1 Ug karon nahitabo nga ang mga anak nga lalaki ni Alma miadto taliwala sa katawhan, aron sa pagpahayag sa pulong ngadto kanila. Ug si Alma, usab, sa iyang kaugalingon, dili makapahulay, ug siya usab miadto.

2 Karon dili na kita maghisgot kabahin sa ilang pagsangyaw, gawas nga nagsangyaw sila sa pulong, ug sa kamatuoran, sumala sa espiritu sa pagpanagna ug pagpadayag; ug nagsangyaw sila subay sa ^abalaan nga kapunongan sa Dios diin sila gitawag.

3 Ug karon mobalik ko sa asoy sa mga gubat tali sa mga Nephita ug sa mga Lamanita, sa ikanapulo ug walo nga tuig sa paghari sa mga maghuhukom.

4 Kay tan-awa, nahitabo nga ang mga ^aZoramita nahimong mga Lamanita; busa, sa pagsugod sa ikanapulo ug walo nga tuig ang katawhan sa mga Nephita nakakita nga ang mga Lamanita misulong kanila; busa naghimo sila og mga pagpangandam alang sa gubat; oo, gipundok nila ang ilang mga kasundalohan didto sa yuta sa Jershon.

5 Ug nahitabo nga ang mga Lamanita misulong uban sa ilang mga kaliboan; ug miabot sila sa yuta sa Antionum, nga mao ang yuta sa mga Zoramita; ug usa ka tawo nga ginganlan og Zerahemnah mao ang ilang pangulo.

6 Ug karon, kay ang mga Amalekita mas daotan ug adunay tinguha nga mopatay kay sa mga Lamanita, diha ug sa ilang mga kaugalingon, busa, si Zerahemnah mipili og labaw nga mga kapitan sa mga Lamanita, ug tanan sila mga Amalekita ug mga Zoramita.

7 Karon gibuhat niya kini aron makapadayon siya sa ilang pagdumot ngadto sa mga Nephita, aron madala niya sila sa pagkaulipon sa katumanan sa iyang mga plano.

8 Kay tan-awa, ang iyang mga plano mao ang paghulhog sa mga Lamanita aron masuko batok sa mga Nephita; gibuhat niya kini aron makaangkon siya og dakong gahom kanila, ug usab aron makaangkon og gahom sa mga Nephita pinaagi sa pagdala kanila ngadto sa pagkaulipon.

9 Ug karon ang plano sa mga Nephita mao ang pagpanalipod sa ilang mga yuta, ug sa ilang mga balay, ug sa ilang mga ^aasawa, ug sa ilang mga anak, aron mapanalipdan sila gikan sa mga kamot sa ilang mga kaaway; ug nga usab mapanalipdan nila ang ilang mga katungod ug ang ilang mga pribilehiyo, oo, ug usab ang ilang ^bkalingkawasan, aron makasimba sila sa Dios sumala sa ilang mga tinguha.

10 Kay nasayod sila nga kon mahulog sila sa mga kamot sa mga Lamanita, nga bisan kinsa ang ^amosimba sa Dios pinaagi sa ^bespiritu ug sa kamatuoran, sa tinuod ug sa buhi nga Dios, pamatyon sa mga Lamanita.

11 Oo, ug nasayod usab sila sa hilabihang pagdumot sa mga Lamanita ngadto sa ilang ^akaigsuonan, kinsa mao ang katawhan sa Anti-Nephi-Lehi, nga gitawag og katawhan ni Ammon—ug dili sila makig-away, oo, mihimo sila og usa ka pakigsaad ug dili sila molapas niini—busa, kon mahulog sila ngadto sa mga kamot sa mga Lamanita pamatyon sila.

12 Ug ang mga Nephita dili makatugot nga pamatyon sila; busa gihatagan nila sila og mga yuta nga ilang kapuy-an.

13 Ug ang katawhan ni Ammon mihatag ngadto sa mga Nephita og dakong bahin sa ilang kabtangan aron isuporta sa ilang kasundalohan; ug sa ingon niana ang mga Nephita napugos, nga nag-inusara, sa pagpakigbatok sa mga Lamanita, nga mga kaliwat nila ni Laman ug ni Lemuel, ug sa mga anak nga lalaki ni Ishmael, ug niadtong tanan nga mibiya gikan sa mga Nephita nga mga Amalekita ug mga Zoramita, ug sa ^akaliwatan sa mga pari ni Noah.

14 Karon kadto nga mga kaliwat hapit mahisama ka daghan sa mga Nephita; ug sa ingon niana ang mga Nephita napugos sa pagpakig-away sa ilang kaigsuonan, gani sa pagpaagas sa dugo.

