Ch’ol 24
Eb’ laj Lamanita neke’chal sa’ xb’een lix tenamit li Dios—Eb’ laj Anti-Nefi-Lehi neke’saho’ sa’ xch’ool rik’in li Kristo ut neke’ula’aniik xb’aaneb’ li anjel—Neke’xsik’ ru li kamk chiru xkolb’al rib’ rik’in pleetik—Wankeb’ chik aj Lamanita li neke’jale’ xch’ool. Wan na 90–77 chihab’ ma nak’ulun li Kristo.
1 Ut kik’ulman naq eb’ laj Amalekita ut eb’ laj Amulonita ut eb’ laj Lamanita li wankeb’ sa’ li ch’och’ Amulon ut sa’ ajwi’ li ch’och’ Helam, ut li wankeb’ sa’ li ch’och’ aJerusalen, malaj ut, sa’ chixjunil li ch’och’ sa’ xsutam, li moko ke’jale’ ta xch’ool ut ink’a’ ke’xk’ul chaq sa’ xb’eeneb’ li k’ab’a’ej bAnti-Nefi-Lehi, ke’eek’asiik xb’aaneb’ laj Amalekita ut xb’aaneb’ laj Amulonita chi josq’o’k rik’ineb’ li ras riitz’ineb’.
2 Ut q’axal kiniman lix kaqaleb’ xch’ool choq’ reheb’, jo’kan naq ke’xtikib’ xpo’resinkil xch’ool rik’in lix reyeb’, jo’kan naq ink’a’ chik ke’raj naq taawanq a’an choq’ rey; jo’kan naq ke’xchap xk’anjeleb’aal re pleet chiru li tenamit aj Anti-Nefi-Lehi.
3 Anajwan li rey kixq’axtesi li awa’b’ejihom sa’ xb’een li ralal, ut aj Anti-Nefi-Lehi kixk’e choq’ xk’ab’a’ a’an.
4 Ut kikam li rey sa’ li chihab’ ajwi’ a’an naq yookeb’ laj Lamanita chixkawresinkil rib’ re xpleetinkil lix tenamit li Dios.
5 Anajwan naq laj Ammon ut eb’ li ras riitz’in ut chixjunileb’ li ke’taqe’ chaq rochb’een ke’rileb’ laj Lamanita chixkawresinkil rib’ re xsachb’aleb’ li ras riitz’ineb’, xkoheb’ sa’ li ch’och’ Midian, ut aran laj Ammon kixk’uleb’ chixjunil lix komon; ut elenaqeb’ chaq aran, ke’wulak sa’ li ch’och’ Ismael re te’xk’uub’ xna’leb’ sa’ akomonil rik’in laj Lamoni ut rik’in ajwi’ laj Anti-Nefi-Lehi li ras, chirix k’a’ru te’xb’aanu re xkolb’al rib’ chiruheb’ laj Lamanita.
6 Anajwan maajun aamej kiwan sa’ xyanq chixjunil li tenamit li ke’jale’ chaq xch’ool choq’ re li Qaawa’ li tixchap xk’anjeleb’aal re pleet chiruheb’ li ras riitz’in; relik chi yaal, ink’a’ ke’raj yal ta xkawresinkil rib’ choq’ re li pleet; relik chi yaal, ut jo’kan ajwi’ lix rey kixtaqlaheb’ naq moko te’xb’aanu ta.
7 Anajwan, a’in li aatin kixye reheb’ li tenamit chirix li na’leb’ a’an: Ninb’antioxi chiru lin Dios, ex intenamit raarookex inb’aan, naq li qanimla Dios rik’in xchaab’ilal kixtaqlaheb’ li qas qiitz’in a’in aj Nefita qik’in re jultikank aatin chiqu, ut re xq’unb’esinkil li qach’ool chirix li ana’leb’ kanab’anb’il chaq xb’aaneb’ li qayuwa’ aj maak.
8 Ut k’ehomaq reetal, ninb’antioxi chiru lin nimla Dios naq kixk’e qe jun raqal lix Musiq’ re taaq’uno’q li qach’ool, ut xb’aan a’an koo’ok chiraatinankil qib’ rik’ineb’ li qas qiitz’in a’in aj Nefita.
9 Ut k’ehomaq reetal, ninb’antioxi ajwi’ chiru lin Dios, naq rik’in xtikib’ankil raatinankil qib’ rik’ineb’ xq’unb’esiik li qach’ool chirix li aqamaak, ut li k’iila kamsink kiqab’aanu chaq.
10 Ut ninb’antioxi ajwi’ chiru lin Dios, relik chi yaal, lin nimla Dios, naq a’an xk’e qe naq taaruuq taqajal qak’a’uxl chirix li k’a’aq re ru a’in, ut jo’kan ajwi’ naq axkuy qamaak chirix li k’iila maak ut kamsink a’an li kiqab’aanu chaq, ut xrisi sa’ qach’ool li bmaak kiwan chaq sa’ qab’een, sa’ xk’ab’a’ lix k’ulub’ejil li Ralal.
