1 Ug nahitabo nga sa ikanapulo ug usa nga tuig sa pagmando sa mga maghuhukom sa katawhan ni Nephi, sa ikalima nga adlaw sa ikaduha nga bulan, human sa dakong kalinaw sa yuta sa Zarahemla, nga walay mga gubat ni mga panagbingkil sulod sa pipila ka tuig, gani hangtod sa ikalima nga adlaw sa ikaduha nga bulan sa ikanapulo ug usa nga tuig, dihay panawagan sa gubat nga gidungog sa tibuok yuta.

2 Kay tan-awa, ang kasundalohan sa mga Lamanita misulong sa daplin sa kamingawan, ngadto sa mga utlanan sa yuta, gani sa siyudad sa ^aAmmonihah, ug misugod sa pagpamatay sa katawhan ug paglaglag sa siyudad.

3 Ug karon nahitabo, sa wala pa ang mga Nephita makaandam og igong kasundalohan aron sa pag-abog kanila gikan sa yuta, sila ^amipatay na sa katawhan kinsa diha sa siyudad sa Ammonihah, ug usab ang uban libot sa mga utlanan sa Noah, ug midala sa uban nga bihag ngadto sa kamingawan.

4 Karon nahitabo nga ang mga Nephita nagmatinguhaon sa pagkuha niadtong kinsa gidala nga bihag ngadto sa kamingawan.

5 Busa, siya nga natudlo nga labawng kapitan sa kasundalohan sa mga Nephita, (ug ang iyang ngalan mao si Zoram, ug siya adunay duha ka anak nga lalaki, si Lehi ug si Aha)—karon si Zoram ug ang iyang duha ka anak nga lalaki, nasayod nga si Alma usa ka labaw nga pari sa simbahan, ug nga nakadungog nga siya adunay espiritu sa pagpanagna, busa miadto sila kaniya ug nagtinguha nga siya magpakisayod kon ang Ginoo motugot ba nga moadto sila sa kamingawan aron sa pagpangita sa ilang kaigsuonan, kinsa gidala nga bihag sa mga Lamanita.

6 Ug nahitabo nga si Alma ^anagpakisayod sa Ginoo kabahin niini nga butang. Ug si Alma mibalik ug miingon ngadto kanila: Tan-awa, ang mga Lamanita motabok sa suba sa Sidon sa habagatan sa kamingawan, layo ngadto sa unahan sa mga utlanan sa yuta sa Manti. Ug tan-awa didto ninyo sila sugaton, sa silangan sa suba sa Sidon, ug didto ang Ginoo motugyan sa inyong kaigsuonan nganha kaninyo kinsa nabihag sa mga Lamanita.

7 Ug nahitabo nga si Zoram ug ang iyang mga anak nga lalaki mitabok sa suba sa Sidon, uban sa ilang kasundalohan, ug mipalayo unahan sa mga utlanan sa Manti ngadto sa habagatan sa kamingawan, nga nahimutang sa silangang bahin sa suba sa Sidon.

8 Ug gisulong nila ang kasundalohan sa mga Lamanita, ug ang mga Lamanita nagkatibulaag ug giabog ngadto sa kamingawan; ug gidala nila ang ilang kaigsuonan kinsa nabihag sa mga Lamanita, ug walay bisan usa ka kalag kanila nga nabihag ang nawala. Ug gidala sila sa ilang kaigsuonan aron sa pagpanag-iya sa ilang kaugalingong mga yuta.

9 Ug sa ingon niana natapos ang ikanapulo ug usa nga tuig sa mga maghuhukom, ang mga Lamanita nga naabog gikan sa yuta, ug ang katawhan sa Ammonihah ^anangamatay; oo, matag buhi nga kalag sa mga Ammonihahita ^bnamatay, ug usab ang ilang gamhanan nga siyudad, nga ilang giingon nga dili malaglag sa Dios, tungod sa pagkagamhanan niini.

10 Apan tan-awa, sa ^ausa lamang ka adlaw nahimo kini nga awaaw; ug ang patay nga mga lawas gikuniskunis sa mga iro ug ihalas nga mga mananap sa kamingawan.

