1 Anajwan chirix naq laj Alma kixye li aatin a’in, eb’ a’an ke’xtaqla xpatz’b’al re ma tento te’xpaab’ ^ajunaj chi Dios, re te’ruuq chixk’ulb’al li ru che’ a’in li ki’aatinak wi’, malaj ut chan ru naq te’raw li ^biyaj, malaj li aatin li ki’aatinak wi’, li kixye naq tento taa’awmanq sa’ xch’ooleb’, malaj ut chan ru naq te’ok chixk’anjelankil xpaab’aaleb’.

2 Ut laj Alma kixye reheb’: K’ehomaq reetal, laa’ex keye naq ^aink’a’ nekexru chixloq’oninkil lee Dios xb’aan naq isinb’ilex chaq sa’eb’ lee ch’utleb’aal. A’b’anan k’ehomaq reetal, ninye eere, wi nekek’oxla naq ink’a’ nekexru chixloq’oninkil li Dios, k’a’jo’ nekexsach, ut tento raj teetz’il rixeb’ li ^bloq’laj hu; wi nekek’oxla naq neke’xk’ut a’in cheru, ink’a’ neketaweb’ xyaalal.

3 Ma jultik eere naq eerilom li k’a’ru kixye laj ^aTzenos, li profeet najter, chirix li tijok malaj li ^bloq’onink?

4 Xb’aan naq a’an kixye: Laa’at aj uxtaanat, at Dios, xb’aan naq xawab’i lin tij, naq kinwan ajwi’ sa’ li yamyookil ch’och’; relik chi yaal, laa’at aj uxtaanat chaq naq kintijok chirixeb’ li wankeb’ choq’ ^aaj xik’ ilonel chiwu, ut laa’at xasutq’isiheb’ wik’in.

5 Relik chi yaal, at Dios, ut laa’at aj uxtaanat chaq wik’in naq kin’elajin chawu sa’ ^ainch’och’; naq kin’elajin chawu sa’ lin tij, ut laa’at kinaawab’i.

6 Ut jo’kan wi’chik, at Dios, naq kinsutq’i sa’ wochoch kinaawab’i sa’ intij.

7 Ut naq kin’ok sa’ ^aintz’aptz’ookil na’aj, at Qaawa’, ut kintijok aawe, kinaawab’i.

8 Relik chi yaal, laa’at nakawuxtaanaheb’ ru laa walal aak’ajol naq neke’elajin chawu, re te’ab’iiq aab’aan ut moko xb’aaneb’ ta li winq, ut taawab’iheb’.

9 Relik chi yaal, at Dios, laa’at kawuxtaana wu, ut kawab’i li welajihom sa’ xyanqeb’ laa ch’utam.

10 Relik chi yaal, ut kinaawab’i ajwi’ naq ^aisinb’ilin chaq ut xik’ ilb’ilin xb’aaneb’ li xik’ neke’ilok we; relik chi yaal, kawab’i li welajihom, ut katjosq’o’ rik’ineb’ li xik’ ke’ilok we, ut kawula’aniheb’ sa’ laa josq’il rik’in li sache’k sa’ junpaat.

11 Ut kinaawab’i xb’aan inch’a’ajkilal ut x’anchalil inch’ool; ut a’ xb’aan laa Walal naq kawuxtaana wu chi jo’kan, jo’kan naq tin’elajinq chawu sa’ chixjunil inch’a’ajkilal, xb’aan naq aawik’in wan xsahil inch’ool, xb’aan naq kawisiheb’ chaq sa’ inb’een laa raqb’a-aatin, sa’ xk’ab’a’ laa Walal.

12 Ut anajwan laj Alma kixye reheb’: Ma nekepaab’eb’ li ^aloq’laj hu a’an li tz’iib’anb’il xb’aaneb’ li ke’wan chaq najter?

13 K’ehomaq reetal, wi nekepaab’, tento teepaab’ li kixye laj ^aTzenos; xb’aan naq k’ehomaq reetal, a’an kixye: Laa’at kawisiheb’ laa raqb’a-aatin, sa’ xk’ab’a’ laa Walal.