15 Ug nahitabo nga samtang ang kasundalohan sa mga Lamanita nagkapundok didto sa yuta sa Antionum, tan-awa, ang kasundalohan sa mga Nephita nakaandam sa pagpakigsangka kanila didto sa yuta sa Jershon.

16 Karon, ang pangulo sa mga Nephita, o ang tawo nga napili nga mahimong labaw nga kapitan sa mga Nephita—karon ang labaw nga kapitan mao ang nangulo sa tanang kasundalohan sa mga Nephita—ug ang iyang ngalan mao si Moroni;

17 Ug si Moroni ang nangulo sa tanan, ug sa pagdumala sa ilang mga gubat. Ug kawhaan ug lima pa lamang ang iyang panuigon sa dihang gipili siya nga labaw nga kapitan sa kasundalohan sa mga Nephita.

18 Ug nahitabo nga iyang nasugatan ang mga Lamanita sa mga utlanan sa Jershon, ug ang iyang katawhan gisangkapan og mga espada, ug mga sundang, ug tanan nga matang sa hinagiban sa gubat.

19 Ug sa dihang ang kasundalohan sa mga Lamanita nakakita nga ang katawhan ni Nephi, o nga si Moroni, nakaandam sa iyang katawhan gamit ang mga taming sa lawas ug mga panagang sa bukton, oo, ug usab mga panagang sa pagpanalipod sa ilang mga ulo, ug usab nagsul-ob sila og bagâ nga sapot—

20 Karon ang kasundalohan ni Zerahemnah wala makaandam sa bisan hain niini nga butang; ang ilang dala mao lamang ang ilang mga espada ug ilang mga sundang, ug ilang mga gapasan ug ilang mga panâ, ilang mga bato ug ilang mga saplong; ug mga ^ahubo sila, gawas sa panit nga gibakos sa ilang mga bat-ang; oo, ang tanan mga hubo, gawas sa mga Zoramita ug mga Amalekita;

21 Apan wala sila sangkapi og mga taming sa lawas, ni mga panagang—busa, nahadlok sila sa hilabihan sa kasundalohan sa mga Nephita tungod sa ilang mga panalipod, bisan og mas labaw ang ilang gidaghanon kay sa mga Nephita.

22 Tan-awa, karon nahitabo nga wala sila mangahas sa pagsulong batok sa mga Nephita didto sa mga utlanan sa Jershon; busa mibiya sila gikan sa yuta sa Antionum paingon sa kamingawan, ug miagi sila libot sa kamingawan, duol sa ulohan sa suba sa Sidon, aron makaadto sila sa yuta sa Manti ug manag-iya sa yuta; kay wala sila magdahom nga ang kasundalohan ni Moroni nasayod asa sila paingon.

23 Apan nahitabo, sa dihang mibiya sila paingon sa kamingawan si Moroni mipadala og mga espiya ngadto sa kamingawan aron sa pagpaniid sa ilang mga sundalo; ug si Moroni, usab, nga nasayod tungod sa mga panagna ni Alma, mipadala og pipila ka tawo ngadto kaniya, nagtinguha nga siya magpakisayod sa Ginoo ^akon ang kasundalohan sa mga Nephita kinahanglan bang manalipod sa ilang mga kaugalingon batok sa mga Lamanita.

24 Ug nahitabo nga ang pulong sa Ginoo midangat ngadto kang Alma, ug si Alma mipahibalo sa mga sinugo ni Moroni, nga ang kasundalohan sa mga Lamanita nagmartsa libot sa kamingawan, aron makaadto sila sa yuta sa Manti, aron makasugod sila sa pag-atake sa mas huyang nga bahin sa katawhan. Ug kadto nga mga sinugo milakaw ug mihatod sa mensahe ngadto kang Moroni.

25 Karon si Moroni, nga nagbilin og bahin sa iyang kasundalohan didto sa yuta sa Jershon, basin pa unya kon sa unsa nga paagi ang usa ka bahin sa mga Lamanita mosulong niana nga yuta ug manag-iya sa siyudad, midala sa nahibilin nga bahin sa iyang kasundalohan ug mimartsa ngadto sa yuta sa Manti.

26 Ug misugo siya nga ang tanang katawhan niana nga dapit sa yuta magpundok sa ilang mga kaugalingon aron makig-away batok sa mga Lamanita, aron sa ^apagpanalipod sa ilang mga yuta ug sa ilang nasod, sa ilang mga katungod ug sa ilang mga kalingkawasan; busa andam na sila batok sa panahon sa pag-abot sa mga Lamanita.