11 Ut anajwan k’ehomaq reetal, ex was wiitz’in, rik’in naq ra chi sa (xb’aan naq laa’o chaq li q’axal sachenaq reheb’ chixjunil li winq) naq kooru chixjalb’al qak’a’uxl chirix chixjunil li qamaak ut li k’iila kamsink kilajqab’aanu, ut naq kiru chiqu naq li Dios akirisi chaq a’an sa’ li qach’ool, xb’aan naq ra chi sa naq tz’aqal lix jalb’al qak’a’uxl chiru li Dios re naq a’an taarisi li qatz’ajnil—
12 Anajwan, ex was wiitz’in q’axal raarookex inb’aan, rik’in naq li Dios kirisi li qatz’ajnil, ut ak saq saq chik ru li qayok’leb’ ch’iich’, chi jo’kan miqatz’ajni chik li qayok’leb’ ch’iich’ rik’in xkik’eleb’ li qas qiitz’in.
13 Relik chi yaal, ninye eere, ink’a’, chiqak’uula b’an li qayok’leb’ ch’iich’ re naq moko tz’ajninb’ilaq ta rik’in xkik’eleb’ li qas qiitz’in; xb’aan naq maare wi taqatz’ajni wi’chik li qayok’leb’ ch’iich’ ink’a’ chik te’ruuq chi ach’aje’q chi saq saq ru rik’in xkik’el li Ralal li qanimla Dios, li taahoye’q choq’ re xtojb’al rix li qamaak.
14 Ut li nimla Dios kiruxtaana qu, ut kixk’e chiqanaw li k’a’aq re ru a’in re naq ink’a’ too’oso’q; relik chi yaal, ut kixk’e chiqanaw li k’a’aq re ru a’in chi junxilaj, xb’aan naq naxra li aqaam jo’ chanru ajwi’ naxraheb’ li qalal qak’ajol, jo’kan ut, rik’in li ruxtaan, a’an nokorula’ani rik’ineb’ lix anjel, re naq li bk’uub’anb’il na’leb’ re li kolb’a-ib’ nawb’ilaq qab’aan laa’o jo’ chanru xb’aaneb’ li tasal tenamit li toj te’chalq.
15 Aay, k’a’jo’ li ruxtaan li qaDios! Anajwan ut k’ehomaq reetal, rik’in naq ra chi sa naq kiqak’ul risinkil li qatz’ajnil chiqix chaq, ut li qayok’leb’ ch’iich’ saq saq chik ru, chiqamuqeb’ re te’kanaaq chi saq saq ru, re xch’olob’ankil xyaalal chiru li qaDios sa’ roso’jik li kutan, malaj sa’ li kutan naq took’ame’q chi xaqliik chiru a’an re taaraqe’q aatin chiqix, naq ink’a’ xqatz’ajni li qayok’leb’ ch’iich’ rik’in xkik’eleb’ li qas qiitz’in chalen chaq naq a’an kixq’axtesi qe li raatin ut kooxch’ajb’ilob’resi rik’in.
16 Ut anajwan, ex was wiitz’in, wi eb’ li qas qiitz’in te’xsik’ qasachb’al, k’ehomaq reetal, taqamuq li qayok’leb’ ch’iich’, relik chi yaal, taqamuq sa’ xchamal li ch’och’, re naq te’kanaaq chi saq saq ru, re xch’olob’ankil xyaalal naq maajo’q’e kiqoksi, sa’ roso’jik li kutan; ut wi eb’ li qas qiitz’in toohe’xsach, k’ehomaq reetal, atooxik rik’in li qaDios ut tookole’q.
17 Anajwan ut kik’ulman naq chirix naq li rey kixk’e xraqik li aatin a’in, ut ch’utch’uukeb’ chixjunil li tenamit, ke’xchapeb’ lix yok’leb’ ch’iich’, ut chixjunil li k’anjeleb’aal li neke’oksiman re xhoyb’al xkik’eleb’ li winq, ut ake’xmuqeb’ sa’ xchamal li ch’och’.
18 Ut a’in ke’xb’aanu, xb’aan naq sa’ xch’ooleb’ a’an naxch’olob’ xyaalal chiru li Dios, ut chiruheb’ ajwi’ li winq, naq amaajo’q’e chik te’roksi li k’anjeleb’aal re pleet re xhoyb’al xkik’eleb’ li winq; ut a’in ke’xb’aanu, rik’in xch’olob’ankil ut bxk’uub’ankil sumwank rik’in li Dios, naq jo’ ruuchil xhoyb’al xkik’eleb’ li ras riitz’ineb’, cte’xq’axtesi b’an xyu’ameb’; ut jo’ ruuchil li maq’ok chiru junaq ras riitz’in, te’k’ehoq b’an re; ut jo’ ruuchil xnumsinkil lix kutaneb’ sa’ q’emal, te’k’anjelaq b’an chi numtajenaq rik’ineb’ li ruq’.
