1 Iwe iei non ewe fansoun pwe ekkewe anuon noun Alma ra feino nein ekkewe aramas, pwe repwe afanafana ewe kapas ngeni ir. Iwe Alma, pwan, won inisin, ese tongeni asoso, iwe i pwan a feino.

2 Iei sisap chiwen pwan apasa pwan och usun ar we afanafan, tiwenon chok pwe ra afanafana ewe kapas, me ewe ennet, anongonong won ewe ewe ngunun osini me pwarata; iwe ra afanafan anongonong won ewe tetten mi fel an Kot ren minne ra kokko ngeni.

3 Iwe iei ua niwin ngeni ew uruon ekkewe maun nefinen ekkewe chon Nifai me ekkewe chon Leiman, non ewe engon me wanuen ierin ekkewe sou apung.

4 Pun nengeni, non ewe fansoun pwe ekkewe chon Soram ra winiti chon Leiman; iei minne, non nepoputan ewe engon me wanuen ier ekkewe aramasen ekkewe chon Nifai ra kuna pwe ekkewe chon Leiman ra feito wor; iei minne ra for amonnetan maun; ewer, ra ionfengeni nour kewe sounfiu non ewe fonuen Jerson.

5 Iwe non ewe fansoun pwe ekkewe chon Leiman ra feito fiti fengen me nour kewe ngerou; iwe ra feito non ewe fonuen Antionum, minne ina fonuen ekkewe chon Soram; iwe emon mwan me ren ewe it Seraemna i nour sou emmwen.

6 Iwe iei, pokiten ekkewe chon Amalekai a kon wor ar ngaw me mochenin niiningaw nap seni ekkewe chon Leiman akkom, pwisin won inisir, iei minne, Seraemna a finata kaptin mi nap won ekkewe chon Leiman, iwe ir meinisin chon Amalekai me chon Soram.

7 Iwe ei a fori pwe epwe tongeni tumunu ar we koput ngeni ekkewe chon Nifai, pwe i epwe tongeni uwei ir ngeni fan nemenem ngeni fisiochunon an kewe kokkot.

8 Pun nengeni, an kewe kokkot pwe repwe amwasangata ekkewe chon Leiman ar repwe song ngeni ekkewe chon Nifai; ei a fori pwe epwe angeimwani watten pochokun wor, me pwe epwe pwan tongeni angei pochokun won ekkewe chon Nifai ren an uweirenong non fotek.

9 Iwe iei ekkewe kokkot an ekkewe chon Nifai pwe repwe anisi fonuer kewe, me imwer kewe, me punuwer kewe, me nour kewe, pwe repwe tongeni tumunur seni ne poun ekkewe chon koum ngeni ir; me pwe repwe pwan tongeni tumunu ar pung me ar tufich; ewer, me pwan ar ngaseno, pwe repwe tongeni fen ngeni Kot anongonong won ar mochen.

10 Pun ir mi sinei pwe ika repwe turunong ne poun ekkewe chon Leiman, pwe ion chok epwe fen ngeni Kot non ngun me non ennet, ewe Kot mi ennet me manau, ekkewe chon Leiman repwe nireno.

11 Ewer, me ir mi pwan sinei ewe wachemuken koput an ekkewe chon Leiman ngeni pwir kewe, ir ekkewe aramasen Antai-Nifai-Liai, ir ekkewe ra iteni ekkewe aramasen Ammon—iwe resap angei pisekin maun, ewer, ra fen tonong non ew pwon mi pin me resap atai—iei minne, ika repwe turunong ne poun ekkewe chon Leiman repwe ninnino.

12 Iwe ekkewe chon Nifai resap mutata pwe repwe ninnino; iei minne ra ngeni ir fonu pwe fonuer.

13 Iwe ekkewe aramasen Ammon ra ngeni ekkewe chon Nifai ew watten kinikinin pisekir kewe pwe repwe anisi nour kewe sounfiu; iwe iei ekkewe chon Nifai ra echimw, anamon, ne ungeni ekkewe chon Leiman, ir ekkewe mi nofit mwirimwirir seni Leiman me Lemuel, me ekkewe anuon noun Ishmael, me ekkewe meinisin ir ra rikino seni ekkewe chon Nifai, ir ekkewe chon Amalekai me chon Soram, me ekkewe mwirimwirin ekkewe pris noun Noah.

