Pukfel
Alma 11


Sopun 11

Ewe pekin moni an ekkewe chon Nifai a aweweno—Amulek a anini ngeni Siesrom—Kraist esap angasa aramas non ar tipis—Ekkewe chok ra muuni ewe muun nang ra ngaseno—Aramas meinisin repwe manausefanita non inis ese tongeni mano—Ese wor mano mwirin ewe Manausefan. Arap ngeni 82 Ier Mwen Kraist.

1 Iei a nom non ewe annukun Mosaia pwe emon me emon mwan ewe a sou apungun ewe annuk, are ekkewe ir ra kefinita ar repwe sou apung, repwe angei niwinir anongonong won ewe ukukun fansoun minne ra angang ar repwe apungu ekkewe ir ra emmwenito mwer ar repwe kapung.

2 Iei ika emon mwan a niwinimang ngeni pwan emon, me i esap möni met a niwinimangei, i a etipisi ngeni ewe sou apung; iwe ewe sou apung a aea pochokunen mumuta, me tinano ekkewe sou angei annuk pwe ewe mwan epwe emmwenito me mwen i; iwe i a apungu ewe mwan anongonong won ewe annuk me ekkewe pungun foffor minne ra wato usun i, iwe iei ewe mwan a echimw pwe epwe möni met minne i a niwinimangei, are repwe angei seni mettoch meinisin, are epwe katuruu seni nein ekkewe aramas usun emon chon mwacho me emon chon sona.

3 Iwe ewe sou apung a angei niwinin anongonong won ukukun an fansoun—efou senine non gold ren ew ran, are efou senum non silver, minne a nonno fengen ngeni efou senine non gold; iwe ei a anongonong won ewe annuk minne a kawor.

4 Iei ikkei iten ekkewe sokkofesenin nour kewe foun gold, me sokkofesenin nour silver, anongonong won auchear. Iwe iter kewe a kawor me ren ekkewe chon Nifai, pun rese eukuuk anongonong won napanapen ekkewe chon Jew ir mi nom non Jerusalem; rese pwan eukuuk anongonong won napanapen ekkewe chon Jew; nge ra siwini ar kaukun moni me ar eukuuk, anongonong won ekiekin me nonnomun ekkewe aramas, non tappin fansoun meinisin, tori ewe muun ekkewe sou apung, ra fen eukuuk me ren king Mosaia.

5 Iei ewe kaukun moni a iei usun—efou senine non gold, efou seon non gold, efou shum non gold, me efou limnah non gold.

6 Efou senum non silver, efou amnor non silver, efou ezrom non silver, me efou onti non silver.

7 Efou senum non silver a nonno ngeni efou senine non gold, iwe ew me neir a eukuuk ngeni ukukun barley, me pwan eukuukun ew me ew sokkun grain.

8 Iei ukukun efou seon non gold a nap fan ru ukukun auchean efou senine.

9 Iwe efou shum non gold a nap fan ru ukukun auchean efou seon.

10 Iwe efou limnah non gold a ukukun auchear meinisin.

11 Iwe efou amnor non silver a usun nonnon ruofou senum.

12 Iwe efou ezrom non silver a usun nonnon fefou senum.

13 Iwe efou onti a usun ukukur meinisin.

14 Iei ewe ukukun auchean kukkununon nampan kaukun nour moni—

15 Efou shiblon a ukukun esopun efou senum; iei minne, efou shiblon a eukuuk ngeni esopun ukukun barley.

16 Iwe efou shiblum a ukukun esopun efou shiblon.

17 Iwe efou leah a ukukun esopun efou shiblum.

18 Iei ar kewe nampa, anongonong won kaukun nour moni.

19 Iei efou antion non gold a nonno ngeni unufou shiblons.

20 Iei, a fis ren ew popun ar repwe pisekisekino, pokiten ra angei niwinir anongonong won ar angang, iei minne, ra amwasangata ekkewe aramas ngeni afitikoko, me sokopaten osukosuk meinisin me fofforungaw, pwe epwe tongeni wor chommong ar angang, pwe repwe tongeni angei moni anongonong won ekkewe annuk minne ra uweiareto me mwer; iei minne ra amwasangata ekkewe aramas pwe repwe ungeni Alma me Amulek.

21 Iwe ei Siesrom a poputa ne etittina Amulek, a apasa: Kose mochen kopwe ponueniei ekkoch kapaseis minne upwe eisinuk? Iei Siesrom i emon mwan mi tipachem non kokkotun ewe tefin, pwe i epwe tongeni atano met minne mi och; iei minne, a apasa ngeni Amulek: Kose mochen kopwe ponueni ekkewe kapaseis minne upwe wata wom?

22 Iwe Amulek a apasa ngeni i: Ewer, ika epwe anongonong won Ngunun ewe Samon, minne a nom rei; pun usap apasa och mettoch minne mi ungeni Ngunun ewe Samon. Iwe Siesrom a apasa ngeni i: Nengeni, ikkei wonofou onti non silver, iwe ekkei meinisin upwe ngonuk ika kopwe amam ennetin an a wor Emon mi Napanap.

23 Iei Amulek a apasa: O en noun hell, pwata kopwe sotuniei? Kose sinei pwe ekkewe mi tupwon rese fang ngeni ekkena sokkun sossot?

24 Ka nuku pwe ese wor Kot? Ua apasa ngonuk, Apw, en mi sinei pwe mi wor emon Kot, nge ka tongei moni nap seni i.

25 Iwe iei ka fen chofona me mwen Kot ngeniei. Ka apasa ngeniei—Nengeni ekkei wonofou onti, minne ra watte auchear, upwe ngonuk—nupwen ka annomu non netipom pwe kopwe amwochur seniei; iwe a chok om mochen pwe upwe amam ewe Kot mi ennet me manau, pwe epwe tongeni wor om popun kopwe nieino. Iwe iei nengeni, ren ei watten ngaw kopwe angei niwinum.

