Puk lal Alma
Wen nahtuhl Alma

1 Na tukun ma inge ke yac se met ke kolyuck luhn mwet nuhnuhnkuh fin mwet lal Nephi, ke pacl se inge fahlac, tohkohsrah Mosiah el misac som liki facluh, el acnwuck ke sie mweun wo, fahsr suwohswohs ye muhtuhn God, wacngihn kuhtwena mwet in kol aholuhl; ne ohinge el oakiyac masap, ac ma inge akihlenyuck sin mwet uh; ke ma inge elos engan in muhta na ke masap ma el oraclah.

2 Ac tukun ma inge ke yac se met ke kolyuck lal Alma ke siyah in nuhnuhnkuh, oasr sie mukul suc utucklac nuh ye muhtahl in nuhnuhnkweyuck, sie mukul suc yohk pihsac, ac etweyuck ke fokoko na yohk lal.

3 Ac el som nuh inmahsrlon mwet uh, luti nuh selos ke ma suc el pahngon muh kahs luhn God, ahkkoluk lain alu uh; fahkwelihk nuh sin mwet ah lah mwet tol ac mwet luti nuhkwewa enenuh na in pwengpwengi; ac elos enenuh na in tiac orekma ke paholos, tuhsruhk tuh elos enenuh na in kahsreyuck sin mwet uh.

4 Ac el oacyacpac fahkwack nuh sin mwet uh lah mwet nuhkwewa enenuh in moliyucklac ke lwen sahflah, ac tuh elos tiac enenuh in sahngweng kuh rarrar, tuhsruhk tuh elos in kuh in ngwetwack nuh lucng ac engan; tuh Leum El oraclah mwet nuhkwewa, ac oacyacpac molwelah mwet nuhkwewa; ac, ke sahflahiyac uh, mwet nuhkwewa enenuh na in moul ma pahtpaht.

5 Ac tukun ma inge el tuh luti ma inge yohk na oruh mwet pucspucs tuh luhlahlfongi kahs lal, arulacna puhslac oruh elos muhtwacwacack in kahsrel ac sang nuh sel mani.

6 Ac el muhtwacwacack in fuhlwactwack ke inse fuhlwact lal, ac in nukum nuknuk na yohk molo, ahok, ac muhtwacwacack in sramtweack sie alu tukun ohiyacn luti lal.

7 Ac tukun ma inge ke el som, in luti nuh selos suc luhlahlfongi ke kahs lal, el sun sie mwet suc wi alu luhn God, ahok, finne sie sin mwet luti lalos; ac el muhtwacwacack in akuhkuhin upac nuh sel, tuh elan kuh in kohllah mwet luhn alu sac; tuhsruhk mwet sac tu na kuh nuh sel, kaeluhl ke kahs luhn God.

8 Inge inen mukul sac pa Gideon; ac el pa el suc orekmakihnyuck ke poun God in kohllah mwet lal Limhi liki srohoh.

9 Inge, ke srihpen Gideon el tu na kuh nuh sel ke kahs luhn God el foloyak sel Gideon, ac faeslah katlas nahtuhl ac muhtwacwacack in faksel. Inge Gideon el mahtohoh ke yac pucspucs, ke ma inge el tiac kuh in lain ke acnwuck el, ke ma inge el acnwucki ke katlas.

10 Ac mwet se suc unilyac ah tuh utucklac sin mwet luhn alu uh, ac el utucklac nuh ye muhtahl Alma, in nuhnuhnkweyuck fal nuh ke orekma koluk suc el oraclah.

11 Ac tukun ma inge el tu ye muhtahl Alma ac siyuck taltal kacl sifacna ke puhlaik yohk.

12 Tuhsruhk Alma el fahk nuh sel: Liye, pa inge pacl se emet ma orekma kuhtasrihk luhn mwet kol alu uh ahkkahlwemyeyuck inmahsrlon mwet inge. Ac liye, kom tiac eis mwacta koluk muhkwena ke orekma kuhtasrihk luhn mwet kol alu, tuhsruhk kom insacnweacng in pahtok ma inge ke katlas; ac fuhnuh orekma kuhtasrihk luhn mwet kol alu uh pahtokyuck inmahsrlon mwet inge ac fah ahkpwacyeiyuck ke kuhnausyucklac lalos nuhkwewa.

