Dza ɔfa Nephi no nkorɔfo hɔn ho, nye hɔn akõkoekõ nye hɔn etuatsew, wɔ Helaman n’aber do dɛ mbrɛ Heleman ne nkyerɛwee no a ɔkyerɛwee wɔ n’aber do no tse.
Ofitsi etsir 45 dze kesi 62.
Tsir 45
Helaman gye Alma ne nsɛm dzi—Alma hyɛ Nephifo nsɛɛe ho nkɔm—Ohyira na ɔdze ndom kã asaase no—Bi a Sunsum no faa Alma kɔr sor dɛ mbrɛ ɔfaa Moses no—Etuatsew soɛr asɔr no mu. Bɛyɛ mfe 73 Ansaana wɔbɔwo Christ.
1 Hwɛ, afei ɔbaa dɛ Nephi no nkorɔfo no enyi gyee mbordo, osiandɛ Ewuradze agye hɔn bio efi hɔn atamfo nsa; dɛm ntsi wɔdze ndaase maa Ewuradze hɔn Nyankopɔn; nyew, na wɔfaa aakɔnkye ara yie na wɔbɔɔ mpaa so ara yie, na wɔdze enyigye kɛse sɔree maa Nyankopɔn.
2 Na ɔbaa dɛ afe a otsĩa duakron mu wɔ ber a atsɛmbuafo dzi adze wɔ Nephi no nkorɔfo do no, nna Alma baa ne babanyin Helaman nkyɛn bɛsee no dɛ: Ana egye nsɛm a mekãa kyerɛɛ wo a ɔfa dɛm ankyerɛwee a wɔdze esie no dzi?
3 Na Helaman see no dɛ: Nyew, megye dzi.
4 Na Alma see bio dɛ: Ana egye Jesus Christ a ɔreba no dzi?
5 Na ɔsee dɛ: Nyew, megye nsɛm nyinara a akã no dzi.
6 Na Alma see no bio dɛ: Ana aibedzi me mbrasɛm do?
7 Na ɔsee dɛ: Nyew, medze m’akoma nyina bedzi wo mbrasɛm do.
8 Afei Alma see no dɛ: Nhyira akã wo; na Ewuradze bɛyɛ wo aprɔmprɔm wɔ asaase yi do.
9 Mbom hwɛ, amerehyɛ biribi ho nkɔm akyerɛ wo; mbom nkɔm a merehyɛ wo yi, mma nnda no edzi nnkyerɛ obiara; nyew, nkɔm a merehyɛ wo yi ɔnnsɛ dɛ wɔda no edzi kyerɛ obiara, mpo kesi dɛ nkɔnhyɛ no bɛhyɛ mã; dɛm ntsi kyerɛw nsɛm a merebɛkã yi.
10 Na nsɛm no nye iyi: Hwɛ, muhu dɛ dɛm nkorɔfo yi ara, Nephifo yi, ɔfa no nyikyerɛ sunsum a ɔwɔ mo mu no kyerɛ dɛ amfe ahaanan mu fi ber a Jesus Christ beyi noho akyerɛ hɔn no, wɔbɔwodow wɔ bgyedzi mu.
11 Nyew, na wobohu akõkoekõ nye ɔyardɔm, nyew, ɔkɔm nye bɔgyagu mpo ekesi dɛ Nephi no nkorɔfo nyinara hɔn aase bɛhyew koraa.
12 Nyew, na iyi besi osiandɛ wɔbɔwodow wɔ gyedzi mu na wɔayɛ sum mu ndwuma, nye antantan bra nye emumuyɛ ahorow pii ekyir; nyew, mese wo dɛ, wɔbɛyɛ bɔn etsia kan nye nyimdzee kɛse a ɔtse dɛm yi, nyew, mese wo dɛ, ofi dɛm da no dze kɔ, ebusuasantsen a otsĩa anan mu dɔm nyinara mpo runntwa mu nnkɔ ansaana dɛm emumuyɛ kɛse yi ne yɛ aba.
13 Na ber a dɛm da kɛse no bɛba no, hwɛ, mber no reba ntsɛntsɛm a hɔn a wɔtse ase sesei, anaadɛ hɔn a wɔakan hɔn afora Nephi no nkorɔfo no hɔn aba no wɔrennkan hɔn mmfora Nephi no mu abio.
