirib’ileb’ rib’ naq kolb’ileb’ rix, relik chi yaal, ut raab’ileb’ chirib’ileb’ rib’, ut raab’ileb’ ajwi’ xb’aaneb’ chixjunil lix tenamit laj Nefi.

3 Ut kik’ulman naq chirix naq ke’xchoy laj Lamanita xmuqb’aleb’ lix kamenaq jo’ ajwi’ xkamenaqeb’ laj Nefita, ke’teneb’aak wi’chik chi b’eek sa’ li ch’och’ Naab’alil, ut laj Teankum, chi taqlanb’il xb’aan laj Moroni, kixtaqla naq te’ok chi k’anjelak re xb’ekb’al jun xjukulal li ch’och’ chi sutsu chirix li ch’och’, malaj chirix li tenamit, Naab’alil.

4 Ut kixtaqla naq te’xyiib’ jun ^aramok maqab’ej rik’in pech’b’il che’ chiru li junpak’al xjukulal li ch’och’ li wan chi sa’; ut ke’xtuub’ li ch’och’ li ke’xb’ek chaq sa’ li jukulal chiru li ramok maqab’ej pech’b’il che’ okenaq; ut chi jo’kan ke’xk’eheb’ chi k’anjelak laj Lamanita toj reetal naq ke’xsuti rix li tenamit Naab’alil rik’in jun kawil xaqxookil tz’ak sa’ xsutam, pech’b’il che’ ut ch’och’ okenaq, q’axal najt xteram.

5 Ut li tenamit a’in ki’ok choq’ jun na’ajej q’axal kaw junelik chik chirix a’an; ut sa’ li tenamit a’in ke’xk’aak’aleheb’ li preex xkomoneb’ laj Lamanita; relik chi yaal, sa’ xyanq jun li xaqxookil tz’ak li ke’xk’eheb’ chaq chixyiib’ankil rik’in tz’aqaleb’ li ruq’. Anajwan aajel ru choq’ re laj Moroni xk’eeb’aleb’ laj Lamanita chi k’anjelak, xb’aan naq moko ch’a’aj ta xk’aak’alenkileb’ naq wankeb’ sa’ xk’anjel; ut kiraj chixjunil lix kawilal lix teep naq taaxik chixpleetinkileb’ laj Lamanita.

6 Ut kik’ulman naq laj Moroni chi jo’kan kixq’ax ru jun reheb’ li teep aj pleet q’axal nim reheb’ laj Lamanita, ut kireechani li tenamit Mulek, a’an jun reheb’ li na’ajej q’axal kaw eechaninb’il xb’aaneb’ laj Lamanita sa’ xch’och’ laj Nefi; ut chi jo’kan kixyiib’ ajwi’ jun li kawil na’ajej re xk’uulankileb’ lix preex.

7 Ut kik’ulman naq ink’a’ chik kixyal xpleetinkileb’ laj Lamanita sa’ li chihab’ a’an; kiroksiheb’ b’an lix winq sa’ xkawresinkil rib’ choq’ re li pleet, relik chi yaal, sa’ xyiib’ankil li kawresinb’il na’ajej re xkolb’al rib’ chiruheb’ laj Lamanita; relik chi yaal, ut re ajwi’ xkolb’aleb’ li rixqilaleb’ ut lix kok’aleb’ chiru we’ej ut ch’a’ajkilal, ut xk’eeb’al li tzakemq choq’ reheb’ lix teep aj pleet.

8 Anajwan ut, kik’ulman naq eb’ li teep aj pleet reheb’ laj Lamanita, sa’ li palaw sa’ rokeb’ saq’e, sa’ xtz’e li saq’e, naq maa’ani chaq laj Moroni sa’ xk’ab’a’ junaq raaxiik’ sa’ xyanqeb’ laj Nefita, xb’aan wi’ ke’wan li jachok-ib’ sa’ xyanqeb’, ke’ru b’ayaq chi numtaak sa’ xb’eeneb’ laj Nefita, relik chi yaal, toj reetal naq ke’reechani junjunq reheb’ lix tenamit sa’ li jun raqal chi ch’och’ a’an.

9 Ut chi jo’kan sa’ xk’ab’a’ li maa’usilal sa’ xyanqeb’ xjuneseb’ rib’, relik chi yaal, sa’ xk’ab’a’ li jachok-ib’ ut li raaxiik’ sa’ xyanqeb’ xjuneseb’ rib’, q’axal xiwxiw li ke’k’ehe’ wi’.

10 Anajwan ut k’ehomaq reetal, wan k’a’ruhaq chinye chirix lix ^atenamit laj Ammon, li aj Lamaniiteb’ chaq sa’ xtiklajik; a’b’an sa’ xk’ab’a’ laj Ammon ut eb’ lix komon, malaj ut sa’ xk’ab’a’ lix wankil ut li raatin li Dios, ^bke’jale’ chaq xch’ool choq’ re li Qaawa’; ut ke’k’ame’ chaq taq’a sa’ li ch’och’ Tzarahemla, ut chirix chik a’an junelik kolb’ileb’ rix xb’aaneb’ laj Nefita.

