1 Thiab tau muaj tias tom qab uas tau ob hnub thiab ob hmos lawm lawv twb yuav luag coj nws lub cev mus thiab tso nws rau hauv ib lub qhov ntxa pob zeb, uas lawv tau ua cia faus lawv tej neeg tuag.

2 Nim no niam vaj ntxwv tau hnov txog Amoos txoj kev muaj suab npe, yog li ntawd nws tau xa xov thiab tau xav kom nws los cuag niam vaj ntxwv.

3 Thiab tau muaj tias Amoos tau ua li nws tau raug txib, thiab tau mus cuag niam vaj ntxwv, thiab tau xav paub saib nws xav kom Amoos ua dab tsi.

4 Thiab nws tau hais rau Amoos tias: Kuv tus txiv tej tub qhe tau ua rau kuv paub tias koj yog Vajtswv dawb huv ib tug yaj saub, thiab tias koj muaj hwj chim ua ntau yam hauj lwm tseem ceeb nyob hauv nws lub npe;

5 Yog li ntawd, yog tias qhov no muaj tseeb, kuv xav kom koj mus thiab saib kuv tus txiv, vim nws tau pw saum nws lub txaj tau ob hnub thiab ob hmos lawm; thiab ib txhia hais tias nws tsis tuag; tiam sis ib txhia hais tias nws tuag lawm thiab nws tsw lwj lawm, thiab tias yuav tsum coj nws mus tso rau hauv qhov ntxa pob zeb; tiam sis rau kuv tus kheej, nws twb tsis tsw rau kuv.

6 Nim no, qhov no yog yam uas Amoos xav tau, vim nws paub lawm tias vaj ntxwv Lamaunais nyob hauv Vajtswv lub hwj chim lawm; nws paub lawm tias qhov thaiv tsaus ntuj ntawm txoj kev tsis ntseeg tau raug tshem tawm ntawm nws lub cim xeeb lawm, thiab qhov kaj tau zes rau hauv nws lub siab, uas yog qhov kaj ntawm Vajtswv lub yeeb koob, uas tau yog ib qhov kaj uas zoo kawg nkaus ntawm nws txoj kev zoo—muaj tseeb tiag, qhov kaj no tau txhab txoj kev xyiv fab ntawd rau hauv nws tus ntsuj plig, tej huab ntawm txoj kev tsaus ntuj tau raug tsis muaj mus, thiab qhov kaj ntawm txoj sia kav ib txhis tau raug zes rau hauv nws tus ntsuj plig, muaj tseeb tiag, nws paub lawm tias qhov no tau kov yeej nws cev nqaij daim tawv lawm, thiab nws tau raug coj lawm nyob hauv Vajtswv—

7 Yog li ntawd, qhov uas niam vaj ntxwv xav tau ntawm nws yog nws tib txoj kev xav. Yog li ntawd, nws tau mus saib vaj ntxwv raws niam vaj ntxwv tau xav kom nws ua; thiab nws tau pom vaj ntxwv, thiab nws paub lawm tias nws tsis tau tuag.

8 Thiab nws tau hais rau niam vaj ntxwv tias: Nws tsis tuag, tiam sis nws pw hauv Vajtswv xwb, thiab tag kis nws yuav sawv dua; yog li ntawd tsis txhob muab nws faus.

9 Thiab Amoos tau hais rau nws tias: Koj puas ntseeg qhov no? Thiab nws tau hais rau Amoos tias: Kuv tsis tau muaj tim khawv tsuas yog koj cov lus, thiab peb cov tub qhe tej lus xwb; txawm li ntawd los kuv ntseeg tias nws yuav muaj raws li koj tau hais lawm.

10 Thiab Amoos tau hais rau nws tias: Koj tau koob hmoov vim yog koj txoj kev ntseeg heev; kuv hais rau koj, poj niam, tsis tau muaj ib tug nyob tag nrho hauv cov Neeg Nifais uas muaj kev ntseeg loj npaum li ntawd.

11 Thiab tau muaj tias nws tau zov nws tus txiv lub txaj, txij li lub caij ntawd mus txog lub caij tag kis uas Amoos tau teem tias nws yuav sawv.

12 Thiab tau muaj tias nws tau sawv, raws li Amoos tej lus; thiab thaum uas nws tau sawv, nws tau cev nws txhais tes rau tus poj niam, thiab tau hais tias: Thov kom Vajtswv lub npe cia li tau koob hmoov, thiab koj cia li tau koob hmoov.

13 Vim tseeb npaum li uas koj tseem muaj txoj sia, saib seb, kuv tau pom kuv tus Txhiv Dim; thiab nws yuav nqis los, thiab raug yug los ntawm ib tug poj niam, thiab nws yuav cawm noob neej txhua tus uas ntseeg hauv nws lub npe. Nim no, thaum nws tau hais tej lus no tas lawm, nws lub siab tau dhia hauv nws, thiab nws tau rov vau nrog txoj kev xyiv fab dua; thiab niam vaj ntxwv los kuj vau thiab, raug tsis muaj zog los ntawm tus Ntsuj Plig.

