1 Anajwan a’in li ^aaatin kixjultika laj ^bAmulek reheb’ li tenamit li wankeb’ sa’ li ch’och’ Ammonihah; kixye:

2 Laa’in laj Amulek; laa’in ralal laj Giddonah, a’an ralal laj Ismael, a’an ralal xk’ajol laj Aminadi; ut a’an ajwi’ laj Aminadi a’an li kixk’ut xyaalalil li aatin tz’iib’anb’il chiru lix tz’akil li santil ochoch, li tz’iib’anb’il xb’aan ru’uj ruq’ li Dios.

3 Ut laj Aminadi a’an ralal xk’ajol laj Nefi, a’an ralal laj Lehi, li ki’el chaq sa’ li ch’och’ Jerusalen, a’an ralal xk’ajol laj ^aManases, a’an li ralal laj ^bJose li ^ckik’ayiik toj Egipto xb’aan ruq’eb’ li ras.

4 Ut k’ehomaq reetal, laa’in ajwi’ jun winq li maaka’ch’in li chaab’ilal k’oxlanb’il chiwix sa’ xyanqeb’ chixjunil li neke’nawok wu; relik chi yaal, ut k’ehomaq reetal, wankeb’ naab’al li wech alal ut li ^awochb’een, ut jo’kan ajwi’ intawom naab’al li b’ihomal rik’in ruq’ insak’ahil.

5 A’b’anan chirix chixjunil a’in, moko naab’al ta xinnaw chirix lix b’ehil li Qaawa’, ut lix ^amuqmuukil na’leb’ ut lix sachb’a-ch’oolejil wankilal. Ninye naq maajun wa innawom chirix li k’a’aq re ru a’in; a’b’an k’ehomaq reetal, moko yaal ta ninye, xb’aan naq wilom naab’al lix muqmuukil na’leb’ ut lix sachb’a-ch’oolejil wankilal; relik chi yaal, naq xe’kole’ rix xyu’ameb’ li tenamit a’in.

6 A’b’anan kinkawob’resi li waam, xb’aan naq k’iila sut ^akinb’oqe’ ut ink’a’ kiwaj ^bab’ink; jo’kan naq kinnaw chirix li k’a’aq re ru a’in, a’ut ink’a’ kiwaj xnawb’al; jo’kan naq ink’a’ kinkanab’ xpo’resinkil inch’ool chiru li Dios, sa’ xmaa’usilal inch’ool, toj kixtaw kaahib’ xb’e li xwuq po a’in, li wan sa’ xlaje chihab’ rawa’b’ejileb’ laj raqol aatin.

7 Naq yookin chi b’eek re rilb’al jun wech alal li q’axal nach’ wan wik’in, k’ehomaq reetal, jun lix ^aanjel li Qaawa’ kixk’ut rib’ chiwu ut kixye: Amulek, sutq’in sa’ laa wochoch, xb’aan naq laa’at taak’e xtzakemq jun lix profeet li Qaawa’; relik chi yaal, jun santil winq, a’an jun xwinq li Dios sik’b’il ru; xb’aan naq a’an ^bxkuy xsa’ k’iila kutan xb’aan lix maak li tenamit a’in, ut yoo xtz’okajik, ut laa’at ^ctaak’ul sa’ laa wochoch ut taak’e xtzakemq, ut a’an tatrosob’tesi, ut laa wochoch; ut li rosob’tesihom li Qaawa’ taakanaaq sa’ aab’een laa’at ut laa wochoch.

8 Ut kik’ulman naq kin’ab’in chiru lix yaab’ xkux li anjel ut kinsutq’i sa’ xjayal li wochoch. Ut naq yookin chi xik aran ^akintaw li winq li kixye wi’ li anjel we: Taak’ul sa’ laa wochoch—ut k’ehomaq reetal naq a’an ajwi’ li winq a’in li yoo cheraatinankil chirix li k’a’aq re ru re li Dios.

9 Ut li anjel kixye we naq a’an jun ^asantil winq; jo’kan naq ninnaw naq a’an santil winq, xb’aan naq yeeb’il xb’aan jun lix anjel li Dios.

10 Ut jo’kan wi’chik, ninnaw naq yaal li k’a’aq re ru kixch’olob’ wi’ xyaalal, xb’aan naq k’ehomaq reetal ninye eere, naq jo’ naq yo’yo li Qaawa’, jo’kan ajwi’ kixtaqla lix ^aanjel re xk’eeb’al chi k’utb’esiik li k’a’aq re ru a’in chiwu, ut a’in kixb’aanu naq yoo laj Alma a’in chi ^bhilank sa’ wochoch.