11 Ut sa’ xk’ab’a’ lix xaqab’anb’il aatineb’ ke’rame’ ru chixchapb’al li k’anjeleb’aal re pleet chiruheb’ li ras riitz’ineb’; xb’aan naq okenaqeb’ chaq sa’ jun xaqab’anb’il aatin naq ^amaajo’q’e chik te’hoyoq kik’; ut jo’ chanru lix xaqab’anb’il aatineb’, ke’oso’ raj, relik chi yaal, ke’xkanab’ raj rib’ chi t’ane’k sa’ ruq’eb’ li ras riitz’ineb’, wi ta ink’a’ ke’toq’ob’aak ru ut q’axal ke’rahe’ xb’aan laj Ammon ut eb’ lix komon.

12 Ut xb’aan a’in naq ke’k’ame’ chaq taq’a sa’ li ch’och’ Tzarahemla; ut junelik ^ake’kole’ rix xb’aaneb’ laj Nefita.

13 A’b’anan kik’ulman, naq ke’ril li xuwajel ru, ut xk’ihal li ch’a’ajkilal ut li rahilal ke’xnumsi laj Nefita choq’ reheb’, naq ke’eek’asiik rik’in xtoq’ob’ankileb’ ru, ut ^ake’raj xchapb’al xk’anjeleb’aal re pleet re xkolb’al lix tenamiteb’.

14 A’b’an k’ehomaq reetal, naq okeb’ raj re chixchapb’al lix k’anjeleb’aal re pleet, ke’q’unb’esiik xch’ool xb’aan li raatin laj Helaman ut eb’ lix komon, xb’aan naq okeb’ raj re ^achixq’etb’al li ^bxaqab’anb’il aatin li ke’ok wi’ chaq.

15 Ut laj Helaman kixxuwa maare anchal rik’in xb’aanunkil chi jo’kan te’sachq chiruheb’ li raameb’; jo’kan naq chixjunileb’ li ke’ok chaq sa’ li sumwank a’in, ki’aje’ ru chiruheb’ rilb’aleb’ li ras riitz’in chi b’eek chiru xch’a’ajkilaleb’, sa’ li xiwxiw li ke’wan wi’ sa’ li kutan a’an.

16 A’ut k’ehomaq reetal, kik’ulman naq ke’wan naab’al li ralaleb’, li moko okenaqeb’ ta sa’ sumwank naq ink’a’ te’xchap xk’anjeleb’aal re pleet re xkolb’al rib’eb’ chiruheb’ li xik’ neke’ilok reheb’; jo’kan naq eb’ a’an ke’xch’utub’ rib’ sa’ li kutan a’an, jo’ k’ihaleb’ li ke’ru chixchapb’al li k’anjeleb’aal re pleet, ut aj Nefita ke’xye rib’.

17 Ut eb’ a’an ke’ok sa’ jun sumwank naq te’pleetiq re xkolb’al li ach’ab’aak wankeb’ wi’ laj Nefita; relik chi yaal, re xkolb’al rix li ch’och’ toj reetal te’xq’axtesi xyu’ameb’; relik chi yaal, ke’ok sa’ sumwank naq maajo’q’e te’xq’axtesi li ^aach’ab’aak wankeb’ wi’; te’pleetiq b’an chi yalaq chan ru re xkolb’aleb’ laj Nefita ut xkolb’al rib’eb’ chiru moosil.

18 K’ehomaq reetal anajwan, wankeb’ wiib’ mil li saaj winq a’an, li ke’ok sa’ li sumwank a’in ut ke’xchap xk’anjeleb’aal re pleet re xkolb’al lix tenamit.

19 Anajwan ut k’ehomaq reetal, jo’ toj aran maajun wa ke’wan choq’ ch’a’ajkilal chiruheb’ laj Nefita, anajwan sa’ li kutan a’in ke’ok choq’ aj tenq’anel chi naab’al, xb’aan naq ke’xchap xk’anjeleb’aal re pleet, ut ke’raj naq laj Helaman taawanq choq’ xjolomineleb’.

20 Ut saaj winqeb’ chixjunileb’, ut numtajenaq xsak’ahileb’ sa’ ^axkawileb’ xch’ool, jo’ ajwi’ sa’ xmetz’eweb’ ut sa’ xb’aanunkil li k’a’aq re ru; a’ut k’ehomaq reetal, moko chixjunil ta a’in—a’aneb’ winq li ^bxaqxookeb’ xch’ool sa’ chixjunil li hoonal sa’ yalaq k’a’ru li k’eeb’il chixb’aanuheb’.

21 Relik chi yaal, a’aneb’ winq re yaal ut re tiikal k’a’uxlej, xb’aan naq tzolb’ileb’ chixpaab’ankil lix taqlahom li Dios, ut chi ^ab’eek chi tiik chiru.

22 Ut anajwan kik’ulman naq laj Helaman kib’eek sa’ xjolomileb’ lix ^awiib’ mil chi saaj aj pleet, re xtenq’ankileb’ li tenamit sa’ xnub’aal li ch’och’ sa’ xtz’e li saq’e chixk’atq li palaw sa’ rokeb’ saq’e.

23 Ut chi jo’kan kiraqe’ li xwaqxaqib’ xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.