14 Nim no Amoos tau pom tias tus Tswv tus Ntsuj Plig raug nchuav los rau cov Neeg Lamas raws li nws tej lus thov, uas yog nws cov kwv tij, uas tau yog cov uas tau ua ntau yam kev nyuaj siab nyob hauv cov Neeg Nifais, los sis rau tag nrho Vajtswv cov neeg vim yog lawv tej kev tsis ncaj ncees thiab lawv tej kev li kev cai, nws tau txhos caug ntua, thiab tau pib nchuav nws lub siab tawm nyob hauv txoj kev thov Vajtswv thiab ua Vajtswv tsaug rau tej uas nws tau ua rau nws cov kwv tij; thiab nws kuj tau tsis muaj zog nrog txoj kev xyiv fab thiab; thiab ces lawv peb leeg tag nrho tau vau rau hauv av.

15 Nim no, thaum vaj ntxwv tej tub qhe tau pom tias lawv tau vau tas lawm, lawv tau pib quaj thov Vajtswv, vim txoj kev ntshai ntawm tus Tswv kuj tau los rau saum lawv lawm thiab, vim lawv tau yog cov uas tau sawv ntawm vaj ntxwv xub ntiag thiab tau ua tim khawv rau nws txog Amoos lub hwj chim loj.

16 Thiab tau muaj tias lawv tau thov rau tus Tswv lub npe, nyob hauv lawv tej dag zog, mus txog thaum lawv tag nrho tau vau rau hauv av, tsuas tshuav ib tug poj niam Lamas, uas muaj npe hu ua Anpis, nws tau raug hloov siab tshiab los rau tus Tswv tau ntau xyoo lawm, vim yog nws txiv txoj kev ua yog toog pom uas zoo heev—

17 Yog li ntawd, tau raug hloov siab tshiab los rau tus Tswv, thiab yeej tsis tau ua leej twg paub, yog li ntawd, thaum nws tau pom tias tag nrho Lamaunais cov tub qhe tau vau tas rau hauv av, thiab nws tus poj nom, tus uas yog niam vaj ntxwv, thiab vaj ntxwv, thiab Amoos pw pua lua rau hauv av, nws paub lawm tias qhov ntawd yog Vajtswv lub hwj chim; thiab tau xav tias lub sij hawm no yog lub uas yuav tau ua rau cov neeg no paub tej yam uas tau tshwm sim nyob hauv lawv, kom los ntawm pom qhov no nws yuav ua rau lawv ntseeg hauv Vajtswv lub hwj chim, yog li ntawd nws tau khiav tiaj lias mus rau ib lub tsev dhau ib lub tsev, ua rau cov neeg paub.

18 Thiab lawv tau pib sib sau tuaj ua ke rau hauv vaj ntxwv tsev. Thiab ib pab neeg coob tau tuaj rau ntawd, thiab rau lawv txoj kev xav tsis thoob lawv tau pom vaj ntxwv, thiab niam vaj ntxwv, thiab nkawd tej tub qhe tau pw pua lua rau hauv av, thiab lawv tag nrho pw zoo li lawv twb tuag lawm; thiab lawv kuj tau pom Amoos, thiab pom tias, nws tau yog ib tug Neeg Nifais.

19 Thiab nim no cov neeg tau pib yws yws nyob hauv lawv; ib txhia hais tias nws yog ib qho kev phem loj heev uas tau los rau lawv, los sis los rau saum vaj ntxwv thiab nws tsev neeg, vim yog nws tau cia Neeg Nifais nyob hauv thaj av.

20 Tiam sis ib txhia tau cem lawv, hais tias: Vaj ntxwv tau coj qhov kev phem no los rau nws tsev neeg, vim yog nws tau tua nws tej tub qhe uas tau ua lawv tej yaj tawg khiav ri niab nyob rau tom cov dej Xinpus.

21 Thiab lawv kuj tau raug cem los ntawm cov txiv neej uas tau sawv nram cov dej Xinpus thiab tau raws cov yaj uas yog vaj ntxwv li, vim lawv tau npau taws rau Amoos vim yog nws tau muab lawv cov kwv tij ntau leej tua nyob nram cov dej Xinpus, thaum tab tom tiv thaiv vaj ntxwv tej yaj.

22 Nim no, ib tug ntawm lawv, uas nws tus kwv tij tau raug tua los ntawm Amoos rab ntaj, tau npau taws heev rau Amoos, tau rho hlo nws rab ntaj thiab txav zog mus xwv kom nws yuav tso poob rau saum Amoos, muab nws tua; thiab thaum nws tsa hlo rab ntaj tua nws, saib seb, nws tau vau hlo tuag lawm.

23 Nim no peb pom tias tsis muaj peev xwm tua tau Amoos, vim tus Tswv tau hais rau Mauxiyas, nws txiv hais tias: Kuv yuav tseg nws nyob, thiab yuav muaj li ntawd rau nws raws li koj txoj kev ntseeg—yog li ntawd, Mauxiyas tau cia siab muab nws tso rau ntawm tus Tswv.

