Vaj Lug Kub
Amas 39


Amas tej lus txib rau nws tus tub Khali-atoos.

Muaj nyob hauv tshooj 39 mus rau 42.

Tshooj 39

Txoj kev ua txhaum kev sib daj sib deev yog ib txoj kev qias—Khali-atoos tej kev txhaum tau thaiv cov Neeg Xaulas los txais yuav txoj lus—Khetos txoj kev txhiv dim yuav pab cawm tau cov ntseeg uas nyob ua ntej nws. Kwv yees li 74 xyoo ua ntej yug Yexus.

1 Thiab nim no, kuv tus me tub, kuv muaj ntau yam hais rau koj dua li tej uas kuv tau hais rau koj tus tij laug; vim saib seb, koj tsis tau pom txoj kev ruaj nrees ntawm koj tus tij laug, nws txoj kev ntseeg, thiab nws txoj kev rau siab coj Vajtswv tej lus txib los? Saib seb, nws tsis tau ua ib tug yam ntxwv zoo rau koj los?

2 Vim koj tsis tau ua raws li kuv tej lus ntau npaum li koj tus tij laugtau ua, nyob rau hauv cov Neeg Xaulas. Nim no qhov no yog yam uas kuv muaj tawm tsam koj; koj tau mus khav theeb txog koj lub zog thiab koj txoj kev txawj ntse.

3 Thiab tsis tas li no xwb, kuv tus me tub es. Koj tau ua tej uas ua rau kuv tu siab heev; vim koj tau tsum txoj kev qhuab qhia txoj moo zoo, thiab tau mus rau hauv thaj av Sailas, uas nyob ntawm cov Neeg Lamas tej ciam teb, mus nrhiav tus niam ntiav Ixanpaus.

4 Muaj tseeb tiag, nws tau nyiag ntau tus tej siab; tiam sis qhov no yuav zam tsis tau rau koj li, kuv tus me tub es. Tsim nyog koj yuav tsum qhuab qhia txoj moo zoo li uas tau muab rau koj ua lawm.

5 Koj tsis paub los, kuv tus me tub es, tias tej yam no yog ib txoj kev qias nyob ntawm tus Tswv lub qhov muag; muaj tseeb tiag, yog txoj kev qias uas phem tshaj txhua yam kev txhaum tsuas yog tshuav txoj kev tua tej neeg tsis muaj txim kom ntshav nrog los sis tsis kam lees tus Vaj Ntsuj Plig Dawb Huv xwb no los?

6 Vim saib seb, yog koj tsis kam lees yuav tus Vaj Ntsuj Plig Dawb Huv thaum nws tseem muaj chaw nyob hauv koj, thiab koj paub tias koj tsis kam lees yuav nws, saib seb, qhov no yog ib qho txhaum uas zam txim tsis tau li; muaj tseeb tiag, thiab tus uas tua neeg tawm tsam qhov kaj thiab txoj kev paub txog Vajtswv, yuav tsis yooj yim rau nws txais tau txoj kev zam txim; muaj tseeb tiag, kuv hais rau koj, kuv tus me tub, tias nws tsis yooj yim rau tus ntawd txais tau ib txoj kev zam txim.

7 Thiab nim no, kuv tus me tub, kuv xav rau Vajtswv tias kheev lam koj tsis txhob tau ua txhaum ib txoj kev txhaum loj. Kuv yuav tsis hais txog koj tej kev txhaum, kom tsim txom koj tus ntsuj plig, yog tias qhov ntawd tsis zoo rau koj.

8 Tiam sis saib seb, koj tsis muaj peev xwm yuav zais koj tej kev txhaum ncaim ntawm Vajtswv; thiab tsuas yog koj yuav hloov siab lees txim xwb tsis li ntawd tej ntawd yuav sawv ua ib qhov tim khawv nkaug koj nyob rau hauv hnub kawg.