14 Iei ekkena mwirimwirin aramas ir mi chommong, akkarap, usun ekkewe chon Nifai; iwe iei ekkewe chon Nifai ra echimw pwe repwe fiu ngeni pwir kewe, pwan mwo tori assuku cha.

15 Iwe non ewe fansoun pokiten ekkewe sounfiun ekkewe chon Leiman ra ioifengen non ewe fonuen Antionum, nengeni, ekkewe sounfiun ekkewe chon Nifai ra monneta ar repwe churi ir non ewe fonuen Jerson.

16 Iei, ewe sou emmwenin ekkewe chon Nifai, are ewe mwan a fen kefinita pwe epwe kaptin mi nap won ekkewe chon Nifai—iei ewe kaptin mi nap a emmweni ekkewe sounfiun ekkewe chon Nifai meinisin—iwe itan Moronai;

17 Iwe Moronai a emmweni ir meinisin, me ewe mwokutukutun ar kewe maun. Iwe i a chok rue me nimu ierin nupwen a kefinita pwe epwe kaptin mi nap won ekkewe sounfiun ekkewe chon Nifai.

18 Iwe non ewe fansoun pwe a churi ekkewe chon Leiman non ekkewe kianin Jerson, iwe noun kewe aramas ra affout ren ketinas, me tok, me sokopaten pisekin maun meinisin.

19 Iwe nupwen ekkewe sounfiun ekkewe chon Leiman ra kuna pwe ekkewe aramasen Nifai, are pwe Moronai, a fen amonnata noun kewe aramas ren chechen neup me ren pwonupwon ir mi kamoch won pour, ewer, me pwan pwonupwon ne eppeti mokurer, me ir mi pwan ufouf ren uf mi manun—

20 Iei ekkewe sounfiun Seraemna rese monneta ren och sokkun mettoch; a chok wor rer nour kewe ketinas me nour kewe tok, nour kewe nikappich me nour kewe foun nikappich, nour foun fau me aunun; iwe ir mi seneno, tiwenon chok och penit minne a fofo ngeni nukanaper; ewer, ir meinisin mi seneno, tiwenon chok ekkewe chon Soram me ekkewe chon Amalekai;

21 Nge rese pisekisek ren chechen neup, are pwonupwon—iei minne, ra fokkun nuokusiti ekkewe sounfiun ekkewe chon Nifai pokiten ar kewe fouten eppet, me nukun chochor kewe a fokkun watte nap seni ekkewe chon Nifai.

22 Nengeni, iei non ewe fansoun pwe rese pwaracho ne feito ngeni ekkewe chon Nifai non ekkewe kianin Jerson; iei minne ra no seni ewe fonuen Antionum ngeni ewe fonu pon, me poputani ar we sai mi rokopwan fetan non ewe fonu pon, towaweno seni ewe chonupupu Sidon, pwe repwe tongeni feito non ewe fonu Mantai me nemenano ewe fonu; pun rese ekieki pwe ekkewe sounfiun Moronai repwe sinei ika ra fen no.

23 Iwe non ewe fansoun, mwitir chok mwirin ar ra no ngeni ewe fonu pon Moronai a tinano ekkoch spai non ewe fonu pon pwe repwe attona ar we nenien asoso; iwe Moronai, pwan, a sinei usun ekkewe osini an Alma, a tinano ekkoch mwan ngeni i, a mochen i pwe epwe eisini ewe Samon ika ekkewe sounfiun ekkewe chon Nifai repwe feino eppeti pwisin ir seni ekkewe chon Leiman.

24 Iwe non ewe fansoun pwe ewe kapasen ewe Samon a feito ngeni Alma, iwe Alma a ureni ekkewe chon kunon Moronai, pwe ekkewe sounfiun ekkewe chon Leiman ra rokopwan fetan non ewe fonu pon, pwe repwe tongeni feito non ewe fonuen Mantai, pwe repwe tongeni poputani ew maun won ewe kinikin mi apwangapwang me nein ekkewe aramas. Iwe ekkena chon kuno ra feino me otoura ewe porous ngeni Moronai.

25 Iei Moronai, a nikiti ew kinikinin noun kewe sounfiu non ewe fonuen Jerson, ren nuokusun ekkoch popun ika ew kinikinin ekkewe chon Leiman repwe feito non ena fonu me nemenano ewe teninimw, a angei ewe nussun kinikinin noun kewe sounfiu me feino ngeni ewe fonuen Mantai.

