Bhuku raAruma
Mwanakomana waAruma

1 Zvino zvakaitika kuti mugore rekutanga rekutonga kwevatongi pavanhu vaNifai, kubvira panguva iyoyi zvichienda mberi, mambo Mosaya ari akange ^aaenda nenzira yepasi rose, ari akange arwa hondo yakanaka, achifamba akatwasanuka pamberi paMwari, asina waakasiya panzvimbo yake yekutonga; zvisinei akanga aisa ^bmitemo, uye yakange yatambirwa nevanhu; saka vakanga vachisungirwa kuteerera mitemo yaakanga avaitira.

2 Uye zvakaitika kuti mugore rekutanga rekutonga kwaAruma ari pachigaro chekutonga, kune ^amurume akaunzwa kwaari kuzotongwa, murume akange ari hamburamakaka, aizivikanwa pamusana pesimba zhinji raaive naro.

3 Uye akanga afamba muvanhu, achiparidza kwavari ^azvaaiti ishoko raMwari, ^bachipandukira chechi; achitaurira vanhu kuti wose mupirisita nemudzidzisi akafanira ^ckukudzwa; uye ^dhavafanire kuita basa nemaoko avo, asi kuti vakafanira kuriritirwa nevanhu.

4 Uye aipupura kuvanhu kuti rudzi rwose rwevanhu rwuchaponeswa muzuva rekupedzisira, uye achiti havafanire kutya kana kubvunda, asi kuti vasimudze misoro yavo vafare; nokuti Ishe ndivo vakasika vanhu vose, uye vakanunura vose vanhu; uye, mukupedzisira, vose vanhu vachawana upenyu hwokusingaperi.

5 Uye zvakaitika kuti akadzidzisa zvinhu izvi zvekuti vazhinji vakatenda mazwi ake, kana vazhinji vakatenda zvekuti vakatanga kumuriritira nekumupa mari.

6 Uye akatanga kusimudzwa mukuzvikudza kwemwoyo wake, nokupfeka nhumbi dzinodhura, hongu, akatangisa kumisa ^achechi inotevedza tsika yekuparidza kwake.

7 Uye zvakaitika kuti zvaakanga achienda, kunoparidza kune avo vakange vachitenda kushoko rake, akasangana nemurume aive wechechi yaMwari, hongu, mumwe wevadzidzisi vavo; uye akatanga kuita nharo naye dzakaipa, kuti akwezve vanhu vechechi; asi murume uyu akamisidzana naye, achimukonesa ^anemazwi aMwari.

8 Zvino zita remurume uyu rainzi ^aGideoni; uye ndiye akange ari mudziyo waive mumaoko aMwari mukubvisa vanhu vaRimuhai muhusungwa.

9 Zvino, nenzira yekuti Gideoni akamukonesa nemazwi aMwari akashatirirwa Gideoni, akaburitsa munondo wake akatanga kumubaya nawo. Zvino Gideoni semunhu akange akwegura, haana kukwanisa kuzvidzivirira kubaiwa kwaaiitwa, saka ^aakauraiwa nemunondo.

10 Uye murume akamuuraya akatorwa nevanhu vechechi, uye vakaenda naye kuna Aruma, kuti ^aatongwe maererano nemhosva dzaakanga aita.

11 Uye zvakaitika kuti akamira pamberi paAruma uye akazvireverera nekushinga kukuru.

12 Asi Aruma akati kwaari: Tarisai, kano ndiko kekutanga kuti ^ahupirisita husakarurama huunzwe kuvanhu. Uye tarisai, mhosva yako haisi yehupirisita husakarurama chete, asi waedza kumanikidza mabasa aya nemunondo; uye dai hupirisita husakarurama uhwu hukamanikidzwa kuitwa muvanhu ava zvinoita kuti vaparadzwe zvachose.

13 Uye iwe wadeura ropa remunhu akarurama, hongu, murume akaita zvinhu zvakanaka zvakawanda muvanhu ava; uye tikati tikuregere ropa rake richauya patiri rotsvaka ^akudzorera.

14 Saka watongerwa kufa, maererano nemutemo watakapiwa naMosaya, mambo wedu wekupedzisira; uye wakabvumwa nevanhu vano; nokudaro vanhu ava vakafanira ^akuita zvinotaurwa nemutemo.

15 Uye zvakaitika kuti vakamutora; uye zita rake ainzi ^aNeho; uye vakamutakura vakaenda naye pachikomo chinonzi Mandi, uye ipapo akaitwa kuti, kana kuti akatenda, pakati pematenga nenyika, kuti zvaakange adzidzisa vanhu zvakanga zvisingapindirane neshoko raMwari; uye ipapa akafa ^brufu rwunonyadzisa.

16 Zvisinei, izvi hazvina kuita kuti hupirisita husakarurama husapararire nenyika; nokuti kwaive nevazhinji vaida kuita zvinhu zvisingabatsire zvemunyika, uye vakaenda vachiparidza dzidziso yemanyepo; uye izvi vaiita kuti vawane ^aupfumi nekukudzwa.

17 Zvisinei, havaikwanisa ^akunyepa, nokuti vaitya mutemo kuti zvizivikanwe, nokuti varevi venhema vairangwa; saka vaiparidza vachinyepera kuti ndizvo zvavaitenda; uye zvino mutemo wakanga usina simba pamunhu nekuda ^bkwezvaaitenda.