27 Ug nahitabo nga si Moroni misugo nga ang iyang kasundalohan kinahanglan motago didto sa walog nga duol sa daplin sa suba sa Sidon, nga anaa sa kasadpan sa suba sa Sidon sa kamingawan.

28 Ug si Moroni mibutang og mga espiya sa palibot, aron masayran niya kanus-a moabot ang mga sundalo sa mga Lamanita.

29 Ug karon, kay nasayod man si Moroni sa katuyoan sa mga Lamanita, nga ang ilang katuyoan mao ang pagpatay sa ilang kaigsuonan, o sa pagmando kanila ug pagdala kanila ngadto sa pagkaulipon aron makatukod sila og usa ka gingharian sa ilang mga kaugalingon sa tibuok yuta;

30 Ug siya usab nga nasayod nga ang tinguha sa mga Nephita mao lamang ang pagpanalipod sa ilang mga yuta, ug sa ilang ^akalingkawasan, ug sa ilang simbahan, busa naghunahuna siya nga dili sala nga siya manalipod kanila pinaagi sa laang; busa, nahibaloan niya pinaagi sa iyang mga espiya asa moagi ang mga Lamanita.

31 Busa, gibahin niya ang iyang kasundalohan ug midala og usa ka bahin ngadto sa walog, ug mipatago kanila sa silangan, ug sa habagatan sa bungtod sa Riplah;

32 Ug ang nahibilin gipatago niya sa kasadpan sa walog, sa kasadpan sa suba sa Sidon, ug ubos sa mga utlanan sa yuta sa Manti.

33 Ug sa ingon niana nga napahimutang na ang iyang kasundalohan sumala sa iyang tinguha, andam na siya sa pagpakig-away kanila.

34 Ug nahitabo nga ang mga Lamanita miabot sa amihanan sa bungtod, diin nagtago ang usa ka bahin sa kasundalohan ni Moroni.

35 Ug samtang ang mga Lamanita miagi sa bungtod sa Riplah, ug milugsong sa walog, ug misugod sa pagtabok sa suba sa Sidon, sa kasundalohan nga nagtago sa habagatan sa bungtod nga gipangulohan sa usa ka tawo nga ginganlan og ^aLehi, ug gipangulohan niya ang iyang kasundalohan ug giliyokan ang mga Lamanita dapit sa silangan sa ilang luyo.

36 Ug nahitabo nga ang mga Lamanita, sa dihang nakita nila ang mga Nephita nga nagpaingon kanila dapit sa ilang luyo, miatubang kanila ug misugod sa pagpakig-away batok sa kasundalohan ni Lehi.

37 Ug ang kalihokan sa kamatayon sa duha ka pundok nagsugod, apan kini mas makalilisang sa habig sa mga Lamanita, kay ang ilang ^apagkahubo nabantang sa kusog kaayong mga paghapos sa mga Nephita gamit sa ilang mga espada ug sa ilang mga sundang, nga nakaingon sa kamatayon sa hapit sa matag paghapos.

38 Samtang sa lain nga bahin, matag karon ug unya adunay usa ka tawo nga mamatay sa mga Nephita, tungod sa ilang mga espada ug pagkahurot sa dugo, ingon nga napanalipdan sila gikan sa ilang mas mahinungdanong mga bahin sa lawas, o ang mas mahinungdanong mga bahin sa lawas gipanalipdan gikan sa mga paghapos sa mga Lamanita, tungod sa ilang mga ^ataming sa dughan, ug sa ilang mga panagang sa bukton, ug sa ilang mga panagang sa ulo; ug sa ingon niana ang mga Nephita nagpahigayon sa kalihokan sa kamatayon diha sa mga Lamanita.

39 Ug nahitabo nga ang mga Lamanita nangahadlok, tungod sa dakong kalaglagan taliwala kanila, gani hangtod nga nagsugod sila sa paglayas paingon sa suba sa Sidon.

40 Ug gigukod sila ni Lehi ug sa iyang mga tawo; ug giabog sila ni Lehi paingon sa katubigan sa Sidon, ug mitabok sila sa katubigan sa Sidon. Ug si Lehi mipugong sa iyang kasundalohan sa daplin sa suba sa Sidon nga dili sila motabok.

41 Ug nahitabo nga si Moroni ug ang iyang kasundalohan misugat sa mga Lamanita didto sa walog, sa pikas nga bahin sa suba sa Sidon, ug misugod sa pagsulong kanila ug sa pagpatay kanila.

