Vaj Lug Kub
Amas 14


Tshooj 14

Amas thiab Amulej raug kaw thiab raug ntaus—Cov neeg ntseeg thiab lawv tej vajlugkub dawb huv raug hluav taws hlawv—Cov neeg uas tuag rau lawv txoj kev ntseeg no tau raug txais los ntawm tus Tswv nyob hauv lub yeeb koob—Tej ntsa loog qhov taub tau raug tawg thiab vau—Amas thiab Amulej raug cawm dim thiab nkawd tej neeg tsim txom tau raug tua. Kwv yees li 82–81 xyoo ua ntej yug Yexus.

1 Thiab tau muaj tias tom qab uas nws tau xaus hais rau cov neeg lawm lawv ntau leej tau ntseeg nws tej lus, thiab tau pib hloov siab lees txim, thiab nrhiav tej vajlugkub.

2 Tiam sis lawv feem coob tau xav tias lawv yuav ua kom Amas thiab Amulej puas tsuaj; vim lawv tau npau taws rau Amas, vim yog qhov tseeb meej ntawm nws tej lus rau Xi-elas; thiab lawv kuj tau hais tias Amulej tau dag rau lawv, thiab tau saib tsis taus lawv txoj kev cai thiab saib tsis taus lawv tej neeg hais kev cai thiab tej neeg txiav txim.

3 Thiab lawv kuj tau npau rau Amas thiab Amulej; thiab vim lawv tau ua tim khawv tseeb meej heev nkaug lawv tej kev phem, lawv tau nrhiav muab nkawd tua ntsiag to.

4 Tiam sis tau muaj tias lawv tsis tau ua; tiam sis lawv tau txhom nkawd thiab tau muab cov hlua khov khov los khi nkawd, thiab tau coj nkawd mus cuag tus thawj tub txiav txim ntawm thaj av.

5 Thiab cov neeg tau tawm mus thiab tau ua tim khawv nkaug nkawd—tau ua tim khawv tias nkawd tau saib tsis tau txoj kev cai, thiab lawv tej tub hais kev cai thiab tej neeg txiav txim ntawm thaj av, thiab tag nrho tej neeg uas tau nyob hauv thaj av; thiab kuj tau ua tim khawv tias tau muaj tiam sis ib tug Vajtswv xwb, thiab tias nws yuav xa nws Leej Tub los rau hauv cov neeg, tiam sis nws yuav tsis cawm kom lawv dim; thiab ntau yam zoo li no uas cov neeg tau ua tim khawv nkaug Amas thiab Amulej. Nim no tau ua li no nyob ntawm tus thawj tub txiav txim ntawm thaj av xub ntiag.

6 Thiab tau muaj tias Xi-elas tau xav tsis thoob rau tej lus uas tau hais lawm; thiab nws kuj tau paub txog tej kev dig ntawm tej siab, uas nws tau ua nyob hauv cov neeg los ntawm nws tej lus dag; thiab nws lub siab tau pib raug tsim txom los ntawm txoj kev paub txog nws tus kheej txoj kev txhaum; muaj tseeb tiag, nws tau pib raug ntuj txiag teb tsaus tej kev mob vij ib puag ncig.

7 Thiab tau muaj tias nws tau pib qw rau cov neeg, hais tias: Saib seb, kuv muaj kev txhaum, thiab cov txiv neej no tsis muaj qhov ceb rau Vajtswv. Thiab nws tau pib thov rau nkawd txij li lub sij hawm ntawd mus; tiam sis lawv tau tsawm nws, hais tias: Puas yog tus phem muab tau koj lawm thiab? Thiab lawv tau nto qaub ncaug rau nws, thiab muab nws ntiab tawm ntawm lawv mus, thiab kuj tag nrho cov uas tau ntseeg tej lus uas Amas thiab Amulej tau hais. Thiab lawv tau muab lawv cov no ntiab tawm, thiab txib neeg txawb pob zeb rau lawv.

8 Thiab lawv tau coj lawv tej poj niam thiab tej me nyuam tuaj ua ke, thiab leej twg tau ntseeg los sis tau raug qhia kom ntseeg Vajtswv txoj lus lawv tau kom lawv yuav tsum raug muab pov rau hauv hluav taws, thiab lawv kuj tau coj lawv tej ceev xwm txheej uas tau muaj tej vajlugkub dawb huv, thiab kuj tau muab lawv pov rau hauv hluav taws thiab, kom lawv yuav raug kub hnyiab thiab puas tsuaj los ntawm hluav taws.

9 Thiab tau muaj tias lawv tau coj Amas thiab Amulej, thiab tau cab nkawd mus rau tom qhov chaw uas tua cov neeg ntseeg, xwv kom nkawd yuav ua tim khawv rau txoj kev puas tsuaj ntawm cov uas tau raug hluav taws kub.

