1 Ka sa yaco me ra lewe levu era sa sega ni muria na vosa i Ilamani kei ira na nona itokani, io era sa soqoni vata me ra vorati ira na wekadra.

2 Ia raica oqo, era sa cudru sara vakalevu, ka nakita me ra vakamatei ira.

3 Na nodra iliuliu ko ira era sa cudruvi ira na wekadra e tamata levu ka kaukauwa; ia na yacana ko Amalikaia.

4 Ia sa gadreva ko Amalikaia me tui; ia ko ira na tamata ka ra cudru tu oqo era vinakata me nodra tui ko koya; raica sa lewevuqa vei ira oqo na ^aturaganilewa lalai ena vanua, ia era segata tiko na kaukauwa.

5 Ka era sa temaki ena vosa veicavilaki i Amalikaia, sa yalataka ni na lesi ira me ra liutaki ira na tamata kevaka era tokoni koya ka buli koya me nodra tui.

6 Sa vagolei ira tani ki na vakaduiduile ko Amalikaia, e dina ga ni sa vunau tiko ko Ilamani kei iratou na wekana, io, e dina ga ni ratou karona vakaidina na lotu, ni ratou a bete levu ena lotu.

7 Ka sa vuqa ena lotu era vakabauta na vosa veicavilaki i Amalikaia, o koya era sa vuki tani kina mai na lotu; ka sa vakaoqo na veika e baleti ira na tamata i Nifai ena kena vakadomobula kei na kena vakarerevaki, e dina ga ni ra a ^aqaqa vei ira na Leimanaiti, kei na marau levu a yaco vei ira ena veisereki ni liga ni Turaga.

8 Eda sa raica rawa na ^atotolo ni nodra guilecava na Turaga na nodra Kalou ko ira na luve ni tamata, io, na totolo ni nodra vakayacora na caka ca, kei na nodra muri koya na vuni ca.

9 Io, eda raica talega na ^aca levu ena vakayacora e dua na tamata ca, ena kedra maliwa na luve ni tamata.

10 Io, keimami sa raica me vaka ni sa tamata ilawaki qaseqase sara ko Amalikaia, ka sa matai ena vosa veicavilaki, sa temaki ira kina na tamata me ra kitaka na ka ca; io, me ra sa segata me ra vakarusa na lotu ni Kalou, me ra segata me ra vakacacana na yavu ni ^abula galala ka solia vei ira na Kalou, se na veivakalougatataki ka vakalutuma ena dela ni vanua na Kalou ena vukudra na ^bivalavala dodonu.

11 Ka sa qai yaco ni sa rogoca ko Moronai, na nodra ^ailiuliu levu duadua na mataivalu ni Nifaiti, na vakaduiduile oqo, sa cudruvi Amalikaia sara kina ko koya.

12 Ka sa yaco ni a dresuka na nona kote; ka taura e dua na tikina, ka vola kina vakaoqo—Me ^aivakananumi ni noda Kalou, na noda lotu, na noda galala kei na noda tiko sautu, o ira na watida, kei ira na luveda—a sa vesuka ena mua ni dua na kau balavu.

13 Ka sa tokara na nona isala kaukamea, kei na peleti ni serena, kei na nona isasabai, ka vauca e tolona na nona iyaragi; a sa kauta na kau, sa vesuki tu kina na tiki ni nona itutuvi, (a sa vakatoka ko koya na drotini ni galala) a sa cuva ki na qele, ka masuta vakaukauwa na nona Kalou, me takavi ira na wekana na veivakalougatataki ni bula galala me yacova na gauna era taukena tiko kina na vanua na lotu Vakarisito—

14 Ia oqori na yaca era sa vakatokai kina o ira era sa vakabauta dina na ivakavuvuli i Karisito ka ra sa lewe ni lotu ni Kalou mai vei ira era sega ni lewe ni lotu.

15 Ka era sa yalodina sara ko ira na lewenilotu; io, ko ira era sa vakabauta vakaidina na Karisito era sa taura, ena yalomarau, na ^ayacai Karisito, se me ra ^blotu Vakarisito me vaka era kilai kina, me vaka na nodra vakabauta na Karisito o koya ena qai lako mai.

16 Ia o koya, ena gauna oqo, sa masulaka ko Moronai na nodra inaki na lotu Vakarisito, kei na galala ni vanua me na karoni.

