1 Ket ita napasamak a kalpasan nga insao ni Alma dagitoy a balikas nagtugaw isuna iti daga, ken timmakder ni ^aAmulek ket inrugina ti nangisuro kadakuada, a kunana:

2 Kakabsatko, pagarupek nga imposible nga ignorantekayo kadagiti bambanag a naisao maipanggep iti yaay ni Cristo, nga insuromi nga agbalin nga Anak ti Dios; wen, ammok a nawadwad a naisuro kadakayo ^adagitoy a bambanag sakbay ti panagsusupiatyo manipud kadakami.

3 Ket kas tinarigagayanyo iti ay-ayatek a kabsatko a rumbeng nga ipakaammona kadakayo no ania ti rumbeng nga aramidenyo, gapu kadagiti panagrigrigatyo; ket nagsao isuna kadakayo iti sumagmamano a banag tapno maisagana dagiti panunotyo; wen, ket pinaregtanakayo a nagbanag ti pammati ken kinaanus—

4 Wen, agingga iti maaddaankayo iti nabileg a pammati kas uray iti ^apanangimula ti balikas kadagiti puspusoyo, tapno masubokyo ti eksperimento iti kinaimbagna.

5 Ket nabigbigmi a ti naindaklan a saludsod nga adda kadagiti panunotyo ket no nagtaud ti balikas iti Anak ti Dios, wenno no awanto ti Cristo.

6 Ket nabigbigmi met a pinaneknekan kadakayo ti lalaki a kabsatko, iti adu a gundaway, nga adda ken Cristo ti ^abalikas a mangyeg iti pannakaisalakan.

7 Tinukoy ti lalaki a kabsatko dagiti balikas ni Zenos, nga umay ti pannakasubbot babaen ti Anak ti Dios, ken kasta met kadagiti balikas ni Zenock; ken kasta met a nagpakaasi isuna ken ni Moises, tapno mapaneknekan a pudno dagitoy a bambanag.

8 Ket ita, kitaen, siak a mismo ^apaneknekak kadakayo a pudno dagitoy a bambanag. Kitaen, kunak kadakayo, nga ammok nga umayto ni Cristo kadagiti annak ti tattao, tapno ibaklayna dagiti salungasing dagiti taona, ken isunto ti ^bmangsubbot kadagiti basbasol ti lubong; gapu ta naisao daytoy ti Apo a Dios.

9 Agsipud ta kasapulan a ti ^apannubbot ket maaramid; agsipud ta sigun iti naindaklan a ^bplano ti Agnanayon a Dios sigurado nga adda maaramid a pannubbot, ta no saan sigurado a saan a maliklikan ti amin a sangataoan ti mapukaw iti naespirituan; wen, nasukir ti amin; wen, ^cnatnag iti managbasol a kasasaad ken napukaw ti amin, ken sigurado a matnag iti managbasol a kasasaad malaksid no babaen ti pannubbot a kasapulan a rumbeng a maaramid.

10 Agsipud ta masapul nga adda naindaklan ken maudi a ^asakripisio; wen, saan a sakripisio ti tao, wenno ayup, wenno iti uray ania a kita ti tumatayab; agsipud ta saan a nataoan a sakripisio; ngem masapul nga ^bawan patinggana ken agnanayon a ^csakripisio.

11 Ita awan ti asinoman a tao a makaisakripisio iti bukodna a dara a mangsubbot kadagiti basbasol ti sabali. Ita, no mangpapatay ti maysa a tao, kitaen, alaen kadi ti lintegtayo, a ^analinteg, ti biag ti kabsatna? Kunak kadakayo, Saan.

12 Ngem kiddawen ti linteg ti ipapatay ti nangpapatay; Ngem ipapilit ti linteg ti biag ti tao a ^anangpapatay; ngarud awan ti mabalin a basbassit pay ngem iti awan patinggana a pannubbot nga umdasen para kadagiti basbasol ti lubong.

13 Ngarud, kasapulan nga addaan iti maysa a naindaklan ken maudi a sakripisio, ket kalpasanna addaanto, wenno rumbeng nga addaan, ti ^apagsardengan ti pammapatay; kalpasanna matungpalto ti ^blinteg ni Moises; wen, matungpalto amin, ti tunggal naisurat ken tuldek, ket awanto ti agsardeng a maipatungpal.