10 Thiab thaum Amulej tau pom tej kev mob ntawm tej poj niam thiab me nyuam uas tau raug hluav taws kub, kuj tau mob nws thiab; thiab nws tau hais rau Amas hais tias: Wb yuav ua tim khawv rau qhov kev phem no tau li cas? Yog li ntawd cia wb xyab wb tej tes, thiab siv Vajtswv lub hwj chim uas nyob hauv wb, thiab cawm lawv kom dim ntawm tej nplaim taws.

11 Tiam sis Amas tau hais rau nws tias: Tus Ntsuj Plig txwv kuv kom kuv tsis txhob xyab kuv txhais tes; vim saib seb tus Tswv tau txais lawv mus rau nws tus kheej, nyob hauv lub yeeb koob; thiab nws yeej cia kom lawv yuav ua tej yam no, los sis kom cov neeg yuav ua tej yam no rau lawv, raws li lawv txoj kev siab tawv, xwv kom tej kev txiav txim uas nws yuav siv rau lawv nyob hauv nws txoj kev npau taws yuav ncaj ncees; thiab cov neeg tsis muaj txim tej ntshav yuav sawv ua ib qho tim khawv nkaug lawv, muaj tseeb tiag, thiab quaj nrov nrov nkaug lawv nyob rau hauv hnub kawg.

12 Nim no Amulej tau hais rau Amas hais tias: Saib seb, tej zaum lawv kuj yuav muab wb hlawv thiab.

13 Thiab Amas tau hais tias: Cia nws muaj raws li tus Tswv lub siab xav. Tiam sis, saib seb, wb txoj hauj lwm tseem tsis tau tas; yog li ntawd lawv yuav tsis muab wb hlawv.

14 Nim no tau muaj tias thaum tej cev ntawm lawv cov uas tau muab pov rau hauv hluav taws, thiab cov ceev xwm txheej uas tau muab pov nrog lawv tau kub hnyiab tas lawm, tus thawj tub txiav txim ntawm thaj av tau los thiab tau sawv ntawm Amas thiab Amulej xub ntiag, thaum uas nkawd tseem raug khi; thiab nws tau xuas ncuav pias rau nkawd plhu, thiab tau hais rau nkawd hais tias: Tom qab uas neb tau pom li no lawm, neb puas tseem yuav qhuab qhia rau cov neeg no ntxiv, tias lawv yuav raug muab pov rau hauv lub pas dej hluav taws thiab leej faj?

15 Saib seb, neb pom tias neb tsis muaj hwj chim cawm cov uas tau muab pov rau hauv hluav taws; thiab Vajtswv los kuj tsis tau cawm lawv vim lawv ntseeg neb txoj kev ntseeg. Thiab tus neeg txiav txim tau rov xuas ncuav pias rau nkawd plhu dua, thiab nug hais tias: Neb muaj dab tsi yuav hais rau neb tus kheej?

16 Nim no tus neeg txiav txim no tau nyob hauv tus txheej txheem thiab txoj kev ntseeg ntawm Nihos, tus uas tau tua Khede-oos.

17 Thiab tau muaj tias Amas thiab Amulej tsis teb nws dab tsi li; thiab nws tau ntaus nkawd dua, thiab tau muab nkawd rau cov tub ceev xwm coj mus pov rau hauv qhov taub.

18 Thiab thaum nkawd tau raug pov rau hauv qhov taub tau peb hnub lawm, tau muaj ntau tus neeg hais kev cai, thiab tej neeg txiav txim, thiab tej pov thawj, thiab tej xib hwb, uas txawj hauj lwm ntawm Nihos; thiab lawv tau tuaj rau hauv qhov taub tuaj saib nkawd, thiab lawv tau nug nkawd txog ntau lo lus; tiam sis nkawd tsis teb lawv dab tsi li.

19 Thiab tau muaj tias tus neeg txiav txim tau sawv ntawm nkawd xub ntiag, thiab tau hais tias: Yog vim li cas neb thiaj tsis teb cov neeg no tej lus? Neb puas paub tias kuv muaj hwj chim muab neb pov rau hauv tej nplaim hluav taws? Thiab nws tau kom nkawd hais lus; tiam sis nkawd tsis teb dab tsi hlo li.

20 Thiab tau muaj tias lawv tau ncaim thiab nyias mus nyias, tiam sis tag kis rov qab tuaj dua; thiab tus neeg txiav txim kuj tau rov qab xuas ncuav pias rau nkawd tej plhu dua. Thiab coob tug kuj tau txav los, thiab tau ntaus nkawd, hais tias: Neb puas yuav rov qab sawv dua thiab txiav txim rau cov neeg no, thiab nrhiav plaub rau peb txoj kev cai? Yog neb muaj hwj chim loj npaum ntawd vim li cas neb ho tsis cawm neb tus kheej?