19 Ut chi jo’kan naqil, naq jo’q’e ke’k’ame’ laj Lamanita a’in chixpaab’ankil ut chixnawb’al li yaal, axaqxookeb’ chi kaw, ut te’xk’ul xb’een wa li kamk re naq ink’a’ te’xb’aanu li maak; ut chi jo’kan naqil naq ke’xmuq lix k’anjeleb’aal re tuqtuukilal, malaj ut ke’xmuqeb’ lix k’anjeleb’aal re pleet, choq’ re li tuqtuukilal.
20 Ut kik’ulman naq eb’ li ras riitz’ineb’ aj Lamanita, ke’xkawresi rib’ choq’ re pleetik, ut ke’taqe’ sa’ li ch’och’ Nefi choq’ re xsachb’al li rey, ut xk’eeb’al jalan chik sa’ xna’aj, ut jo’kan ajwi’ re xsachb’aleb’ chaq sa’ li ch’och’ li tenamit aj Anti-Nefi-Lehi.
21 Anajwan naq eb’ li tenamit ke’ril naq chalkeb’ re sa’ xb’eeneb’, xkoheb’ chixk’ulb’aleb’, ut ake’xhupub’ rib’ chiruheb’ chi ch’och’, ut ke’ok chixpatz’b’al xk’ab’a’ li Qaawa’; ut chi jo’kan yookeb’ naq ke’ok laj Lamanita chi t’ane’k sa’ xb’eeneb’, ut ke’ok chixkamsinkileb’ rik’in li yok’leb’ ch’iich’.
22 Ut chi jo’kan, chi ma’ani naxyal ru rik’ineb’, ke’xkamsi jun mil rik’in oob’ reheb’; ut naqanaw naq osob’tesinb’ileb’, xb’aan naq xikenaqeb’ chi wank rik’in lix Dios.
23 Anajwan naq ke’ril laj Lamanita naq eb’ li ras riitz’in moko te’eeleliq ta chiru li yok’leb’ ch’iich’, chi moko te’risi rib’ sa’ li nim chi moko sa’ li tz’e, naq te’xyokob’ b’an rib’ ut ate’oso’q, rik’in xnimankil ru li Dios naq yookeb’ ajwi’ chi oso’k rub’el li yok’leb’ ch’iich’—
24 Anajwan naq ke’ril laj Lamanita a’in, ake’xkanab’ xkamsinkileb’; ut wankeb’ naab’al li bke’niman xch’ool sa’ xk’ab’a’eb’ li ras riitz’in li t’anenaqeb’ rub’el li yok’leb’ ch’iich’, xb’aan naq ke’xjal xk’a’uxl rik’in li k’a’aq re ru ke’xb’aanu chaq.
25 Ut kik’ulman naq ke’xtz’eq lix k’anjeleb’aal re pleet, ut ink’a’ chik ke’xchap, xb’aan naq ke’raho’ xb’aaneb’ li kamsink ke’xb’aanu chaq; ut ke’xkub’si rib’ chanchaneb’ ajwi’ li ras riitz’ineb’, ke’xkanab’ rib’eb’ chiru li ruxtaaneb’ li ani taqsinb’ileb’ lix tel re xkamsinkileb’.
26 Ut kik’ulman naq li rajlankileb’ li ke’xjunaji rib’ rik’in lix tenamit li Dios sa’ li kutan a’an, kixq’ax ru rajlankileb’ li ke’kamsiik, ut tiikeb’ xch’ool li ani ke’kamsiik, jo’kan naq moko nawiib’an ta qach’ool naq ake’kole’.
27 Ut maajun winq aj maak kikamsiik sa’ xyanqeb’; a’b’an numenaq jun mil li ke’k’ame’ chixnawb’al chirix li yaal; chi jo’kan naqil naq k’iila apaay chan ru naq li Qaawa’ nak’anjelak re taa’uxq xkolb’al lix tenamit.
28 Anajwan lix k’ihaleb’ lix komoneb’ laj Lamanita li ke’kamsink chaq re xnaab’alileb’ li ras riitz’in, a’aneb’ aj Amalekita ut aj Amulonita, ut lix k’ihaleb’ a’an wankeb’ jo’ chanru axk’anjelileb’ laj bNehoril.
29 Anajwan, sa’ xyanqeb’ li ke’xjunaji rib’ rik’in lix tenamit li Qaawa’, amaajun wan xkomoneb’ laj Amalekita ut laj Amulonita, chi moko ani wan sa’ xk’anjelil laj Nehor; a’aneb’ b’an tz’aqal ralal xk’ajoleb’ laj Laman ut laj Lemuel.
30 Ut chi jo’kan naru naqak’e reetal chi saqen ru, naq chirix naq jun tenamit akutanob’resinb’il jun sutaq xb’aan lix Musiq’ li Dios, ut wanjenaq xnimal bxna’leb’ chirix li k’a’aq re ru re li tiikilal, ut chirix a’an cneke’xjalb’ehi rib’ sa’ li maak ut li q’etok aatin, q’axal wi’chik kaw neke’kana, ut chi jo’kan dq’axal wi’chik ink’a’ us lix wanjikeb’ chiru wi maajun wa xnawomeb’ chaq li k’a’aq re ru a’in.