1 Ug nahitabo nga ang mga Nephita kinsa wala ^amapatay pinaagi sa mga hinagiban sa gubat, human molubong sa mga napatay—karon ang gidaghanon sa napatay dili maihap, tungod sa hilabihan ka daghan niini—human nila gilubong ang ilang mga patay silang tanan mibalik ngadto sa ilang mga yuta, ug ngadto sa ilang kabalayan, ug sa ilang mga asawa, ug sa ilang mga anak.

2 Karon daghan nga mga babaye ug mga bata ang nangamatay pinaagi sa espada, ug daghan usab sa ilang mga panon ug ilang mga kahayopan; ug daghan usab sa ilang kaumahan sa lugas ang nalaglag, kay kini gitunob-tunoban sa mga panon sa katawhan.

3 Ug karon ang kadaghanon sa nangamatay nga mga Lamanita ug mga Amlicita diha sa daplin sa suba sa Sidon gipanglabay ngadto sa ^akatubigan sa Sidon; ug tan-awa ang ilang mga bukog anaa sa kahiladman sa ^bdagat, ug daghan kini.

4 Ug ang ^amga Amlicita mailhan gikan sa mga Nephita, kay ^bgibutangan nila og pula nga timaan ang ilang kaugalingon diha sa ilang mga agtang sunod sa paagi sa mga Lamanita; hinoon wala sila magpakagis sa ilang mga ulo sama sa mga Lamanita.

5 Karon ang mga ulo sa mga Lamanita gikagisan; ug mga ^ahubo sila, gawas sa mga panit nga gibakos sa ilang mga bat-ang, ug sa ilang hinagiban usab, nga gibakos kanila, ug sa ilang mga gapasan, ug sa ilang mga panâ, ug sa ilang mga bato, ug sa ilang mga saplong, ug uban pa.

6 Ug ang mga panit sa mga Lamanita itomon, sumala sa timaan nga gibutang sa ilang mga amahan, nga usa ka ^atunglo nganha kanila tungod sa ilang kalapasan ug sa ilang pagsupil batok sa ilang kaigsoonan, kinsa naglakip kang Nephi, Jacob, ug Joseph, ug Sam, kinsa makiangayon ug mga tawo nga balaan.

7 Ug ang ilang kaigsoonan nagtinguha sa pagpatay kanila, busa gitunglo sila; ug ang Ginoong Dios mibutang og ^atimaan diha kanila, oo, kang Laman ug kang Lemuel, ug usab sa mga anak nga lalaki ni Ishmael, ug sa kababayen-an nga Ishmaelita.

8 Ug gihimo kini aron ang ilang binhi mailhan gikan sa binhi sa ilang kaigsoonan, nga pinaagi niana ang Ginoong Dios makapanalipod sa iyang katawhan, nga sila dili ^amosagol ug motuo sa sayop nga ^bmga tradisyon nga maoy hinungdan sa ilang kalaglagan.

9 Ug nahitabo nga si bisan kinsa nga mosagol sa iyang binhi ngadto sa mga Lamanita nagdala og sama nga tunglo sa iyang binhi.

10 Busa, si bisan kinsa nga motugot sa iyang kaugalingon nga magpalingla sa mga Lamanita gitawag ubos niana nga ngalan, ug adunay timaan nga ibutang diha kaniya.

11 Ug nahitabo nga si bisan kinsa nga dili motuo sa ^atradisyon sa mga Lamanita, apan motuo niadtong mga talaan nga gidala gikan sa yuta sa Jerusalem, ug sa husto usab nga tradisyon sa ilang mga amahan, kinsa mituo sa mga sugo sa Dios ug mituman niini, gitawag og mga Nephita, o ang katawhan ni Nephi, gikan niana nga panahon—

12 Ug sila mao ang naghupot sa mga talaan nga ^atinuod bahin sa ilang katawhan, ug usab sa katawhan sa mga Lamanita.

13 Karon mobalik na usab kita ngadto sa mga Amlicita, kay sila usab adunay ^atimaan nga gibutang diha kanila; oo, mibutang sila og timaan sa ilang mga kaugalingon, oo, gani usa ka pula nga timaan diha sa ilang mga agtang.