26 Iwe Siesrom a apasa ngeni i: Ka apasa pwe mi wor emon Kot mi ennet me manau?

27 Iwe Amulek a apasa: Ewer, mi wor emon Kot mi ennet me manau.

28 Iei Siesrom a apasa: Mi chommong nap seni emon Kot?

29 Iwe a ponueni, Apw.

30 Iei Siesrom a apasa ngeni i sefan: Ifa usun ka sinei ekkei mettoch?

31 Iwe a apasa: Emon chon nang a pwarareno ngeniei.

32 Iwe Siesrom a apasa sefan: Ion i ewe epwe wareto? Ewe Noun Kot?

33 Iwe a apasa ngeni i, Ewer.

34 Iwe Siesrom a apasa sefan: Epwe angasa noun kewe aramas non ar tipis? Iwe Amulek a ponueni me apasa ngeni i: Ua apasa ngonuk i esap, pun ese tufich ngeni an epwe amam an kapas.

35 Iei Siesrom a apasa ngeni ekkewe aramas: Oupwe ennetin pii pwe oupwe chechemeni ekkei mettoch; pun a apasa pwe mi wor emon chok Kot; nge inamo a apasa pwe ewe Noun Kot epwe feito, nge esap angasa noun kewe aramas—usun ita a wor an mumuta ne annuku Kot.

36 Iei Amulek a apasa sefan ngeni i: Nengeni ka fen chofona, pun ka apasa pwe ua kapas usun ita a wor ai mumuta ne annuku Kot pokiten ua apasa pwe i esap angasa noun kewe aramas non ar tipis.

37 Iei ua apasa ngenikemi sefan pwe i ese tongeni angaser non ar tipis; pun use tongeni amam an kapas, iwe i a fen apasa pwe ese wor mettoch mi nimengaw a tongeni muuni ewe muun nang; iei minne, ifa usun oupwe manau, tiwenon chok ika oupwe muuni ewe muun nang? Iei minne, ouse tongeni manau non ami tipis.

38 Iei Siesrom a apasa sefan ngeni i: Ewe Noun Kot i ewe Sam Esemuch?

39 Iwe Amulek a apasa ngeni i: Ewer, i ewe ennetin Sam Esemuch seni nang me seni fonufan, me mettoch meinisin minne ra nom non ir me ru; i ewe nepoputan me ewe nesoponon, ewe aewin me ewe amuchunon.

40 Iwe i epwe feito non ewe fonufan pwe epwe angasa noun kewe aramas; iwe i epwe wata won inisin ekkewe atai annuk an ekkewe ir mi nuku non itan we; iwe ikkei ir ekkewe epwe wor ar manau esemuch, iwe amanau esap pwan kawor ngeni pwan emon.

41 Iei minne ekkewe aramas mi ngaw ra nonnom usun ita ese wor ngaseno a fen kawor, tiwenon chok kepichinon ekkewe senin mano; pun nengeni, ewe ran a wareto pwe meinisin repwe manausefan seni mano me uta me mwen Kot, me repwe kapung anongonong won ar angang.

42 Iei, mi wor ew mano minne a iteni ew manon inis; iwe ewe manon Kraist epwe epichi ekkewe senin ei manon inis, pwe meinisin repwe tongeni manausefan seni ei manon inis.

43 Ewe ngun me ewe inis repwe chufengen sefan non unusochun napanapan; pau me peche me pwan nekafon chuu repwe niwin ngeni wesewesen napanapen inis, pwan mwo usuch atun ei fansoun; iwe sipwe emmwenino ne uta me mwen Kot, sipwe sinei usun sia sinei iei, me epwe wor ew ach fatafatochun chechemenien ach kewe tipis meinisin.

44 Iei, ei niwinsefan epwe fis ngeni meinisin, ekkewe mi watte me pwan ekkewe mi kukkun, ekkewe mi fotek me pwan ekkewe mi ngaseno, mwan me pwan fefin, ekkewe aramas mi ngaw me pwan ekkewe mi tupwon; iwe esap mwo pwan wor emet metan mokurer epwe turu senir; nge mettoch meinisin repwe niwin ngeni unusochun napanaper, usun iei, are non ewe inis, iwe repwe emmwenito me tetenoch me mwen ewe nenien kapung an Kraist ewe Nau, me Kot ewe Sam, me ewe Ngun mi Fel, minne a ew Kot Esemuch, ar repwe kapung anongonong won ar angang, ika repwe öch are ika repwe ngaw.

45 Iei, nengeni, ua fen kapas ngonuk usun ewe manon ewe inis mi tongeni mano, me pwan usun ewe manausefanitan ewe inis mi tongeni mano. Ua apasa ngonuk pwe ei inis mi tongeni mano a manausefan ngeni ew inis ese chiwen tongeni mano, ina seni mano, pwan mwo seni ewe aewin mano ngeni manau, pwe resap chiwen tongeni mano; ngunur repwene chufengen ngeni inisir, resap chiwen keimufesen; iei ewe chufengen a winiti pekin ngun me esap chiwen tongeni mano, pwe resap chiwen kuna kiteter.

46 Iei, nupwen Amulek a awesano ekkei kapas ekkewe aramas ra poputa sefan ne mairu, iwe pwan Siesrom a poputa ne chechech. Iwe iei a muchuno ekkewe kapas an Amulek, are ikkei meinisin met ua fen makkei.