13 Ac kom ahksohrohryelah srah luhn sie mukul suwohswohs, ahok, sie mukul suc oraclah ma wo pucspucs inmahsrlon mwet inge; ac fin kuht fihlikomlac srah lal fah tuhkuh nuh facsr in suk mwacta.

14 Ke ma inge kom nuhnuhnkweyuck in misac, in fal nuh ke masap ma utuckuh nuh sesr sel Mosiah, tohkohsrah sahflah lasr; ac ahkkahlwemyeyuck ma inge sin mwet inge; ke ma inge mwet inge enenuh in ukwe masap.

15 Ac tukun ma inge elos usacl; ac inel pa Nehor; ac elos usacl fin pihsaclos nuh inging Manti, ac oreklac tuh elan, kuh elan fahk, inmahsrlon kuhsrao ac facluh, lah ma el luti nuh sin mwet uh lain kahs luhn God; ac el kweokkihn sie misac srihkkihnyuck.

16 Ne ohinge, ma se inge tiac na ahksahfyelah osrwaclihk luhn orekma kuhtasrihk luhn mwet kol alu fin acn ah; tuh oasr mwet pucspucs suc luhngse ma wacngihn srihpac luhn facluh, ac elos som luti mwe luti suhtuhuh; ac ma inge elos oruh ke srihpen kahsruhp ac lwemlwem.

17 Ne ohinge, elos tiac kuh in kikiacp, fin etweyuck, ke sahngweng ke masap, tuh mwet kikiacp uh kalyeiyuck; ke ma inge elos oruh in nuh muh elos luti fal nuh ke luhlahlfongi lalos; ac inge wacngihn kuh luhn masap uh nuh sin kuhtwena mwet ke luhlahlfongi lal.

18 Ac elos tiac kuh in pihsrapasr, ke sahngweng ke masap, tuh ma inge kalyeiyuck; kuh elos tiac pac pihsre, kuh ahkmas, tuh el suc ahkmas el kalyeiyuck ke misac.

19 Tuhsruhk tukun ma inge kuhtwena mwet suc tiac wi alu luhn God elos muhtwacwacack in kalyei elos suc wi alu luhn God, ac eis nuh faclos inen Kraist.

20 Ahok, elos tuh kalyeilos, ac ahkkweokyelos ke kain in kahs nuhkwewa, ac ohinge ke srihpen puhsisacl lalos; ke srihpen elos tiac na fuhlwactwack ye muhtahlos sifacna, ac ke srihpen elos fahkwelihk kahs luhn God, yurun sie sin sie, ke wacngihn mani ac wacngihn molo.

21 Inge oasr sie masap na upac inmahsrlon mwet luhn alu uh, tuh wacngihn kuhtwena mwet, suc wi alu uh, in tuyak ac kalyei elos suc tiac wi alu uh, ac tuh in wacngihn mwe kalyei inmahsrlolos sifacna.

22 Ne ohinge, puhs inmahsrlolos suc muhtwacwacack in insefuhlwact, ac muhtwacwacack in follah akuhkuhin nuh sin mwet lainuhlos, finne ne ke na in acnwucklac; ahok, elos ac fihski sie sin sie ke paholos.

23 Inge pacl ke yac ahkluo ke kolyuck lal Alma, ac ma inge oraclah kweok yohk ke alu uh; ahok, ma inge pa oraclah fohs luhlahp ke alu uh.

24 Tuh insiacn mwet pucspucs kwekweelihk, ac inelos iyucklac, tuh elos tiac sifilpac esamyuck inmahsrlon mwet luhn God. Ac oacyacpac mwet pucspucs elos sifacna som liki inmahsrlolos.