24 Thiab tau muaj tias thaum cov neeg coob coob tau pom tias tus txiv neej, uas tau tsa ntaj tua Amoos tau vau tuag lawm, txoj kev ntshai tau los rau lawv sawv daws, thiab lawv tsis kam cev lawv tej tes tuav nws los sis tuav cov uas tau vau lawm ib tug twg li; thiab lawv tau pib xav tsis thoob nyob hauv lawv dua txog yam dab tsi uas tau ua lub hwj chim loj no, los sis seb tag nrho ib puas yam tsav no yog dab tsi.

25 Thiab tau muaj tias tau muaj ntau tus nyob hauv lawv uas tau hais tias Amoos tau yog tus Ntsuj Plig uas Muaj Hwj Chim, thiab ib co ho tau hais tias nws tau raug xa los ntawm tus Ntsuj Plig uas Muaj Hwj Chim;

26 Tiam sis ib txhia tau cem lawv sawv daws, hais tias nws tau yog ib tug dab, uas tau raug xa los ntawm cov Neeg Nifais tuaj tsim txom lawv.

27 Thiab tau muaj ib txhia uas tau hais tias Amoos tau raug xa los ntawm tus Ntsuj Plig uas Muaj Hwj Chim los tsim txom lawv vim yog lawv tej kev tsis ncaj ncees; thiab tias nws tau yog tus Ntsuj Plig uas Muaj Hwj Chim uas tau nrog cov Neeg Nifais nyob tas mus li, tus uas pheej tso lawv dim ntawm lawv tej tes; thiab lawv tau hais tias nws tau yog tus Ntsuj Plig uas Muaj Hwj Chim loj no uas tau ua rau lawv cov kwv tij Lamas ntau leej heev puas tsuaj.

28 Thiab xws li no txoj kev sib cav tau pib phem heev kawg nkaus nyob hauv lawv. Thiab thaum lawv tseem tab tom sib cav zoo li no, tus poj niam ntxhais qhev uas tau ua rau cov neeg coob coob tuaj sib sau ua ke, thiab thaum nws tau pom txoj kev sib cav uas nyob hauv cov neeg coob coob ntawd nws tau tu siab heev, kua muag twb poob.

29 Thiab tau muaj tias nws tau mus thiab tau tuav niam vaj ntxwv tes, xwv kom tej zaum nws yuav tsa tau nws sawv hauv av los; thiab thaum nws tuav nkaus niam vaj ntxwv tes ua ciav nws cia li sawv tsees sawv ntsug, thiab tau hu ib lub suab nrov nrov hais tias: Au Yexus tus uas tau koob hmoov, tus uas tau cawm kuv dim ntawm lub ntuj txiag teb tsaus uas phem kawg! Au Vajtswv tus ua tau koob hmoov, thov muaj kev hlub tshua rau cov neeg no lauj!

30 Thiab thaum nws tau hais li no tas lawm, nws tau npuaj teg, tau muaj kev xyiv fab puv npo, tau hais ntau lo lus uas tsis to taub; thiab thaum nws tau ua li no tas lawm, nws tau tuav vaj ntxwv Lamaunais tes, thiab saib seb nws tau sawv tsees sawv ntsug.

31 Thiab nws, tam sim ntawd, tau pom txoj kev sib cav nyob hauv nws cov neeg, tau txav zog mus thiab tau pib cem lawv, thiab qhia rau lawv tej lus uas nws tau hnov los ntawm Amoos lub qhov ncauj; thiab txhua tus uas tau hnov nws tej lus puav leej ntseeg, thiab tau hloov siab tshiab los rau tus Tswv.

32 Tiam sis tseem tau tshuav ntau leej hauv lawv uas tsis kam mloog nws tej lus; yog li ntawd lawv tau nyias mus nyias txoj kev lawm.

33 Thiab tau muaj tias thaum Amoos sawv lawm nws kuj tau qhuab qhia rau lawv, thiab tag nrho Lamaunais tej tub qhe sawv daws thiab; thiab lawv tau tshaj tawm tag nrho rau cov neeg tib yam—tias lawv tej siab twb raug hloov lawm; tias lawv tsis muaj lub siab xav ua phem lawm.

34 Thiab saib seb, ntau leej tau tshaj tawm rau cov neeg tias lawv tau pom tej tim tswv thiab tau nrog lawv tham; thiab xws li no lawv tau qhia rau lawv tej yam uas yog Vajtswv li, thiab txog nws txoj kev ncaj ncees.

35 Thiab tau muaj tias tau muaj ntau leej uas tau ntseeg lawv tej lus; thiab txhua tus uas tau ntseeg tau ua kev cai raus dej; thiab lawv tau rais los mus ua ib co neeg ncaj ncees, thiab lawv tau tsim ib lub koom txoos nyob hauv lawv.

36 Thiab tus Tswv txoj hauj lwm tau pib muaj nyob hauv cov Neeg Lamas zoo li no; tus Tswv tau pib nchuav nws tus Ntsuj Plig los rau lawv; thiab peb pom tias nws txhais caj npab tseem ncav rau tag nrho cov neeg uas yuav hloov siab lees txim thiab ntseeg nws lub npe.