14 Mbom obiara a ɔbɛka na wɔnnkɛsɛɛ no wɔ dɛm da kɛse a ɔyɛ hu no mu no, awɔbɛkan no afora Lamanfo no, na hɔn nyina bɛyɛ dɛ mbrɛ wɔtse ara pɛr, gyedɛ kumaabi a wɔbɛfrɛ hɔn Ewuradze n’esuafo; na Lamanfo no betsiw hɔn so araa ekodu dɛ hɔn base bɛhyew koraa. Na afei, osian emumuyɛ ntsi, dɛm nkɔnhyɛ yi bɛhyɛ mã.
15 Na afei ɔbaa dɛ ber a Alma kãa ndzɛmba yinom kyerɛɛ Helaman wiei no, ohyiraa no, nye ne mbabanyin nkaafo no so; na ohyiraa asaase no so osian aatseneneefo ntsi.
16 Na ɔsee dɛ: Dɛm na Ewuradze Nyankopɔn se—aNdom bɛkã asaase, nyew, dɛm asaase, yi dze ama aman, ebusuafo, kasa horow nye nyimpa nyinara, dze akɔ ɔsɛɛ mu, dze ama hɔn a wɔyɛ emumuyɛdze no, ber a hɔn bɔn adɔɔ sõ no na dɛ mbrɛ makã no, ɔbɛyɛ hɔ so; na iyi nye Nyankopɔn no ndom nye bnhyira a ɔdze egu asaase yi do, osiandɛ Ewuradze runntum nnhwɛ bɔn wɔ ckwan ketseketse biara do.
17 Na afei, ber a Alma kãa dɛm nsɛm yinom wiei no, ohyiraa aasɔr no, nyew, nye hɔn nyinara a ɔsɛ dɛ wogyina pintsinn wɔ gyedzi mu fi dɛm mber no dze kɔ no.
18 Na ber a Alma yɛɛ iyi wiei no, ofii Zarahemla asaase do hɔ dɛ mbrɛ ɔrokɔ Melek asaase do. Na ɔbaa dɛ wɔanntse ne nka bio; ɔfa no wu mu anaadɛ ne nsiei mu no yennyim ho hwee.
19 Hwɛ, iyi na yenyim, dɛ ɔyɛ tseneneenyi; na asɛm yi petsee asɔr no mu nyinara dɛ Sunsum no faa no kɔr sor, anaadɛ Ewuradze noara dze ne nsa asiee no, dɛ mbrɛ wɔdze yɛɛ Moses no. Mbom hwɛ, kyerɛwsɛm kyerɛ dɛ Ewuradze faa Moses kɔr ne nkyɛn; na yesusu dɛ ɔagye Alma wɔ sunsum mu so akɔ ne nkyɛn; dɛm ntsi, yennyim biribiara a ɔfa no wu nye ne nsiei ho.
20 Na afei ɔbaa dɛ afe a otsĩa duakron wɔ ber a atsɛmbuafo dzi adze wɔ Nephi no nkorɔfo do n’ahyɛse no, Helaman kɔr dɔm no mu kɛkãa asɛm no kyerɛɛ hɔn.
21 Na hwɛ osian akõ a wɔnye Lamanfo no dzii nye hɔn etuatsew nketsenketse pii nye basabasayɛ a ɔbaa dɔm no mu no ntsi, ɔbɛyɛɛ ehiadze dɛ wɔkã aNyankopɔn n’asɛm no wɔ dɔm no mu, nyew, na wɔhyehyɛ mbra no yie bio wɔ asɔr nyinara mu.
22 Dɛm ntsi, Helaman nye no nuanom no kɔr dɛ wɔrekɛkyekyer asɔr no bio wɔ asaase no do nyina, nyew, wɔ kurow biara a ɔwɔ asaase no do nyina, a ɔyɛ Nephi no nkorɔfo dze. Na ɔbaa dɛ woyiyii asɔfo nye akyerɛkyerɛfo wɔ asaase no nyina do na wɔdze hɔn sisii asɔr nyina ano dɛ wɔnhwɛ do.
23 Na afei ɔbaa dɛ ber a Helaman na no nuanom no yiyii asɔfo nye akyerɛkyerɛfo dze hɔn sisii asɔr nyina ano dɛ wɔnhwɛ do no maa aetuatsew baa hɔn mu, na wɔammpɛ dɛ wotsie Helaman na no nuanom no hɔn nsɛm.
24 Mbom wɔyɛɛ ahantan, na wɔmemaa hɔnho do, osian hɔn aahonya mbordo a woenya ntsi, dɛm ntsi osiandɛ bwoehu dɛ woenya ahonya dodow ntsi, wɔammpɛ dɛ wotsie hɔn nsɛm, na wɔnantsew tseneneeyɛ mu wɔ Nyame enyim.