1 Ma o lenei sa oo ina a’o malaga atu Alema mai le laueleele o Kitiona agai i le itu i saute, e alu ese atu i le laueleele o Maneti, faauta, sa ofo o ia, i lona ^afeiloai ma ^eatalii o Mosaea, o malaga atu agai i le laueleele o Sara’emila.

2 O lenei o atalii nei o Mosaea sa faatasi ma Alema i le taimi na ^aafio muamua ifo ai le agelu ia te ia; o lea sa olioli tele Alema i le vaai atu i ona uso; ma o le mea na faatele atili ai lona olioli, ona sa avea pea i latou ma ona uso i le Alii; ioe, ma sa latou matuā malolosi i le malamalama o le upumoni; ona o i latou o ni alii mafaufau lelei ma sa latou ^esuesue i tusitusiga paia ma le filigā, ina ia latou iloa le afioga a le Atua.

3 Ae sa le ona pau lea; sa latou tuu atu i latou lava i le ^atatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga, ma a latou ^ea’oa’o atu, sa latou a’oa’o atu ma le mana ma le pule mai le Atua.

4 Ma sa latou a’oa’o atu le afioga a le Atua i totonu o sa Lamanā mo le va o le sefulu fa tausaga, ona sa ^afaamanuiaina tele i latou i lo latou ^eaumaia o le toatele i le malamalama o le upumoni; ioe, o le mana o a latou upu na aumai ai le toatele i luma o le fatafaitaulaga a le Atua, e valaau atu i lona suafa ma ⁱta’uta’u atu a latou agasala i ona luma.

5 O lenei o tulaga nei na oo ia te i latou ia latou malaga, ona sa tele o latou puapuaga; sa latou mafatia tele, i le tino ma le mafaufau, e pei o le fia aai, fia inu ma le le lavavā, ma le tele foi o ^atauiviga i la le agaga.

6 O lenei o a latou malaga nei: Ina ua latou ^atuua lo latou tamā, o Mosaea, i le tausaga muamua o faamasino; ina ua latou ^eteena le malo lea sa manao lo latou tamā e faaee i o latou luga, ma o le mea foi lenei sa i mafaufau o le nuu;

7 Ae ui i lea sa latou o ese atu mai le laueleele o Sara’emila, ma ave a latou pelu, ma a latou tao, ma a latou aufana, ma a latou ufanafana, ma a latou maatā; ma sa latou faia lenei mea ina ia mafai ona latou maua o ni meaai mo i latou lava a’o latou i ai i le vao.

8 Ma sa faapea ona latou o ese atu i le vao faatasi ma o latou aofai o tagata sa latou filifilia, e o a’e i le laueleele o Nifae, e tala’i atu le afioga a le Atua ia sa Lamanā.

9 Ma sa oo ina latou malaga atu i le vao mo aso e tele, ma sa latou anapopogi soo ma ^atatalo soo ina ia tuu mai e le Alii se vaega o lona Agaga e o faatasi ma i latou, ma mafuta faatasi ma i latou, ina ia mafai ona avea i latou o ni ^emeafaigaluega i aao o le Atua e aumaia, pe afai e mafai, o latou uso, o sa Lamanā, i le malamalama o le upumoni, i le malamalama i le leaga o ⁱuputuu a o latou tamā, ia ua le sa’o.

10 Ma sa oo ina ^aasiasi mai le Alii ia te i latou e ala i lona ^eAgaga, ma fetalai mai ia te i latou: Ia ⁱfaamafanafanaina outou. Ma sa faamafanafanaina i latou.

11 Ma sa fetalai mai foi le Alii ia te i latou: Ia outou o atu i totonu o sa Lamanā, o outou uso, ma faatuina la’u upu; peitai ia outou ^aonosai i le tali-tiga ma puapuaga, ina ia mafai ona outou faaali atu faataitaiga lelei ia te i latou e ala atu ia te au, ma o le a ou faia outou o se mea faigaluega i o’u lima mo le faaolataga o agaga e toatele.

12 Ma sa oo ina lotoa loto o atalii o Mosaea, ma i latou foi o e na faatasi ma i latou, e o atu ia sa Lamanā e talai atu ia te i latou le afioga a le Atua.

13 Ma sa oo ina ua latou taunuu atu i tuaoi o le laueleele o sa Lamanā, sa latou ^afaataape i latou lava ma alu ese atu le tasi mai le isi, ma faalagolago i le Alii o le a latou toe feiloai i le faaiuga o la latou ^eseleselega; ona sa latou manatu ua telē lava le galuega lea ua latou amataina.