26 Iwe a annuku pwe ekkewe aramas meinisin non ena kinikinin ewe fonu repwe ionfengenir pwe repwe maun ngeni ekkewe chon Leiman, pwe repwe eppeti fonuer kewe me muur kewe, ar pung me ar ngaseno; iei minne ra monneta ngeni ewe fansoun wareton ekkewe chon Leiman.

27 Iwe non ewe fansoun pwe Moronai a annuku pwe noun kewe sounfiu repwe opono non ewe nemonun chuk minne a arap ngeni oroppan ewe chonupupu Sidon, minne a nom notoun ewe chonupupu Sidon non ewe fonu pon.

28 Iwe Moronai a enenia spai unukun, pwe i epwe tongeni sinei nupwen ewe mwichen ekkewe chon Leiman repwe feito.

29 Iwe iei, pokiten Moronai a sinei kokkotun ekkewe chon Leiman, pwe ar kokkot pwe repwe nieno pwir kewe, are nemeni ir me uweir ir ngeni fotek pwe repwe tongeni forata ew muu ngeni ir pwisin won unusen ewe fonu;

30 Iwe i a pwan sinei pwe ina chok mochenin ekkewe chon Nifai pwe repwe tumunu fonuer kewe, me ar ngaseno, me ar we mwichefen, iei minne a ekieki pwe esap tipis pwe i epwe eppeti ir me ren kokkot; iei minne, a sinei me ren noun kewe spai minne aan ekkewe chon Leiman repwe fetan won.

31 Iei minne, a eimufeseni noun kewe sounfiu me uwei ew kinikinin ngeni ewe nemonun chuk, me opareno won otiw, me won eorun ewe chukuchukuta Repla;

32 Iwe ekkewe nussun a opareno non nemonun chuk notou, won notoun ewe chonupupu Sidon, me soposopotiw ngeni ekkewe kianin ewe fonu Mantai.

33 Iwe iei mwirin an enenia noun kewe sounfiu anongonong won an mochen, i a monneta ne churi ir.

34 Iwe non ewe fansoun pwe ekkewe chon Leiman ra feita me won ennefenin ewe chukuchukuta, ikewe ew kinikinin ekkewe sounfiun Moronai ra opono.

35 Iwe nupwen ekkewe chon Leiman ra nuseni ewe chukuchukuta Repla, me feito non ewe nemonun chuk, me poputa ne feino epekin ewe chonupupu Sidon, ekkewe sounfiu minne ra opono won eorun ewe chukuchukuta, minne ra emmwen me ren emon mwan itan Liai, iwe a emmwenano noun kewe sounfiu me rokopwanieno ekkewe chon Leiman won otiw mwirir.

36 Iwe non ewe fansoun pwe ekkewe chon Leiman, nupwen ra kuna ekkewe chon Nifai ar feita wor me mwirir, ra kunsefan me poputa ne fiu ngeni ekkewe sounfiun Liai.

37 Iwe ewe angangen mano a poputa me ruepek, nge a kon anuokus me won kinikinin ekkewe chon Leiman, pun ar seneno a pwano ngeni ekkewe pochokunen wopup an ekkewe chon Nifai ren nour kewe ketinas me nour kewe tok, minne a esenipato mano ren fansoun meinisin ar wopup.

38 Nupwen won ewe efoch pau, a wor iei me ekiseno emon mwan a turuno me nein ekkewe chon Nifai, me ren nour kewe ketinas me ewe pönon cha, pokiten ir mi pwonupwon seni ekkewe kon auchean kinikinin ewe inis, are ekkewe kon auchean kinikinin ewe inis mi pwonupwon seni ekkewe wopup an ekkewe chon Leiman, me ren ar kewe chechen neup, me ren ekkewe pwonupwon ir mi kamoch won pour, me ar kewe pwonupwonun mokur; iwe iei ekkewe chon Nifai ra soposopono won ewe angangen mano me nein ekkewe chon Leiman.

39 Iwe non ewe fansoun pwe ekkewe chon Leiman ra nuokus, pokiten watten ewe kiteter me neir, pwan mwo tori ar poputa ne su ngeni ewe chonupupu Sidon.

40 Iwe ra tapw me ren Liai me noun kewe mwan; iwe ra su sefan me ren Liai ngeni ekkewe konikin Sidon, iwe ra feino epekin ekkewe konikin Sidon. Iwe Liai a amwochatiw noun kewe sounfiu won oroppan ewe chonupupu Sidon pwe resap feino epekin we.