21 Thiab lawv tau hais ntau yam zoo li ntawd rau nkawd, tom lawv hniav qees rau nkawd, thiab nto qaub ncaug rau nkawd, thiab hais tias: Peb yuav zoo li cas thaum peb raug txim?

22 Thiab ntau yam zoo li no, muaj tseeb tiag, lawv hais tag nrho ib puas yam tsav zoo li no rau nkawd; thiab li no lawv tau thuam nkawd tau ntau hnub. Thiab lawv tau tsis pub zaub mov rau nkawd xwv kom nkawd yuav tshaib plab, thiab tsis pub dej kom nkawd yuav nqhis dej; thiab lawv kuj tau muab nkawd tej ris tsho ntawm nkawd mus kom nkawd yuav liab qab; thiab li no nkawd tau raug xuas hlua khov khov khi, thiab raug kaw hauv qhov taub.

23 Thiab tau muaj tias tom qab nkawd tau raug txom nyem tau ntau hnub lawm, (thiab nws tau yog hnub kaum ob, nyob hauv lub kaum hli ntuj, nyob hauv xyoo thib kaum ntawm cov neeg txiav txim txoj kev kav Nifais cov neeg) ces tus thawj tub txiav txim rau thaj av Amonaihas thiab lawv cov xib hwb coob tug thiab lawv tej neeg hais kev cai tau mus rau hauv lub qhov taub uas Amas thiab Amulej tau raug hlua khi.

24 Thiab tus thawj tub txiav txim tau sawv ntawm nkawd xub ntiag, thiab tau rov ntaus nkawd dua, thiab tau hais rau nkawd tias: Yog nej muaj Vajtswv lub hwj chim cia li cawm neb tus kheej ntawm tej hlua no, thiab tom qab ntawd peb yuav ntseeg tias tus Tswv yuav ua kom cov neeg no puas tsuaj raws li neb tej lus.

25 Thiab tau muaj tias lawv sawv daws tau txav mus thiab ntaus nkawd, hais tib co qub lus, mus txog tus kawg; thiab thaum tus kawg tau hais lus rau nkawd tas lawm Vajtswv lub hwj chim tau los rau saum Amas thiab Amulej, thiab nkawd tau sawv thiab tau sawv ntsug.

26 Thiab Amas tau hu, hais tias: Wb tseem yuav nyiaj tej kev txom nyem heev no ntev npaum li cas os tus Tswv es? Au tus Tswv, muab lub zog rau wb raws li wb txoj kev ntseeg uas nyob hauv Khetos, kom muaj kev dim. Thiab nkawd tau tu cov hlua uas khi nkawd; thiab thaum cov neeg tau pom qhov no, lawv tau pib khiav, vim txoj kev ntshai ntawm txoj kev puas tsuaj tau los rau saum lawv.

27 Thiab tau muaj tias lawv tau ntshai kawg ces lawv tau vau rau hauv av, thiab mus tsis txog sab qhov rooj sab nraud ntawm lub qhov taub; thiab av tshee heev kawg li, thiab tej phab ntsa qhov taub tau faib ua ob sab, ces tej ntawd txawm tau vau rau hauv av; thiab tus thawj tub txiav txim, thiab tej neeg hais kev cai, thiab tej pov thawj, thiab tej xib hwb, uas tau ntaus Amas thiab Amulej, tau raug tua los ntawm txoj kev vau ntawm qhov ntawd.

28 Thiab Amas thiab Amulej tau tawm hauv qhov taub los, thiab nkawd tsis tau raug mob dab tsi; vim tus Tswv tau pub hwj chim rau nkawd, raws li nkawd txoj kev ntseeg uas nyob hauv Khetos. Thiab nkawd tau tawm plaws hauv qhov taub ncaj qha los; thiab tej hlua uas tau khi nkawd tau plam tas; thiab lub qhov taub tau vau rau hauv av, thiab txhua tus uas nyob hauv tej ntsa loog sab hauv puav leej raug tuag, tsuas tshuav Amas thiab Amulej xwb; thiab nkawd tau tawm ncaj qha mus rau hauv lub nroog.

29 Nim no cov neeg tau hnov ib lub suab loj tau khiav ua ke tej pwb pawg tuaj kom paub txog qhov xwm ntawd; thiab thaum lawv tau pom Amas thiab Amulej tau tawm tom qhov taub los, thiab tej phab ntsa tod tau vau rau hauv av, lawv tau raug ntshai kawg li, thiab tau khiav ntawm Amas thiab Amulej mus zoo li ib tug tshis khiav nrog nws tus me nyuam tawm ntawm ob tug tsov ntxhuav; thiab lawv tau khiav ntawm Amas thiab Amulej mus zoo li no.