11 Xb’aan naq k’ehomaq reetal, a’an ^axrosob’tesi li wochoch, xinrosob’tesi laa’in, ut eb’ li ixqilal, ut eb’ lin kok’al, ut lin yuwa’ ut eb’ li wech alal; relik chi yaal, chixjunileb’ li wech alal kirosob’tesi, ut kihilan li rosob’tesihom li Qaawa’ sa’ qab’een, jo’ chanru li aatin li kixye.

12 Ut anajwan, chirix naq laj Amulek kixye li aatin a’in eb’ li tenamit ke’ok chi sachk xch’ooleb’, rik’in rilb’al naq ^amoko jun ajwi’ ta aj yehol nawom li naxch’olob’ xyaalal li k’a’aq re ru jitb’ileb’ wi’, ut jo’kan ajwi’ li k’a’aq re ru taachalq, jo’ chanru li musiq’ej re profeetil aatin li kiwan rik’ineb’.

13 A’b’anan wan sa’ xyanqeb’ li ke’k’oxlank re xpatz’inkil li na’leb’ reheb’, re naq rik’in lix ^ak’oxlanb’il seeb’aleb’ te’ruuq chixchapb’aleb’ sa’ li raatineb’, re te’xtaw k’a’ru taajitoq reheb’, re naq te’ruuq chixq’axtesinkileb’ chiruheb’ laj raqol aatin, re te’raqe’q aatin chirixeb’ jo’ chanru li chaq’rab’, re naq te’kamsiiq malaj te’tz’ape’q sa’ tz’alam, jo’ chanru li maak li te’xk’e chi k’ute’k, malaj chi ch’olob’ank chirixeb’.

14 Anajwan eb’ li winq a’an li ke’sik’ok re xsachb’aleb’, a’aneb’ laj ^ach’olob’anel chaq’rab’, li tojb’ileb’ malaj xaqab’anb’ileb’ xb’aan li tenamit re xk’anjelankil li chaq’rab’ sa’ xhoonal li raqok aatin sa’ xb’eeneb’, malaj naq te’raqe’q aatin chirix lix maakeb’ li tenamit chiruheb’ laj raqol aatin.

15 Anajwan eb’ laj ch’olob’anel chaq’rab’ a’in tzolb’ileb’ rik’in chixjunil lix na’leb’eb’ ut xseeb’aleb’ li tenamit; ut a’in re xtenq’ankileb’ re te’ruuq chi wank xseeb’al sa’ xk’anjeleb’.

16 Ut kik’ulman naq ke’ok chixpatz’inkil li na’leb’ re laj Amulek, re naq chi jo’kan taaruuq te’xk’e chixjal li raatin, malaj chixsachb’al rib’ sa’ li aatin li tixye.

17 Anajwan moko neke’xnaw ta naq laj Amulek kiru chixnawb’al chirix xk’oxlahomeb’. A’b’an naq ke’ok chixpatz’inkil li na’leb’ re, kik’ulman naq a’an ^akixtz’il rix lix k’oxlahomeb’, ut kixye reheb’: Ex ^btasal tenamit aj maakex ut po’b’il eech’ool, ex aj ch’olob’anel chaq’rab’ ut aj ka’pak’al-u, xb’aan naq yookex chixk’eeb’al lix k’ojob’ankil laj tza; xb’aan naq yookex chixk’ojob’ankil li ^cra’al ut li chapleb’ k’aam re xchapb’aleb’ lix santil moos li Dios.

18 Yookex chixk’uub’ankil li na’leb’ re ^axpo’b’al ru xb’eheb’ li tiikeb’ xch’ool, ut re xk’amb’al chaq xjosq’il li Dios sa’ xb’een eejolom, toj reetal naq te’sache’q chi junajwa li tenamit a’in.

19 Relik chi yaal, wan xyaalal naq kixye laj Mosiah, a’an xraqikeb’ li qarey, naq ok re chixq’axtesinkil li awa’b’ejihom, ut maajun aj-e kiwan re tixq’axtesi, ut kixk’e naq li tenamit a’in te’wanq chi jolominb’il xb’aan tz’aqal xyaab’eb’ xkux a’an—relik chi yaal, wan xyaalal naq kixye, naq wi taawulaq xq’ehil naq lix yaab’ xkux li tenamit a’in ^atixsik’ ru li maa’usilal, malaj ut wi taachalq xq’ehil naq li tenamit a’in te’t’ane’q sa’ li q’etok aatin, ak xe’q’ano’ raj choq’ re li sache’k.

20 Ut anajwan ninye eere naq wan xyaalal naq li Qaawa’ naxraq aatin chirix lee maa’usilal; wan xyaalal naq na’elajin chiru li tenamit a’in, rik’in xyaab’ xkuxeb’ lix ^aanjel: Jalomaq eek’a’uxl, jalomaq eek’a’uxl, xb’aan naq taanach’oq chaq li awa’b’ejihom re choxa.