25 Inge ma se inge mwe srihfe yohk nuh selos suc tu na kuh ke luhlahlfongi; ne ohinge, elos tu na kuh ac muhtweng in liyacacng masap luhn God, ac elos muhtweng ke mongfihsrwacsr ke kalyeiyuck ma orek nuh faclos.

26 Ac ke mwet tol ah som liki orekma lalos in fahkwelihk kahs luhn God nuh sin mwet uh, mwet uh oacyacpac som liki orekma lalos in lohng kahs luhn God. Ac ke mwet tol ah fahkwelihk nuh selos kahs luhn God elos nuhkwewa sifilpac oaru in fohlohk nuh ke orekma lalos; ac mwet tol, el tiac motko kacl sifacna muh el lucng liki mwet porongel, tuh sie mwet luti el tiac wo liki na mwet porongel, kuh sie mwet luti el tiac pac wo liki mwet sirape; ac ohinge elos ma sefanna ke wal, ac elos nuhkwewa orekma, mwet nuhkwewa fal nuh ke kuhiyacl.

27 Ac elos sang ma lalos, mwet nuhkwewa fal nuh ke ma suc oasr lal, nuh sin mwet suhkahsruhp, ac mwet enenuh, ac mwet mas, ac mwet kweok; ac elos tiac nukum nuknuk yohk molo, tuhsruhk elos nwacsnwacs ac kahto.

28 Ac ohinge elos tuh oakiyac mukwikwi luhn alu; ac ohinge elos muhtwacwacack fahfahlac in sifilpac puhla mislac, finne ke mwe kalyei nuhkwewa lalos.

29 Ac inge, ke srihpen kapkapwack luhn alu uh elos muhtwacwacack in arulacna kahsruhpi, oasr puhkantwen ma nuhkwewa ma elos enenuh—puhkantwen un sip ac kosro, ac kain in kaho nuhkwewa, ac oacyacpac puhkantwen grain, ac kol, ac selfuh, ac ma sacohk, ac puhkantwen silk ac nuknuk linen srihk eoa, ac kain in nuknuk wo nuhkwewa.

30 Ac ohinge, ke ohiyac kahsruhp lalos, elos tiac na suhpwaclah kuhtwena mwet suc kohflohfohl, kuh masrinsrwacl, kuh maluh, kuh mas, kuh suc soenna mongoi; ac elos tiac likiyac insiaclos ke ma kahsruhp; ke ma inge elos kuhlwacng nuh sin mwet nuhkwewa, kwewa na mwet mahtuh ac mwet fuhsr, kwewa na mwet srohoh ac mwet sukohsohk, kwewa na mukul ac muhtwacn, finne tiac wi alu uh kuh wi alu uh, wacngihn suhnakihnyuck nuh sin mwet oacna elos suc oasr enenuh la.

31 Ac ohinge elos tuh kapkapwack ac eklac kahsruhpi luhkwelos suc tiac wi alu lalos ah.

32 Tuh elos suc tiac wi alu lalos ah elos sifacna pwacrkihn inutnut, ac alu nuh sin ma sruhlwaclah kuh alsruhngwesr, ac suhmaht in sramsram, ac sok ac fohs; nukum nuknuk yohk molo; fuhlwactwack na ke inse fuhlwact luhn muhtahlos sifacna; kalyei, kikiacp, pihsrapasr, pihsre, orek kosro, ac ahkmas, ac kain in ma koluk nuhkwewa; ne ohinge, masap uh orek nuh selos nuhkwewa suc kuhnahoslah masap, yohk na fin kuh.

33 Ac tukun ma inge ke orekmakihnyuck masap uh faclos, kais sie mwet nuhkwewa kweok fal nuh ke ma suc el oraclah, elos eklac ohi, ac tiac ke oruh kuhtwena ma koluk fin etweyuck; ke ma inge, oasr mislac yohk inmahsrlon mwet lal Nephi ne ke na yac ahklimekohsr ke kolyuck luhn mwet nuhnuhnkuh.