1 Iwe non ewe fansoun pwe ra enenia chon mas won ekkewe chon kanapusen ekkewe chon Leiman, me echimwer pwe repwe feino me peiasenano ar kewe mi mano, ewer, me pwan ekkewe mi mano an ekkewe chon Nifai ekkewe ra ninnino; iwe Moronai a ewiisa ekkoch mwan wor pwe repwe maser nupwen repwe fori ar kewe angang.

2 Iwe Moronai a feino ngeni ewe teninimwen Mulek fiti Liai, me angei ewe nemenem won ewe teninimw me ngeni Liai. Iwe nengeni, ei Liai i emon mwan a fen pin nom ren Moronai non unusen kinikinin an kewe maun meinisin; iwe i emon mwan usun chok Moronai, iwe ra pwapwa non tumunun emon me emon ir; ewer, ir mi achengicheng me ren emon me emon, me pwan achengicheng me ren ekkewe aramasen Nifai meinisin.

3 Iwe non ewe fansoun pwe mwirin an ekkewe chon Leiman ra peiasenano ar kewe mi mano me pwan ekkewe mi mano an ekkewe chon Nifai, ra fetan sefan ngeni ewe fonu Fonuen ras; iwe Tiankam, me ren annuk an Moronai, a annuku pwe repwe poputa angang ne tueta warawar epwe rokopwanieno ewe fonu, are ewe teninimw, Fonuen ras.

4 Iwe a annuku pwe repwe aueta ew tit mi for seni fochun ira won kukkunongen oroppan ewe warawar; iwe ra achukuchukata puun seni ewe warawar ngeni ewe tit mi for seni fochun ira; iwe iei ra annuku ekkewe chon Leiman pwe repwe angang tori ar rokopwanieno ewe teninimwen Fonuen ras ren ew pochokunen tit mi for seni fochun ira me puun, tori an fokkun tekia.

5 Iwe ewe teninimw a winiti ew neni mi fokkun pochokun feinfeino; iwe non ei teninimw ra masa ekkewe chon kanapusen ekkewe chon Leiman; ewer, pwan mwo non ew tit minne ra annuku ngeni ir pwe repwe aueta ren pwisin pour. Iei Moronai a echimw ne annuku ekkewe chon Leiman pwe repwe angang, pokiten a mecheres ne maser nupwen ar angang; iwe a mochen pwe noun kewe mwichen sounfiu meinisin repwe monneta nupwen epwe fori ew maun won ekkewe chon Leiman.

6 Iwe non ewe fansoun pwe Moronai a akkufu ew me nein ekkewe watten sounfiu noun ekkewe chon Leiman, me a angei nemenem won ewe teninimwen Mulek, minne a ew me nein ekkewe pochokunen nenien eppet an ekkewe chon Leiman non ewe fonuen Nifai; iwe iei i a pwan aueta ew neni mi pochokun pwe epwe annomu noun kewe chon kanapus.

7 Iwe non ewe fansoun pwe ese chiwen sotuni ew maun ngeni ekkewe chon Leiman non ena ier, nge a anganga noun kewe mwan non amonnetan maun, ewer, me non forun tittin eppet pwe epwe eppeti ekkewe chon Leiman, ewer, me pwan anisi nour kewe fefin me nour kewe semirit seni nengita me riaffou, me awora mwongo fan iten nour kewe sounfiu.

8 Iwe non ewe fansoun pwe ekkewe sounfiun ekkewe chon Leiman, non ewe sat notou, eor, nupwen fansoun Moronai ese nom pokiten ekkoch kokkot mi monomon me nein ekkewe chon Nifai, minne a efisi ekkoch etinepat me neir, ra angei ekkoch tufich me won ekkewe chon Nifai, ewer, ina minne ra angei nemenem won chommong me nein teninimwer kewe non ena kinikinin ewe fonu.

9 Iwe ei pokiten angangangaw me neir pwisin, ewer, pokiten etinepat me kokkot mi monomon me neir pwisin ra katonong non ewe fokkun feiengawen nikinik.