21 Relik chi yaal, wan xyaalal naq na’elajin, rik’in xyaab’ xkuxeb’ lix anjel, naq: ^aTinkub’eeq sa’ xyanq lin tenamit, rik’in juntaq’eetalil ut tiik ruhil na’leb’ sa’ wuq’.

22 Relik chi yaal, ninye eere naq wi ta moko xb’aan ta lix ^atijeb’ li tiikeb’ xch’ool, li wankeb’ sa’ li ch’och’ anajwan, naq sa’ li kutan ajwi’ a’in tex’ula’aniiq raj rik’in li sache’k chi junajwa; a’ut moko taawanq raj rik’in ^bb’uut’iha’, jo’ ke’xk’ul li tenamit sa’ xkutan laj Noe; taawanq b’an rik’in we’ej, ut rik’in yajel, ut li yok’leb’ ch’iich’.

23 A’ b’an xb’aan ^axtijeb’ li tiikeb’ xch’ool naq kolb’il eeyu’am; anajwan ut, wi teerisi chaq sa’ eeyanq li tiikeb’ xch’ool, chirix a’an li Qaawa’ moko tixram ta li ruq’; rik’in b’an xnimal lix josq’il taachalq sa’ eeb’een; toja’ naq texsak’e’q rik’in we’ej, ut rik’in yajel, ut rik’in li yok’leb’ ch’iich’, ut taanach’oq chaq li ^bkutan wi ink’a’ nekejal eek’a’uxl.

24 Ut anajwan kik’ulman naq eb’ li tenamit q’axal wi’chik ke’josq’o’ rik’in laj Amulek, ut ke’xjap re chixyeeb’al: Li winq a’in naxhob’ li qachaq’rab’ li tiik ru, ut eb’ li qach’olob’anel chaq’rab’ li chaab’ileb’ xna’leb’, li sik’b’ileb’ ru qab’aan.

25 A’b’an laj Amulek kixye’ li ruq’, ut q’axal kaw wi’chik kixjap re chiruheb’ chixyeeb’al: Ex tasal tenamit aj maakex ut po’b’il eech’ool, k’a’ut naq q’axal kiru laj Satanas chixchapb’al eech’ool? K’a’ut naq teeq’axtesi eerib’ chiru a’an re taawanq xwankil sa’ eeb’een, re ^axmutz’ob’resinkil eeru, re naq ink’a’ teetaw ru li aatin li yeeb’il, jo’ chanru lix yaalalil?

26 Xb’aan naq k’ehomaq reetal, ma xinch’olob’an re xjitb’al eechaq’rab’? Ink’a’ neketaw xyaalal; nekeye naq xin’aatinak re xjitb’al eechaq’rab’; a’b’an moko xinb’aanu ta, xin’aatinak b’an re xxaqab’ankil xwankil lee chaq’rab’, rik’in wi’ jitb’ilex laa’ex.

27 Ut anajwan k’ehomaq reetal, ninye eere, naq natikla xk’eeb’al xk’ojob’ankil lix sachlijik li tenamit a’in xb’aan xmaa’usilaleb’ xch’ool lee ^ach’olob’anel chaq’rab’ ut laj raqol aatin eere.

28 Ut anajwan kik’ulman naq chirix naq laj Amulek kixye li aatin a’in eb’ li tenamit ke’xjap re chixjitb’al, ut ke’xye: Anajwan naqanaw naq li winq a’in ralal laj tza, xb’aan naq ^axtik’ti’ik chiqu, xb’aan naq x’aatinak re xjitb’al li qachaq’rab’. Ut anajwan naxye chik naq moko x’aatinak ta re xjitb’al.

29 Ut jo’kan wi’chik, kixhob’eb’ li qach’olob’anel chaq’rab’ ut eb’ laj raqol aatin qe.

30 Ut kik’ulman naq eb’ laj ch’olob’anel chaq’rab’ ke’xk’e sa’ xch’ooleb’ naq taajultiko’q reheb’ li k’a’aq re ru a’in chirix.

31 Ut kiwan jun sa’ xyanqeb’, aj Tzeesrom xk’ab’a’. Ut a’an li xb’eenil sa’ ^axjitb’al laj Amulek ut laj Alma, rik’in naq a’an jun reheb’ li q’axal seeb’ sa’ xyanqeb’, ut k’a’jo’ li k’anjel naxb’aanu sa’ xyanq li tenamit.

32 Ut li rajomeb’ laj ch’olob’anel chaq’rab’ a’in, a’an xk’ulb’al xtumineb’; ut neke’xk’ul xtumineb’ a’ yaal k’a’ru li tojb’ileb’ wi’ chi k’anjelak.