14 Ket kitaen, daytoy ti sibubukel a ^akaipapanan ti ^blinteg, itudo ti tunggal kabassitan a paset iti dayta naindaklan ken maudi a ^csakripisio; ket dayta a naindaklan ken maudi a sakripisio isunto ti Anak ti Dios, wen, awan patinggana ken agnanayon.

15 Ket iti kasta iyegnanto ti ^apannakaisalakan kadagiti amin a mamati iti naganna; daytoy ti panggep daytoy a maudi a sakripisio, tapno mangiyeg iti panangngaasi, a mangparmek iti kinahustisia, ken mangiyeg iti wagas para kadagiti tattao tapno maaddaanda iti pammati a mangiyeg ti panagbabawi.

16 Ket iti kasta mapnek ti ^aasi ti kiddawen ti ^bhustisia, ket likmutenna ida kadagiti takiag ti kinatalged, idinto ta ti saan a mangaramat iti pammatina a mangiyeg iti panagbabawi ket maibutaktak iti sibubukel a kiddawen ti ^chustisia; ngarud para kenkuana laeng nga addaan pammati a mangiyeg iti panagbabawi ti pakaiyegan iti naindaklan ken agnanayon a ^dplano ti pannakasubbot.

17 Ngarud sapay koma ta ipaay ti Dios kadakayo, kakabsatko, ta rugianyo koma nga usaren ti ^apammatiyo a mangiyeg iti panagbabawi, ta rugianyo ti ^bumawag iti nasantuan a naganna, tapno kaasiannakayo;

18 Wen, agpakaasikayo kenkuana para iti asi, agsipud ta nabileg isuna a mangisalakan.

19 Wen, agpakumbabakayo, ken itultuloyyo ti agkararag kenkuana.

20 Agpakaasikayo kenkuana no addakayo iti kataltalonanyo, wen, para kadagiti amin nga arbanyo.

21 ^aAgpakaasikayo kenkuana iti balbalayyo, wen, kadagiti amin a sangakabbalayanyo, iti agsapa, tengnga ti aldaw, ken rabii.

22 Wen, agpakaasikayo kenkuana a maibusor iti bileg dagiti kabusoryo.

23 Wen, ^aagpakaasikayo kenkuana maibusor iti ^bsairo, a kabusor ti amin a ^ckinalinteg.

24 Agpakaasikayo kenkuana para kadagiti mulmula iti taltalonyo, tapno agrang-aykayo kadagitoy.

25 Agpakaasikayo para kadagiti arban iti taltalonyo, tapno umaduda.

26 Ngem saan laeng amin dagitoy; masapul nga ibukbok dagiti kararuayo kadagiti ^asiledyo, ken iti nalimed a luglugaryo, ken iti let-angyo.

27 Wen, ket no man saankayo nga agpakaasi iti Apo, ipalubosyo a ti ^apuspusoyo ket ^bmapno, agtultuloy nga agkarkararag kenkuana para iti pagimbaganyo, ken kasta met para iti pagimbagan dagiti adda iti aglawlawyo.

28 Ket ita kitaen, ay-ayatek a kakabsatko, kunak kadakayo, saanyo a pagarupen nga umdasen dagitoy; gapu ta no kalpasan a naaramidmo amin dagitoy a bambanag, no tallikudanyo dagiti ^amakasapul, ken dagiti lamulamo, ken saanyo a sarungkaran dagiti masaksakit ken marigrigat, ken saanyo ^bibingayan dagiti makasapul iti taraonyo, no addaankayo, kadagiti agkasapulan—kunak kadakayo, no saanyo nga aramiden ti uray ania kadagitoy a bambanag, kitaen, ti ^ckararagyo ket ^dawan serbina, ket awan ti maipaayna kadakayo, ket kaslakayo kadagiti managinkukuna a mangilibak iti pammati.

29 Ngarud, no saanyo a lagipen ti agbalin a ^amanangngaasi, maipadakayo iti basura a material, nga ibelleng dagiti agpimpino, (gapu ta awan pategna) ket mapadpaddakan dagiti tattao.

30 Ket ita, kakabsatko, kayatko a, kalpasan ti panangawatyo iti adu a pammaneknek, agsipud ta paneknekan ti nasantuan a kasuratan dagitoy a bambanag, umaykayo ket mangpataud iti ^abunga a mangiyeg iti panagbabawi.