18 Uye ^ahavaiba, nokuti vaitya mutemo, nokuti vaidaro vairangwa; kana kupamba, kana kuponda, nokuti uyo ainge ^baponda airangwa ^cnerufu.

19 Asi zvakaitika kuti wose akange asiri wechechi yaMwari akatanga kunetsa avo vakanga vari vechechi yaMwari, uye vakange vazvipa zita raKristu.

20 Hongu, vakavanetsa, uye vakavarwadzisa nemazwi akasiyana-siyana, uye zvose izvi nenzira yokupfava kwavo; nokuti vakange vasingadade mumaziso avo, nenzira yekuti vaitaurirana shoko raMwari, pasina ^amari kana mutengo.

21 Zvino kwakange kuine mutemo wakaoma muvanhu vechechi, kuti hakufanire kuve nemunhu, wechechi, anosimuka ^aachinetsa vanhu vasiri vechechi, nekuti hakufanire kuve nekunetsana pachavo.

22 Zvisinei, kwakave nevazhinji vavo vakatanga kudada, uye vakatanga kukakavadzana zvakaoma nevavengi vavo, kana zvekutorovana; hongu, vairovana netsiva.

23 Zvino izvi zvaive mugore rechipiri rekutonga kwaAruma, uye chakanga chiri chinhu chainetsa kwazvo muchechi; hongu, chaive chikonzero chechiedzo chaicho muchechi.

24 Nokuti mwoyo yevazhinji yakanga yaoma, uye mazita avo akanga ^aadzimwa, zvekuti vakanga vasisarangarirwe mukati mevanhu vaMwari. Uyewo vazhinji ^bvakabva mukati mavo.

25 Zvino izvi zvakange zviri chiedzo chikuru kune avo vakange vamire vakasimba murutendo: zvisinei, vakanga vakasimba uye vasingazungunuke mukuchengetedza mirairo yaMwari, uye vakatakura ^anemwoyo murefu kunetswa kwavaiitwa.

26 Uye paisiya vapirisita ^amabasa avo kuti vanopa vanhu shoko raMwari, naivowo vanhu vaisiya mabasa avo kuti vanonzwa shoko raMwari. Uye kana vapirisita vavapa shoko raMwari vose vaidzokera kumabasa avo zvakare vachishanda nesimba; uye mupirisita asingazviise pamusoro peavo vauya kuzoteerera, nokuti muparidzi akanga asiri nani kune muteereri, kana mudzidzisi akanga asiri nani kune mudzidzi; uye ndiko kusaka vose vakange vakaenzana, uye vose vaishanda, wose munhu ^bmaererano nesimba rake.

27 Uye ^avaipa zvinhu zvavo, wose munhu nekuwana kwake, ^bkuvarombo, nekune avo vanoshaya, nevanorwara, nevarikurwadziwa; uye vakanga vasingapfeke nhumbi dzinodhura, asi vakange vakatsvinda vachiratidzika.

28 Uye ndiko kumisa kwavakaita nyaya dzechechi; uye ndiko kuita kwavakaita kuti kurambe kuine runyararo zvakare, zvisinei nekunetswa kwose kwavakanga vachiitwa.

29 Uye zvino, nekutsiga kwakange kwaita chechi vakatanga ^akupfuma zvikuru, vaine zvinhu zvakawanda pazvinhu zvipi nezvipi zvavaida—matanga akawanda, nemhuru dzekukodza dzemarudzi akasiyana, nekuwanda kwembeu, negoridhe, nesirivha, nezvinhu zvinokosha, ^bnesirika yakawanda nemachira akarukwa zvinoyevedza, nemhando dzose dzemachira akanaka.

30 Uye saka, ^amukubudirira kwavo, hapana avaitandanisa akange ari ^bmusvo, kana vainge vaine nzara, kana vaive nenyota, kana vaive vachirwara, kana vainge vasina kudya; uye havana kuisa mwoyo yavo kuupfumi; saka vakanga vachipa zvakawanda wose munhu, harahwa nevadiki, vakasungwa nevakasununguka, varume nevakadzi, vari muchechi kana vasiri muchechi, vasina ^crusaruro kune avo vanoshaya.

31 Uye ndiko kubudirira kwavakaita uye vakapfuma kupfuura avo vakanga vasiri vechechi yavo.

32 Nokuti avo vakange vasiri vechechi yavo vakapinda muzvinhu zveuroyi, ^anekunamata zvifananidzo kana ^bnungo, ^cnekutaura zvisina maturo, ^dnomukuchiva nekushushana; vachipfeka nhumbi dzinodhura; ^evachisimudzwa nokudada kwemaziso avo; kunetsa, kunyepa, kuba, kupamba, kuita zveupombwe, nokuponda, nekuipa kwakasiyana-siyana; zvisinei, mutemo wakashandiswa kune avo vose vakautyora, sekugonekwa kwazvaiitwa.

33 Uye zvakaitika kuti mukushandiswa kwemutemo uku kwavari, wose munhu achirangwa maererano nemhosva yaanenge aita, vakatsiga, vakatya kuita zvinhu zvakaipa kuti zvingazivikanwe; saka, kwakave nerunyararo rukuru mukati mevanhu vaNifai kudakara mugore rechishanu rekutonga kwevatongi.