9 Nim no kuv tus me tub, kuv xav kom koj yuav hloov siab lees txim thiab tso koj tej kev txhaum tseg, thiab tsis txhob mus raws tej uas koj lub qhov muag ntshaw ntxiv lawm, tiam sis tseg kiag koj tus kheej nyob hauv ib puas yam tsav no; vim tsuas yog koj yuav ua li no xwb tsis li ntawd koj yuav tsis muaj peev xwm tau Vajtswv lub nceeg vaj los ua koj tug. Au, cia li nco ntsoov, thiab cia li muab qhov no ris, thiab tseg kiag koj tus kheej nyob hauv ib puas yam tsav no.

10 Thiab kuv txib kom koj muab koj tus kheej los sab laj nrog koj tej tij laugtxog txhua yam uas koj yuav ua; vim saib seb, koj tseem hluas, thiab koj tseem xav tau kev pab tu los ntawm koj cov tij laug. Thiab cuab pob ntseg rau nkawd tej lus qhuab ntuas.

11 Tsis txhob cia koj tus kheej raug tej yam tsis muaj qab hau los sis ruam ntxias tau; tsis txhob cia tus dab rov qab ntxias tau koj lub siab mus raws tej niam ntiav phem ntawd. Saib seb, Au kuv tus me tub es, koj tau coj txoj kev tsis ncaj ncees los rau cov Neeg Xaulas loj npaum li cas; vim thaum lawv tau pom koj txoj kev coj lawv tsis kam ntseeg kuv tej lus.

12 Thiab nim no tus Tswv tus Ntsuj Plig hais rau kuv tias: Txib koj tej me nyuam kom ua zoo, ntshai tsam lawv yuav ntxias tau ntau tus neeg tej siab mus rau txoj kev puas tsuaj; yog li ntawd kuv txib koj, kuv tus me tub, nyob ntawm txoj kev ntshai Vajtswv, kom koj yuav tsum tso koj tej kev tsis ncaj ncees tseg.

13 Kom koj yuav tig rov qab mus cuag tus Tswv nrog tag nrho koj lub siab, lub ntsws, thiab lub dag lub zog; kom koj yuav tsis txhob ntxias tau neeg tej siab mus ua phem ntxiv li lawm; tiam sis rov qab mus cuag lawv, thiab lees qhia koj tej kev txhaum thiab qhov tsis yog uas koj tau ua lawm.

14 Tsis txhob nrhiav tej kev nplua nuj los sis tej uas tsis muaj nuj nqis ntawm lub ntiaj teb no; vim saib seb, koj yuav coj tsis tau lawv nrog koj.

15 Thiab nim no, kuv tus me tub, kuv xav hais tej yam rau koj txog txoj kev Khetos yuav los. Saib seb, kuv hais rau koj, tias nws twb yog tus uas yuav los tiag tiag los ris tej kev txhaum ntawm lub ntiaj teb mus; muaj tseeb tiag, nws yuav los tshaj tawm txoj moo zoo txog txoj kev cawm seej rau nws cov neeg.

16 Thiab nim no, kuv tus me tub, qhov no yog txoj kev qhuab qhia txoj moo zoo uas koj tau raug hu, mus tshaj tawm tej moo zoo no mus rau cov neeg no kom kho npaj lawv tej siab; los sis kom txoj kev cawm seej yuav los rau lawv, xwv kom lawv yuav npaj lawv tej me nyuam tej siab los hnov txoj lus nyob rau lub sij hawm thaum nws los.

17 Thiab nim no kuv yuav ua kom yooj yim rau koj lub siab me ntsis txog qhov no. Saib seb, koj tau xav tias yog vim li cas es ho tsim nyog yuav tsum xub paub tej no ntev ua ntej. Saib seb, kuv hais rau koj tias, tsis yog ib tug neeg nyob rau lub sij hawm no muaj nuj nqis rau Vajtswv ib yam li ib tug neeg nyob rau lub sij hawm thaum nws los lod?

18 Tsis yog tsim nyog tias txoj kev txhiv dim yuav tsum raug ua kom paub rau cov neeg no ib yam li rau lawv tej me nyuam thiab los?

19 Tsis yog nws yooj yim nyob rau lub sij hawm no rau tus Tswv xa nws tus tim tswv los tshaj tawm tej moo zoo no rau peb ib yam li rau peb tej me nyuam, los sis ib yam li tom qab lub sij hawm uas nws los lawm thiab los?