14 Anajwan k’ehomaq reetal, ex was wiitz’in, nawaj raj xpatz’b’al ma xeril li tz’iib’anb’il sa’eb’ li loq’laj hu? Wi ut eerilom, chan put ru naru naq ink’a’ teepaab’ li Ralal li Dios?

15 Xb’aan naq ^amoko tz’iib’anb’il ta naq ka’ajwi’ laj Tzenos ki’aatinak chirix li k’a’aq re ru a’in; laj ^bTzenok b’an ki’aatinak ajwi’ chirix li k’a’aq re ru a’in—

16 Xb’aan naq k’ehomaq reetal, a’an kixye: Yoo aajosq’il, at Qaawa’ rik’in li tenamit a’in, xb’aan naq ink’a’ te’raj xtawb’al ru laa wuxtaan li kak’e sa’ xb’eeneb’ sa’ xk’ab’a’ laa Walal.

17 Ut anajwan, ex was wiitz’in, nekeril naq jun chik profeet li kiwan najter kixch’olob’ xyaalal li Ralal li Dios, ut rik’in naq eb’ li tenamit ink’a’ ke’raj xtawb’al ru li raatin ^ake’xkamsi chi pek.

18 A’ut k’ehomaq reetal, moko chixjunil ta a’in; moko ka’ajeb’ ta wi’ a’in li ke’aatinak chirix li Ralal li Dios.

19 K’ehomaq reetal, a’an kiyehe’ resil xb’aan laj ^aMoises; relik chi yaal, ut k’ehomaq reetal naq ^bkitaqsiik jun ^ceetalil sa’ li yamyookil ch’och’, re naq ani taa’iloq re taawanq xyu’am. Ut naab’al ke’ilok ut ke’wan xyu’am.

20 A’b’an moko k’iheb’ ta li ke’tawok xyaalal li k’a’aq re ru a’in, ut a’in xb’aan xkawil li raameb’. A’ut ke’wan naab’al li q’axal kawujenaqeb’, jo’kan naq ink’a’ ke’raj ilok, jo’kan naq ke’oso’. Ut a’in xyaalalil naq ink’a’ ke’ilok, xb’aan naq moko neke’xpaab’ ta naq ^atixk’irtesiheb’.

21 Aay, ex was wiitz’in, wi ta taaruuq texk’irtesiiq yal rik’in xb’eresinkil lee rilob’aal re taaruuq texk’irtesiiq, ma ink’a’ raj tex’iloq sa’ junpaat, malaj ut teeraj raj b’an xkawob’resinkil lee raam chi maak’a’ eepaab’aal, ut texq’emo’q raj, re naq ink’a’ raj teeb’eresi lee rilob’aal, re b’an tex’oso’q raj?

22 Wi jo’kan, rahilal taachalq sa’ eeb’een; wi b’an ink’a’, b’eresihomaq b’i’ lee rilob’aal, ut ^atikib’omaq xpaab’ankil li Ralal li Dios, naq a’an taachalq chixtojb’al rix lix tenamit, ut naq a’an tixk’ul rahilal ut taakamq re ^bxtojb’al rix lix maakeb’; ut naq a’an ^ctaawakliiq chaq wi’chik sa’ xyanqeb’ li kamenaq, li tixk’e chi uxmanq li ^dwakliik chi yo’yo, re naq chixjunileb’ li winq te’xaqliiq chiru, re taaraqe’q aatin chirixeb’ sa’ li kutan re roso’jik ut re raqb’a-aatin, a’ yaal jo’ chanru ^exk’anjeleb’.

23 Ut anajwan, ex was wiitz’in, nawaj naq ^ateeraw li aatin a’in sa’ lee ch’ool, ut naq na’ok chi siipook, chi jo’kan teech’olani rik’in lee paab’aal. Ut k’ehomaq reetal, a’an taa’ok choq’ jun xtoonal li che’, li ^btaanimanq eerik’in toj sa’ li yu’am li junelik taawanq. Toja’ ut naq li Dios chixk’ehaq eere naq seeb’aq lee ^criiq, xb’aan li sahil ch’oolejil chirix li Ralal. Chixjunil ut a’in naru nekeb’aanu wi nekeraj. Amen.