31 Wen, kayatko nga umasidegkayo ket saanyon a patangkenen dagiti puspusoyo; agsipud ta kitaen, ita ti panawen ken ^aaldaw ti pannakaisalakanyo; ket ngarud, no agbabawikayo ket saanyo a patangkenen dagiti puspusoyo, dagus a maiyeg kadakayo ti naindaklan a plano ti pannakasubbot.

32 Agsipud ta kitaen, daytoy a biag ti panawen a ^apanagsagana dagiti tattao nga umay iti presensia ti Dios; wen, kitaen ti aldaw daytoy a biag ti aldaw nga agpaay kadagiti tattao a mangaramid kadagiti trabahoda.

33 Ket ita, kas naibagak kadakayo idin, gapu ta naaddaankayo iti adu a saksi, ngarud, ipakaasik kadakayo a saanyo nga ^aitantan ti aldaw ti ^bpanagbabawiyo agingga iti panungpalan; agsipud ta kalpasan daytoy nga aldaw ti biag, a naited kadatayo nga agsagana para iti agnanayon, kitaen, no saantayo a pasayaaten ti panawentayo iti daytoy a biag, umayto ti ^crabii ti ^dkinasipnget nga awanto ti trabaho a maaramid.

34 Saanyo a maibaga, inton maiyegkayo iti dayta nakaam-amak a ^akrisis, nga agbabawiak, nga agsubliak iti Diosko. Saan, saanyo a maibaga daytoy; agsipud ta dayta sigud nga espiritu a nangtagikua iti bagbagiyo iti oras a pumanawkayo iti daytoy a biag, dayta met laeng nga espiritu ti mangtagikua iti bagiyo iti dayta agnanayon a lubong.

35 Ta kitaen, no intantanyo ti aldaw a panagbabawiyo agingga iti patay, kitaen, ^ainturayannakayo ti espiritu ti sairo, ket ^bpatalgedannakayo a kukuana; ngarud, pimmanaw ti Espiritu ti Apo kadakayo, ket awan ti lugarna kadakayo, ket iturayannakayo ti amin a bileg ti sairo; ket daytoy ti panungpalan a kasasaad dagiti dakes.

36 Ket ammok daytoy, agsipud ta kinuna ti Apo a saan nga agnaed isuna iti ^asaan a nasantuan a templo, ngem kadagiti puspuso dagiti ^bnalinteg ti pagnaedanna; wen, ket kinunana pay nga agtugawto dagiti nalilinteg iti pagarianna, a saanton a rummuar; ngem nasken a mapapuraw dagiti kawesda babaen ti dara ti Kordero.

37 Ket ita, ay-ayatek a kakabsatko, kayatko a kasapulan a laglagipenyo dagitoy a bambanag, ken kasapulan nga ^aagtrabahokayo nga addaan iti nadayaw a panagbuteng iti sanguanan ti Dios para iti pannakaisalakanyo, ket saanyo koman nga ilibak ti yaay ni Cristo.

38 Ta pulos saankayo ^amakisinnusik maibusor iti Espiritu Santo, ngem awatenyo, ket situtulok a maawagan iti ^bnagan ni Cristo; nga agpakumbabakayo uray agingga iti tapok, ket ^cagdayawkayo iti Dios, iti aniaman a lugar a mabalin a pagnaedanyo, iti espiritu ken kinapudno; ken agbiagkayo iti ^dpanagyaman iti inaldaw, gapu iti adu nga asi ken bendision nga ipaayna kadakayo.

39 Wen, ket paregtaekkayo pay, kakabsatko, nga agtultuloykayo nga ^aagridam maipapan iti panagkararag, tapno saankayo a maallilaw babaen kadagiti ^bsulisog ti sairo, tapno saannakayo a parmeken, tapno saankayo ​​nga agbalin nga iturayanna iti maudi nga aldaw; agsipud ta kitaen, ^cawan ti igunggonanna kadakayo a nasayaat a banag.

40 Ket ita, ay-ayatek a kakabsatko, kayatko a paregtaenkayo a maaddaan iti ^akinaanus, ken ta ibturanyo ti amin a kita ti panagrigrigat; ta saanyo nga ^binsultuen dagidiay nangpapanaw kadakayo gapu iti nalabes a kinapanglawyo, amangan ta agbalinkayo ​​a managbasol a kas kadakuada;

41 Ngem ta adda kadakayo ti kinaanus, ken ibturanyo dagidiay panagrigrigat, nga addaan iti natibker a namnama nga aginanakayonto manipud kadagiti amin a panagrigrigatyo.