10 Iwe iei nengeni, a ekis wor met upwe apasa usun ekkewe aramasen Ammon, ekkewe, non nepoputan, ir chon Leiman; nge me ren Ammon me pwin kewe, are fen me ren ewe manaman me kapasen Kot, ra fen siwin ngeni ewe Samon; iwe ra fen emmwenitiw ngeni ewe fonuen Saraemla, iwe soposopono seni ena fansoun ra fen tumun me ren ekkewe chon Nifai.

11 Iwe pokiten ar we pwon ra fen akkaponu ra fen eppet seni ar repwe angeiata pisekin maun ne ungeni pwir kewe; pun ra fen angei ew pwon ra akkaponu pwe resap chiwen assuku cha sefan; iwe anongonong won ar ei pwon ra fen akkaponu repwe fen mano; ewer, repwe fen mutata inisir pwe repwe fen turunong ne poun pwir kewe, ika esap pokiten ewe kirekiroch me ewe fokkun tong minne a wor ren Ammon me pwin kewe fan iter.

12 Iwe ren ei popun ra emmwenitiw ngeni ewe fonuen Saraemla; iwe ra soposopono ne tumun me ren ekkewe chon Nifai.

13 Iwe non ewe fansoun pwe nupwen ra kuna ewe feiengaw, me ekkewe chommong riaffou me weires minne ekkewe chon Nifai ra riaffouni fan iter, ra uren kirekiroch me ra fokkun mochen pwe repwe angei pisekin maun ren eppetin fonuer we.

14 Nge nengeni, nupwen ar ita repwene angei pisekin maun, ra nemenemeno me ren pesepesen Ilaman me pwin kewe, pun arap ita repwene atai ewe pwon ra fen akkaponu minne ra fen fori.

15 Iwe Ilaman a nuokus pwe ika repwe atai iwe ngunur repwe poutmwanino; iei minne ekkewe meinisin ra fen tonong non ei pwon mi pin ra echimw pwe repwe nengeni pwir kewe ne fetan non ar kewe riaffou, non ar kewe efeiengawen nikinik non ei fansoun.

16 Nge nengeni, non ewe fansoun pwe mi wor chommong nour anuon, ekkewe rese tonong non ew pwon mi pin pwe resap angei nour pisekin maun ne eppeti inisir seni ekkewe chon koum ngeni ir; iei minne ra achufengeni inisir non ei fansoun, meinisin ekkewe ra tongeni angei pisekin maun, iwe ra eita ngeni ir pwisin chon Nifai.

17 Iwe ra tonong non ew pwon mi pin pwe repwe fiu fan iten ngasenon ekkewe chon Nifai, ewer, pwe repwe tumunu ewe fonu tori ar repwe watiw manauer; ewer, ra pwan mwo pwon pwe resap tongeni fangeta ar we ngaseno, nge repwe fiu non nikinik meinisin ne tumunu ekkewe chon Nifai me pwisin inisir seni fotek.

18 Iei nengeni, mi wor ru ngorowun ekkena kukkun anuon, ekkewe ra tonong non ei pwon mi pin me angei nour kewe pisekin maun pwe repwe eppeti fonuer.

19 Iwe iei nengeni, usun rese mwo fen akkom ew ngawen tufich ngeni ekkewe chon Nifai, ra winiti pwan ew watten aninis non ei kinikinin fansoun; pun ra angei nour kewe pisekin maun, iwe ra mochen pwe Ilaman epwe nour sou emmwen.

20 Iwe ir meinisin ir kukkun anuon, iwe ir mi fokkun uren pwaracho ren apinukunuk, me pwan ren pochokun me pekin mwokutukut fetan; nge nengeni, esap ikkei meinisin—ir mwan ekkewe ir mi ennet fansoun meinisin non met chok mettoch ra ewiis ngeni.

21 Ewer, ir mwanin wenechar me ennet, pun ra fen kaeo ar repwe aneasochisi ekkewe annukun Kot me fetan wenechar me mwen i.

22 Iwe iei non ewe fansoun pwe Ilaman a karisino me mwen noun kewe ru ngorow sounfiun serafo, pwe repwe anisi ekkewe aramas non ekkewe kianin ewe fonu non eor unukun ewe sat notou.

23 Iwe iei a muchuno ewe rue me wanuen ierin muun ekkewe sou apung won ekkewe aramasen Nifai.