14 Ma e moni lava sa matua tele lava, ona sa latou saunia e tala’i atu le afioga a le Atua i ni tagata ^aaivao, ma lotomaaa ma feai; o ni tagata sa fiafia i le fasiotia o sa Nifaē, ma gaoi ma vete a latou mea; ma sa tuinanau o latou loto i oa, po o auro ma ario, ma maa taua; ae sa latou saili ia maua nei mea i le fasioti tagata ma le vete, ina ia latou lē galulue i o latou lava lima mo nei mea.

15 Sa faapea ona avea ai i latou o ni tagata paie tele, o le toatele o i latou sa tapuai i tupua, ma sa pa’ū ifo i o latou luga le ^afetuu a le Atua ona o ^euputuu a o latou tamā; e ui i lea sa tuu atu ia te i latou folafolaga a le Alii i luga o tulaga o le salamo.

16 O lea, o le ^apogai lenei na amata ai e atalii o Mosaea le galuega e fai, ina atonu e mafai ai ona latou aumai o i latou i le salamo; ina atonu e mafai ai ona latou aumai o i latou ia latou iloa e uiga i le fuafuaga o le togiola.

17 O lea na latou faataape ai i latou lava mai le tasi, ma o atu ia i latou, e taitoatasi le tagata na’o ia, e tusa ma le afioga ma le mana a le Atua na tuuina mai ia te ia.

18 O lenei ona o Amona sa ta’ita’i ia i latou, pe ona sa ia auauna atu ia te i latou, sa alu ese atu o ia mai ia i latou, ina ua uma ona ia ^afaamanuia ia te i latou e tusa ma o latou tofitofiga eseese, ina ua uma ona ia tuu atu o le afioga a le Atua ia te i latou, pe auauna atu ia te i latou a’o le’i alu ese atu o ia; ma sa faapea ona latou o atu ia latou malaga eseese i le laueleele atoa.

19 Ma sa alu atu Amona i le laueleele o Isamaeli, o le laueleele lea na faaigoa i atalii o ^aIsamaeli, oē ua avea foi ma sa Lamanā.

20 Ma ina ua ulu atu Amona i le laueleele o Isamaeli, sa ave o ia e sa Lamanā ma saisai o ia, e tusa ma la latou masani o le saisai o sa Nifaē uma e pa’u’ū atu i o latou lima, ma ave i latou i luma o le tupu; ma sa faapea ona tuu ai i le filifiliga a le tupu pe fasioti i latou, pe taofi i latou e faatagataotauaina, pe lafo i latou i le falepuipui, pe tutuli ese i latou mai lona laueleele, e tusa ma lona loto ma lana filifiliga.

21 Ma sa faapea ona avatu o Amona i luma o le tupu o lē na pule i le laueleele o Isamaeli; ma o lona igoa o Lamonae; ma o ia o sē e tupuga mai ia Isamaeli.

22 Ma sa fesili atu le tupu ia Amona pe o lona manao e fia nofo i le laueleele i totonu o sa Lamanā, po o totonu o lona nuu.

23 Ma sa fai atu Amona ia te ia: Ioe, ou te manao ou te nofo i totonu o lenei nuu mo se taimi; ioe, ma atonu foi seia oo i le aso ou te oti ai.

24 Ma sa oo ina fiafia tele le tupu o Lamonae ia Amona, ma faatonu atu ia tatalaina ona noanoaga; ma sa ia manao ia ave e Amona se tasi o ona afafine e fai ma ana avā.

25 Peitai sa fai atu Amona ia te ia: E leai, ae o le a avea a’u ma āu auauna. O lea na avea ai Amona ma se auauna i le tupu o Lamonae. Ma sa oo ina tuu o ia i totonu faatasi ma isi auauna e leoleo lafu manu a Lamonae, e tusa ma le masani a sa Lamanā.

26 Ma ina ua mavae aso e tolu talu ona auauna atu o ia i le tupu, a’o latou faatasi ma auauna sa Lamanā o o atu ma a latou lafu manu i se mea sa i ai vai, lea sa ta’ua o le vai o Sevusa, ma o iina sa tulituli atu i ai e sa Lamanā a latou lafu manu, ina ia mafai ona latou maua ai se suavai—

27 O lea a’o tulituli atu e Amona ma auauna a le tupu a latou lafu manu i lenei nofoaga o le vai, faauta, sa tutū mai ni isi o sa Lamanā, o e sa i le vai faatasi ma a latou lafu manu, ma faasalalau lafu manu a Amona ma auauna a le tupu, ma sa latou matua’i faasalalauina i latou ma na oo ai ina latou sosola i ala eseese.