14 Sa ingon niana ang pulong sa Dios natuman, kay mao kini ang mga pulong nga iyang gisulti kang Nephi: Tan-awa, ang mga Lamanita akong gitunglo, ug Ako mobutang og timaan diha kanila nga sila ug ang ilang binhi mabulag gikan kanimo ug sa imong binhi, gikan niini nga panahon ug sa kahangtoran, gawas kon sila mohinulsol sa ilang pagkadaotan ug ^amobalik ngari kanako aron Ako maluoy kanila.

15 Ug usab: Ako mobutang og timaan diha kaniya nga mosagol sa iyang binhi uban sa imong kaigsoonan, aron sila matunglo usab.

16 Ug usab: Ako mobutang og timaan diha kaniya nga makig-away batok kanimo ug sa imong binhi.

17 Ug usab, Ako moingon nga siya nga mobiya gikan kanimo dili na pagatawgon nga imong binhi; ug Ako mopanalangin kanimo, ug ni bisan kinsa nga pagatawgon nga imong binhi; gikan karon ug sa kahangtoran; ug kini mao ang mga saad sa Ginoo ngadto kang Nephi ug sa iyang binhi.

18 Karon ang mga Amlicita wala masayod nga sila nakatuman sa mga pulong sa Dios sa diha nga misugod sila sa pagbutang og timaan sa ilang mga kaugalingon diha sa ilang mga agtang; bisan pa niana sila mipakita og ^apagsupil batok sa Dios; busa kinahanglan nga ang tunglo modangat kanila.

19 Karon manghinaot ko nga kamo makakita nga sila midala diha sa ilang mga kaugalingon sa ^atunglo; ug gani ang matag tawo nga gitunglo midala diha kaniya sa iyang kaugalingon nga silot.

20 Karon nahitabo nga dili daghan ang mga adlaw human sa panag-away nga nahitabo sa yuta sa Zarahemla, pinaagi sa mga Lamanita ug sa mga Amlicita, nga dihay lain nga kasundalohan sa mga Lamanita nga misulong sa katawhan ni Nephi, sa ^asama nga dapit diin ang unang kasundalohan misugat sa mga Amlicita.

21 Ug nahitabo nga dihay kasundalohan nga gipadala aron sa pag-abog kanila gikan sa ilang yuta.

22 Karon si Alma nga nag-antos sa iyang kaugalingon sa usa ka ^asamad wala motungas aron makig-away niini nga higayon batok sa mga Lamanita;

23 Apan mipadala siya og daghan nga kasundalohan batok kanila; ug misulong sila ug mipatay og daghan nga Lamanita, ug miabog sa nahibilin kanila gikan sa mga utlanan sa ilang yuta.

24 Ug unya mibalik na usab sila ug misugod sa pagpatunhay sa kalinaw sa yuta, kay wala na samoka sulod sa usa ka panahon sa ilang mga kaaway.

25 Karon kining tanan nga butang nahimo, oo, kining tanan nga panaggubat ug panagbingkil gisugdan ug gitapos sa ikalima nga tuig sa paghari sa mga maghuhukom.

26 Ug sulod sa usa ka tuig dihay liboan ug napulo ka liboan nga kalag ang napadala ngadto sa kalibotan nga walay kataposan, nga sila moani sa ilang mga ^aganti sumala sa ilang mga buhat, kon kini mga maayo o kon kini mga daotan, makaani sa mahangtoron nga kalipay o mahangtoron nga pagkauyamot, sumala sa espiritu nga ilang gipili nga sundon, kon kini usa ka maayo nga espiritu o usa ka daotan.

27 Kay ang matag tawo modawat og mga ^asuhol gikan kaniya nga iyang gipili nga ^bsundon, ug kini sumala sa mga pulong sa espiritu sa panagna; busa himoa kini sumala sa kamatuoran. Ug sa ingon natapos ang ikalima nga tuig sa paghari sa mga maghuhukom.