42 Ug ang mga Lamanita nanglayas na usab gikan kanila, paingon sa yuta sa Manti; ug gisugat na usab sila sa kasundalohan ni Moroni.

43 Karon niini nga hitabo ang mga Lamanita nakig-away sa hilabihan; oo, wala pa sukad ang mga Lamanita mahibaloi nga nakig-away sa tumang kalig-on ug kaisog, wala, wala bisan sukad sa sinugdanan.

44 Ug gidasig sila sa mga ^aZoramita ug sa mga Amalekita, nga ilang labaw nga mga kapitan ug mga pangulo, ug pinaagi ni Zerahemnah, nga ilang labaw nga kapitan, o ilang labaw nga pangulo ug komandante; oo, nakig-away sila sama sa mga dragon, ug daghan sa mga Nephita ang napatay pinaagi sa ilang mga kamot, oo, kay napikas nila ang daghan sa ilang mga panagang sa ulo, ug milapos sa panagang sa lawas ang ilang mga pagduslak, ug mitigbas sila sa daghan sa ilang mga bukton; ug sa ingon niana ang mga Lamanita mitigbas tungod sa ilang mabangis nga kasuko.

45 Bisan pa niana, ang mga Nephita nadasig sa usa ka mas maayong katuyoan, kay wala sila ^amakig-away alang sa usa ka monarkiya ni sa gahom apan nakig-away sila alang sa ilang mga panimalay ug sa ilang mga ^bkalingkawasan, sa ilang mga asawa ug sa ilang mga anak, ug sa ilang tanan, oo, alang sa ilang mga tulumanon sa pagsimba ug sa ilang simbahan.

46 Ug gibuhat nila ang unsay gibati nila nga mao ang ^akatungdanan nga nautang nila sa ilang Dios; kay ang Ginoo misulti kanila, ug usab ngadto sa ilang mga amahan, nga: ^bKon kamo dili sad-an sa ^cunang pagsulong, ni sa ikaduha, kamo dili motugot nga kamo pamatyon sa mga kamot sa inyong mga kaaway.

47 Ug usab, ang Ginoo miingon nga: Kamo ^amanalipod sa inyong mga pamilya bisan hangtod sa pagpaagas sa dugo. Busa tungod niini nga hinungdan ang mga Nephita nakig-away sa mga Lamanita, aron sa pagpanalipod sa ilang mga kaugalingon, ug sa ilang mga pamilya, ug sa ilang mga yuta, sa ilang nasod, ug sa ilang mga katungod, ug sa ilang relihiyon.

48 Ug nahitabo nga sa dihang ang mga tawo ni Moroni nakakita sa kabangis ug sa kasuko sa mga Lamanita, hapit na unta sila mosibog ug molayas gikan kanila. Ug si Moroni, nga nakasabot sa ilang tuyo, mipadala sa iyang mga pulong ug midasig sa ilang mga kasingkasing uban niini nga mga hunahuna—oo, sa paghunahuna sa ilang mga yuta, sa ilang kalingkawasan, oo, sa ilang kagawasan gikan sa pagkaulipon.

49 Ug nahitabo nga giatubang nila ang mga Lamanita, ug ^anangamuyo sila uban sa hiniusa nga tingog ngadto sa Ginoo nga ilang Dios, alang sa ilang kalingkawasan ug sa ilang kagawasan gikan sa pagkaulipon.

50 Ug misugod sila sa pagpakigbatok sa mga Lamanita uban sa gahom; ug nianang mao gihapon nga oras dihang nangamuyo sila sa Ginoo alang sa ilang kagawasan, ang mga Lamanita misugod sa pagpanglayas gikan kanila; ug nanglayas sila ngadto sa katubigan sa Sidon.

51 Karon, ang mga Lamanita mas daghan pa, oo, labaw pa kon kaduhaon ang gidaghanon kay sa mga Nephita; bisan pa niana, giabog sila hangtod nga natingob sa usa ka pundok sa walog, sa daplin sa suba sa Sidon.

52 Busa ang kasundalohan ni Moroni miliyok kanila, oo, bisan sa duha ka habig sa suba, kay tan-awa, didto sa silangan mao ang mga tawo ni Lehi.

53 Busa sa dihang nakakita si Zerahemnah sa mga tawo ni Lehi didto sa silangan sa suba sa Sidon, ug ang mga kasundalohan ni Moroni didto sa kasadpan sa suba sa Sidon, nga giliyokan sila sa mga Nephita, giabot sila og kalisang.

54 Karon si Moroni, sa dihang nakita niya ang ilang kalisang, misugo sa iyang mga tawo nga mohunong sa pagpaagas sa ilang dugo.