1 Ug nahitabo nga si Alma ug si Amulek gisugo nga mobiya niana nga siyudad; ug mibiya sila, ug miabot gani ngadto sa yuta sa Sidom; ug tan-awa, didto ilang nakita ang tanang katawhan nga mibiya gikan sa yuta sa ^aAmmonihah, kinsa ^bgisalikway ug gibato, tungod kay mituo sila sa mga pulong ni Alma.

2 Ug ilang gisaysay kanila ang tanan nga nahitabo sa ilang ^amga asawa ug mga anak, ug usab kabahin sa ilang mga kaugalingon, ug sa ilang ^bgahom sa pagkaluwas.

3 Ug usab si Zeezrom nasakit didto sa Sidom, sa taas kaayo nga hilanat, nga ang nakaingon mao ang dakong mga kalisdanan sa iyang hunahuna tungod sa iyang ^apagkadaotan, kay nagtuo siya nga si Alma ug si Amulek wala na; ug nagtuo siya nga gipamatay na sila tungod sa iyang pagkadaotan. Ug kining labihan ka dako nga sala, ug ang iyang uban pang daghan nga sala, nakapahasol sa iyang hunahuna hangtod nga kini nahimong hilabihan ka sakit, ingon nga wala nay kaluwasan; busa nagsugod siya og taas kaayo nga kainit.

4 Karon, sa dihang nakadungog siya nga si Alma ug si Amulek anaa sa yuta sa Sidom, nadasig ang iyang kasingkasing; ug mipadala siya og mensahe dihadiha ngadto kanila, nagtinguha nga sila moadto kaniya.

5 Ug nahitabo nga miadto dayon sila, nagsunod sa mensahe nga iyang gipadala kanila; ug giadto nila ang balay ni Zeezrom; ug ilang nakita nga naghigda siya sa iyang higdaanan, masakiton, luya kaayo tungod sa taas kaayo nga hilanat; ug ang iyang hunahuna usab hilabihan ka sakit tungod sa iyang mga hiwi nga mga binuhatan; ug sa dihang nakakita siya kanila gituyhad niya ang iyang kamot, ug mihangyo kanila nga sila moayo kaniya.

6 Ug nahitabo nga si Alma miingon ngadto kaniya, migunit kaniya sa kamot: ^aMotuo ba ikaw sa gahom ni Kristo sa kaluwasan?

7 Ug mitubag siya ug miingon: Oo, mituo ako sa tanan nga pulong nga imong gitudlo.

8 Ug si Alma miingon: Kon ikaw motuo sa katubsanan ni Kristo ikaw ^amamaayo.

9 Ug siya miingon: Oo, mituo ako sumala sa imong mga pulong.

10 Ug unya si Alma nangamuyo sa Ginoo, nga nag-ingon: O Ginoo nga among Dios, kaloy-i kining tawhana, ug ^aayoha siya sumala sa iyang pagtuo nga anaa kang Kristo.

11 Ug sa dihang si Alma nakapamulong niini nga mga pulong, si Zeezrom ^amibarog sa iyang mga tiil, ug misugod sa paglakaw; ug kini nakapatingala pag-ayo sa tanang katawhan; ug ang kahibalo bahin niini mikaylap sa tibuok yuta sa Sidom.

12 Ug si Alma mibunyag ni Zeezrom ngadto sa Ginoo; ug misugod siya gikan niana nga panahon sa pagsangyaw sa katawhan.

13 Ug si Alma mitukod og simbahan sa yuta sa Sidom, ug mipahimutang og mga pari ug mga magtutudlo sa yuta, aron bunyagan ngadto sa Ginoo si bisan kinsa nga magtinguha nga magpabunyag.

14 Ug nahitabo nga daghan sila; kay nagpanon sila gikan sa tanan nga rehiyon nga naglibot sa Sidom, ug gibunyagan.

15 Apan kadtong katawhan nga didto sa yuta sa Ammonihah, sa gihapon nagpabilin sila nga tig-a og kasingkasing ug tikig og liog nga katawhan; ug wala sila maghinulsol sa ilang mga sala, miingon nga ang tanang gahom ni Alma ug ni Amulek iya sa yawa; kay sila sama og tinuohan ni ^aNehor, ug wala motuo sa paghinulsol sa ilang mga sala.

16 Ug nahitabo nga si Alma ug si Amulek, si Amulek ^amibiya sa iyang tanang bulawan, ug plata, ug sa iyang mahalon nga mga butang, nga didto sa yuta sa Ammonihah, alang sa pulong sa Dios, kay ^bgisalikway siya niadtong kinsa kanhiay iyang kahigalaan ug usab sa iyang amahan ug iyang kaliwatan;

17 Busa, human si Alma makatukod og simbahan sa Sidom, nga nakakita og hilabihan nga ^apagpugong, oo, nakakita nga ang katawhan mipugong sa garbo sa ilang mga kasingkasing, ug misugod sa ^bpagpaubos sa ilang mga kaugalingon sa atubangan sa Dios, ug misugod sa pagpundok sa ilang mga kaugalingon sa ilang mga santuwaryo aron sa ^cpagsimba sa Dios sa atubangan sa altar, ^dnagbantay ug nag-ampo sa kanunay, aron maluwas sila gikan kang Satanas, ug gikan sa ^ekamatayon, ug gikan sa kalaglagan—

18 Karon sama sa akong giingon, si Alma kay nakakita niining tanan nga butang, busa iyang gidala ni Amulek ug miadto sa yuta sa Zarahemla, ug midala kaniya ngadto sa iyang kaugalingon nga balay, ug nangalagad kaniya sa iyang mga kalisdanan, ug gilig-on siya ngadto sa Ginoo.

19 Ug sa ingon niana natapos ang ikanapulo nga tuig sa pagmando sa mga maghuhukom sa katawhan ni Nephi.