17 Ka sa yaco ni sa sovaraka yani na yalona vua na Kalou, sa cavuta kece sara na vanua ena ceva kei ^aVanualala, io, na kena ivakalekaleka ga na vanua kece ena vualiku kei na ceva—Sa vanua digitaki ka vanua ni bula galala.

18 Ka sa kaya ko koya: Sa dina ena sega ni laiva na Kalou me da buturaki sobu ka vakarusai, ka beci koi keda eda sa taura na yacai Karisito, ia eda na qai vakarusai ga kevaka eda sa talaidredre.

19 Ia ni sa cavuta oti na veivosa oqo ko Moronai, sa lako yani vei ira na tamata, ka yaloyalo yani ki macawa ena nona ^aisulu ka a dresuka, me rawa ni ra raica ko ira kece na ka e volai tu ena tiki ni tutuvi, ka tagi yani vakadomoilevu, ka kaya:

20 Raica, ko ira kece era na taura na itutu oqo ena vanua oqo, me ra lako mai ena kaukauwa ni Turaga, me ra veiyalayalati ni ra na tutaka na nodra dodonu, kei na nodra lotu, me na vakalougatataki ira kina na Turaga na Kalou.

21 Ka sa yaco ni sa cavuta oti na vei vosa oqo ko Moronai, raica, era sa cici vata mai ko ira na tamata ni sa vesu tu e tolodra na nodra iyaragi, era sa dresuka na nodra isulu me ivakatakilakila se me vaka na veiyalayalati ni ra na sega ni biuta na Turaga na nodra Kalou; se, ena dua tale na kena vosa, kevaka era na talaidredre ki na ivakaro ni Kalou, se me ra na lutu ki na talaidredre, ka ^amadua me taura na yacai Karisito, me na qai dresulaki ira na Turaga me vaka na nodra sa dresulaka na nodra isulu.

22 Sai koya oqo na veiyalayalati era a cakava, era biuta yani na nodra isulu ena yavai Moronai, ka kaya: Keimami sa veiyalayalati kei na neimami Kalou, ni keimami na vakarusai, me vakataki ira na wekai keimami ena vanua ena vualiku, kevaka keimami na lutu ki na talaidredre; io, me na qai biuti keimami ko koya ena yavadra na keimami meca, me vaka ga keimami sa biuta oqo na neimami isulu ena yavamuni me qai buturaki sobu, kevaka keimami lutu ki na talaidredre.

23 A sa kaya vei ira ko Moronai: Raica, eda sa ivovo ni kawa i Jekope; io, eda sa ivovo ni ^akawa i ^bJosefa, o koya era a dresulaka vakamatailalai na nona ^ckote ko ira na tuakana; io, raica oqo, me da nanuma me da muria na ivakaro ni Kalou, de ra na qai dresulaka ko ira na wekada na noda isulu, ia eda na qai biu ki vale ni veivesu, se volitaki yani, se me da vakamatei.

24 Io, me da maroroya sara na noda galala ni da ^aivovo ni kawa i Josefa; io me da nanuma tale ga na vosa i Jekope, ni sa bera ni mate, ia raica, e a raica ni a maroroi e dua na tikitiki ni kote i Josefa ka sega ni vuca. A sa kaya—Me vaka ni sa maroroi e dua na tikitiki ni kote i na luvequ, ena maroroya tale ga vakakina na liga ni Kalou e dua na ^bivovo ni kawa i na luvequ, me na qai kauta cake yani ki vei koya, ia era na qai mate na vo ni kawa i Josefa, me vaka ga na ivovo ni nona isulu.

25 Raica, na ka oqo sa vakararawataka na yaloqu; o koya, sa marau kina na yaloqu ena vukuna na luvequ, baleta na iwase ni nona kawa ena kau cake yani vua na Kalou.

26 Raica oqo, sa vakaoqori na vosa i Jekope.

27 Ia oqo ko cei e kila na ivovo ni kawa i Josefa cava, ena rusa me vaka na nona isulu sa vuca, o ira beka era sa tawase tani mai vei keda? Io, ena rawa ni koi keda kevaka eda na sega ni tudei ena vakabauta na Karisito.