28 O lenei sa amata ona muimui o auauna a le tupu, fai mai: O le a fasioti nei i tatou e le tupu, e pei ona ia faia i o tatou uso ona sa faasalalauina a latou lafu manu e le amio leaga o nei tagata. Ma sa amata ona latou fetagisi tetele, fai mai: Faauta, ua salalau nei a tatou lafu manu.

29 O lenei sa latou fetagisi ona o le matata’u ne’i fasiotia i latou. O lenei ina ua vaai atu Amona i lenei mea sa faatumulia lona loto i totonu o ia i le olioli; ona, sa faapea ifo o ia, o le a ou faaali atu lo’u mana ia te i latou nei o o’u uso a auauna, po o le mana ua ia te a’u, e toe aumai ai nei lafu manu i le tupu, ina ia mafai ona ou manumalo i loto o o’u uso a auauna nei, ina ia mafai ona ou ta’ita’i mai o i latou ia talitonu i a’u upu.

30 Ma o lenei, o manatu ia o Amona, ina ua vaai atu o ia i puapuaga o i latou o e na ia ta’ua o ona uso.

31 Ma sa oo ina ia faalototeteleina i latou i ana upu, ua fai atu: O’u uso e, ia outou lototetele ma ia tatou o e saili mai lafu manu, ma o le a tatou faapotopoto faatasi mai i latou ma toe aumai i latou i le nofoaga o le vai; ma o le a faapea ona tatou faasaoina ai lafu manu mo le tupu ma o le a ia le fasiotia ai i tatou.

32 Ma sa oo ina latou o atu e saili mai lafu manu, ma sa latou mulimuli atu ia Amona, ma sa latou taufetuli atu ma le vave tele ma sisi’o mai lafu manu a le tupu ma toe faapotopoto faatasi mai i latou i le nofoaga o le vai.

33 Ma sa toe tutū mai na tagata e faasalalau a latou lafu manu; peitai sa fai atu Amona i ona uso: Si’osi’o faataamilo le lafu manu ina ia le sosola; ma o le a ou alu atu e tauivi ma tagata ia o ē ua faasalalauina a tatou lafu manu.

34 O lea sa latou faia e pei ona faatonuina ai i latou e Amona, ma ua alu atu o ia ma tulai e tauivi ma i latou o ē na tutū i tafatafa o vai o Sevusa; ma sa toatele e lē toaitiiti i latou.

35 O lea sa latou lē fefefe ia Amona, ona sa latou manatu e mafai e le toatasi o o latou tagata ona fasioti ia te ia e tusa ma la latou filifiliga, ona sa latou le iloa sa folafola mai le Alii ia Mosaea o le a ia ^alaveaiina ona atalii mai o latou lima; latou te le’i iloa foi se mea e uiga i le Alii; o lea sa latou fiafia ai i le faaumatiaina o o latou uso; ma o le pogai lea na latou tutū mai ai e faasalalau lafu manu a le tupu.

36 Peitai sa tulai atu ^aAmona ma amata ona ia sasau atu o maa ia te i latou i lana maatā; ioe, sa ia liai atu maa ma le mana malosi i totonu o i latou; ma sa faapea ona ia fasia ai se ^evaega mautinoa o i latou ma sa oo ai ina amata ona latou ofo i lona mana; ae ui i lea sa latou feitai ona o o latou uso na fasia, ma sa latou lotonaunau ia mafai ona pa’ū o ia; o lea, ina ua iloa ua lē ⁱmafai ona lavea o ia i a latou maa, sa latou tula’i mai ma a latou uatogi e fasioti ai o ia.

37 Ae faauta, o tagata uma taitoatasi na sii i luga lana uatogi e ta Amona, sa ia vavae ese o latou lima i lana pelu; ona sa ia talitalia a latou ta i le taia o o latou lima i le lau o lana pelu, sa oo ina amata ona latou ofo, ma amata ona sosola ese mai ona luma; ioe, ma sa le toaitiiti lo latou aofai; ma sa ia faia ia latou sosola ese e ala i le malosi o lona lima.

38 O lenei e toaono i latou na pa’u’ū i le maatā, ae sa ia le’i fasiotia se tasi i lana pelu vagana ai lo latou taitai; ma sa ia vavae ese le tele o o latou lima na sii e faasaga ia te ia, ma sa le toaitiiti i latou.

39 Ma ina ua uma ona ia tutuli mamao ese i latou, sa ia toe foi mai ma latou faainu a latou lafu manu ma toe faafoi i latou i fanua e tausi ai manu a le tupu, ma ona latou o atu ai lea i le tupu, ma aveina atu lima na vavae ese i le pelu a Amona, o i latou o e na saili e fasioti ia te ia; ma avatu i latou i le tupu mo se molimau o mea na latou faia.