41 Iwe non ewe fansoun pwe Moronai me noun kewe sounfiu ra churi ekkewe chon Leiman me non ewe nemonun chuk, won epekin ewe chonupupu Sidon, me ra poputa ne turuta wor me nireno.

42 Iwe ekkewe chon Leiman ra su sefan me mwer, ngeni ewe fonuen Mantai; iwe ra chu sefan me ren ekkewe sounfiun Moronai.

43 Iei non ei nikinik ekkewe chon Leiman ra fokkun fiu; ewer, esemo fis me akkom pwe ekkewe chon Leiman ra fiu ren fokkun pochokun napanap me pwaracho, apw, esap pwan mwo seni nepoputan.

44 Iwe ra pesepes me ren ekkewe chon Soram me ekkewe chon Amalekai, ir ekkewe nour kaptin mi nap me sou emmwen, me ren Seraemna, i ewe nour kaptin mi nap, are nour sou emmwen mi nap me sou emmwenin sounfiu; ewer, ra fiu usun dragon, iwe chommong me nein ekkewe chon Nifai ra ninnino me ren pour, ewer, pun ra wichi ir ngeni non ru kinikin me ren pwonupwonun mokurer kewe, iwe ra pwereni chommong me nein ar kewe chechen neup, iwe ra wichieno chommong pour kewe; iwe iei ekkewe chon Leiman ra wichiwich non ar song mi pochokun.

45 Nge inamo, ekkewe chon Nifai ra pesepes me ren ew popun mi echipwer, pun rese fiu fan iten seikitan king are pochokun nge ra fiu fan iten imwer kewe me ar ngaseno, punuwer kewe me nour kewe, me ar mettoch meinisin, ewer, fan iten ar angangen fen me ar mwichefen.

46 Iwe ra fori met minne ra nuku pwe wiiser minne ra mefi pwe repwe ngeni ar Kot; pun ewe Samon a apasa ngeni ir, me pwan ngeni semer kewe, pwe: Pokiten ami ouse tipisini ewe aewin assong, are pwan ewe aruwan, ousap mutata inisimi pwe oupwe ninnino me ren poun ekkewe chon koum ngenikemi.

47 Iwe pwan, ewe Samon a fen apasa pwe: Oupwe eppeti ami kewe famini pwan mwo tori assuku cha. Iei minne ren ei popun ekkewe chon Nifai ra fiu ngeni ekkewe chon Leiman, pwe repwe eppeti inisir, me ar kewe famini, me fonuer kewe, me muur kewe, me ar pung, me ar mwichefen.

48 Iwe non ewe fansoun pwe nupwen ekkewe mwan noun Moronai ra kuna ewe pochokun me ewe songen ekkewe chon Leiman, ita repwene nursefan me su me mwer. Iwe Moronai, a weweiti ar ekiek, a titino me pesei netiper ren ekkei ekiek—ewer, ekkewe ekiekin fonuer kewe, me ar ngaseno ne finata mettoch, ewer, me ar ngaseno seni fotek.

49 Iwe non ewe fansoun pwe ra kun ngeni ekkewe chon Leiman, iwe ra sio ren ew mongungu ngeni ewe Samon ar Kot, fan iten ar ngaseno ne finata mettoch me ar ngaseno seni fotek.

50 Iwe ra poputa ne ungeni ekkewe chon Leiman ren pochokun; iwe non ena chok pwan awa pwe ra sio ngeni ewe Samon fan iten ar ngaseno, ekkewe chon Leiman ra poputa ne su me mwer; iwe ra suno pwan mwo ngeni ekkewe konikin Sidon.

51 Iei, ekkewe chon Leiman ra kon fokkun chommong, ewer, chommong nap seni fan ru chochon ekkewe chon Nifai; nge inamo, ra echimw ne su sefan ina minne ra ioifengen non ew mwich non ewe nemonun chuk, won ewe oroppa me ren ewe chonupupu Sidon.

52 Iei minne ekkewe sounfiun Moronai ra rokopwanireno, ewer, pwan mwo won ruepekin ewe chonupupu, pun nengeni, won otiw ekkewe mwan noun Liai ra nom ie.

53 Iei minne nupwen Seraemna a kuna ekkewe mwan noun Liai won otiwen ewe chonupupu Sidon, me ekkewe sounfiun Moronai won notoun ewe chonupupu Sidon, pwe ra rokopwanino me ren ekkewe chon Nifai, ra mairu ren nuokus.

54 Iei Moronai, nupwen a kuna ar nuokus, a annuku noun kewe mwan pwe repwe kouno ne assuku char.