28 Ka sa qai yaco ni sa tinia na nona vosa ko Moronai sa lako yani, ka sa talatala tale ga yani ki na veivanua kece ka yaco tiko kina na veileti, me ra soqoni vata mai ko ira era sa gadreva me ra taqomaka na nodra bula galala, me ra tu ka vorati Amalikaia kei ira kece era sa vuki tani; ko ira era sa vakatokai na Amalikaiaiti.

29 Ka sa yaco ni sa raica ko Amalikaia ni ra sa lewelevu cake na tamata i Moronai mai vei ira na Amalikaiaiti—ia sa kila tale ga ni ra sa lomalomaruataka tiko na kena dodonu na inaki ni veika era segata—o koya, ni sa rivarivabi de na sega ni rawata na nona inaki, sa kauti ira era sa via muri koya ka ra dro ki na vanua ko Nifai.

30 A sa nanuma ko Moronai ni sa sega ni namaki me ra kaukauwa cake ko ira na Leimanaiti; o koya sa nanuma kina me muduki ira tani na tamata i Amalikaia, se me tauri ira ka vakasukai ira lesu mai, ka vakamatei Amalikaia, io, ni kila ni na vakayavalati ira na Leimanaiti ko koya me ra cudruvi ira ka lako mai me valuti ira; io sa kila ko koya ni na vakayacora ko Amalikaia na ka oqo me na rawata kina na nona inaki.

31 O koya sa nanuma kina ko Moronai me kauta yani na nona mataivalu, era sa soqoni vata mai, ka vakaiyaragitaki ira, ka ra sa veiyalayalati oti me ra taqomaka na veisaututaki—ka sa yaco me kauti ira yani na nona mataivalu ka lako yani kei na nodra valelaca ki na loma ni lekutu ka takosovi ira na Amalikaia ena loma ni lekutu.

32 Ka sa yaco ni sa vakayacora me vaka na nona gagadre, ia era sa lako yani ki na lekutu, ka takosova na mataivalu i Amalikaia.

33 Ka sa yaco ni sa dro ko Amalikaia kei na vica ga na nona tamata, ia ko ira na kena vo era sa soro vei Moronai, ka kauti ira lesu ko koya ki na vanua ko Saraemala.

34 Ko Moronai oqo na tamata era a ^adigitaka na turaganilewa levu kei na domodra na tamata, o koya sa tu vua na kaukauwa me lewa na mataivalu kece ni Nifaiti, ka kitaka na ka sa nanuma ni ganita.

35 Ka sa yaco ni o koya ga vei ira na Amalikaiaiti e sega ni veiyalayalati se tokona na cakacaka ni bula galala, me rawa kina ni vakadeitaki na galala ni matanitu, sa lewa ko koya me ra vakamatei; ia era a lewelailai ga ko ira era cakitaka na veiyalayalati ni tu galala.

36 Ka sa yaco talega, me lewa ko Moronai me vakarewataki na drotini ni galala ena veivale cecere kecega ena nodra vanua, ka nodra na Nifaiti; o koya sa tea kina na ivakatagedegede ni bula galala vei ira na Nifaiti.

37 Ka era sa tekivu me tiko sautu tale ena vanua taucoko; ka ra sa tiko sautu vakaoqori me yacova ni sa voleka ni cava na i ka tinikaciwa ni yabaki ni nodra veiliutaki na turaganilewa.

38 Ia ko Ilamani kei ira na ^abete levu era sa maroroya na ivakarau tudei ni veiqaravi ena lotu; io, sa yaco tiko na tiko sautu kei na marau ena lotu ena loma ni va na yabaki.

39 Ka sa yaco ni lewevuqa era sa mate yani, ka ra ^avakabauta deivaki tu ni a sereka na yalodra na Turaga ko Jisu Karisito; o koya era sa biuti vuravura yani kina ena marau.

40 Ia e so tale era sa mate ena tauvi katakata ka dauveitauvi vakawasoma ena so na gauna ena loma ni yabaki—ia era sega soti ni lewelevu sara, ni sa tu na ^akau kei na wakana sa vakarautaka tu na Kalou me medra wai ni bula na tamata ena veivanua kecega era sa tu kina—

41 Ia sa lewevuqa ga era mate ni ra sa qase; ia ko ira na vakabauti Karisito me yacova na mate, era na ^amarau vata kei koya ka sa dodonu meda vakabauta ni sa vakakina.