11 Bisan pa niana human sa daghan nga adlaw ang ilang patay nga mga lawas nagtipun-og sa ibabaw sa yuta, ug gitabonan sila og nipis nga tabon. Ug karon hilabihan kaayo ang kabaho niana nga ang katawhan wala na moadto aron sa pagpanag-iya sa yuta sa Ammonihah sulod sa daghang katuigan. Ug gitawag kini og Biniyaan sa mga Nehor; kay sila sama og tinuohan ni ^aNehor, kinsa gipamatay; ug ang ilang mga yuta nagpabilin nga biniyaan.

12 Ug ang mga Lamanita wala na gayod mobalik pag-usab aron sa pagpakiggubat batok sa mga Nephita hangtod sa ikanapulo ug upat nga tuig sa pagmando sa mga maghuhukom sa katawhan ni Nephi. Ug sa ingon niana sulod sa tulo ka tuig ang katawhan ni Nephi nakaangkon og padayon nga kalinaw sa tibuok yuta.

13 Ug si Alma ug si Amulek mipadayon sa pagsangyaw og paghinulsol ngadto sa katawhan sa ilang ^amga templo, ug sa ilang mga santuwaryo, ug usab sa ilang mga ^bsinagoga, nga gitukod subay sa pamaagi sa mga Judeo.

14 Ug kutob sa mamati sa ilang mga pulong, kanila padayon sila nga mipakigbahin sa pulong sa Dios, nga walay ^apagpili sa mga tawo.

15 Ug sa ingon niana si Alma ug si Amulek mipadayon, ug usab sa daghan pa kinsa napili alang sa buhat, sa pagsangyaw sa pulong sa tibuok yuta. Ug ang katukoran sa simbahan mikatap sa tibuok yuta, sa tanan nga rehiyon libot niini, taliwala sa tanang katawhan sa mga Nephita.

16 Ug ^awalay pamintaha diha kanila; ang Ginoo mibu-bo sa iyang Espiritu sa tibuok yuta sa pag-andam sa mga hunahuna sa katawhan, o sa pag-andam sa ilang mga ^bkasingkasing sa pagdawat sa pulong diin kinahanglan itudlo kanila sa panahon sa iyang pag-anhi—

17 Aron dili sila magmagahi batok sa pulong, aron dili sila mahimong dili matuohon, ug mosangpot sa kalaglagan, apan nga sila modawat sa pulong uban ang kamaya, ug sama sa usa ka ^asanga nga gisumbak ngadto sa tinuod nga ^bubas, nga sila makasulod sa ^ckapahulayan sa Ginoo nga ilang Dios.

18 Karon kadto nga ^amga pari kinsa mipadayon taliwala sa katawhan misangyaw batok sa tanan nga pagpamakak, ug ^bmga pagpanglimbong, ug ^cmga kasina, ug mga panagbangi, ug daotan og tuyo, ug mga pagbiay-biay, ug pagpangawat, pagpanulis, pagpanglungkab, pagpatay, pagpanapaw, ug tanan nga matang sa pagkamaulagon, nag-awhag nga kining mga butanga dili unta mahitabo—

19 Nagsangyaw sa mga butang nga sa dili madugay moabot; oo, nagsangyaw sa ^apag-anhi sa Anak sa Dios, sa iyang mga pag-antos ug kamatayon, ug usab sa pagkabanhaw sa mga patay.

20 Ug daghan sa katawhan ang nagpakisayod kabahin sa dapit nga adtoan sa Anak sa Dios; ug gitudloan sila nga siya ^amopakita kanila ^bhuman sa iyang pagkabanhaw; ug niini ang katawhan namati uban sa dakong kamaya ug kalipay.

21 Ug karon human ang simbahan matukod sa tibuok yuta—nga nakaangkon og ^akadaogan batok sa yawa, ug ang pulong sa Dios nga gisangyaw sa kaputli niini sa tibuok yuta, ug ang Ginoo mibu-bo sa iyang mga panalangin nganha sa katawhan—sa ingon niana natapos ang ikanapulo ug upat nga tuig sa pagmando sa mga maghuhukom sa katawhan ni Nephi.